୧୯୭୨ ମସିହା ମାଟ୍ରିକ ବ୍ୟାଚର ସୁବର୍ଣ୍ଣ ଜୟନ୍ତୀ ସମାରୋହରେ : ଉତ୍କଳମଣି ଙ୍କ ପ୍ରତିମୂର୍ତ୍ତି ଉନ୍ମୋଚିତ

” ଗୋପବନ୍ଧୁ ଦାସ ଥିଲେ ଜଣେ ଦରଦୀ ମଣିଷ “

ଓଡ଼ିଶା ତାଜା ନ୍ୟୁଜ୍ /୦୯ ମଇ ସୋମବାର/କଟକ :- କଟକ ସଦର ବ୍ଲକ ଅନ୍ତର୍ଗତ କନ୍ଦରପୁର ପଞ୍ଚାୟତର ସିଦ୍ଧେଶ୍ଵରପୁର ସ୍ଥିତ ପୂର୍ଣ୍ଣଚନ୍ଦ୍ର ଓଡ଼ିଆ ଭାଷାକୋଷର ପ୍ରଣେତା ଗୋପାଳ ଚନ୍ଦ୍ର ପ୍ରହରାଜଙ୍କ ନାମରେ ନାମିତ ଗୋପାଳ ସ୍ମୃତି ବିଦ୍ୟାପୀଠର ୧୯୭୨ ମସିହା ମାଟ୍ରିକ ବ୍ୟାଚର ସୁବର୍ଣ୍ଣ ଜୟନ୍ତୀ ସମାରୋହ ପାଳିତ ହୋଇଯାଇଛି । ଏହି ଅବସରରେ ସ୍କୁଲ ପରିସରରେ ” ମୋ ସ୍କୁଲ ଅଭିଯାନ ” ରେ ଏକ ପାର୍କ ନିର୍ମାଣ କରାଯାଇ ଉକ୍ତ ପାର୍କରେ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସଙ୍କ ଏକ ପ୍ରତିମୂର୍ତ୍ତି ଲୋକସେବକ ମଣ୍ଡଳ ଓଡ଼ିଶା ଶାଖା ଅଧକ୍ଷ ନିରଞ୍ଜନ ରଥଙ୍କ ଦ୍ଵାରା ଉଦ୍ଘାଟିତ ହୋଇଯାଇଛି । ସୁବର୍ଣ୍ଣ ଜୟନ୍ତୀ ସମାରୋହ ପାଳନ କମିଟିର ସଭାପତି ରଘୁନାଥ ପୃଷ୍ଟିଙ୍କ ସଭାପତିତ୍ବରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଶ୍ରୀ ରଥ ଛାତ୍ରଛାତ୍ରୀ ମାନଙ୍କୁ ଅନେକ ଶିକ୍ଷଣୀୟ କଥା କହିବା ସହ ଗୋପବନ୍ଧୁ ପ୍ରକୃତରେ ଜଣେ ଦରଦୀ ମଣିଷ ଥିଲେ ବୋଲି କହିଥିଲେ ।

ମୁଖ୍ୟ ବକ୍ତା ଭାବରେ ଆୟକର ବିଭାଗର ଅବସରପ୍ରାପ୍ତ ମୁଖ୍ୟ କମିଶନର ତ୍ରୈଲୋକ୍ୟ ନାଥ ଜେନା ଶିକ୍ଷା ଓ ସାକ୍ଷରତା ବିଷୟରେ ଆଲୋକପାତ କରିଥିଲେ । ସମ୍ମାନିତ ଅତିଥି ଭାବରେ କଟକ ଶିକ୍ଷା ଜିଲ୍ଲା ଅଧିକାରୀ କୃଷ୍ଣଚନ୍ଦ୍ର ନାୟକ ଓ ବିଦ୍ୟାପୀଠର ପ୍ରଧାନ ଶିକ୍ଷୟତ୍ରୀ ଜୟଶ୍ରୀ ବିଶ୍ୱାଳ ପ୍ରମୁଖ ଯୋଗଦେଇଥିଲେ । ଏହି ଅବସରରେ ୭୨’ ମସିହା ବ୍ୟାଚ ପକ୍ଷରୁ ଏକ ସ୍ମରଣିକା ” ସ୍ମୃତି ମଞ୍ଜୁଶା ” ଅତିଥି ମାନଙ୍କ ଦ୍ଵାରା ଉନ୍ମୋଚିତ ହୋଇଥିଲା । ପୁରାତନ ଶିକ୍ଷକ ଆକୁଳ ନନ୍ଦ ମଲ୍ଲିକ ଓ ଧରଣୀଧର ବେହେରା , ପୁରାତନ କର୍ମଚାରୀ ଜଗନ୍ନାଥ ମହାନ୍ତିଙ୍କୁ ସମ୍ବର୍ଦ୍ଧିତ କରାଯାଇଥିବାବେଳେ ସ୍ବେଚ୍ଛାସେବୀ ତପନ ଓଝା ଓ ସାମ୍ବାଦିକ ତାପସ ରାଉତରାୟଙ୍କୁ ମଧ୍ୟ ସମ୍ବର୍ଦ୍ଧନା ଦିଆଯାଇଥିଲା ।

ତତ୍ ସହିତ ସାଧାରଣ ଜ୍ଞାନ ଓ ବକୃତା ପ୍ରତିଯୋଗୀତାରେ କୃତିତ୍ୱ ଅର୍ଜନ କରିଥିବା ଛାତ୍ରଛାତ୍ରମାନଙ୍କୁ ପୁରସ୍କୃତ କରାଯାଇଥିଲା । ଆସନ୍ତା ୨୦୨୩ ମସିହାରେ ସ୍କୁଲର ୭୫ତମ ବାର୍ଷିକ ଉତ୍ସବ ପାଳନ ନିମନ୍ତେ ପ୍ରାରମ୍ଭିକ ପ୍ରସ୍ତୁତି ଆରମ୍ଭ କରିବା ପାଇଁ ସଭାପତି ଶ୍ରୀ ପୃଷ୍ଟି ସୂଚନା ଦେଇଥିଲେ । ପ୍ରାରମ୍ଭରେ କବି କାଳୀ ପ୍ରସାଦ ମହାପାତ୍ର ଅତିଥି ପରିଚୟ ଓ ସ୍ବାଗତ ଭାଷଣ ପ୍ରଦାନ କରିଥିବାବେଳେ ସମ୍ପାଦକ ରବୀନ୍ଦ୍ର କୁମାର ମିଶ୍ର ବିବରଣୀ ପାଠ କରିଥିଲେ । ଏଥିରେ ସଦର ବ୍ଲକ ପୂର୍ବତନ ଅଧକ୍ଷ ସାଧୁ ଚରଣ ଜେନା , ବାସୁଦେବ ପ୍ରଧାନ , ଅଚ୍ୟୁତାନନ୍ଦ ବୈଶାଖ , ସୁଲୋଚନା ବିଶ୍ୱାଳ, ବଳରାମ ସାହୁ , ନାରାୟଣ ଚନ୍ଦ୍ର ସିହ୍ନୁ ,ବଂଶୀଧର ଲେଙ୍କା , କୈଳାସ ସାହୁ ପ୍ରମୁଖ ସହଯୋଗ କରିଥିବାବେଳେ ଶ୍ରୀକାନ୍ତ ଦତ୍ତ ଧନ୍ୟବାଦ୍ ପ୍ରଦାନ କରିଥିଲେ ।