ଦୁର୍ଗମ ପାହାଡ଼ିଆ ରାସ୍ତାରେ ଗର୍ଭବତୀଙ୍କୁ ଭାରରେ ବୋହି ଆଣିଲେ ୧୦୮ ଆମ୍ବୁଲାନ୍ସ କର୍ମଚାରୀ

ଓଡ଼ିଶା ତାଜା ନ୍ୟୁଜ୍ (୨୯ ଜାନୁଆରୀ ଶନିବାର )ରାୟଗଡ଼ା :- ବିଭିନ୍ନ ସମୟରେ ୧୦୮ ଆମ୍ବୁଲାନ୍ସ କର୍ମଚାରୀ ମାନେ ସେମାନଙ୍କର ନିଃସ୍ୱାର୍ଥପର ସେବା ଏବଂ କର୍ତବ୍ୟନିଷ୍ଠା ପାଇଁ ପ୍ରଶଂସିତ ହୋଇଛନ୍ତି । ଯାହାର ଅନେକ ଜ୍ୱଳନ୍ତ ଉଦାହରଣ ଆମକୁ ଦେଖିବାକୁ ମଧ୍ୟ ମିଳିଛି । ବର୍ତମାନ ସମାନ ଧରଣର ଏକ ଏକ ଦୃଷ୍ଟାନ୍ତ ଦେଖିବାକୁ ମିଳିଛି ରାୟଗଡ଼ା ଜିଲ୍ଲାରେ । ଘଟଣାନୁଯାୟୀ ଚଳିତ ଜାନୁଆରୀ ୨୮ ତାରିଖ ଦିନ ରାୟଗଡ଼ା ଜିଲ୍ଲା ଗୁଡାରି ବ୍ଲକ କଦମା ପଂଚାୟତ ବୁରୁଡ଼ି ଗ୍ରାମରୁ ପ୍ରେମୀ ମାଝୀ ନାମକ ଜଣେ ଗର୍ଭବତୀଙ୍କ ସଂକ୍ରାନ୍ତ ରେ ୧୦୮ ଆମ୍ବୁଲାନ୍ସକୁ ଏକ ଫୋନ କଲ ଆସିଥିଲା । ଖବର ପାଇବା ମାତ୍ରେ ଇଏମଟି ଜ୍ଞାନ ରଞ୍ଜନ ନାୟକ, ଡ୍ରାଇଭର ଅଚ୍ୟୁତ କୁମାର ଓଡ଼ିଆ ଏବଂ ସହାୟକ ପ୍ରମୋଦ ଜେନାଙ୍କୁ ନେଇ ତୁରନ୍ତ ଏକ ୧୦୮ ଆମ୍ବୁଲାନ୍ସ ଗର୍ଭବତୀଙ୍କ ଗ୍ରାମ ଅଭିମୁଖେ ବାହାରି ଯାଇଥିଲା ।

କିନ୍ତୁ ଗାଁ କୁ ଯାଉଥିବା ରାସ୍ତାର ଅବସ୍ଥା ଅତ୍ୟନ୍ତ ଖରାପ ହୋଇଥିବା କାରଣରୁ ଆମ୍ବୁଲାନ୍ସ ଆଗକୁ ବଢ଼ିପାରିନଥିଲା । ଯାହାପରେ ଆମ୍ବୁଲାନ୍ସ କର୍ମୀ ମାନେ ସେହିସ୍ଥାନରେ ଆମ୍ବୁଲାନ୍ସ ଛାଡ଼ି ଅଣ ଓସାରିଆ ଏବଂ ପାହାଡ଼ିଆ ରାସ୍ତା ଦେଇ ଚାଲି ଚାଲି ଯାଇ ରୋଗୀଙ୍କ ଘର ନୀକଟ  ରେ ପହଂଚି ଥିଲେ ଏବଂ ସେଠାରୁ ରୋଗୀଙ୍କୁ ଗ୍ରାମବାସୀଙ୍କ ସହାୟତାରେ ଜଙ୍ଗଲି ରାସ୍ତା ଦେଇ ପ୍ରାୟ ୫ କି.ମି ପର୍ଯ୍ୟନ୍ତ ଭାରରେ ବୋହି ଆଣି ଆମ୍ବୁଲାନ୍ସ ନୀକଟରେ ପହଂଚାଇଲେ । ଏହାପରେ ଗର୍ଭବତୀ ଙ୍କୁ ଆମ୍ବୁଲାନ୍ସ ଯୋଗେ ପଦ୍ମପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତି କରାଯାଇଛି । ଆମ୍ବୁଲାନ୍ସ କର୍ମଚାରୀ ମାନଙ୍କର ଏଭଳି ମହତ କାର୍ଯ୍ୟ ପାଇଁ ସଭିଏଁ ତାଙ୍କୁ ସାଧୁବାଦ ଜଣାଇଛନ୍ତି ।