ଓଡିଶା ତାଜା ନ୍ୟୁଜ୍ (୧୧ ଅଗଷ୍ଟ ମଙ୍ଗଳବାର ) ପାରଳାଖେମୁଣ୍ଡି :- ଗଜପତି ଜିଲା ଅନ୍ତର୍ଗତ ରାୟଗଡ ବ୍ଲକରେ ଏକ ଅଭାବନିୟ ଘଟଣା ଘଟି ଯାଇଛି । କରୋନାରେ ଆକ୍ରାନ୍ତ ହୋଇ ଜଣେ ବିଧବା ମହିଳାଙ୍କ ମୃତ୍ୟୁ ଘଟିଛି । ଏହି ବିଧବା ମାଁଆଙ୍କ ଦ୍ୱାରା ପାଳିତ ହୋଇ ଆସୁଥିବା ୨ଜଣ ଭିନ୍ନକ୍ଷମ ପୁଅ ଓ ଝିଅ ଅନାଥ ହୋଇପଡିଛନ୍ତି । ଘଟଣାରୁ ପ୍ରକାଶ,୪ ବର୍ଷ ପୁର୍ବେ ତାଙ୍କ ସ୍ୱାମୀଙ୍କ ମୃତ୍ୟୁ ପରେ ଭିନ୍ନକ୍ଷମ ୨ ପିଲା ଓ ଝିଅକୁ ଧରି ଏହି ମାଁ ଜଣକ ବ୍ୟବସାୟ କରି ପେଟପାଟଣା କରୁଥିଲେ । ମାତ୍ର ତାଙ୍କର କରୋନା ସଂକ୍ରମଣ ଯୋଗୁଁ ବର୍ତ୍ତମାନ ମୃତ୍ୟୁ ଘଟିଛି । ଏଭଳି ଦୁଖଃଦ ଘଟଣା ରାୟଗଡ ବ୍ଲକର ସଦରମହକୁମାରେ ଦେଖିବାକୁ ମିଳିଛି ।
ଏଠାରେ ସୂଚନା ଯୋଗ୍ୟ ଯେ, ରାୟଗଡ ବ୍ଲକ ସଦର ମହକୁମା ରାୟଗଡ଼ ଓଡ଼ିଆ ସାହିର ଝୁନୁ ସୁବୁଧି (୫୧) ଶୁକ୍ରବାର କୋଭିଡ୍ ହଷ୍ପିଟାରେ ଚିକିତ୍ସାଦିନ ଅବସ୍ଥାରେ ଦେହାନ୍ତ ହୋଇଥିଲେ । ମିଳିଥିବା ସୂଚନା ଅନୁସାରେ ଗତ ଜୁଲାଇ ୨୫ ତାରିଖରେ ତାଙ୍କର ସ୍ୱାସ୍ଥ୍ୟ ଅବସ୍ଥା ଜନିତ ସମସ୍ୟା ଦେଖା ଦେବାରୁ ତାଙ୍କୁ ସାଙ୍ଗେ ସାଙ୍ଗେ ରାୟଗଡ ମେଡିକାଲକୁ ନିଆଯାଇଥିଲା, ସେଠାରେ ତାଙ୍କର ଚିକିତ୍ସାଧିନ ଅବସ୍ଥାରେ ମୃତ୍ୟୁ ଘଟିଥିବା ସୂଚନା ମିଳିଛି । ତାଙ୍କ ମୃତ୍ୟୁ ପରେ ତାଙ୍କର ୨ ଭିନ୍ନକ୍ଷମ ପୁଅ ଝିଅ ବର୍ତ୍ତମାନ ଅନାଥ ଅବସ୍ଥାରେ ରହିଥିବା ବେଳେ ତାଙ୍କୁ ରାଜ୍ୟ ସରକାର ଓ ଜିଲ୍ଲା ପ୍ରଶାସନ ପକ୍ଷରୁ ସହାୟତା ଯୋଗାଇ ଦେବାପାଇଁ ଅଞ୍ଚଳବାସୀ ଦାବୀ କରିଛନ୍ତି । (ରିପୋର୍ଟ -ଗରୁଡ଼ ଧ୍ଵଜ ଚୌଧୁରୀ )
