ନିମ୍ନମାନର ପିଡିଏସ ଚାଉଳ ପାଇଁ ଯୋଗାଣ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁଙ୍କ ଇସ୍ତଫା ଦାବି କଲା ; ପ୍ରଦେଶ ଛାତ୍ର କଂଗ୍ରେସ ମାଷ୍ଟର କ୍ୟାଂଟିନ ଛକରେ ବିକ୍ଷୋଭ

ଓଡ଼ିଶା ତାଜା ନ୍ୟୁଜ୍ (୦୮ ଜୁନ୍ , ମଙ୍ଗଳବାର ) ଭୁବନେଶ୍ୱର :- ଆଜି ପ୍ରଦେଶ ଛାତ୍ର କଂଗ୍ରେସ ପକ୍ଷରୁ ସଭାପତି ଶ୍ରୀ ୟାସିର ନୱାଜଙ୍କ ନେତୃତ୍ୱରେ ନିମ୍ନମାନର ପିଡିଏସ ଚାଉଳ ଏବଂ ଏହି ମହାଦୁର୍ନୀତି ପାଇଁ ଯୋଗାଣ ମନ୍ତ୍ରୀ ରାଜା ସ୍ୱାଇଁ ଏବଂ ବିଭାଗୀୟ ସଚ୍ଚିବ ବିରବିକ୍ରମ ସିଂଙ୍କ ଦାୟି କରାଯାଇ ମାଷ୍ଟର କ୍ୟାଂଟିନ ଛକରେ ଏକ ବିକ୍ଷୋଭ ପ୍ରଦର୍ଶନ କରାଯାଇଥିଲା । ଏହି ବିକ୍ଷୋଭରେ ମନ୍ତ୍ରୀ ସ୍ୱାଇଁଙ୍କର କୁଶପୁତଳିକା ଦାହ କରାଯାଇଥିଲା । ଏହି ପରିପ୍ରେକ୍ଷୀରେ ଶ୍ରୀ ନୱାଜ କହିଥିଲେ ଯେ ଜାତୀୟ ଖାଦ୍ୟ ସୁରକ୍ଷା ଆଇନ ବଳରେ ଓଡ଼ିଶାର ୭୭ଭାଗ ଲୋକ ଅର୍ଥାତ ୩ କୋଟିରୁ ଉର୍ଦ୍ଧ୍ୱ ଲୋକ ଯେଉଁ ଚାଉଳ/ ଗହମ ପାଉଛନ୍ତି ତାହା ଛେଳି, ମେଣ୍ଢା, ଘୋଡା ଆଦି ପଶୁଖାଦ୍ୟ ଯୋଗ୍ୟ ବୋଲି କେନ୍ଦ୍ର ସରକାରଙ୍କ ଖାଉଟିକଲ୍ୟାଣର ମନ୍ତ୍ରଣାଳୟର ଅଧିକାରୀମାନେ ତଦନ୍ତ କରି ରାଜ୍ୟ ସରକାରଙ୍କୁ ଜଣାଇ ଦେଇଛନ୍ତି ।

ସୁତରାଂ ଟଙ୍କିକିଆ ଚାଉଳ ପାଉଥିବା ୩କୋଟି ଓଡ଼ିଶା ଛେଳି, ମେଣ୍ଢା ଓ ଘୋଡ଼ା ସାଙ୍ଗେ ସମାନ ବୋଲି ତନଖିରୁ ଜଣାପଡ଼ିଛି । ନବୀନ ସରକାର ୧ଟଙ୍କିଆ ଚାଉଳ ଦେଇ ଓଡ଼ିଶାବାସୀଙ୍କ ଭୋଟ ଲୋଟିନେଲେ । ମାତ୍ର ଯେଉଁ ଚାଉଳ ଦେଲେ ତାହା ପଶୁଖାଦ୍ୟ । ଏଥିରୁ ସ୍ପଷ୍ଟ ହୋଇଛିଯେ ଓଡ଼ିଶା ଜାତୀୟ ଖାଦ୍ୟ ସୁରକ୍ଷା ଆଇନ କାର୍ଯ୍ୟକାରୀ କରିବାରେ ବିଫଳ ଏବଂ ଏଥିରେ କୋଟି କୋଟି ଟଙ୍କା ଓଡ଼ିଶା ସରକାର ଆତ୍ମସାତ କରିଛନ୍ତି । କଟକ ଓ ଖୋର୍ଦ୍ଧାର ଚାଉଳ ଗୋଦାମ, ରାଇସ ମିଲ, ଶୋଲଭ ଗୋଦାମ ଏବଂ ଏଫସିଆଇ ଗୋଦାମରୁ ସଂଗୃହିତ ୧୫ଟି ନମୁନା ଦିଲ୍ଲୀ କୃଷି ବିଭାଗ ପରୀକ୍ଷାଗାରରେ ପରୀକ୍ଷଣ କରାଯିବା ପରେ ୯ଟି ନମୂନା ପଶୁଖାଦ୍ୟ ବୋଲି ପ୍ରମାଣିତ ହେଲା । ଏବେ କେନ୍ଦ୍ର ଖାଉଟି କଲ୍ୟାଣ ବିଭାଗ ୨ଟି ଟିମ କରି ୮ଟି ଜିଲ୍ଲାରେ ଏହାର ତଦନ୍ତ କରୁଛନ୍ତି । ବର୍ତମାନ ୧୦ଲକ୍ଷ ଟନ ଚାଉଳ ମହଜୁଦ ଅଛି ।

