ବରିଷ୍ଠ ନାଗରିକ ସୁରକ୍ଷା ମଞ୍ଚର ଅଷ୍ଟମ ବାର୍ଷିକୋତ୍ସବ

ପୁରୀ (ଓଡ଼ିଶା ତାଜା ନ୍ୟୁଜ୍) :- ପୁରୀଜିଲ୍ଲା ବରିଷ୍ଠ ନାଗରିକ ସୁରକ୍ଷା ମଞ୍ଚ ପକ୍ଷରୁ ରବିବାର ପୂର୍ବାହ୍ନରେ ସର୍ବୋଦୟ ନଗର ସ୍ଥିତ ଶିରିଡି ସାଇ ମନ୍ଦିର ପରିସରରେ ଅଷ୍ଟମ ବାର୍ଷିକୋତ୍ସବ ଅନୁଷ୍ଠିତ ହୋଇଯାଇଛି । ଏହି ଉତ୍ସବରେ ମୁଖ୍ଯ ଅତିଥି ଭାବେ ରାଜ୍ଯସଭା ସାଂସଦ ଶୁଭାଶିଷ ଖୁଣ୍ଟିଆ ମହାପ୍ରଭୁ ଶ୍ରୀଜଗନ୍ନାଥଙ୍କ ଫଟୋଚିତ୍ରରେ ପୁଷ୍ପ ମାଲ୍ୟାର୍ପଣ ସହ ପ୍ରଦୀପ ପ୍ରଜ୍ଜ୍ୱଳନ କରି ଆନୁଷ୍ଠାନିକ ଭାବେ ଉଦଘାଟନ କରିଥିଲେ । ଶ୍ରୀଖୁଣ୍ଟିଆ କହିଲେ ବରିଷ୍ଠ ନାଗରିକ ମାନଙ୍କୁ ସବୁ ସୁବିଧା ଯୋଗାଇ ଦେବା ଆମ୍ଭମାନଙ୍କ କର୍ତ୍ତବ୍ୟ । ସେମାନେ ସୁସ୍ଥ ଓ ନିରୋଗ ରହିବା ସହ ଯୁବ ସମାଜକୁ ଦିଗଦର୍ଶନ ଦେବା ପାଇଁ ପରାମର୍ଶ ଦେଇଥିଲେ ।

ଉତ୍ସବରେ ଭୀମସେନ ପଣ୍ଡା ସଭାପତିତ୍ବ କରିଥିଲେ । ମୁଖ୍ଯବକ୍ତା ଭାବେ ଅବସରପ୍ରାପ୍ତ ପ୍ରଶାସକ ବିନୋଦ କୁମାର ପଣ୍ଡା ଯୋଗଦେଇ ବରିଷ୍ଠ ନାଗରିକଙ୍କ ବିଭିନ୍ନ ସମସ୍ୟା ସମ୍ପର୍କରେ ଆଲୋକପାତ କରିଥିଲେ । ଅନୁଷ୍ଠାନର ସାଧାରଣ ସମ୍ପାଦକ କୃତ୍ତିବାସ କାମଲା ସମ୍ପାଦକୀୟ ବିବରଣୀ ପାଠ କରିବା ସହ ଅନୁଷ୍ଠାନର ଅଭାବ ଅସୁବିଧା ସମ୍ପର୍କରେ ମତବ୍ୟକ୍ତ କରିଥିଲେ । ୨୦୧୭ ମସିହାରୁ ଏହି ଅନୁଷ୍ଠାନ ଅବକାଶ ଲେନ ସ୍ଥିତ ମଙ୍ଗଳ ମଣ୍ଡପ ଠାରେ ଆରମ୍ଭ ହୋଇଥିଲା । ଆଜି ପର୍ଯ୍ୟନ୍ତ ୩୮୦ ଜଣ ବରିଷ୍ଠ ସଭ୍ୟ ଓ ସଭ୍ଯା ରହିଛନ୍ତି ।

ଅନୁଷ୍ଠାନ ପକ୍ଷରୁ ସୋମ,ବୁଧ ଓ ଶୁକ୍ରବାର ଅପରାହ୍ନ ୫ଟାରୁ ସଂଧ୍ଯା ୭ଟା ପର୍ଯ୍ୟନ୍ତ ସମସ୍ତଙ୍କୁ ଶଶୀକଳା ଧାନୁକା ଆରୋଗ୍ଯମ ଏବଂ ବରିଷ୍ଠ ନାଗରିକ ସୁରକ୍ଷା ମଞ୍ଚ ମିଳିତ ଆନୁକୂଲ୍ୟରେ ସସ୍ମିତା ଦାଶ ଓ ଡାକ୍ତର ଦୀପକ କୁମାର ମିଶ୍ରଙ୍କ ତତ୍ତ୍ବାବଧାନରେ ମାଗଣା ହୋମିଓପାଥିକ ଚିକିତ୍ସା, ପରାମର୍ଶ ଓ ଔଷଧ ବିତରଣ କରାଯାଉଅଛି । ପ୍ରଶାସନ ସହ ସହଯୋଗ ଓ ରଥଯାତ୍ରାରେ ସେବାକାର୍ଯ୍ୟ, ପାନୀୟଜଳ ବଣ୍ଟନ ଓ ଶୁଖିଲା ଖାଦ୍ଯ ବଣ୍ଟନ କରାଯାଉଛି । ଏହି ଅବସରରରେ ଅନୁଷ୍ଠାନର ନୂତନ କର୍ମକର୍ତ୍ତା ମନୋନୀତ ହୋଇ ସଭ୍ଯ ସଭ୍ଯା ମାନଙ୍କ ଦ୍ବାରା ସମର୍ଥନ ଦିଆଯାଇଥିଲା ।

