ଅଣ୍ଡା ଉଷୁମାଉ ଥିବା ଅଜଗର କୁ ସୁରକ୍ଷା ଦେବେ ଗ୍ରାମ ବାସୀ ଓ ବନ କର୍ମଚାରୀ :ସ୍ନେକ ହେଲ୍ପ ଲାଇନ ର ଐତିହାସିକ ଉଦ୍ୟମ: ଓଡ଼ିଶାରେ ପ୍ରଥମ ଘଟଣା

ସ୍ଥିତି ଅନୁଧ୍ୟାନ କରୁଛନ୍ତି ବାଙ୍କୀ ର ପୁଅ ସ୍ନେକ ହେଲ୍ପ ଲାଇନ ର ରାଜ୍ୟ ସଂଯୋଜକ ଲଳିତ ।

 ଓଡ଼ିଶା ତାଜା ନ୍ୟୁଜ (୧୬ ମଇ ରବିବାର ) ବାଙ୍କୀ :- ଖୋର୍ଦ୍ଧା ଜିଲ୍ଲା ମଲ୍ଲିପୁର ପଞ୍ଚାୟତ ର ମଲ୍ଲିପୁର ଗ୍ରାମର ଗ୍ରାମ୍ୟ ଜଙ୍ଗଲରେ କିଛି ଲୋକ ଏକ ଖୋଲ ଭିତରେ ଏକ ଅଜଗର ସାପ କୁ ଦେଖିଲେ । ସ୍ଥାନୀୟ ଯୁବକ ମାନେ ହଳଦିଆ ରେଞ୍ଜ ଅଫିସର ଙ୍କୁ ଖବର ଦେଲା ପରେ ରେଞ୍ଜ ଅଫିସର ଜୟକୃଷ୍ଣ ପଣ୍ଡା ନିଜର ଟିମ ଧରି ପହଞ୍ଚିଲେ । ସ୍ଥାନୀୟ କିଛି ସାପ ଉଦ୍ଧାରକାରୀ ମଧ୍ୟ ଘଟଣା ସ୍ଥଳରେ ପହଞ୍ଚିଲେ । ତେବେ ସେମାନେ ସାପ କୁ ଉଦ୍ଧାର କରିବା ପୂର୍ବରୁ ସ୍ନେକ ହେଲ୍ପ ଲାଇନ ର ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ ରେଞ୍ଜ ଅଫିସର ଙ୍କୁ ଉଦ୍ଧାର କରିବା ପାଇଁ ମନା କରି ନିଜେ ଯାଉଛନ୍ତି ବୋଲି କହିଲେ । ରେଞ୍ଜ ଅଫିସର ସ୍ଥାନୀୟ ସାପ ଉଦ୍ଧାରକାରୀ ଙ୍କୁ ବାରଣ କରିଥିଲେ ।ସ୍ନେକ ହେଲ୍ପ ଲାଇନ ର ଏକ ଦୁଇ ଜଣିଆ ଟିମ ଶୁଭେନ୍ଦୁ ମଲ୍ଲିକ ଙ୍କ ନେତୃତ୍ୱରେ ଘଟଣା ସ୍ଥଳରେ ପହଞ୍ଚିବା ବେଳକୁ ବହୁ ଜନ ସମାଗମ ହୋଇସାରିଥିଲା , ଏବଂ ଜଣେ ପୁଲିସ ସବଇନ୍ସପେକ୍ଟର ନିଜ ଷ୍ଟାଫ ଙ୍କୁ ଧରି ଆଇନ ଶୃଙ୍ଖଳା ରକ୍ଷା କରୁଥିଲେ ।

