ପ୍ରଶ୍ନପତ୍ର ଭାଇରାଲ ହୋଇନାହିଁ : ବୋର୍ଡ ଘଟଣାର ଉଚ୍ଚସ୍ତରୀୟ ତଦନ୍ତ ହେବ : ମନ୍ତ୍ରୀ
ଭୁବନେଶ୍ୱର ମାଟ୍ରିକ ପଶ୍ନପତ୍ର ଭାଇରାଲ ନେଇ ଓଡ଼ିଶା ମାଧ୍ୟମିକ ଶିକ୍ଷା ବୋର୍ଡ ତରଫରୁ ସ୍ପଷ୍ଟୀକରଣ ଦିଆଯାଇଛି । ବୋର୍ଡ ତରଫରୁ କୁହାଯାଇଛି କି ମାଟ୍ରିକ୍ ପ୍ରଶ୍ନପତ୍ର ଭାଇରାଲ ହୋଇନାହିଁ । ଭାଇରାଲ ନେଇ ଯେଉଁ ଅଭିଯୋଗ ହୋଇଛି, ତା ସହ ଆମ ପ୍ରଶ୍ନପତ୍ରର କୌଣସି ତାଳମେଳ ରହୁନାହିଁ । ସାମ୍ବାଦିକ ସମିଳନୀରେ ବୋର୍ଡର ସଭାପତି ରାମାଶିଷ ହାଜରା ଗଣମାଧ୍ୟମର ପ୍ରତିନିଧିଙ୍କୁ କହିଛନ୍ତି, ମାଟ୍ରିକ ପରୀକ୍ଷାର ପ୍ରଥମ ଦିନରେ ଆଜି ପ୍ରଶ୍ନପତ୍ର ଭାଇରାଲ ହୋଇ ନାହିଁ । ପରୀକ୍ଷା ପରେ ଆମେ ପ୍ରଶ୍ନ ପତ୍ର ଯାଞ୍ଚ କରିଥିଲୁ । କିନ୍ତୁ ଭାଇରାଲ ପ୍ରଶ୍ନପତ୍ର ସହ ଏହାର କୌଣସି ମେଳ ଖାଇ ନଥିଲା । ବୋର୍ଡକୁ ବଦନାମ କରିବା ପାଇଁ ଅର୍ଥାତ ଖରାପ ଉଦ୍ଦେଶ୍ୟ ନେଇ କେହି ଜଣେ ବ୍ୟକ୍ତି ପ୍ରଶ୍ନପତ୍ର ପ୍ରସ୍ତୁତ କରି ଭାଇରାଲ କରିଛି ବୋଲି ଶ୍ରୀ ହାଜରା କହିଛନ୍ତି । ସୂଚନାଯୋଗ୍ୟ, ବୋର୍ଡ ପକ୍ଷରୁ ଆଜି ପ୍ରଥମ ଦିନରେ ଓଡ଼ିଆ (ମାତୃଭାଷା) ପରୀକ୍ଷା କରାଯାଇଥିଲା । ପ୍ରଥମ ଦିନରେ ରାଜ୍ୟର ବିଭିନ୍ନ କେନ୍ଦ୍ରରେ ୪୪ଟି ପିଲା ଓଡ଼ିଆରେ କପି କରି ଧରାପଡ଼ିଥିବା ଜଣାପଡ଼ିଛି । ମାଟ୍ରିକ୍ ପରୀକ୍ଷାର ପଥମ ଦିନରେ ଗଣଶିକ୍ଷା ମବୀ ସମୀର ରଞ୍ଜନ ଦାଶ ରାଜଧାନୀର କେତେକ ପରୀକ୍ଷା କେନ୍ଦ୍ର ପରିଦର୍ଶନ କରିଛନ୍ତି । ବଲାଙ୍ଗୀର ସମେତ ରାଜ୍ୟର କେତେକ ଜିଲ୍ଲାରେ ଆଜିର ପରୀକ୍ଷା ପ୍ରଶ୍ନପତ୍ର (ମାତୃଭାଷା) ସାମାଜିକ ଗଣମାଧ୍ୟମରେ ଭାଇରାଲ୍ ହୋଇଥିବା ପ୍ରସଙ୍ଗ ତାଙ୍କ ଦୃଷ୍ଟିକୁ ଆସି ନ ଥିବା କଥା ସେ ଗଣମାଧ୍ୟମକୁ କହିଛନ୍ତି । ଯଦି ସେ ଭଳି କୌଣସି ଘଟଣା ଦୃଷ୍ଟିକୁ ଆସେ ତେବେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି ।
