ହିଞ୍ଜିଳିକାଟୁରେ କୋଭିସିଲ୍ଡ ଟୀକା ଅଭାବ : ବରିଷ୍ଟ ନାଗରିକ ମହଲରେ ଅସନ୍ତୋଷ

ଓଡ଼ିଶା ତାଜା ନ୍ୟୁଜ (୧୭ ଅପ୍ରେଲ ଶନିବାର ) ହିଞ୍ଜିଳିକାଟୁ :- ସାରା ବିଶ୍ୱରେ ମହାମାରୀ କରୋନା ଭୁତାଣୁ ସଂକ୍ରମଣକୁ ନେଇ ଆତଙ୍କ ସୃଷ୍ଟି ହୋଇଛି । ଏହାକୁ ପ୍ରତିହିତ କରିବା ସକାଶେ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଉଦ୍ୟମ ପ୍ରଂଶସନୀୟ । କରୋନା ଟୀକାର ଆବିଷ୍କାର ପରେ ଜନସାଧାରଣଙ୍କୁ ସାମାନ୍ୟ ଆଶ୍ୱସ୍ତି ମିଳିଛି । ପ୍ରଥମ ପର୍ଯ୍ୟାୟରେ କରୋନା ଯୋଦ୍ଧା ସମେତ ବରିଷ୍ଟ ନାଗରିକ ମାନଙ୍କୁ କରୋନା ଟୀକା ପ୍ରଦାନ କରାଯିବାକୁ ସରକାର ଘୋଷଣା କରିବା ପରେ ବହୁ କୋରନା ଯୋଦ୍ଧା ସମେତ ବରିଷ୍ଟ ନାଗରିକ ମାନଙ୍କ ମଧ୍ୟରେ ଖୁସିର ବାତାବରଣ ଦେଖିବାକୁ ମିଳିଛି । ପରବର୍ତୀ ସମୟରେ ୪୫ ବର୍ଷରୁ ଉର୍ଦ୍ଧ୍ୱ ଲୋକଙ୍କୁ କରୋନା ଟୀକା ପ୍ରଦାନ କରୋଯିବା ନେଇ ଘୋଷଣା ପରେ ବହୁ ବ୍ୟକ୍ତିଙ୍କ ମଧ୍ୟରେ ଖୁସିର ଲହରୀ ଦେଖିବାକୁ ମିଳିଥିଲା । ୪୫ ବର୍ଷରୁ ଉର୍ଦ୍ଧ୍ୱ ଲୋକ ମାନେ ସମସ୍ତ ସରକାରୀ ଚିକିତ୍ସାଳୟରେ ନିଜ ନାମକୁ ପଞ୍ଜିକରଣ କରିବା ପରେ ଟୀକା ଗ୍ରହଣ କରୁଥିବାର ଦେଖିବାକୁ ମିଳିଥିଲା । ଏହି ପରିପ୍ରେକ୍ଷୀରେ ଗଞ୍ଜାମ ଜିଲ୍ଲା ହିଞ୍ଜିଳିକାଟୁ ପୌରାଂଚଳ ଉପଖଣ୍ଡ ଚିକିତ୍ସାଳୟରେ ମଧ୍ୟ ଗତ କିଛି ଦିନ ଧରି ଟୀକା ପ୍ରଦାନ କରାଯାଉଥିଲା ।

ପ୍ରଥମେ ସ୍ଥାନୀୟ ଉପଖଣ୍ଡ ଚିକିତ୍ସାଳୟ ପୁରୁଣା କୋଠାରେ ଟୀକା ପ୍ରଦାନ କରାଯାଉଥିବା ବେଳେ ସଂପୃକ୍ତ ଚିକିତ୍ସାଳୟ ପୁରୁଣାକୋଠାକୁ କୋଭିଡ଼ କେୟାର ସେଂଟର ଭାବେ କାର୍ଯ୍ୟକାରୀ କରାଯିବା ପରେ ଶୁକ୍ରବାର ଠାରୁ ସ୍ଥାନୀୟ ଉପଖଣ୍ଡ ଚିକିତ୍ସାଳୟ ନୂତନ କୋଠାରେ ଟୀକା ପ୍ରଦାନ କରାଯାଉଥିଲା । ଗଚ୍ଛିତ ଥିବା ଟୀକା ସରିଯିବା ପରେ ଶନିବାର ସଂପୃକ୍ତ ଚିକିତ୍ସାଳୟକୁ ଟୀକା ଗ୍ରହଣ ପାଇଁ ଆସିଥିବା ଶହେରୁ ଉର୍ଦ୍ଧ୍ୱ ଲୋକେ ଟୀକା ପାଇନପାରିବା ଯୋଗୁଁ ସେମାନଙ୍କ ମଧ୍ୟରେ ଅସନ୍ତୋଷ ଭାବ ପ୍ରକାଶ ପାଇଥିଲା । ବହୁ ବରିଷ୍ଟ ନାଗରିକ ମାନେ ଖୁସି ମନରେ ଟୀକା ଗ୍ରହଣ ପାଇଁ ଆସୁଥିବା ବେଳେ ବହୁ ସମୟ ଧରି ଅପେକ୍ଷା କରିବା ପରେ ମଧ୍ୟାନ୍ନ ସମୟ ରେ ଟୀକା ଗଚ୍ଛିତ ନଥିବା ଦର୍ଶାଇ ଘଉଡ଼ାଇ ଦିଆଯାଇଥିଲା । ଫଳରେ ପ୍ରବଳ ଗ୍ରୀଷ୍ମ ପ୍ରବାହରେ ବରିଷ୍ଟ ନାଗରିକ ମାନେ ଚାଲୀ ଚାଲି ଘରକୁ ଫେରୁଥିବାର ଦେଖିବାକୁ ମିଳିଥିଲା । ଟୀକା ଗ୍ରହଣ କରିବାକୁ ଆସିବା ସମୟରେ ଚିକିତ୍ସାଳୟ କର୍ମଚାରୀ ମାନେଟୀକା ଗଚ୍ଛିତ ନଥିବା ନକହିବା ଯୋଗୁଁ କିଛି ସମୟ ପାଇଁ ବରିଷ୍ଟ ନାଗରିକ ଓ ଚିକିତ୍ସାଳୟ କର୍ମଚାରୀଙ୍କ ମଧ୍ୟରେ ଉଚ୍ଚବାଚ୍ଚ ହୋଇଥିବା ଜଣାପଡ଼ିଛି । ବିଭାଗୀୟ ମୁଖ୍ୟ ଘଟଣା ପ୍ରତି ଦୃଷ୍ଟି ପ୍ରଦାନ କରି କରୋନା ଟୀକା ହିଞ୍ଜିଳିକାଟୁ ଉପଖଣ୍ଡ ଚିକିତ୍ସାଳୟରେ ଗଚ୍ଛିତ ରଖିବାକୁ ବରିଷ୍ଟ ନାଗରିକ ମହଲରେ ଦାବି ହୋଇଛି । ( ରିପୋର୍ଟ : ଶୁସାନ୍ତ ପ୍ରଧାନ )