ଏହାର ଆନୁମାନିକ ମୂଲ୍ୟ ୨୫୦୦ କୋଟି । ଯଦି କଟକ ଖୋର୍ଦ୍ଧା ଜିଲ୍ଳାର ଅବସ୍ଥା ଏପରି ତେବେ ମାଲକାନଗିରୀ, ନବରଙ୍ଗପୁର ଓ ମୟୁରଭଞ୍ଜରେ ଅବସ୍ଥା କିପରି ଥିବ ଶ୍ରୀ ନୱାଜ ପ୍ରଶ୍ନ କରିଛନ୍ତି । ଏଥିରୁ ସ୍ପଷ୍ଟ ଯେ ବ୍ୟାପକ ଚାଉଳ ରିସାଇକ୍ଲିନ ହେଉଛି । ମନ୍ତ୍ରୀ ଓ ସରକାରୀ ଅଫିସର ସମସ୍ତେ ଏଥିରେ ସଂପୃକ୍ତ । ବର୍ତମାନ ରାଜ୍ୟ ଯୋଗାଣ ନିଗମର କ୍ୱାଲିଟି ସେଲ ତଦନ୍ତ କରି କେବଳ ତଳତଳିଆ ଅଫିସରଙ୍କ ଉପରେ କାର୍ଯ୍ୟାନୁଷ୍ଠାନ ନେଉଛନ୍ତି । ମାତ୍ର ଏହି ମହାଦୁର୍ନୀତର ଖଳନାୟକ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ଏବଂ ବିଭାଗୀୟ କମିଶନର ବୀରବିକ୍ରମ ସିଂ କୋଟି କୋଟି ଟଙ୍କା ଆତ୍ମସାତ କରି ମୁଖ୍ୟମନ୍ତ୍ରୀଙ୍କ ବାହୁଛାୟାତଳେ ନିର୍ଭୟରେ ରହିଛନ୍ତି ।

ପ୍ରଦେଶ ଛାତ୍ର କଂଗ୍ରେସ ମନ୍ତ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ, କମିଶନର ବିରବିକ୍ରମ ସିଂ, ମିଲମାଲିକ ଏବଂ ଏଥିରେ ସଂପୃକ୍ତ ଥିବା ସମସ୍ତ ଦୋଷୀଙ୍କ ଉପରେ ଦୃଢ଼ କାର୍ଯ୍ୟାନୁଷ୍ଠାନ ଦାବି କରୁଛି ଏବଂ ମନ୍ତ୍ରୀଙ୍କ ଇସ୍ତଫା ଦାବି କରୁଛି । ଏହି କାର୍ଯ୍ୟକ୍ରମରେ ଯୋଗଦେଇ ଶ୍ରୀ ସୁରେଶ କୁମାର ରାଉତରାୟ କହିଥିଲେ ଯେ କେନ୍ଦ୍ର ସରକାର ଅତ୍ୟାବଶକୀୟ ସାମଗ୍ରୀ ଆଇନ ୨୦୨୦ ରେ ସଂପୃକ୍ତ ମିଲମାଲିକଙ୍କୁ ଖୁବଶୀଘ୍ର କଳା ତାଲିକାଭୁକ୍ତ କରନ୍ତୁ । ପିଡିଏସ ଯୋଜନାରେ ଲୋକଙ୍କୁ ପଶୁଖାଦ୍ୟ ଦେଇ ମୁଖ୍ୟମନ୍ତ୍ରୀ ଓଡ଼ିଶାବାସୀଙ୍କ ପାଇଁ ଚରମ ବିଶ୍ୱାସଘାତକତା କରିଛନ୍ତି । ଏହି କାର୍ଯ୍ୟକ୍ରମରେ ସୁନିଲ ମାଟିଆ, ବାବୁ ଜେନା, ରଞ୍ଜିତ ପାତ୍ର, ସୁବ୍ରତ ମହାପାତ୍ର, ବାଦଲ ମହାନ୍ତି, ଜୟକୃଷ୍ଣ ସୁବୁଦ୍ଧି, ମିହିର ଆଚାର୍ଯ୍ୟ, ସଂକୁନା କହଁର, ବଟକୃଷ୍ଣ ରାଉତରାୟ, ରଞ୍ଜିତ ସେନାପତି, ମହମ୍ମଦ ଗୋଲଫାମ, ବାଦଲ ମହାନ୍ତି, ଅଭିରାମ ଗୌଡ଼, ଅଖିଳେଷ ଯାଦବ, ବିଶ୍ୱଭୂଷ୍ଣଣ ମହାପାତ୍ର, କାର୍ତିକ କାଣ୍ଡି, ଅହମ୍ମଦ ଖାନ, ସହାରୁଖ ଖାନ୍‌, ଅଜିତ ବାରିକ, ଅବିନାଶ ନନ୍ଦ, ସଞ୍ଜିବ ରାଉତ, ରିଆଜୁଲ ଅହମ୍ମଦ, ସୂର୍ଯ୍ୟ ସାହୁ, ରାଜେଶ ଦାଶ, ପ୍ରତ୍ୟୁଷ ପ୍ରଧାନ, ପ୍ରଦୀପ ବେହେରା, ଆରିୟନ ସାମଲ, ଦେବ୍ରପସାଦ ନାୟକ, ସୁୟମ୍ଭୁ ପ୍ରମୁଖ ଅଂଶଗ୍ରହଣ କରିଥିଲେ ।