ଧର୍ମଗଡ଼ ଓ କଣ୍ଟାବାଂଝି (ଓଡିଶା ତାଜା ନ୍ୟୁଜ୍ ) କଣ୍ଟାବାଂଝି 19.2.2020 :- କୁଆଡ଼େ ଗଲା ବାହାସ୍ଫୋଟ୍ ? କୁଆଡ଼େ ଗଲା ଷ୍ଟ୍ରାଡେଜି ? ପୁଣି ମ୍ୟାଟ୍ରିକ ପରୀକ୍ଷାରେ ପଶିଗଲା ଭାଇରାଲ୍ ଭୂତ । ଆରମ୍ଭ ଦିନରୁ ସେଣ୍ଟର ବାହାରେ ବୁଲିଲା ମାତୃଭାଷା ପ୍ରଶ୍ନପତ୍ର । ଧର୍ମଗଡ଼ ଓ କଣ୍ଟାବାଂଝିରେ ଆଜି ପରୀକ୍ଷା ଆରମ୍ଭର ମାତ୍ର ଅଧ ଘଣ୍ଟାଏରୁ ଘଣ୍ଟାଏ ଭିତରେ ମୋବାଇଲରୁ ମୋବାଇଲ ଘୂରି ବୁଲିଥିଲା ବି ସେଟ ମାତୃଭାଷା ପ୍ରଶ୍ନପତ୍ର । ଉଭୟ ସବ୍ଜେକ୍ଟିଭ ଓ ଅବଜେକ୍ଟିଭ୍ ପ୍ରଶ୍ନ ପୂରାପୂରି ସମାନ ଥିବା କଣ୍ଟାବାଂଝି କେନ୍ଦ୍ରରେ ପରୀକ୍ଷା ଦେଉଥିବା ଛାତ୍ର ଶଶୀକାନ୍ତ ପଟେଲ ଓ ଜିତୁ କରଣ କହିଛନ୍ତି । ତେଣୁ ଏଥିରୁ ସ୍ପଷ୍ଟ ଯେ, ଭାଇରାଲ୍ ହୋଇଥିବା ପ୍ରଶ୍ନପତ୍ର ହିଁ ଅସଲି । ତାହାଲେ ଏଠି ପ୍ରଶ୍ନ ଉଠୁଛି, ଫସର ଫାଟିଲା କି ବୋର୍ଡର ପ୍ରଶ୍ନପତ୍ର ଭାଇରାଲ୍ ବ୍ରେକ୍ ଷ୍ଟ୍ରାଟେଜି ? ଗଣ୍ଡାଗଣ୍ଡା ସ୍କ୍ୱାର୍ଡ, ସିସିଟିଭି ସର୍ଭେଲାନ୍ସ, ତ୍ରିସ୍ତରୀୟ ସୁରକ୍ଷା ସାଙ୍ଗକୁ ପିଲା ଓକେ କଲେ ପ୍ରଶ୍ନପତ୍ର ପ୍ୟାକେଟ ଖୋଲିବା ଭଳି ଏତେସବୁ ନିଷ୍ପତ୍ତି ସତ୍ତ୍ୱେ କେମିତି ବାହାରକୁ ଗଲା ପ୍ରଶ୍ନପତ୍ର? ଏ ନେଇ ଛାତ୍ରଛାତ୍ରୀ, ଅଭିଭାବକ ଓ ଶିକ୍ଷାବିତ୍ ସମସ୍ତେ ଉଠାଇଛନ୍ତି ପ୍ରଶ୍ନ । ତେବେ ଧର୍ମଗଡ଼ ନା କଣ୍ଟାବାଂଝି, ପ୍ରକୃତରେ କେଉଁ ସ୍କୁଲରୁ ଲିକ ହୋଇଛି ମାତୃଭାଷା ପ୍ରଶ୍ନପତ୍ର? ତାହା ଅଦ୍ୟାବଧି ସ୍ପଷ୍ଟ ହୋଇନଥିବା ବେଳେ ବୋର୍ଡ କର୍ତ୍ତୃପକ୍ଷ କିନ୍ତୁ ସଫାସଫା ଭାଇରାଲକୁ ଖଣ୍ଡନ କରିଛନ୍ତି । ବୋର୍ଡକୁ ବଦନାମ କରିବାକୁ ଏହା ଏକ ଉଦ୍ୟମ ବୋଲି ସଭାପତି ରାମାଶିଷ ହାଜରା କହିଥିବା ବେଳେ ଗଣଶିକ୍ଷାମବୀ ସମୀର ଦାଶ କହିଛନ୍ତି, ଅଭିଯୋଗର ତଦନ୍ତ ହେବ । ଯିଏ ଦୋଷୀ କାର୍ଯ୍ୟାନୁଷ୍ଠାନ ନିଆଯିବ । ସୂଚନାଯୋଗ୍ୟ ଯେ ଚଳିତ ବର୍ଷ ମୋଟ୍ ୫ଲକ୍ଷ ୬୦ ହଜାର ୯୦୫ଜଣ ଛାତ୍ରଛାତ୍ରୀ ୨ହଜାର ୮ଶହ ୮୮କେନ୍ଦ୍ରରେ ପରୀକ୍ଷା ଦେଉଛନ୍ତି । ପ୍ରଶ୍ନପତ୍ର ଲିକ୍କୁ ରୋକିବା ପାଇଁ ତିନି ସ୍ତରରେ ସିଲ୍ ହୋଇଛି ପ୍ରଶ୍ନ ଓ ଉତ୍ତର ଖାତା । ସେଣ୍ଟର ସୁପରିଣ୍ଟେଣ୍ଡେଣ୍ଟ ଗୋଟିଏ କଭର ଖୋଲିବା ପରେ ପରୀକ୍ଷା ହଲରେ ପ୍ୟାକେଟର ଦ୍ୱିତୀୟ କଭର ଖୋଲିବେ ଇନ୍ଭିଜଲେଟର । ଏଥିରେ ରହିବ ଦୁଇ ପରୀକ୍ଷାର୍ଥୀଙ୍କ ଦସ୍ତଖତ । ଏହାପରେ ସିଲ୍ ଅବସ୍ଥାରେ ହିଁ ପିଲାଙ୍କୁ ପ୍ରଶ୍ନ-ଉତ୍ତର ପତ୍ର ମିଳିବ । ପରୀକ୍ଷାର୍ଥୀ ପ୍ରଶ୍ନ ପ୍ୟାକେଟର ତୃତୀୟ ସିଲ୍ ଖୋଲି ଲେଖିବେ ଉତ୍ତର । ଏପରି କଡ଼ା ବ୍ୟବସ୍ଥା ସତ୍ତ୍ୱେ କିପରି ଏହି ପ୍ରଶ୍ନପତ୍ର ଭାଇରାଲ ହୋଇଛି ଓ ଏହା ପଛରେ ମାଷ୍ଟର ମାଇଣ୍ଡ କିଏ, ତାହାକୁ ନେଇ ଚର୍ଚ୍ଚା ଜୋର ଧରିଲାଣି । ଫେବ୍ରୁଆରୀ ୨୬-୨୦୧୮ ଭାଇରାଲ୍ ହୋଇଥିଲା ମ୍ୟାଟ୍ରିକ ଇଂରାଜୀ ପ୍ରଶ୍ନପତ୍ର । ସାରା ରାଜ୍ୟରେ ହଇଚଇ ପରେ ଘଟଣାର କ୍ରାଇମବ୍ରାଞ୍ଚ ତଦନ୍ତ ନିର୍ଦ୍ଦେଶ ଦିଆଯାଇଥିଲା । ଠିକ ସେମିତି ଫେବ୍ରୁଆରୀ ୨୨-୨୦୧୯ ଏବର୍ଷ ଭଳି ଗତବର୍ଷ ମଧ୍ୟ ପରୀକ୍ଷାର ପ୍ରଥମ ଦିନରେ ନୂଆପଡ଼ାରୁ ଭାଇରାଲ ହୋଇଥିଲା ମାତୃଭାଷା ପ୍ରଶ୍ନ । ଆଉ ସେ ଭାଇରାଲ ଭୂତ ପୂରା ପରୀକ୍ଷା ସରିବା ଯାଏଁ ଲାଗି ରହିଥିଲା । ଗତବର୍ଷର ସିରିଜ୍ ଭାଇରାଲ୍ ରୋକିବାକୁ ଏଥର ବୋର୍ଡ ପ୍ରଶ୍ନପତ୍ର କୋଡ଼ିଂ ଭଳି ନୂଆ କୌଶଳ ଆପଣାଇବା ସତ୍ତ୍ୱେ ସବୁ ଯେମିତି ଫେଲ୍ ମାରିଛି ।
