ଉତ୍ତର ବନଖଣ୍ଡ ନର୍ଲା ରେଞ୍ଜରେ ହାତୀ ମୃତ

ଓଡ଼ିଶା ତାଜା ନ୍ୟୁଜ୍ (୧୨ଫେବ୍ରୁଆରୀ ଶନିବାର ) କଳାହାଣ୍ଡି : – କଳାହାଣ୍ଡି ଜିଲ୍ଲା ଉତ୍ତର ବନଖଣ୍ଡ ନର୍ଲା ରେଞ୍ଜର ଜାମପଡା ଗାଁ ନିକଟରୁ ଏକ ମୃତ ହାତୀକୁ ଠାବ କରାଯାଇଛି । ପ୍ରଥମେ ସ୍ଥାନୀୟ ଲୋକେ ଆଜି ମୃତ ହାତୀକୁ ଦେଖି ନର୍ଲା ବନବିଭାଗକୁ ଖବର ଦେଇଥିଲେ। ଖବର ପାଇ ନର୍ଲା ରେଞ୍ଜର ଓ ଫରେଷ୍ଟର ପହଞ୍ଚି ତଦନ୍ତ ଆରମ୍ଭ କରିଥିଲେ । ମୃତ ହାତୀର କାରଣ ଶବ ବ୍ୟବଚ୍ଛେଦ ରିପୋର୍ଟ ପରେ ଜଣାପଡ଼ିବ ବୋଲି ନର୍ଲା ବନପାଳ ଭବାନୀ ନାଏକ ଜଣାଇଛନ୍ତି ।

ତେବେ ହାତୀ ମରିଥିବା ସ୍ଥାନର ଠିକ୍ ଉପରେ ଉଚ୍ଚ କ୍ଷମତା ସମ୍ପନ୍ନ ବିଦ୍ୟୁତ ତାର ଓହ୍ଲେଇ ହୋଇ ରହିଥିବା ଓ ନିକଟରେ ବିଦ୍ୟୁତ ଖୁଣ୍ଟ ଢଳି ରହିଥିବାରୁ ବିଦ୍ୟୁତ ତାର ସଂସ୍ପର୍ଶରେ ଆସି ହାତୀର ମୃତ୍ୟୁ ଘଟିଥିବା ଜନସାଧାରଣରେ ଆଲୋଚନା ହେଉଛି । ଏଠାରେ ସୂଚନାଯୋଗ୍ୟ ଏହି ଅଞ୍ଚଳରେ ଦୀର୍ଘ ଦିନରୁ ହାତୀପଲ ରହି ଆସୁଥିବା ବେଳେ ଗତ କାଲି ପଲସାପଡା ଗ୍ରାମର ଫକୀର ନାଏକଙ୍କ କଦଳୀ ବଗିଚାରେ ପଶି କଦଳୀ ଚାଷ ନଷ୍ଟ କରିଥିବା ଅଭିଯୋଗ ହୋଇଛି ।