ଘର ଭିତରକୁ ପଶିଲା ବେଦାନ୍ତ ଆମ୍ବୁଲାନ୍ସ, ଜଣେ ଆହତ

ଓଡ଼ିଶା ତାଜା ନ୍ୟୁଜ୍/୧୭ ଜୁଲାଇ ରବିବାର /କଳାହାଣ୍ଡି :- ନର୍ଲା ବ୍ଳକ ଅନ୍ତର୍ଗତ ବାଗପୁର ପଞ୍ଚାୟତର ପିପଲପଦର ଗାଁରେ ଏକ ଅଭାବନୀୟ ଘଟଣା ଘଟିଛି । ଗତକାଲି ରାତି ପ୍ରାୟ ଆଠଟା ପଇଁଚାଲିଶ ସମୟରେ ମ. ରାମପୁର ଭବାନୀପାଟଣା ମୁଖ୍ୟ ରାସ୍ତାର ମ.ରାମପୁର ପଟରୁ ନର୍ଲା ଅଭିମୁଖେ ଆସୁଥିବା ଏକ ବେଦାନ୍ତ ଆମ୍ବୁଲାନ୍ସ ପିପଲପଦର ଗାଁର ଅକୃର ସୁନାଙ୍କ ଘର ଭିତରକୁ ପଶିଯାଇଥିଲା । ଘରେ ଅଙ୍କୃର ସୁନାଙ୍କ ସ୍ତ୍ରୀ ବିଜଲି ସୁନା ଉପସ୍ଥିତ ଥିବା ବେଳେ ହଠାତ୍ ମୃତ୍ୟୁ ମୁଖରୁ ଅଳ୍ପକେ ରକ୍ଷା ପାଇଛନ୍ତି ।

ତେବେ ଦୁର୍ଘଟଣାରେ ମହିଳାଙ୍କ ମୁଣ୍ଡରେ ଓ ହାତରେ ଆଘାତ ଲାଗିଥିବା ଜଣାପଡିଛି । ପ୍ରଥମେ ଗ୍ରାମବାସୀ ଅନ୍ୟ ଏକ ଆମ୍ବୁଲାନ୍ସକୁ ଯୋଗା ଯୋଗ କରି ଆହତଙ୍କୁ ଚିକିତ୍ସା ସେବା ଯୋଗାଇ ଦେବା ପାଇଁ ଚେଷ୍ଟା କରିଥିଲେ। ଫୋନ ସତ୍ତ୍ୱେ ଆମ୍ବୁଲାନ୍ସ ପହଞ୍ଚି ପାରି ନ ଥିଲା । ଏଥିଯୋଗୁଁ ଲୋକେ ଏକ ଅଟୋରେ ଆହତ ମହିଳାଙ୍କୁ ନର୍ଲା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ପହଞ୍ଚାଇ ଥିଲେ ।  ଘଟଣାସ୍ଥଳରେ ଜନସାଧାରଣଙ୍କ ଉତ୍ତେଜନା ପ୍ରକାଶ ପାଇଥିଲା । ନର୍ଲା ପୋଲିସ ଘଟଣାସ୍ଥଳରେ ପହଂଚି ଲୋକଙ୍କୁ ବୁଝାଇବା ପରେ ଲୋକେ ଶାନ୍ତ ହୋଇଥିଲେ ।