୭୩ତମ ରାଜଧାନୀ ପ୍ରତିଷ୍ଠା ଦିବସ ପାଳନ ପାଇଁ – ପ୍ରସ୍ତୁତି ବୈଠକ

ଓଡ଼ିଶା ତାଜା ନ୍ୟୁଜ୍ (୬ ଏପ୍ରିଲ ମଙ୍ଗଳବାର ) ଭୁବନେଶ୍ୱର :-  ୭୩ତମ ରାଜଧାନୀ ପ୍ରତିଷ୍ଠା ଦିବସ ପାଳନ ନିମନ୍ତେ ଏକ ପ୍ରସ୍ତୁତି ବୈଠକ ସୋମବାର କ୍ୟାପିଟାଲ ହାଇସ୍କୁଲ୍ ସମ୍ମିଳନୀ କକ୍ଷରେ ଅନୁଷ୍ଠିତ ହୋଇଥିଲା ।  ଖୋର୍ଦ୍ଧା ଜିଲ୍ଲାପାଳଙ୍କ ତରଫରୁ ଭୁବନେଶ୍ୱରର ଅତିରିକ୍ତ ଜିଲ୍ଲାପାଳ ପ୍ରଫୁଲ୍ଲ କୁମାର ସ୍ୱାଇଁଙ୍କ ଅଧ୍ୟକ୍ଷତାରେ ଏକ ବୈଠକ ବସିଥିଲା । କୋଭିଡ଼ ନିୟମ ପାଳନ ହେଉଥିବା ପରିପ୍ରେକ୍ଷୀରେ ଆସନ୍ତା ଏପ୍ରିଲ ୧୩ ତାରିଖରୁ ୧୫ ତାରିଖ ପର୍ଯ୍ୟନ୍ତ ୩ ଦିନ ଧରି ପ୍ରତିଷ୍ଠା ଦିବସ ପାଳନ ହୋଇଥାଏ । କିନ୍ତୁ ଚଳିତବର୍ଷ ଏହାର ବ୍ୟତିକ୍ରମ ହୋଇଛି । କେବଳ ଏପ୍ରିଲ ୧୩ ତାରିଖ ଦିନ ରାଜଧାନୀ ପ୍ରତିଷ୍ଠା ଦିବସ ପାଳନ କରାଯିବ ।

ଭୁବନେଶ୍ୱରର ବିଭିନ୍ନ ସ୍କୁଲ୍ ଓ କଲେଜ ଛାତ୍ରଛାତ୍ରୀଙ୍କ ଦ୍ୱାରା ବେସାମରିକ ପ୍ୟାରେଡ଼ ଏଥର ହେବନାହିଁ । କେବଳ ରାଜଧାନୀ ଶିଳାନ୍ୟାସ ଫଳକ ସମ୍ମୁଖରେ ସମବେତ ହୋଇ ସକାଳ ୮ଟାରେ ବିଭିନ୍ନ ସ୍କୁଲ ଓ କଲେଜର ପ୍ରଧାନ ଶିକ୍ଷକ/ଅଧ୍ୟକ୍ଷ (ଜଣେ ଲେଖାଏଁ) ଯୋଗଦେଇ ପୁଷ୍ପମାଲ୍ୟ ଅର୍ପଣ କରିବେ । ଏହାଛଡ଼ା ବିଭିନ୍ନ ସରକାରୀ ସଂସ୍ଥାର ପ୍ରତିନିଧିମାନେ ସେଦିନ ସକାଳେ ଶିଳାନ୍ୟାସ ଫଳକରେ ମଧ୍ୟ ପୁଷ୍ପମାଲ୍ୟ ଦେବେ । ରାଜଧାନୀ ଶିଳାନ୍ୟାସ ଫଳକକୁ ଅଧିକ ଆକର୍ଷଣ କରିବା ପାଇଁ ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ (ବିଡ଼ିଏ) ଏବଂ ଭୁବନେଶ୍ୱର ପୂର୍ତ୍ତ ବିଭାଗ ଡ଼ିଭିଜନ ନଂ-୧କୁ ଅନୁରୋଧ କରାଯିବ ।

