କଟକଣାକୁ କମିଟିର ଅବମାନନା ; ମନ୍ଦିର ସ୍ଥଳୀରେ ପ୍ରବଳ ଗହଳି

ଓଡ଼ିଶା ତାଜା ନ୍ୟୁଜ୍ ( ୨୦ ଏପ୍ରିଲ , ମଙ୍ଗଳବାର ) ହିଞ୍ଜିଳିକାଟୁ :-  ଦେଶ ତଥା ରାଜ୍ୟରେ କରୋନା ମହାମାରୀର ୨ୟ ଲହର ସାଧାରଣ ଜନଜୀବନକୁ ଅସ୍ତବ୍ୟସ୍ତ କରି ଚାଲିଛି । ଦିନକୁ ଦିନ ଏହି ଭୁତାଣୁର ସ୍ଥିତି ଭୀଷଣ, ଭୟଙ୍କର ଓ ଅଣାୟତ ଆଡକୁ ଗତି କରୁଛି । ଏହାର ମୁକାବିଲା ପାଇଁ ଉଭୟ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ପଦକ୍ଷେପ ଗ୍ରହଣ କରୁଛନ୍ତି । ଏପରି ଏକ ବିପର୍ଯ୍ୟୟ ସମୟରେ ଅନ୍ଧବିଶ୍ୱାସ ଓ କୁସଂସ୍କାର ପ୍ରଥାକୁ ଆପଣେଇ ପୂଜାର୍ଚ୍ଚନା ନାଁ ରେ କୋଭିଡ଼ ସଂକ୍ରମଣ ବୃଦ୍ଧି ପାଇବା ଭଳି କାର୍ଯ୍ୟକ୍ରମ ଅନୁଷ୍ଠିତ ହୋଇଛି ।ସବୁଠାରୁ ଉଦବେଗର କାରଣ ହେଲା କରୋନା ସଂକ୍ରମଣକୁ ଦୃଷ୍ଟିରେ ରଖି ବିଭିନ୍ନ ମନ୍ଦିର ଓ ଧାର୍ମିକ ଅନୁଷ୍ଠାନ ଉପରେ କଟକଣା ଜାରି ହୋଇଥିଲା ବେଳେ ପୂଜାର୍ଚ୍ଚନା ଲାଗି ମନ୍ଦିର ସ୍ଥଳୀରେ ଶହ ଶହ ଲୋକଙ୍କର ଉପସ୍ଥିତି ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ଏଭଳି ଏକ ସମ୍ବେଦନଶୀଳ ପ୍ରସଙ୍ଗ ଗଞ୍ଜାମ ଜିଲ୍ଲାର ହିଞ୍ଜିଳିବ୍ଳକ ଖରିଡା ପଞ୍ଚାୟତ ରେ ଘଟିଥିବା ଜଣାପଡ଼ିଛି।ସମ୍ପୃକ୍ତ ପଞ୍ଚାୟତରେ ଥିବା ଠାକୁରାଣୀ ଓ କରେଇଶୁଣି ମନ୍ଦିର ସ୍ଥଳୀରେ ପୂଜାର୍ଚ୍ଚନା ଓ ଭୋଜିଭାତର ଆସରରେ ଶହ ଶହ ଲୋକଙ୍କ ସମାବେଶ ପ୍ରଶାସନକୁ ତାଜୁବ କରିଥିବା ଜଣାପଡ଼ିଛି । ଘଟଣାର ଅନୁସନ୍ଧାନରୁ ଜଣାଯାଇଛି , ହିଞ୍ଜିଳି ବ୍ଲକ ଖରିଡା ଗ୍ରାମରେ ମଙ୍ଗଳବାର ମଧ୍ୟାହ୍ନ ପ୍ରାୟ ୧୨ ଟା ବେଳେ ଗ୍ରାମର ଶହ ଶହ ମହିଳା ଓ ପୁରୁଷ ଏକ ବିରାଟ ପଟୁଆରରେ ଗ୍ରାମର ଠାକୁରାଣୀ ଓ କରେଇଶୁଣି ମନ୍ଦିରକୁ ଯାଇ ପଣାପାଣି, ଲିଆ, ମୁଆଁ ଆଦି ଭୋଗ ଲାଗି ପୂଜାର୍ଚ୍ଚନା କରିଥିଲେ । ଦିନକ ପୂର୍ବରୁ କରେଇଶୁଣି ମନ୍ଦିର ପରିଚାଳନା କମିଟିର ସଦସ୍ୟ ଗୌରାଙ୍ଗ ସ୍ବାଇଁକୁ ଗତ ରବିବାର ରାତିରେ କୁଆଡେ ଦେବୀଙ୍କ ସ୍ୱପ୍ନାଦେଶ ହୋଇଥିଲା ବୋଲି ଚର୍ଚ୍ଚା ହେଉଛି ।