ଏଥିରେ ସଭାପତି ଭାବେ କାଶୀନାଥ ମିଶ୍ର, କାର୍ଯ୍ଯକାରୀ ସଭାପତି ରବିନାରାୟଣ ପ୍ରହରାଜ, ଉପସଭାପତି ପ୍ରମୋଦ କୁମାର ମିଶ୍ର, ସାଧାରଣ ସମ୍ପାଦକ କୃତ୍ତିବାସ କାମଲା, ସହ ସମ୍ପାଦକ ଗୋପୀନାଥ ମହାନ୍ତି,କୋଷାଧ୍ୟକ୍ଷ ଭାବେ ଅଶୋକ କୁମାର ପଟ୍ଟନାୟକ ମନୋନୀତ ହୋଇଥିଲେ । କାର୍ଯ୍ୟକାରୀ ସଭ୍ୟ ଭାବେ ସଂଗ୍ରାମ କେଶରୀ ମିଶ୍ର, ତ୍ରିଲୋଚନ ନନ୍ଦ, ପ୍ରଦେଶ କୁମାର ଜେନା, ସୁଧାକର ପ୍ରଧାନ, ପ୍ରଫୁଲ୍ଲ କୁମାର ସାହୁ, ରାଜକିଶୋର ସାସମଲ, ବିପିନ ବିହାରୀ ତ୍ରିପାଠୀ ମନୋନୀତ ହୋଇଥିଲେ । ଏଥିସହ କୋଣାର୍କ ଶାଖାର ସଭାପତି ଶକ୍ତିଦେବ ଶତପଥୀ ଉତ୍ସବରେ ଯୋଗ ଦେଇଥିଲେ।

ବରିଷ୍ଠ ନାଗରିକ ମାନଙ୍କୁ ଶ୍ରୀମନ୍ଦିରରେ ସୁଖଦ ଦର୍ଶନ ବ୍ଯବସ୍ଥା, ମେଡିକାଲ ସୁବିଧା ସୁଯୋଗ ସହ ଟେନ ଓ ବସରେ ସିଟ ସଂରକ୍ଷଣ ସହ ରିହାତି ଯୋଗାଇ ଦେବାକୁ ଦାବି ହୋଇଥିଲା । ଅନୁଷ୍ଠାନର ନିଜସ୍ବ ଜାଗା ଓ ଗୃହ ନିର୍ମାଣ ପାଇଁ କର୍ମକର୍ତ୍ତା ମାନେ ରାଜ୍ଯସଭା ସାଂସଦ ନିକଟରେ ଦାବି ଉପସ୍ଥାପନ କରିଥିଲେ । ସ୍ବର୍ଗବାସୀ ହୋଇଯାଇଥିବା ଅନୁଷ୍ଠାନର ସଭ୍ଯ ସଭ୍ଯା ମାନଙ୍କ ଉଦ୍ଦେଶ୍ଯରେ ଦୁଇ ମିନିଟ ନୀରବ ପ୍ରାର୍ଥନା କରାଯାଇଥିଲା।

ଏହି ଅବସରରେ ଆଜୀବନ ସଭ୍ଯ ମାନଙ୍କୁ ଅତିଥିମାନଙ୍କ ଦ୍ବାରା ମାନପତ୍ର ଉପଢୌକନ ସହ ପୁଷ୍ପଗୁଚ୍ଛ ପ୍ରଦାନ କରାଯାଇ ସମ୍ବର୍ଦ୍ଧିତ କରାଯାଇଥିଲା । ଡଃ ମନୋଜ କୁମାର ସାମନ୍ତରାୟ ଅତିଥିମାନଙ୍କ ପରିଚୟ ପ୍ରଦାନ କରିବା ସହ କାର୍ଯ୍ଯକ୍ରମ ପରିଚାଳନା ଓ ଶେଷରେ ଧନ୍ୟବାଦ ଅର୍ପଣ କରିଥିଲେ । ଶତାଧିକ ବରିଷ୍ଠ ସଭ୍ଯ ସଭ୍ଯା ନାଗରିକ କାର୍ଯ୍ଯକ୍ରମରେ ଉପସ୍ଥିତ ରହିବା ସହ ଶିରିଡି ସାଇବାବାଙ୍କ ପ୍ରସାଦ ସେବନ କରିଥିଲେ ।