ସେଦିନ ସନ୍ଧ୍ୟାରେ ଜୟଦେବ ଭବନରେ ୧୩ଜଣ ବିଶିଷ୍ଟ ପ୍ରତିଭାବାନ ବ୍ୟକ୍ତିଙ୍କୁ ରାଜଧାନୀ ଗୌରବ ସମ୍ମାନ, ଆଲୋଚନା ସଭା କରାଯିବ ଓ ଜନ୍ମଦିନ କେକ୍ ମଧ୍ୟ କଟାଯିବ । ସନ୍ଧ୍ୟାରେ ସଂସ୍କୃତି ବିଭାଗ ପକ୍ଷରୁ ସାଂସ୍କୃତିକ କାର୍ଯ୍ୟକ୍ରମ କୋଭିଡ଼ ନିୟମ ଅନୁସାରେ ପାଳନ କରିବା ପାଇଁ ବୈଠକରେ ସ୍ଥିରୀକୃତ ହୋଇଛି । ଏହି ଅବସରରେ ବିଧାନସଭାର ବାଚସ୍ପତି ସୂର୍ଯ୍ୟନାରାୟଣ ପାତ୍ର ମୁଖ୍ୟ ଅତିଥି ରୂପେ ଯୋଗ ଦେବେ । ଏହି ଉପଲକ୍ଷେ ୧୩ ତାରିଖ ଦିନ ରାଜଧୀନର ବିଭିନ୍ନ ସରକାରୀ, ବେସରକାରୀ ଉଦ୍ୟୋଗ, କେନ୍ଦ୍ର ସରକାରଙ୍କ ଅଧୀନସ୍ଥ ସଂସ୍ଥା, ରାଷ୍ଟ୍ରାୟତ ବ୍ୟାଙ୍କର କୋଠାବାଡ଼ି, ରାସ୍ତାଘାଟ, ବାଣିଜ୍ୟକର ପ୍ରତିଷ୍ଠାନ, ପେଟ୍ରୋଲ ପମ୍ପ, ସଚିବାଳୟ, ବିଧାନସଭା, ରିଜର୍ଭ ବ୍ୟାଙ୍କ, ଏଜି ଅଫିସ, ଇଡ଼କୋ, ଫରଚ୍ୟୁନ ଟାୱାର, ବିଡ଼ିଏ, ଭାରତ ଦୂର ସଞ୍ଚାର ଭବନ, ବିଏମ୍‌ସି, ହାଉସିଂବୋର୍ଡ଼, କମିଶନରେଟ ପୋଲିସ୍‌, ପିଏମ୍‌ଜି ଅଫିସ୍‌, ସୂଚନା ଓ ଲୋକ ସମ୍ପର୍କ ଭବନ, ଓଏମ୍‌ସି କାର୍ଯ୍ୟାଳୟ, ବିଭାଗୀୟ ମୁଖ୍ୟ ଦପ୍ତର କୋଠାଗୁଡ଼ିକୁ ଆଲୋକମାଳାରେ ସୁସଜ୍ଜିତ କରାଯିବା ପାଇଁ ବୈଠକରେ ସ୍ଥିରୀକୃତ ହୋଇଥିଲା ।

ପ୍ରାରମ୍ଭରେ ରାଜଧାନୀ ପ୍ରତିଷ୍ଠା ଦିବସ ପାଳନ କମିଟିର ସଭାପତି ତଥା ବରିଷ୍ଠ ସାମ୍ବାଦିକ ପ୍ରଦୋଷ ପଟ୍ଟନାୟକ ସ୍ୱାଗତ ଭାଷଣ ଦେଇଥିବା ବେଳେ ସାଧାରଣ ସମ୍ପାଦକ ତଥା ସାମ୍ବାଦିକ ସନତ ମିଶ୍ର କାର୍ଯ୍ୟକ୍ରମ ସମ୍ପର୍କରେ ବିବରଣୀ ପ୍ରଦାନ କରିଥିଲେ । ଏହି ପ୍ରସ୍ତୁତି କମିଟି ବୈଠକରେ ଭୁବନେଶ୍ୱରର ଅତିରିକ୍ତ ଜିଲ୍ଲାପାଳ ପ୍ରଫୁଲ୍ଲ କୁମାର ସ୍ୱାଇଁ, ଭୁବନେଶ୍ୱର ମହାନଗର ନିଗମର ଉପକମିଶନର ଡଃ ପ୍ରମୋଦ କୁମାର ପୃଷ୍ଟି, କ୍ୟାପିଟାଲ ହାଇସ୍କୁଲର ପ୍ରଧାନ ଶିକ୍ଷୟିତ୍ରୀ ଶ୍ରୀମତୀ ସୋନାମିକା ରାୟ, ବ୍ଲକ ଶିକ୍ଷା ଅଧିକାରୀ ସନ୍ତୋଷ କୁମାର ରାଉତ, ସେଣ୍ଟ ଜନ ଆମ୍ବୁଲାନ୍ସ ସହକାରୀ କମିଶନର ପୁରୁଷୋତ୍ତମ ବଳ, ସୂଚନା ଓ ଲୋକ ସମ୍ପର୍କ ବିଭାଗର ଜିଲ୍ଲା ସୂଚନା

ଅଧିକାରୀ ତାପସ ଦାସଙ୍କ ସମେତ ପୂର୍ତ୍ତ ପରିବହନ ଜନସ୍ୱାସ୍ଥ୍ୟ, ବିଡ଼ିଏ, ସିଆରପିଏଫ୍‌, ଟ୍ରାଫିକ ଏବଂ ରାଜଧାନୀର ବିଭିନ୍ନ ସ୍କୁଲ ଓ କଲେଜର ପ୍ରଧାନ ଶିକ୍ଷକ, ଶିକ୍ଷୟିତ୍ରୀ, ଅଧ୍ୟାପକ, ଅଧ୍ୟାପିକା ପ୍ରମୁଖ ଯୋଗ ଦେଇଥିଲେ । ଶେଷରେ ରାଜଧାନୀ ପ୍ରତିଷ୍ଠା ଦିବସ ପାଳନ କମିଟିର ଉପସଭାପତି ତଥା ବରିଷ୍ଠ ସାମ୍ବାଦିକ ପ୍ରଦ୍ୟୁମ୍ନ କୁମାର ମହାନ୍ତି ଧନ୍ୟବାଦ ଅର୍ପଣ କରିଥିଲେ । ଏହି ବୈଠକକୁ ଗୌର ଚନ୍ଦ୍ର ମହାପାତ୍ର, ପ୍ରଭାସ ରଞ୍ଜନ ଦାସ ଓ ସୁଧାଂଶୁ ଶେଖର ମହାନ୍ତି ପରିଚାଳନା କରିଥିଲେ ।