ସ୍ୱପ୍ନାଦେଶ ପ୍ରକାରେ ମଙ୍ଗଳବାର ଗ୍ରାମ ଦେବୀଙ୍କୁ ପଣା, ପାଣି,ମୁଆଁ,ଲିଆ ଆଦି ଦେଇ ସନ୍ତୁଷ୍ଟ କଲେ ଦେବୀ ସନ୍ତୁଷ୍ଟ ହେବେ ଓ କରୋନା ମହାମାରୀ ଦୂର ହୋଇଯିବ । ତଦନୁଯାୟୀ ମନ୍ଦିର ପରିଚାଳନା କମିଟିର କାଙ୍ଗାରୁ କୋର୍ଟର ନିଷ୍ପତ୍ତି କ୍ରମେ ଅନ୍ୟତମ ସଦସ୍ୟ ଈଶ୍ୱର ପ୍ରଧାନ ଓ ଅଭିରାମ ସାହୁ ପ୍ରମୁଖଙ୍କ ତତ୍ତ୍ୱାବଧାନରେ ସୋମବାର ସନ୍ଧ୍ୟାରେ ଗାଁ ସାରା ଢେଣ୍ଡୁରା ଜରିଆରେ ଗ୍ରାମବାସୀଙ୍କୁ ସୂଚନା ଦିଆଯାଇଥିଲା । ନିଷ୍ପତ୍ତି ଅନୁସାରେ ପ୍ରତି ଘରୁ ଜଣେ ଲେଖାଏଁ ସ୍ତ୍ରୀ ଲୋକ ଯୋଗଦେବାପାଇଁ ନିର୍ଦ୍ଦେଶ ଦିଆଯାଇଥିଲା।ମଙ୍ଗଳବାର ପୂଜାର୍ଚ୍ଚନା ନେଇ ସମସ୍ତ ପ୍ରସ୍ତୁତି ସମ୍ପନ୍ନ ହୋଇଥିଲା । ଏନେଇ ସାମାଜିକ ଗଣ ମାଧ୍ୟମରେ ଏକ ଭିଡିଓ ଘୁରି ବୁଲୁଥିବା ଦେଖା ଯାଉଥିଲା । ଘଟଣା ପରେ ସରପଞ୍ଚ ରଘୁନାଥ ବେହେରା ଧେଣ୍ଡୁରା ବିଷୟରେ ଅବଗତ ଥିଲେ କିନ୍ତୁ କାର୍ଯ୍ୟକ୍ରମ ତାଙ୍କ ଅଗୋଚରରେ ଏହା ହୋଇଥିଲା ବୋଲି ସେ କହିଛନ୍ତି । ପରେ ପିଇଓ ସୁଶାନ୍ତ କୁମାର ପାତ୍ର, ଶିକିରି ରାଜସ୍ୱ ନିରୀକ୍ଷକ ଓ ପୁଲିସ ଘଟଣା ସ୍ଥଳରେ ପହଞ୍ଚିଥିଲେ । ସ୍ଥାନୀୟ ଥାନାଧିକାରୀ ଅଭିମନ୍ୟୁ ଦାସଙ୍କୁ ଘଟଣା ସମ୍ପର୍କରେ ଦୃଷ୍ଟି ଆକର୍ଷଣ କରିବାରୁ ସେ ଭିଡ଼ିଓ ନଜରକୁ ଆସିବା ପରେ ଘଟଣା ସ୍ଥଳ କୁ ସଦଳ ବଳେ ଯାଇଥିଲେ ମଧ୍ୟ କାହାକୁ ପୂଜାର୍ଚନା ସ୍ଥଳରେ ପାଇ ନ ଥିବା ପ୍ରକାଶ କରିଛନ୍ତି । ତଦନ୍ତ ଚାଲିଛି, ଯଦି ଭାଇରଲ ଭିଡ଼ିଓ ର ସତ୍ୟତା ସାବ୍ୟସ୍ତ ହେଲେ ଆୟୋଜକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ ସ୍ୱଷ୍ଟ କରିଥିଲେ । ଘଟଣା ପରେ ସାଧାରଣରେ ତୀବ୍ର ଅସନ୍ତୋଷ ପ୍ରକାଶ ପାଇଛି । କରୋନା ସ୍ଥିତି ପ୍ରତି ପ୍ରଶାସନ ସଜାଗ ଥିଲା ବେଳେ ମନ୍ଦିର କର୍ତ୍ତୃପକ୍ଷଙ୍କ ଏଭଳି ବେଆଇନ କାର୍ଯ୍ୟକ୍ରମ ବେଶ ଆଲୋଡନ ସୃଷ୍ଟି କରିଛି । ( ରିପୋର୍ଟ ଶୁସାନ୍ତ ପ୍ରଧାନ )