ଭୁବନେଶ୍ଵର ରିପୋର୍ଟ (ଓଡଶା ତାଜା ନ୍ୟୁଜ୍) ସାମ୍ବାଦିକ ସମ୍ମିଳନୀ 10.4.2020 ଶୁକ୍ରବାର : – ରାଜ୍ୟ ସରକାର କୋଭିଡ୍ -୧୯ ଭୂତାଣୁ ନମୁନା ପରୀକ୍ଷା କ୍ଷମତା ବଢ଼ାଇ ଚାଲିଛନ୍ତି । କେବଳ ଭୁବନେଶ୍ଵର କିମ୍ବା କଟକ ନୁହେଁ ରାଜ୍ୟର ଅନ୍ୟ ଅଂଚଳରେ ଏହି ସୁବିଧା ଉପଲବ୍ଧ କରିବା ପାଇଁ ଉଦ୍ୟମ କରାଯାଉଛି । ଶୁକ୍ରବାର ସାମ୍ବାଦିକ ସମ୍ମିଳନୀରେ ଶ୍ରୀ ସିଂହ କହିଛନ୍ତି ଆରଏମଆରସିରେ ଆଗାମୀ ଦିନରେ ୧୦୦୦ରୁ ଅଧିକ ନମୁନା ପରୀକ୍ଷା କରାଯିବ । ଏଥିପାଇଁ ଯୁଦ୍ଧକାଳୀନ ଭିତ୍ତିରେ କାମ ଚାଲିଛି । ଆରଏମଆରସିକୁ ଅତ୍ୟାଧୁନିକ ମେସିନ ଆସିଛି । ବୈଜ୍ଞାନିକ ଓ ଇଞ୍ଜିନିୟରମାନେ ଅଧିକରୁ ଅଧିକ ନମୁନା ପରୀକ୍ଷା କରିବା ପାଇଁ ଲାଗିଛନ୍ତି । ସେ କହିଲେ ମାର୍ଚ୍ଚ ୫ରେ ପ୍ରଥମେ ଆରଏମଆରସିରେ ୧୦୦ଟି ନମୁନା ପରୀକ୍ଷା କରାଯାଇଥିଲା । ମାର୍ଚ୍ଚ ୧୬ ବେଳକୁ ପରୀକ୍ଷା କ୍ଷମତା ୩୫୦ରେ ପହଞ୍ଚିଥିଲା । ଆଜି (ଏପ୍ରିଲ ୧୦ରେ) ୧୦୦୦ ନମୁନା ପରୀକ୍ଷା କରିବାକୁ ଲକ୍ଷ୍ୟ ରଖାଯାଇଛି । ଏଥିପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ସହଯୋଗ କରୁଛନ୍ତି । କେବଳ ଭୁବନେଶ୍ଵର କିମ୍ବା କଟକ ନୁହେଁ ରାଜ୍ୟର ଅନ୍ୟ ଅଂଚଳରେ ଏହି ସୁବିଧା ଉପଲବ୍ଧ କରିବା ପାଇଁ ଉଦ୍ୟମ କରାଯାଉଛି । ଦକ୍ଷିଣ ଓଡ଼ିଶାରେ ଆଜି ଏହି ସୁବିଧା ଲାଗି ସବୁଜ ସଂକେତ ମିଳିଛି । ବ୍ରହ୍ମପୁରସ୍ଥିତ ଏମକେସିଜିରେ ପରୀକ୍ଷା ଲାଗି ଆଇସିଏମଆର୍ ଅନୁମତି ଦେଇଛି । ୧୩ ତାରିଖରୁ ପରୀକ୍ଷା ଆରମ୍ଭ ହେବ । ଆସନ୍ତା ୧୫ ତାରିଖରୁ ବୁର୍ଲାସ୍ଥିତ ଭିମସାରରେ ମଧ୍ୟ କରୋନା ପରୀକ୍ଷା ଆରମ୍ଭ ହୋଇଯିବ । ଏହି ସୂଚନା ଦେଇଛନ୍ତି ରାଜ୍ୟ ସରକାରଙ୍କ ସୂଚନା ଓ ଲୋକସଂପର୍କ ସଚିବ ସଂଜୟ ସିଂହ । ଶ୍ରୀ ସିଂହ କହିଲେ ଭୁବନେଶ୍ୱରସ୍ଥିତ ଏମ୍ସରେ ମାର୍ଚ୍ଚ ୨୪ରେ ପ୍ରଥମେ କରୋନା ପରୀକ୍ଷା କରାଯାଇଥିବା ବେଳେ କଟକ ଏସସିବିରେ ମାର୍ଚ୍ଚ ୩୧ରୁ ନମୁନା ପରୀକ୍ଷା କରାଯାଉଛି । ଏମ୍ସରେ ଦିନକୁ ୭୫ଟି ନମୁନା ପରୀକ୍ଷା କରାଯାଉଥିବା ବେଳେ ଏସସିବିରେ ୫୦ଟି ନମୁନା ପରୀକ୍ଷା ହୋଇପାରୁଛି । କରୋନା ଯୁଦ୍ଧରେ ବିଜୟୀ ହେବାପାଇଁ ରାଜ୍ୟ ସରକାର ତଥ୍ୟ ଆଧାରରେ ରଣନୀତି ପ୍ରସ୍ତୁତ କରିଛନ୍ତି । ଏକ ତୁଳନାତ୍ମକ ଚିତ୍ର ଉପସ୍ଥାପନ କରି ସେ କହିଲେ ଭାରତରେ ୨୦୨୦ ଏପ୍ରିଲ ୯ ପର୍ଯ୍ୟନ୍ତ ୧ ଲକ୍ଷ ୪୪ ହଜାର ୯୧୦ଟି ନମୁନା ପରୀକ୍ଷା ହୋଇଛି । ସେଥିରୁ ପଜିଟିଭ ୬୪୧୨ ଚିହ୍ନଟ ହୋଇଛି । ଓଡ଼ିଶାରେ ଏପର୍ଯ୍ୟନ୍ତ ୩୨୪୯ ନମୁନା ପରୀକ୍ଷା ହୋଇଥିବା ବେଳେ ୪୮ଟି ପଜିଟିଭ ଚିହ୍ନଟ ହୋଇଛି । ଅର୍ଥାତ ଜାତୀୟ ସ୍ତରରେ ପଜିଟିଭ ହାର ୪.୪୨ ପ୍ରତିଶତ ଥିବା ବେଳେ ଓଡ଼ିଶାରେ ଏହା ୧.୪୭ ପ୍ରତିଶତ ରହିଛି ।
