ତୃତୀୟ ସପ୍ତାହାନ୍ତ ସଟଡ଼ାଉନ ବଜାର, ରାସ୍ତାଘାଟ ଶୁନଶାନ : ସାହି ଓ ଗଳିକନ୍ଦିରେ ଚାଲିଛି ଗୁଲିଖଟି

ଓଡ଼ିଶା ତାଜା ନ୍ୟୁଜ୍ (୦୯ ମଇ ରବିବାର ) ହିଞ୍ଜିଳିକାଟୁ :- କରୋନା ସଂକ୍ରମଣର ଚେନକୁ ରୋକ ଲଗାଇବା ପାଇଁ ଗତ ୫ ତାରିଖ ଠାରୁ ଆରମ୍ଭ ହୋଇଥିବା ଲକଡ଼ାଉନ ବଳବତର ରହିଥିବା ବେଳେ ଚଳିତ ବର୍ଷର ସହରାଂଚଳରେ ଲାଗୁ କରାଯାଇଥିବା ସପ୍ତାହାନ୍ତ ସଟଡ଼ାଉନର ୩ୟ ପର୍ଯ୍ୟାୟ ଶନି ଓ ରବିବାର ମୋଟାମୋଟି ଭାବରେ ହିଞ୍ଜିଳିକାଟୁ ଅଂଚଳରେ ସଫଳ ହୋଇଛି । ସପ୍ତାହାନ୍ତ ସଟଡ଼ାଉନରେ ବହୁ ସଚେତନ ଲୋକେ ଘରୁ ବାହାରକୁ ବାହାରିନଥିବା ବେଳେ କିଛି ଅମାନିଆ ବାଇକ ଧରି ସାହି ସାହି ବୁଲି ଚକ୍କର କାଟୁଥିବାର ଦେଖିବାକୁ ମିଳିଥିଲା । ସ୍ଥାନୀୟ ପୌରାଂଚଳର ମୁଖ୍ୟ ସଡ଼କ, ବଜାର ପୁରା ଶୁନଶାନ ରହିଥିବା ବେଳେ କିଛି ଅମାନିଆ ମାନେ ସାହି ବସ୍ତିରେ ଅଯଥା ଗହଳି କରି ଗୁଲିଖଟି କରିବା ସହ ତାସ ଖେଳୁଥିବାର ଦେଖିବାକୁ ମିଳିଥିଲା । ହିଞ୍ଜିଳି ଥାନା ଭାରପ୍ରାପ୍ତ ଅଧିକାରୀ ଅଭିମନ୍ୟୁ ଦାସଙ୍କ ତତ୍ୱାବଧାନରେ ୨ଟି ପୁଲିସ ପେଟ୍ରୋଲିଂ ଗାଡ଼ି ସାଇରନ ବଜାଇ ପୌରାଂଚଳ ପରିସରଭୁକ୍ତ ଅଂଚଳରେ ପଇଁତରା ମାରୁଥିବାର ଦେଖିବାକୁ ମିଳିଥିଲା ।

ଚିକିତ୍ସା ପାଇଁ ମେଡ଼ିକାଲକୁ ଯାଉଥିବା ଲୋକ ଓ ଔଷଧ କିଣିବା ପାଇଁ ଯାଉଥିବା ଲୋକଙ୍କୁ ଯିବା ପାଇଁ ଅନୁମତି ଦିଆଯାଉଥିବା ବେଳେ ଅନ୍ୟ ସମସ୍ତଙ୍କୁ ବାରଣ କରାଯାଇଥିଲା । ସହରର ଆରଏମସି ଛକ, ବିଜୁ ପଟ୍ଟନାୟକ ଛକ ଓ ବଇଁଚବଣିଆ ଛକ ନିକଟରେ ଯାଂଚ କଡ଼ାକଡ଼ି କରାଯାଉଥିଲା । ବିନା କାଣରେ ବାହାରେ ବୁଲୁଥିବାେ ଅମାନିଆଙ୍କ ଠାରୁ ଜରିମାନା ଆଦାୟ କରାଯାଉଥିବା ବେଳେ କଡ଼ା ତାଗିଦ କରି ଘରକୁ ଫେରିବା ପାଇଁ ନିର୍ଦ୍ଦେଶ ଦେଉଥିବାର ଦେଖିବାକୁ ମିଳିଥିଲା । ଅନ୍ୟପକ୍ଷରେ ପୌର କାର୍ଯ୍ୟ ନିର୍ବାହୀ ଅଧିକାରୀ ଡ଼ଃ. ମନୋରଞ୍ଜନ ସାହୁ ଓ ବିଡ଼ିଓ ସୁବ୍ରତ କୁମାର ଜେନା ପୌରାଂଚଳ ବୁଲି ବୁଲି ଘଟଣାର ତୀକ୍ଷ୍ମ ନଜର ରଖିଥିଲେ । ବିଭିନ୍ନ ସାହି ବସ୍ତିରେ ଅମାନିଆ ଯୁବକ ମାନେ ମିଳିମିଶି ସହରର ବିଭିନ୍ନ ଛକ ସ୍ଥାନ ମାନଙ୍କରେ ଗୁଲିଖଟି କରୁଥିବା ବେଳେ ପ୍ରଶାସନର ଗାଡ଼ିକୁ ଦେଖି ଘଟଣଶ ସ୍ଥଳରୁ ଦୌଡ଼ି ପଳାଉଥିବାର ଦେଖିବାକୁ ମିଳିଥିଲା । ଗାଡ଼ି ଯିବା ପରେ ପୁଣି ଅମାନିଆ ମାନେ ପୂର୍ବାବସ୍ଥାକୁ ଫେରୁଥିବାର ଦେଖିବାକୁ ମିଳିଥିଲା । ଏଭଳି ଅମାନିଆଙ୍କ ଯୋଗୁଁ ସ୍ଥାନୀୟ ଅଂଚଳରେ ସଂକ୍ରମିତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଉଥିବା ମତ ପ୍ରକାଶ ପାଇଛି । ଏଭଳି ଅମାନିଆଙ୍କ ବିରୁଦ୍ଧରେ ପ୍ରଶାସନ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୁଦ୍ଧିଜୀବି ମହଲରେ ମତ ପ୍ରକାଶ ପାଇଛି ।  ( ରିପୋର୍ଟ : ଶୁସାନ୍ତ ପ୍ରଧାନ )