odishatazanews.com, whatsApp – 9938341180, ph.7008991872, facebook – odishatazanews, ଲାଇକ୍ ଓ ସେୟାର କରନ୍ତୁ – Mail – odishatazanews1@gmail.com
ହିଞ୍ଜିଳିକାଟୁ,ରିପୋର୍ଟ / ଶେଷଦେବ ସାହୁ (ଓଡିଶା ତାଜା ନ୍ୟୁଜ୍ )୧୯ ମଇ,ମଙ୍ଗଳବାର, :- ଦୀର୍ଘ ଦିନ ଧରି ଗଞ୍ଜାମ ଜିଲ୍ଲା ହିଞ୍ଜିଳି ଥାନା ପଳାସି ଗ୍ରାମରେ ଚାଲିଥିଲା ଏକ ବେଆଇନ ଗୁଟଖା ଓ ପାନମସଲା କାରଖାନା । ରବିବାର ବିଳମ୍ବିତ ରାତିରେ ଆସିକା ଏସଡ଼ିପିଓ ସୂର୍ଯ୍ୟମଣି ପ୍ରଧାନ ଓ ହିଞ୍ଜିଳି ପୁଲିସର ଏକ ସ୍ୱତନ୍ତ୍ର ଟିମ୍ ସଂପୃକ୍ତ କାରଖାନା ଉପରେ ଅର୍ତକିତ ଚଢାଉ କରି ୨୦ ଲକ୍ଷରୁ ଉର୍ଦ୍ଧ୍ୱ ଟଙ୍କାର ଗୁଟଖା, ପାନମସଲା, ପ୍ୟାକିଂ ଜରି, ଲେବଲ୍, ପାନମସଲା ଓ ଗୁଟଖା ସକାଶେ ଆବଶ୍ୟକୀୟ କଂଚାମାଲ, ଗୁଟଖା ଓ ପାନମସଲା ତିଆରି ୬ଟି ମେସିନ ସମେତ ଏକଟାଟା ଏସି (ଓଡ଼ି୦୭ବି ୫୪୦୮)ଗାଡ଼ିକୁ ଜବତ କରାଯାଇଛି । ବେଆଇନ ଭାବେ ଚାଲିଥିବା ଗୁଟଖା ଓ ପାନମସଲା କାରଖାନା ଚଢାଉ ସମୟରେ ସଂପୃକ୍ତ କାରଖାନାର ମାଲିକଙ୍କ ସମେତ ୪ ଶ୍ରମିକଙ୍କୁ ପୁଲିସ ଗିରଫ କରିଛି ।
ଗିରଫ ମାନେ ହେଲେ ମାଲିକ ହିଞ୍ଜିଳି ଥାନା ସିକୁଳିପଲ୍ଲୀ ଗ୍ରାମର ପୁର୍ଣ୍ଣଚନ୍ଦ୍ର ସାହୁ, କାର୍ଯ୍ୟରତ ଶ୍ରମିକ ସ୍ଥାନୀୟ ଥାନା ଦୁର୍ବନ୍ଧ ଗ୍ରାମର ଅନନ୍ତ ସାହୁ, ବିହାର ଅଂଚଳର ମୋହିତ, ଜଗଦିଶ ଓ ଆଦ୍ୱେଶ । ଏ ନେଇ ହିଞ୍ଜିଳି ଥାନାରେ ନଂ-୧୬୧/୨୦ରେ ଏକ ମାମଲା ରୁଜୁ କରି ଗିରଫ ୫ ଜଣଙ୍କୁ ମଙ୍ଗଳବାର କୋର୍ଟ ଚାଲାଣ କରାଯାଇଥିବା ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସ କହିଛନ୍ତି । ପ୍ରକାଶ ଯେ, ସାରା ବିଶ୍ୱରେ ମହାମାରୀ କରୋନା ଭୁତାଣୁ ସଂକ୍ରମଣ କାୟା ବିସ୍ତାର କରିବାରେ ଲାଗିଛି । ଏହାକୁ ଆଖି ଆଗରେ ରଖି ସରକାର ଆସନ୍ତା ମେ ୩୧ ତାରିଖ ପର୍ଯ୍ୟନ୍ତ ଦେଶରେ ଲକଡ଼ାଉନ ଘୋଷଣା କରିଥିଲେ ।
ତୃତୀୟ ପର୍ଯ୍ୟାୟ ଲକଡ଼ାଉନ ମେ୧୭ ତାରିଖ ପର୍ଯ୍ୟନ୍ତ ବଳବତର ରହିଥିବା ବେଳେ ଉକ୍ତ ସମୟରେ ଚାହା, ପାନ, ମଦ ଦୋକାନ ବନ୍ଧ କରାଯିବା ଲାଗି କଟକଣା ଜାରୀ କରାଯାଇଥିଲା । କିଛି ପ୍ରଭାବଶାଳୀ ବ୍ୟକ୍ତି ବେଆଇନ ଭାବେ ବିଭିନ୍ନ ନାମିଦାମୀ କମ୍ପାନୀର ଗୁଟଖା ଓ ପାନମସଲା ତିଆରି କରି ଚଢା ଦରରେ ବିକ୍ରି କରି ରାତାରାତି ମାଲାମାଲ ହେଉଥିଲେ । ଏପରିକି ୫ ଟଙ୍କାର ଗୁଟଖା ୧୫ ଟଙ୍କାରେ ଓ ବିଭିନ୍ନ କମ୍ପାନୀା