ଓଡ଼ିଶା ତାଜା ନ୍ୟୁଜ (୨୮ ଅକ୍ଟୋବର ବୁଧବାର) ଢେଙ୍କାନାଳ :– ଆଜି ଜିଲ୍ଲାପାଳଙ୍କ କାର୍ଯ୍ୟାଳୟ ସ୍ଥିତ ସଦଭାବନା ଭିଡିଓ କନଫରେନ୍ସି ହଲରେ ଜିଲ୍ଲାପାଳ ଶ୍ରୀ ଭୁମେଶ ଚନ୍ଦ୍ର ବେହେରା ଜିଲ୍ଲାର ସମସ୍ତ ଉପ-ଜିଲ୍ଲାପାଳ, ବିଡ଼ିଓ, ତହସିଲଦାର, ପୌରାଞ୍ଚଳ ଏବଂ ବିଜ୍ଞାପିତ ଅଞ୍ଚଳର ନିର୍ବାହୀ ଅଧିକାରୀ ଓ ସିଡିପିଓ ମାନଙ୍କ ସହିତ ଜିଲ୍ଲାର କରୋନା ପରିସ୍ଥିତି ସମ୍ପର୍କରେ ଭିଡିଓ କନଫରେନ୍ସି ମାଧ୍ୟମରେ ଆଲୋଚନା କରି ସମୀକ୍ଷା ବୈଠକ କରିଛନ୍ତି।
କରୋନା ସଂକ୍ରମଣକୁ ହ୍ରାସ କରିବା ପାଇଁଁ ଆକ୍ରାନ୍ତଙ୍କ ଚିହ୍ନଟ ଉପରେ ଜିଲ୍ଲାପାଳ ଗୁରୁତ୍ୱାରୋପ କରିଛନ୍ତି। ସେଥିପାଇଁ ପ୍ରତ୍ୟେକ ବ୍ଲକରେ ସପ୍ତାହକୁ ଥରେ କିମ୍ବା ଦୁଇଥର କୋଭିଡ୍ ଟେଷ୍ଟ୍ ସେଣ୍ଟରରେ ଅଧିକରୁ ଅଧିକ ଆଣ୍ଟିଜେନ୍ ଟେଷ୍ଟ୍ କରାଯିବ। ବିଭିନ୍ନ କାର୍ଯ୍ୟାଳୟକୁ ଜନସାଧାରଣଙ୍କ ଆସୁଥିବାରୁ କାର୍ଯ୍ୟାଳୟ ଗୁଡିକରେ ଅଧିକ ଯତ୍ନଶୀଳ ଓ ସ୍ଵାସ୍ଥ୍ୟ ସଚେତନ ହେବାକୁ କର୍ମଚାରୀ ମାନଙ୍କୁ ପରାମର୍ଶ ଦିଆଯିବା ସହିତ କର୍ମଚାରୀ ମାନଙ୍କ ଆଣ୍ଟିଜେନ୍ ଟେଷ୍ଟ୍ ଓ ଆରଟିପିସିଆର୍ ଟେଷ୍ଟ୍ କରାଯିବାକୁ ପରାମର୍ଶ ଦିଆଯାଇଛି। ଚିହ୍ନଟ ପଜିଟିଭ୍ ମାନଙ୍କୁ ତତକାଳ ମେଡ଼ିସିନ୍ କିଟ୍ ପ୍ରଦାନ କରାଯିବା ସହ ହେଲ୍ପ୍ ଡେସ୍କ୍ ମାଧ୍ୟମରେ ଆକ୍ରାନ୍ତ ଓ ସେମାନଙ୍କ ପରିବାର ସଦସ୍ୟଙ୍କ ସ୍ଵାସ୍ଥ୍ୟ ସମ୍ପର୍କରେ ତଥ୍ୟ ସଂଗ୍ରହ କରାଯିବ।
ପ୍ରତ୍ୟେକ ଅଞ୍ଚଳର ଅଙ୍ଗନବାଡ଼ି କର୍ମୀ ଓ ସୁପରଭାଇଜର ମାନେ ଘରକୁ ଘର ବୁଲି ସମସ୍ତଙ୍କ ସ୍ଵାସ୍ଥ୍ୟଗତ ତଥ୍ୟ ସଂଗ୍ରହ କରି ସଂପୃକ୍ତ ସିଡିପିଓ ଏବଂ ଡିଏସଡବ୍ଲ୍ଯୂଓ ଙ୍କୁ ରିପୋର୍ଟ୍ ପ୍ରଦାନ କରିବେ। ଆଗକୁ ଆସୁଥିବା ପ୍ରସିଦ୍ଧ ଗଜଲକ୍ଷ୍ମୀ ପୂଜା ଓ ଅନ୍ୟ ପାର୍ବଣ ସମୟରେ ଜନ ସମାବେଶ ହେବାର ସମ୍ଭାବନା ଏବଂ ଶୀତରୁତୁରେ ଅଧିକ କରୋନା ସଂକ୍ରମଣ ଆଶଙ୍କା ଥିବାରୁ ସଂପୃକ୍ତ ଅଞ୍ଚଳର ଉପଜିଲ୍ଲାପାଳ, ବିଡ଼ିଓ, ତହସିଲଦାର, ନିର୍ବାହୀ ଅଧିକାରୀ ଓ ପୋଲିସ ଅଧିକାରୀ ମାନେ ମିଳିତ ଭାବେ ସାମାଜିକ ଦୂରତା ପାଳନ,ମାସ୍କ୍ ପରାଧାନକୁ କଡାକଡି ଭାବେ ଜାଞ୍ଚ କରିବାକୁ ଏବଂ ଏହାର ଅବମାନନା ସ୍ଥଳେ ଜୋରିମାନା ଆଦାୟ କରିବାକୁ ଜିଲ୍ଲାପାଳ ନିର୍ଦ୍ଦେଶ ଦେଇଛନ୍ତି।ରାପିଡ୍ ରେସ୍ପନ୍ସ୍ ଟିମ୍ ଡାକ୍ତର ଓ ସ୍ବାସ୍ଥ୍ୟକର୍ମୀ ମାନେ ବିଭିନ୍ନ ଅଞ୍ଚଳକୁ ଗସ୍ତକରି ଲୋକମାନଙ୍କ ସ୍ଵାସ୍ଥ୍ୟ ପରିକ୍ଷା କରି ଜିଲ୍ଲା ମୁଖ୍ୟ ଚିକିତ୍ସାଳୟ ଅଧିକାରୀ ଓ ଉପଜିଲ୍ଲାପାଳଙ୍କୁ ରିପୋର୍ଟ୍ ପ୍ରଦାନ କରିବାକୁ ଜିଲ୍ଲାପାଳ ପ୍ରକାଶ କରିଛନ୍ତି ।
ଶେଷରେ ବିଭିନ୍ନ ବିଭାଗରେ ପଡ଼ି ରହିଥିବା ଇ-ଅଭିଯୋଗ ଗୁଡ଼ିକର ଯଥାଶୀଘ୍ର ଜିଲାପାଳଙ୍କ କାର୍ଯ୍ୟାଳୟକୁ ଜଣାଇବା ପାଇଁ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଛନ୍ତି । ଏହି ବୈଠକର ପ୍ରାରମ୍ଭରେ ଜିଲ୍ଲା ଭୁବନ ବ୍ଲକ ନିର୍ବାହୀ ଅଧିକାରୀ ପ୍ରମୋଦ କୁମାର ନାୟକଙ୍କ ଅକାଳ ବିୟୋଗ ଯୋଗୁଁ ତାଙ୍କର ଆତ୍ମାର ସଦଗତି କାମନା କରି ଦୁଇ ମିନିଟ୍ ନିରବ ପ୍ରାର୍ଥନା କରାଯାଇଥିଲା । ଏହି ଭିଡିଓ କନଫରେନ୍ସି ସମୀକ୍ଷା ବୈଠକରେ ଅତିରିକ୍ତ ଜିଲ୍ଲାପାଳ ଶ୍ରୀମତୀ ସୌଦାମିନୀ ସେଠୀ, ଡେପୁଟି କଲେକ୍ଟର ଶ୍ରୀ ସିତାଂଶୁ ଶେଖର ଦାସ, ପ୍ରକଳ୍ପ ନିର୍ଦ୍ଦେଶକ ଶ୍ରୀ ନରୋତ୍ତମ ବେହେରା, ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଶ୍ରୀମତୀ ସୁଜାତାରାଣୀ ମିଶ୍ର, ପୌର ନିର୍ବାହୀ ଅଧିକାରୀ ଶ୍ରୀ ଅତନୁ କୁମାର ସାମନ୍ତ, ସଦର ତହସିଲଦାର ଶ୍ରୀ ଲକ୍ଷ୍ମୀଧର ରାଉତ,ଆପାତ୍ତକାଳୀନ ଅଧିକାରୀ ଶ୍ରୀ ଶଶାଙ୍କ ଶେଖର ମିଶ୍ର, ଜିଲ୍ଲା ସୂଚନା ଓ ଲୋକସମ୍ପର୍କ ଅଧିକାରୀ ଶ୍ରୀ ସୁଶାନ୍ତ କୁମାର ମିଶ୍ର ଏବଂ ଜିଲ୍ଲା ସମାଜ ମଙ୍ଗଳ ଅଧିକାରୀ ପ୍ରମୁଖ ଉପସ୍ଥିତ ଥିଲେ। (ରିପୋର୍ଟ୍ /ଅମର ରଞ୍ଜନ ଦାସ)