ପ୍ରାଥମିକ କୃଷି ସମବାୟ ସମିତି ଗୁଡ଼ିକରେ ଫସଲ ଅମଳ ପରବର୍ତ୍ତୀ ପରିଚାଳନା ନିମନ୍ତେ ଭିତ୍ତିଭୂମି ପ୍ରତିଷ୍ଠା କରିବାର ଆବଶ୍ୟକତା ରହିଛିି : ମନ୍ତ୍ରୀ ଶ୍ରୀ ସ୍ୱାଇଁ ପ୍ରଥମ ପର୍ଯ୍ୟାୟରେ ୧୦୦ଟି ପ୍ୟାକ୍ସକୁ ବହୁମୁଖୀ ସେବାକେନ୍ଦ୍ରରେ ପରିଣତ କରାଯିବ କେନ୍ଦ୍ରୀୟ ଯୋଜନା କୃଷି ଭିତ୍ତିଭୂମି ପାଣ୍ଠିରୁ ନାବାର୍ଡ ପକ୍ଷରୁ ୨୬ କୋଟି ଟଙ୍କା ଋଣ ମଂଜୁର
ଓଡିଶା ତାଜା ନ୍ୟୁଜ୍ ( ୧୨ ଅଗଷ୍ଟ ବୁଧବାର ) ଭୁବନେଶ୍ୱର :- ଫସଲ ଅମଳ ପରବର୍ତ୍ତୀ କ୍ଷତିକୁ ହ୍ରାସ କରିବା ଏବଂ କୃଷିଜାତ ଦ୍ରବ୍ୟର ଉପଯୁକ୍ତ ମୂଲ୍ୟ ଯେପରି ଚାଷୀମାନେ ପାଇପାରିବେ ସେଥିନିମନ୍ତେ ପ୍ରାଥମିକ କୃଷି ସମବାୟ ସମିତିଗୁଡ଼ିକରେ ଫସଲ ଅମଳ ପରବର୍ତ୍ତୀ ପରିଚାଳନା ନିମନ୍ତେ ଭିତ୍ତିଭୂମି ପ୍ରତିଷ୍ଠା କରିବାର ଆବଶ୍ୟକତା ରହିଛି । ଏହା ଦ୍ୱାରା ରାଜ୍ୟର କୃଷକମାନଙ୍କର ଉତ୍ପାଦିକତା ବଢ଼ିବା ସହିତ ସେମାନଙ୍କ ଆୟ ବୃଦ୍ଧି ହୋଇପାରିବ ଏବଂ ପ୍ରାକୃତିକ ବିପର୍ଯ୍ୟୟଜନିତ କ୍ଷୟକ୍ଷତିକୁ ମଧ୍ୟ କମ କରାଯାଇପାରିବ ବୋଲି ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ, ସମବାୟ ମନ୍ତ୍ରୀ ଶ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ କହିଛନ୍ତି । ଏଥିନିମନ୍ତେ ପ୍ୟାକ୍ସଗୁଡ଼ିକରେ ଚାଷୀମାନଙ୍କୁ ବିଭିନ୍ନ ଫସଲ ଅମଳ ପରବର୍ତ୍ତୀ ସୁବିଧା ଯୋଗାଇଦେବା ଦିଗରେ ଭିତ୍ତିଭୂମି ପ୍ରତିଷ୍ଠା କରିବା ପାଇଁ ନାବାର୍ଡ ପକ୍ଷରୁ କେନ୍ଦ୍ର ଯୋଜନା କୃଷି ଭିତ୍ତିଭୂମି ପାଣ୍ଠି ଅନ୍ତର୍ଗତ ସ୍ପେସିଆଲ୍ ରିଫାଇନାନ୍ସ ଯୋଜନାରେ ଋଣ ପ୍ରଦାନ କରାଯାଇଛି । ଏହି ଋଣର ମଂଜୁରିପତ୍ର ଆଜି ମନ୍ତ୍ରୀ ଶ୍ରୀ ସ୍ୱାଇଁ ଓଡ଼ିଶା ରାଜ୍ୟ ସମବାୟ ବ୍ୟାଙ୍କର ପରିଚାଳନା ନିର୍ଦ୍ଦେଶକ ଶ୍ରୀ ଗୋପବନ୍ଧୁ ଶତପଥୀଙ୍କୁ ବ୍ୟାଙ୍କର ମୁଖ୍ୟ କାର୍ଯ୍ୟାଳୟରେ ହସ୍ତାନ୍ତର କରିଥିଲେ । ପ୍ରଥମ ପର୍ଯ୍ୟାୟରେ ରାଜ୍ୟର ୧୦୦ଟି ପ୍ୟାକ୍ସଗୁଡ଼ିକରେ ଫସଲ ଅମଳ ପରବର୍ତ୍ତୀ ପରିଚାଳନା ନିମନ୍ତେ ଭିତ୍ତିଭୂମି ପ୍ରତିଷ୍ଠା କରି ଏଗୁଡ଼ିକୁ ବହୁମୁଖୀ ସେବାକେନ୍ଦ୍ରରେ ପରିଣତ କରାଯିବ ଓ ଏଥି ନିମନ୍ତେ ନାବାର୍ଡ ପକ୍ଷରୁ ୨୬ କୋଟିରୁ ଊଦ୍ଧ୍ୱର୍ ଟଙ୍କାର ଋଣ ରିହାତି ହାରରେ ଯୋଗାଇ ଦିଆଯିବ ।
