ପାରଳାଖେମୁଣ୍ଡି ବିଧାୟକଙ୍କ ବାସଭବନରେ ଲୁଟ୍ ; ହତ୍ୟା ଉଦ୍ୟମ ଅଭିଯୋଗରେ ମା, ପୁଅ ସମେତ ୩ ଜଣଙ୍କୁ ଗିରଫ

ଓଡ଼ିଶା ତାଜା ନ୍ୟୁଜ୍ (୨୭ ନଭେମ୍ବର ଶୁକ୍ରବାର )ପାରଳାଖେମୁଣ୍ଡି :- ପାରଳାଖେମୁଣ୍ଡି ବିଧାୟକଙ୍କ କେ ନାରାୟଣ ରାଓଙ୍କ ମାଉସୀଙ୍କୁ ହତ୍ୟା ଉଦ୍ୟମ ଘଟଣାରେ ସମ୍ପୃକ୍ତ ୩ଜଣକୁ ପାରଳାଖେମୁଣ୍ଡି ଓ ଆନ୍ଧ୍ରପ୍ରଦେଶର ପୁରୁଣାପାଟନମ୍ ରୁ ଗିରଫ କରିଛି । ଏନେଇ ପାରଳାଖେମୁଣ୍ଡି ଥାନାରେ ଅନୁ୍ଷ୍ଠିତ ହୋଇଥିବା ସାମ୍ବାଦିକ ସମ୍ମିଳନୀରେ SDPO ରାମକୃଷ୍ଣ ପତି ସୂଚନା ପ୍ରଦାନ କରିଛନ୍ତି । ଗିରଫ ହୋଇଥିବା ଅଭିଯୁକ୍ତ ମାନେ ହେଲେ ପାରଳାଖେମୁଣ୍ଡି ସହର ତେଲୁଗୁ ଶୁଣ୍ଢିସାହିର ଏସ. କାନ୍ତାମା(୪୦), ଏସ. ତେଜା ରାଓ ଓ ଅଙ୍କସାହିର ଜି ରୋହିତ (୧୯) । ସେମାନଙ୍କ ନିକଟରୁ ଚୋରୀ ଓ ହତ୍ୟା ଉଦ୍ୟମ ନିମନ୍ତେ ବ୍ୟବହାର କରିଥିବା ଗାଡି ନଂ-OD20-9571 TVS Appache , OD20-8446 Scooty ,୩ଟି ମୋବାଇଲ ଫୋନ୍ , ଶାଢୀ ଫଲ୍ସ ଓ ଘଟଣାସ୍ଥଳରୁ ଜୋତା ପୋଲିସ ଜବତ କରିଥିଲା । ପାରଳାଖେମୁଣ୍ଡି ବିଧାୟକଙ୍କ ଏର୍ଦଲା ସାହି ଘରେ ତାଙ୍କ ମାଉସୀ ରହନ୍ତି । ନଭେମ୍ବର ୨୫ତାରିଖ ସଂଧ୍ୟା ପ୍ରାୟ ୭ଘଣ୍ଟା ସମୟରେ ଅଭିଯୁକ୍ତ ତେଲୁଗୁ ଶୁଣ୍ଢିସାହିର ଏସ କାନ୍ତାମା(୪୦) ବିଧାୟକଙ୍କ ମାଉସୀଙ୍କ ପି ତାତମ୍ମାଙ୍କ ଠାରୁ ଧାର ବାବଦରେ ଆଣିଥିବା ୫ହଜାର ଟଙ୍କା ପରିଶୋଧ କରିବା ବାହାନାରେ ଚୋରୀ ଓ ହତ୍ୟା କରିବା ପାଇଁ ଯାଇଥିଲେ । ବିଧାୟକଙ୍କ ମାଉସୀ ଏକୁଟିଆ ଥିବା ଦେଖି ତେଲୁଗୁ ଶୁଣ୍ଢିସାହିର ଏସ କାନ୍ତାମା(୪୦) ତାଙ୍କ ପୁଅ ଏସ ତେଜାରାଓ ଓ ତାର ସାଙ୍ଗ ଅଙ୍କସାହିର ଜି ରୋହିତକୁ ଫୋନ୍ କରି ଡାକିଥିଲେ । ସେମାନେ ବିଧାୟକଙ୍କ ଘରେ ପଶି ପି ତାତମ୍ମାଙ୍କ ପାଟି ଓ ନାକକୁ ଏକ କପଡାରେ ଜୋରଜବରଦସ୍ତ ଧରି ହତ୍ୟାକରି ଚୋରୀ କରିବାକୁ ଉଦ୍ୟମ କରୁଥିଲେ ।

ସେହି ସମୟରେ ବିଧାୟକଙ୍କ ମାଉସୀ ପାଟି କରିବାରୁ ପଡୋଶୀ ଘର ଲୋକ ମାନେ ଆସିଥିବାରୁ ଅଭିଯୁକ୍ତ ମାନେ ଘଟଣାସ୍ଥଳରୁ ବାଇକରେ ଚାଲିଯାଇଥିଲେ । ଗୁରୁତର ଆହତ ହୋଇ ତଳେ ପଡିଥିବା ବିଧାୟକଙ୍କ ମାଉସୀଙ୍କୁ ଚିକିତ୍ସା ନିମନ୍ତେ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା ଏବଂ ସେଠାରୁ ତାଙ୍କୁ ଶ୍ରୀକାକୁଲମ ସ୍ଥିତ କିମ୍ସ ହସ୍ପିଟାଲକୁ ସ୍ଥାନାନ୍ତର କରାଯାଇଥିଲା । ବର୍ତ୍ତମାନ ତାଙ୍କର ସ୍ବାସ୍ଥ୍ୟବସ୍ଥା ଠିକ୍ ଅଛି । ଏନେଇ ବରିଷ୍ଠ ବିଜେପି ନେତା ନୃସିଂହ ଚରଣ ପଟନାୟକ ପାରଳାଖେମୁଣ୍ଡି ଥାନାରେ ଲିଖିତ ଅଭିଯୋଗ କରିଥିଲେ । ଉକ୍ତ ଅଭିଯୋଗକୁ ଭିତ୍ତିକରି ପାରଳାଖେମୁଣ୍ଡି ଥାନା କେସ୍ ନଂ-୨୯୮/୨୬-୧୧-୨୦୨୦ ଭାରତୀୟ ପିଙ୍ଗଳ କୋଡର ୪୫୨, ୩୦୭ ଓ ୩୪ ଦଫାରେ ମାମଲା ରୁଜୁ କରାଯାଇଥିଲା ଏବଂ ମାମଲାର ତଦନ୍ତ ଏସଆଇ ଅହଲ୍ୟା ମହାରଣା ତଦନ୍ତ କରୁଥିଲେ ବୋଲି ଏସ୍ଡିପିଓ ରାମକୃଷ୍ଣ ପତି ଗଣମାଧ୍ୟମକୁ ସୂଚନା ପ୍ରଦାନ କରିଛନ୍ତି । ସାମ୍ବାଦିକ ସମ୍ମିଳନୀରେ ପାରଳାଖେମୁଣ୍ଡି ଥାନାଧିକାରୀ ବିବେକାନନ୍ଦ ସ୍ବାଇଁ ଉପସ୍ଥିତ ଥିଲେ ।ପାରଳାଖେମୁଣ୍ଡି ପୋଲିସ ୪୮ଘଣ୍ଟା ଅଭିଯୁକ୍ତ ମାନଙ୍କୁ ଗିରଫ କରିବାରେ ସଫଳ ହୋଇଥିବାରୁ ବିଭିନ୍ନ ମହଲରେ ପ୍ରଶଂସା କରାଯାଉଛି l ( ରିପୋର୍ଟ – ଗରୁଡ଼ ଧ୍ୱଜ ଚୌଧୁରୀ )