ଐତିହ୍ୟ, କଳା, ସ୍ଥାପତ୍ୟ, ସଂସ୍କୃତି ପାଇଁ ଢେଙ୍କାନାଳ ଜିଲା ରାଜ୍ୟ ଓ ଜାତୀୟସ୍ତରରେ ବେଶ୍‌ ପରିଚିତ

ଓଡ଼ିଶା ତାଜା ନ୍ୟୁଜ୍ (୧୪ ଏପ୍ରିଲ ବୁଧବାର ) ଢେଙ୍କାନାଳ :- ଐତିହ୍ୟ, କଳା, ସ୍ଥାପତ୍ୟ, ସଂସ୍କୃତି ପାଇଁ ଢେଙ୍କାନାଳ ଜିଲା ରାଜ୍ୟ ଓ ଜାତୀୟସ୍ତରରେ ବେଶ୍‌ ପରିଚିତ । କିନ୍ତୁ ଗତ ୬ବର୍ଷ ହେଲା ଜିଲା ସଂସ୍କୃତି ବିଭାଗକୁ ଅଣଦେଖା କରି ରଖାଯାଇଛି । ଫଳରେ ଜିଲା ସଂସ୍କୃତି ପରିଷଦ ଗଠନ ହୋଇପାରୁ ନ ଥିବାରୁ ଢେଙ୍କାନାଳ ମହୋତ୍ସବ ଭଳି ସାଂସ୍କୃତିକ ଉତ୍ସବର ଆୟୋଜନ ହୋଇପାରୁନାହିଁ । ଦେଢବର୍ଷ ହେବ କରୋନା ସଂକ୍ରମଣ ଏ କ୍ଷେତ୍ରରେ ଆଉ ଏକ ପ୍ରତିବନ୍ଧକ ସାଜିଛି ।

ସଂସ୍କୃତି ପରିଷଦ ଗଠନ ନ ହେବାରୁ ଜିଲାର ସାଂସ୍କୃତିକ ବିକାଶ ପାଇଁ କେଉଁ ସୂତ୍ରରୁ କେତେ ଅର୍ଥ ଅନୁଦାନ ମିଳିଲା ଏବଂ ତାହା କିପରି ଭାବରେ ବ୍ୟୟ ହେଲା ତାହା ସାଧାରଣ ନାଗରିକଙ୍କ ପକ୍ଷେ ଜାଣିବା ମଧ୍ୟ ସମ୍ଭବପର ହେଉନାହିଁ। ସେହିପରି ପରିଷଦର କୌଣସି ବୈଠକ ଅନୁଷ୍ଠିତ ହେଉନାହିଁ। ଏହାକୁ ନେଇ ଢେଙ୍କାନାଳ ଜିଲାର ବିଭିନ୍ନ ସାହିତ୍ୟ ଓ ସାଂସ୍କୃତିକ ସଙ୍ଗଠନ ପକ୍ଷରୁ ତୀବ୍ର ଅସନ୍ତୋଷ ପ୍ରକାଶ ପାଉଛି। ଜିଲାର ବିଭିନ୍ନ ସାଂସ୍କୃତିକ ଅନୁଷ୍ଠାନ କର୍ମକର୍ତ୍ତାମାନେ ତୁରନ୍ତ ସଂସ୍କୃତି ପରିଷଦ ଗଠନ ପାଇଁ ସୋମବାର ଜିଲାପାଳଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି। ପ୍ରତ୍ୟେକ ଜିଲାରେ ଜିଲା ସଂସ୍କୃତି ବିଭାଗ ଆନୁକୂଲ୍ୟରେ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ ପାଇଁ ଜିଲା ସଂସ୍କୃତି ପରିଷଦ ରହିଛି ।

ଜିଲା ସଂସ୍କୃତି ପରିଷଦର କାର୍ଯ୍ୟକାଳ ୩ବର୍ଷ। ପ୍ରତି ୩ ମାସରେ ଥରେ ପରିଷଦ ବୈଠକ ବସିବା କଥା। କିନ୍ତୁ ୨୦୧୬ ମସିହାରୁ ଗୋଟିଏ ବି ବୈଠକ ବସିନାହିଁଁ। ଜିଲାପାଳ ସଂସ୍କୃତି ପରିଷଦ ଅଧ୍ୟକ୍ଷ ଥିବାବେଳେ ଅତିରିକ୍ତ ଜିଲାପାଳ ଏହାର ଉପାଧ୍ୟକ୍ଷ। କିନ୍ତୁ ଢେଙ୍କାନାଳ ଭଳି ସଂସ୍କୃତି ସମ୍ପନ୍ନ ଜିଲାରେ ଏଥିରେ ବ୍ୟତିକ୍ରମ କେଉଁ ସ୍ବାର୍ଥରେ ବୋଲି ସାଧାରଣରେ ଆଲୋଚନାର ବିଷୟ ହୋଇଛି। ଢେଙ୍କାନାଳ ମହୋତ୍ସବ କୋରାପୁଟ ଜିଲାର ପରବ, ନବରଙ୍ଗପୁର ଜିଲାର ମଣ୍ଡେଇ ମହୋତ୍ସବ ଭଳି ବହୁ ପୁରୁଣା । ଢେଙ୍କାନାଳ ମହୋତ୍ସବରେ ରାଜ୍ୟର ବିଭିନ୍ନ ସଂସ୍କୃତି ସମ୍ପନ୍ନ ଜିଲାର କଳାକାରମାନେ ଲୋକନୃତ୍ୟ ପରିବେଷଣ କରିଥାନ୍ତି ।

କୋରାପୁଟ, କଳାହାଣ୍ଡି, ମାଲକାନଗିରି, ନବରଙ୍ଗପୁର, ବରଗଡ, ସମ୍ବଲପୁର, ପୁରୀ ସମେତ ଢେଙ୍କାନାଳ ଜିଲାର ପ୍ରସିଦ୍ଧ ଲୋକନୃତ୍ୟ ପରିବେଷଣ ଦର୍ଶକମାନଙ୍କୁ ବେଶ୍‌ ଆକର୍ଷିତ କରିଥାଏ। କିନ୍ତୁ ସଂସ୍କୃତି ପରିଷଦ ଗଠନ ନ ହେବା ଯୋଗୁ ଢେଙ୍କାନାଳ ମହୋତ୍ସବ ହୋଇପାରୁ ନାହିଁ। ଜଣେ ଅଧିକାରୀ ଓ ଦୁଇଜଣ କର୍ମଚାରୀଙ୍କୁ ନେଇ ସଂସ୍କୃତି ବିଭାଗ ଚାଲିଥିବାରୁ କୌଣସି ସାଂସ୍କୃତିକ କାର୍ଯ୍ୟକ୍ରମ ମଧ୍ୟ ହୋଇପାରୁ ନାହିଁ। ତେଣୁ ଜିଲା ସଂସ୍କୃତି ପରିଷଦ ତୁରନ୍ତ ଗଠନ ପାଇଁ ବିଭିନ୍ନ ସାଂସ୍କୃତିକ ସଙ୍ଗଠନ ପକ୍ଷରୁ ଜିଲାପାଳଙ୍କ ନିକଟରେ ଦାବି କରାଯାଇଛି । (ରିପୋର୍ଟ ଭଞ୍ଜ ବିହାରୀ ମହାନ୍ତି )