ଆଜି ଓଡ଼ିଶା ରାଜ୍ୟ ସମବାୟ ବ୍ୟାଙ୍କ ପରିସରରେ ଆୟୋଜିତ ଏକ ଭିଡିଓ କନ୍ଫରେନ୍ସିଂ ବୈଠକରେ ମନ୍ତ୍ରୀ ଶ୍ରୀ ସ୍ୱାଇଁ ଜିଲ୍ଲା କେନ୍ଦ୍ରୀୟ ସମବାୟ ବ୍ୟାଙ୍କଗୁଡ଼ିକର ମୁଖ୍ୟ କାର୍ଯ୍ୟନିର୍ବାହୀ ଏବଂ ଡିଆର୍ସିଏସ୍ ଓ ଏଆର୍ସିଏସ୍ମାନଙ୍କ ସହିତ ଆଲୋଚନା କରି ବିିଭିନ୍ନ ଜିଲ୍ଲାରେ କୃଷକ ମାନଙ୍କର ଆବଶ୍ୟକତା ଅନୁଯାୟୀ ଫସଲ ଅମଳ ପରବର୍ତ୍ତୀ ପରିଚାଳନା ନିମନ୍ତେ କୃଷି ଭିତ୍ତିଭୂମି ପ୍ରତିଷ୍ଠା କରି ପ୍ୟାକ୍ସ ମାଧ୍ୟମରେ ଚାଷୀମାନଙ୍କୁ ବିଭିନ୍ନ ସେବା ଯୋଗାଇଦେବା ପାଇଁ ନିର୍ଦ୍ଦେଶ ଦେଇଥିଲେ । ସୂଚନାଯୋଗ୍ୟ ଯେ ପ୍ରଥମ ପର୍ଯ୍ୟାୟର ରାଜ୍ୟର ୧୦୦ ଗୋଟି ପ୍ୟାକ୍ସରେ ଆବଶ୍ୟକତା ଅନୁଯାୟୀ ଗୋଦାମଗୃହ, କୃଷିଜାତ ଦ୍ରବ୍ୟର ପ୍ରକ୍ରିୟାକରଣ, ମାର୍କେଟ କମ୍ପ୍ଲେକ୍ସ, ଓୟାର ହାଉସ୍, ୱେ-ବ୍ରିଜ୍, ଇ- ମାର୍କେଟିଂ ପ୍ଲାଟଫର୍ମ, ପ୍ୟାକେଜିଂ ସୁବିଧା, ଆଗ୍ରୋ ଷ୍ଟୋରେଜ୍ କେନ୍ଦ୍ର, ଗ୍ରାମ୍ୟ ଗୋଦାମ ଗୃହ, କୃଷିଜାତ ଦ୍ରବ୍ୟର କୋଲଡ୍ ଚେନ୍ ଏବଂ କୃଷିଜାତ ଦ୍ରବ୍ୟର ସପ୍ଲାୟ ଚେନ୍ ଆଦି ନିର୍ମାଣ କରାଯିବ । ଏହା ଦ୍ୱାରା ଗୋଷ୍ଠୀ କୃଷି ଭିତ୍ତିଭୂମି ପ୍ରତିଷ୍ଠା କରାଯାଇ ପ୍ରାଥମିକ କୃଷି ସେବା ସମିତିଗୁଡ଼ିକୁ ଅଧିକ ସୁଦୃଢ଼ ଓ ପୋଷଣୀୟ କରାଯାଇପାରିବ ଏବଂ ଚାଷୀମାନଙ୍କୁ ବିଭିନ୍ନ ସେବା ଯୋଗାଇ ଦିଆଯାଇପାରିବ ବୋଲି ମନ୍ତ୍ରୀ ଶ୍ରୀ ସ୍ୱାଇଁ କହିଛନ୍ତି । ଏହି ଅବସରରେ ନାବାର୍ଡର ସାଧାରଣ ପରିଚାଳକ ଶ୍ରୀ ଏ.ପି.ଦାସ, ଅନ୍ୟତମ ସାଧାରଣ ପରିଚାଳକ, ନାବାର୍ଡ ଶ୍ରୀ ବି. ନାଗେଶ୍ୱର ରାଓ, ଡି.ଜି.ଏମ୍ ନାବାର୍ଡ ଶ୍ରୀ ଭି.ବାଲସୁବ୍ରମଣ୍ୟମ୍ ରେଜିଷ୍ଟାର, କୋଅପରେଟିଭ୍ ସୋସାଇଟି ଶ୍ରୀ ଭରତ ଚନ୍ଦ୍ର ବେହେରା ପ୍ରମୁଖ ଉପସ୍ଥିତ ଥିଲେ ।