ପାନମସଲା ପ୍ରାୟ ୩ଗୁଣା ଅଧିକ ଦରରେ ବିକ୍ରି କରାଯାଉଥିବାର ଦେଖିବାକୁ ମିଳିଥିଲା । ଘଟଣଶ ନେଇ ୱେବ ମିଡ଼ିଆ ‘ଓଡ଼ିଶା ତାଜା ନ୍ୟୁଜ୍’ରେ ଖବର ପ୍ରକାଶ ପାଇଥିଲା । ଖବର ପ୍ରକାଶନ ପରେ ପୁଲିସ ପ୍ରଶାସନର ଆଖିରୁ ନିଦ ହଜିଯାଇଥିଲା । ଗଞ୍ଜାମ ଜିଲ୍ଲା ହିଞ୍ଜିଳି ଥାନା ପଳାସି ଗ୍ରାମରେ ବେଆଇନ ଗୁଟଖା ଓ ପାନମସଲା କାରଖାନା ଚାଲିଥିଲା ନେଇ ପୁଲିସ କୌଣସି ସୁତ୍ରରୁ ଖବର ପାଇ ରବିବାର ବିଳମ୍ବିତ ରାତିରେ ଆସିକା ଏସଡ଼ିପିଓ ପ୍ରଧାନ, ହିଞ୍ଜିଳି ଆଇଆଇସି ଦାସ, ଏସଆଇ ବାସୁଦେବ ଭୋଇଙ୍କ ସମେତ ହିଞ୍ଜିଳି ପୋଲିସର ଏକ ସ୍ୱତନ୍ତ୍ ଟିମ୍ ସଂପୃକ୍ତ କାରଖାନା ଉପରେ ଅର୍ତକିତ ଚଢାଉ କରିଥିଲେ ।
ରବିବାର ବିଳମ୍ବିତ ରାତିରେ ବେଆଇନ ଭାବେ ଚାଲିଥିବା ଗୁଟଖା ଓ ପାନମସଲା କାରଖାନା ଉପରେ ଚଢାଉ ପରେ ସ୍ଥାନୀୟ ପୌରାଂଚଳ ସମେତ ନିକଟବର୍ତି ଅଂଚଳର ବହୁ ହୋଲସେଲ୍ ପାନମସଲା ଦୋକାନୀ ମାଲିକଙ୍କ ମଧ୍ୟରେ କୋକୁଆ ଭୟ ସୃଷ୍ଟି ହୋଇଥିଲା । କିଛି ହୋଲସେଲ ବ୍ୟବସାୟୀ ତରବରିଆ ଭାବେ ନିଜ ଦୋକାନରେ ମହଜୁଦ ରଖିଥିବା ବହୁ ଗୁଟଖା ଓ ପାନମସଲାକୁ ରାତାରାତି ଅନ୍ୟ ଏକ ନିରାପଦ ସ୍ଥାନକୁ ସ୍ଥାନାନ୍ତରିତ କରୁଥିବାର ଜଣାପଡ଼ିଛି । ପ୍ରକାଶ ଥାଉକି, ଗତ ୧୨ ଜୁଲାଇ ୨୦୧୭ରେ ତତ୍କାଳୀନ ହିଞ୍ଜିଳି ଥାନା ଭାରପ୍ରାପ୍ତ ଅଧିକାରୀ ପ୍ରଶାନ୍ତ ସାହୁ ସ୍ଥାନୀୟ ଥାନା ଦୟାପଲ୍ଲୀ ଗ୍ରାମରେ ଚାଲିଥିବା ଏକ ବେଆଇନ ଗୁଟଖା ଓ ପାନମସଲା କାରଖାନା ଉପରେ ଚଢାଉ କରି ୩୫ ଲକ୍ଷରୁ ଉର୍ଦ୍ଧ୍ୱ ଟଙ୍କାର ଗୁଟଖା, ପାନମସଲା, ପ୍ୟାକିଂ ଜରି, ଲେବଲ୍, ପାନମସଲା ଓ ଗୁଟଖା ସକାଶେ ଆବଶ୍ୟକୀୟ କଂଚାମାଲ, ଗୁଟଖା ଓ ପାନମସଲା ତିଆରି ମେସିନ ଜବତ କରିବା ସହ ୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଥିଲେ ।
ଜବତ ଗୁଟଖା, ପାନମସଲା ଓ ଅନ୍ୟାନ ସାମଗ୍ରୀର ମୂଲ୍ୟ ପ୍ରାୟ ଅଢେଇ କୋଟି ଟଙ୍କା ହେବ ବୋଲି ଜଣାପଡ଼ିଛି । ଅନ୍ୟପକ୍ଷରେ ହିଞ୍ଜିଳି ଥାନାର ବିଭିନ୍ନ ଅଂଚଳରେ ବେଆଇନ ଭାବେ ଗୁଟଖା ଓ ପାନମସଲା କାରଖାନା ଚାଲୁଥିବା ସ୍ପଷ୍ଟ ବାରି ହୋଇପଡ଼ୁଛି । ପୁଲିସ ପ୍ରଶାସନ ପକ୍ଷରୁ ସ୍ୱତନ୍ତ୍ର ଦୃଷ୍ଟି ପ୍ରଦାନ କରି ସ୍ଥାନୀୟ ଥାନା ଅଂଚଳର ବିଭିନ୍ନ ସ୍ଥାନରେ ଚଢାଉ କଲେ ଆଗାମୀ ଦିନରେ ବହୁ ବେଆଇନ ଗୁଟଖା ଓ ପାନମସଲା କାରଖାନାର ଫର୍ଦ୍ଧାଫାସ ହେବ ବୋଲି ଅଂଚଳର ବୁଦ୍ଧିଜୀବି ମହଲରେ ମତପ୍ରକାଶ ପାଇଛି ।