 କରୋନା କଟକଣା ପାଇଁ ପୁଲିସ ଲୋକଙ୍କୁ ଦୂରକୁ ହଟେଇବା ପରେ ଶୁଭେନ୍ଦୁ ଆସ୍ତେ ଆସ୍ତେ ସାପ କୁ ନିଜର ହୁକ ସାହାଯ୍ୟରେ ଅଳ୍ପ ଟେକିବା ପରେ ସାପ ପେଟ ତଳେ କିଛି ଅଣ୍ଡା ଦେଖିବାକୁ ପାଇଥିଲେ । ଆଉ ସାପ କୁ ବିରକ୍ତ ନକରି ତୁରନ୍ତ ଚନ୍ଦକା ଡିଏଫଓ ଙ୍କୁ ଜଣେଇଥିଲେ । ସାପକୁ ତା ବସା ରୁ ବାହାରନକରିସେହିଜାଗାରେଅଣ୍ଡାଫୁଟେଇବାକୁ ସୁଯୋଗ ଦେବା ପାଇଁ ଶୁଭେନ୍ଦୁ ପରାମର୍ଶ ଦେଇଥିଲେ । ଚନ୍ଦକା ଡିଏଫଓ ଙ୍କ ନିର୍ଦ୍ଦେଶ ରେ ଆଜି ଠାରୁ ସେହି ଜାଗାରେ ବାରିକେଡ ତିଆରି ହୋଇ ଏଜ ଅସ୍ଥାୟୀ କ୍ୟାମ୍ପ ବ୍ୟବସ୍ଥା ହେଲା। ସ୍ଥାନୀୟ ଗ୍ରାମ କମିଟି ତରଫରୁ ଗ୍ରାମର ଯୁବକ ସଙ୍ଘ ମଧ୍ୟ ସାପ ର ସୁରକ୍ଷା ନେବା ଦାୟୀତ୍ବ ନେଲେ । ମଲ୍ଲୀପୁର ସରପଞ୍ଚ ବିଜୟ କୁମାର ଦାସ ଓ ଗଡ଼ ନିଆଳ ଗ୍ରାମ୍ୟ କମିଟି ସଭାପତି ମନୋଜ କୁମାର ପ୍ରତିହାରୀ ଗ୍ରାମ ବାସୀଙ୍କ ତରଫରୁ ସୁରକ୍ଷା ଦେବା ପାଇଁ ଆଗେଇ ଆସିଛନ୍ତି । ଅଜଗର ସାପ ଟି କିପରି ନିଜ ବସା ପାଖରେ ପାଣି ପାଇ ପାରିବ ସେଥି ନିମନ୍ତେ ଗ୍ରାମ୍ୟ କମିଟି ତରଫରୁ ଏକସିମେଣ୍ଟ ନନ୍ଦ ବ୍ୟବସ୍ଥା କରାଯାଇଛି । ସେହି ନନ୍ଦ ଭିତରେ ପାଣି ମଧ୍ୟ ଭର୍ତ୍ତି କରି ଦିଆଯାଇଛି ।

 ଅଜଗର ସାପ ଅଣ୍ଡା ଦେଇଥିବା ଖବର ବିଜୁଳି ବେଗରେ ଚାରିଆଡେ ବ୍ୟାପୀ ବାରେ ଲାଗିଥିଲା, ଏବଂ ବହୁତ ଲୋକ ଘଟଣା ସ୍ଥଳକୁ ଆସିବାରେ ଲାଗିଛନ୍ତି । ଏଥିପାଇଁ ବନ ବିଭାଗ ତରଫରୁ ସାପ ବସା ଠାରୁ ପ୍ରାୟ 30 ଫୁଟ ରୁ ଅଧିକ ଦୂର ରେ କାଠ ବହ୍ଲା ଦ୍ୱାରା ବାରିକେଡ ନିର୍ମାଣ କରାଯାଇଛି । ହଳଦିଆ ରେଞ୍ଜ ଅଧିକାରୀ ଜୟକୃଷ୍ଣ ପଣ୍ଡା ଏନେଇ କହିଛନ୍ତି “ଭାରତୀୟ ଅଜଗର ସାପ ବନ୍ୟପ୍ରାଣୀ (ସଂରକ୍ଷଣ) ଆଇନ, ୧୯୭୨ ଅନୁଯାୟୀ ତଫସିଲ ୧ଅନ୍ତର୍ଭୂକ୍ତ । ସାପ ର ବସାକୁ ଭାଙ୍ଗି ନଷ୍ଟ କଲେ ଜାମିନ ବିହୀନ ଦଫା ଧାରା ୯(ପ୍ରୋହିବିସନ ଅଫ ହଁଟିଙ୍ଗ) ରେ ଗିରଫଦାରୀ ହେବ । ସାପ ଅଣ୍ଡା ଫୁଟିବା ପର୍ଯ୍ୟନ୍ତ ଆମର ଏହି ସ୍ଥାନରେ ୨୪ ଘଣ୍ଟିଆ ପହରା ଦିଆଯିବ” ।

ସାପ ଅଣ୍ଡା ଦେଇଥିବା ଜାଗାର ଆଖ ପାଖରେ ୩ -୪ଟି ଗୋଧି ବୁଲା ବୁଲି କରିବା ଦେଖାଯିବା ପରେ, ସାପ ବସା ରୁ ଅଣ୍ଡାକୁ ଗୋଧି ଖାଇ ଦେବାର ବିପଦ ଦେଖା ଦେଲା । ଏଣୁ ଗ୍ରାମ୍ୟ କମିଟି ସଭାପତି ମନୋଜ ପ୍ରତିହାରୀ ଗାଁ ରୁ ମାଛ ଜାଲ ଆଣି ବ୍ୟାରିକେଡ ଚାରି ପଟେ ଘେରି ବୁଲେଇ ଥିଲେ । ଏହା ଫଳରେ ଯଦି ଗୋଧି ସାପ ଅଣ୍ଡା ଖାଇବାକୁ ଆସିବ, ସେହି ଜାଲ ରେ ଛନ୍ଦି ହେଇଯିବ, ଏବଂ ତା ପରେ ଗୋଧିକୁ ଜାଲ କାଟି ବାହାର କରି ଜଙ୍ଗଲରେ ଛାଡି ଦିଆ ଯିବ ।ସ୍ନେକ ହେଲ୍ପ ଲାଇନ ର ସାଧାରଣ ସମ୍ପାଦକ ଶୁଭେନ୍ଦୁ ମଲ୍ଲିକ କହିଛନ୍ତି “ସାପ ଅଣ୍ଡା କୁ ବନ କର୍ମଚାରୀ ଓ ଗ୍ରାମବାସୀ ସୁରକ୍ଷା ଦେବା ଓଡ଼ିଶାରେ ପ୍ରଥମ ଘଟଣା । ଅଜଗର ସାପ ମାର୍ଚ୍ଚ ରୁ ଜୁନ ମାସ ମଧ୍ୟରେ ପ୍ରାୟ ୧୦୦ ପର୍ଯ୍ୟନ୍ତ ଅଣ୍ଡା ଦେଇ ଅଣ୍ଡା କୁ ଫୁଟିବା ପର୍ଯ୍ୟନ୍ତ ଜଗି ରହି ଥାଏ ।

 ଏଠି ଯଦି ମା’ ସାପ କୁ ଧରି ସ୍ଥାନାନ୍ତର କରାଯାଇଥାନ୍ତା ତାହେଲେ ଆଉ ସେହି ଅଣ୍ଡା ଗୁଡିକ କସ୍ମିନ୍ କାଳେ ଫୁଟି ନଥାନ୍ତା” । ସ୍ନେକ ହେଲ୍ପ ଲାଇନ ର ଅଧୀକୃତ ସଦସ୍ୟ ମାନେ ପ୍ରତିଦିନ ଘଟଣା ସ୍ଥଳକୁ ଯାଇ ପୁରା ବ୍ୟବସ୍ଥାକୁ ତଦାରଖ କରୁଛନ୍ତି । ସ୍ନେକ ହେଲ୍ପ ଲାଇନ ର ସଂଯୋଜକ ବାଙ୍କୀ ର ସମାଜସେବୀ ଲଳିତ ମୋହନ ପଣ୍ଡା ଦିନେ ଛଡା ଦିନେ ଡ୍ରୋନ କ୍ୟାମେରା ସାହାଯ୍ୟରେ ଅଜଗର ସାପର ଗତି ବିଧି ପର୍ଯ୍ୟବେକ୍ଷଣ କରୁଛନ୍ତି ।ଚନ୍ଦକା ଡିଏଫଓ କେଦାର ସ୍ୱାଇଁ କହିଛନ୍ତି “ସାପ ଅଣ୍ଡା ଫୁଟିବା ପର୍ଯ୍ୟନ୍ତ ଏହି କଟକଣା ଜାରି ରହିଲା । କୌଣସି ଲୋକଙ୍କୁ ସାପ ଅଣ୍ଡା ପାଖକୁ ଛଡା ଯିବ ନାହିଁ । ଆମ କର୍ମଚାରୀ ୨୪ ଘଣ୍ଟା ସେହି ସ୍ଥାନରେ ରହିବେ । ଗ୍ରାମବାସୀ କରୋନା କାଳ ରେ ନିଜ ଘରେ ରୁହନ୍ତୁ, ଏବଂ ସାପ ଅଣ୍ଡା ପାଖକୁ ଆଦୌ ଆସନ୍ତୁ ନାହିଁ” ।(ରିପୋର୍ଟ – ଗୌତମ ମିଶ୍ର )