୨୪ ଜାନୁଆରୀ ୨୦୨୪ ( ଓଡିଶା ତାଜା ନିୟୁଜ ) ଶେରଗଡ଼/ହିଞ୍ଜିଳିକାଟୁ :- ଗ୍ରାମାଞ୍ଚଳ ଭିତ୍ତିଭୂମି ବିକାଶ ରାଜ୍ୟ ସରକାରଙ୍କ ପ୍ରମୁଖ ଲକ୍ଷ୍ୟ ରହିଛି। ରୂପାନ୍ତରଣ ଉପକ୍ରମ ଜରିଆରେ ଗ୍ରାମାଞ୍ଚଳ ଲୋକଙ୍କ ସେବା ତ୍ୱରାନ୍ୱିତ ସକାଶେ ବହୁବିଧ ଉନ୍ନୟନ ପ୍ରକଳ୍ପ ବାବଦରେ ରାଜ୍ୟ ସରକାର ପର୍ଯ୍ୟାପ୍ତ ପରିମାଣର ଅର୍ଥ ବିନିଯୋଗ କରିଛନ୍ତି। ପଞ୍ଚାୟତ ଭିତ୍ତିଭୂମିକୁ ସୁଦୃଢ଼ କରିବା ସହିତ ବିକାଶ ପ୍ରକ୍ରିୟାକୁ ସୁବ୍ୟବସ୍ଥିତ ଏବଂ ସଫଳ ରୂପାୟନ ସକାଶେ ସରକାରଙ୍କ ନିରନ୍ତର ପ୍ରୟାସ ଜାରି ରହିଛି। ରାଜ୍ୟ ସରକାରଙ୍କ ବିଭିନ୍ନ ଲୋକହିତକର ଯୋଜନାରେ ସାମିଲ ଥିବା ବ୍ୟକ୍ତିଗତ ଏଵଂ ଗୋଷ୍ଠିଗତ ଉନ୍ନୟନ ପ୍ରକଳ୍ପ ଗୁଡିକ ଯେପରି ଲୋକଙ୍କ ହିତ ସାଧନ ଦିଗରେ ସଦୁପଯୋଗ ହେବ ସେ ଦିଗରେ ମଧ୍ଯ ଗୁରୁତ୍ଵ ପ୍ରଦାନ କରାଯାଉଛି। କିନ୍ତୁ ପ୍ରଶାସନର ଢିଲାପଣର ସୁଯୋଗ ହେଉ କିମ୍ବା ରାଜନୈତିକ ନେତୃବୃନ୍ଦଙ୍କ ଛତ୍ରଛାୟାରେ ରହି ସର୍ବସାଧାରଣଙ୍କ ବ୍ଯବହାର ଉପଯୋଗୀ ଗୃହକୁ ଜଣେ ନିର୍ଦ୍ଧିଷ୍ଟ ବ୍ୟକ୍ତି କିଭଳି ଭାବେ ଦଖଲରେ ରଖି ନିଜ ପତିଆରା ପ୍ରଦର୍ଶନ କରିଛନ୍ତି ତାହା ଏବେ ପଞ୍ଚାୟତରେ ଚର୍ଚ୍ଚାର ପ୍ରସଙ୍ଗ ପାଲଟିଛି।
ଘଟଣାଟି କିନ୍ତୁ ଉନ୍ନୟନ ପ୍ରକଳ୍ପରେ ତୁଣ୍ଡି ବାନ୍ଧିବା ଭଳି ମନେ ହେଉଥିଲେ ମଧ୍ୟ ଏଭଳି ଅବ୍ୟବସ୍ଥା ଯୋଗୁଁ ପ୍ରଶାସନ ଉପରେ ଲୋକଙ୍କ ଭରସା ତୁଟି ଯାଉଥିବା ଭଳି ପରିଲକ୍ଷିତ ହୋଇଛି। ଏଭଳି ବିଶୃଙ୍ଖଳିତ କାର୍ଯ୍ୟ ଉପରେ ଆପତ୍ତି ଓ ଅଶାନ୍ତି ପ୍ରକାଶ କରି ସାହି ବାସିନ୍ଦା ସମ୍ପୃକ୍ତ ବ୍ଲକର ବିଡ଼ିଓଙ୍କୁ ଫେରାଦ ହୋଇଛନ୍ତି। ସୂଚନା ମୁତାବକ ଶେରଗଡ଼ ବ୍ଲକ୍ ପିତଳ ପଞ୍ଚାୟତ ସନ୍ତୋଷପୁର ପାତ୍ରସାହି ଠାରେ ରାଜ୍ୟ ସରକାରଙ୍କ ଆମ ଗାଁ ଆମ ବିକାଶ ଯୋଜନାରେ ଏକ କୋଠଘର ନିର୍ମିତ ହୋଇଛି। ଲକ୍ଷ ଲକ୍ଷ ଟଙ୍କା ସରକାରୀ ଅନୁଦାନ ବ୍ୟୟରେ ନିର୍ମାଣ ହୋଇଥିବା ଏହି କୋଠଘରଟିକୁ ଗ୍ରାମର ଜଣେ ପ୍ରଭାବଶାଳୀ ବ୍ୟକ୍ତି ଦୀର୍ଘ ଦିନ ଧରି ନିଜ ଅକ୍ତିଆରରେ ରଖିଥିବା ଜଣାପଡ଼ିଛି। ସାମୁହିକ ବ୍ୟବହାର ଲାଗି ଉଦ୍ଧିଷ୍ଟ ଉକ୍ତ କୋଠାଘରେ ବିଭିନ୍ନ ପ୍ରକାରର ଜିନିଷପତ୍ର ମହଜୁଦ ରଖି ବ୍ୟକ୍ତିଗତ ଭାବେ ତାହାକୁ ବ୍ୟବହାର କରୁଥିବା ମଧ୍ଯ ଅଭିଯୋଗ ହୋଇଛି। ଫଳରେ ପାତ୍ରସାହି ବାସିନ୍ଦାଙ୍କ କୌଣସି ଉତ୍ସବ କିମ୍ୱା ସାମୁହିକ କାର୍ଯ୍ୟ ସମ୍ପାଦନ କରିବାରେ ସମସ୍ୟା ସୃଷ୍ଟି ହୋଇଛି ।
ଏହାକୁ ନେଇ ସାଧାରଣରେ ଜନ ଅସନ୍ତୋଷ ପ୍ରକାଶ ପାଉଛି।ସରକାରୀ ଅନୁଦାନରେ ନିର୍ମିତ କୋଠଘରକୁ ନିଜ ଅକ୍ତିଆରରେ ରଖିବା ଫଳରେ ସରକାରଙ୍କ ମହତ ଉଦ୍ଦେଶ୍ୟ ବାସ୍ତବ କ୍ଷେତ୍ରରେ ଲୋକଙ୍କ ସେବାରେ ଆସୁ ନ ଥିବା ଭଳି ପରିସ୍ଥିତ ଦେଖାଦେଇଛି। ଏଭଳି ଚରମ ଅବ୍ୟବସ୍ଥା ଏଵଂ ସରକାରୀ ନିୟମରେ ବ୍ୟତିକ୍ରମ ଓ ଖୋଲାଖୋଲି ଉଲ୍ଲଂଘନ ଉପରେ ଅସନ୍ତୋଷ ପ୍ରକାଶ କରି ପାତ୍ର ସାହିବାସିନ୍ଦା ପିଙ୍କୁ ପରିଡା, ଭଗବାନ ଦଳାଇ, ଭାଲୁ ପ୍ରଧାନ, ଭୋଳାନାଥ ପରିଡା, ଆନନ୍ଦ ସେଠୀ, ପାଣ୍ଡବ ମହାପାତ୍ର, ଭାବଗ୍ରାହୀ ପରିଡା, ଗୁଣ୍ଡିଚା ପ୍ରଧାନ ଓ ପ୍ରଶାନ୍ତ କୁମାର ଦାଶ ପ୍ରମୁଖ ଶେରଗଡ଼ ବିଡ଼ିଓ ଶିବାଶିଷ ବରାଳଙ୍କ ନିକଟରେ ଫେରାଦ ହୋଇଛନ୍ତି। ଏଭଳି ବିବାଦୀୟ ପ୍ରସଙ୍ଗ ଉପରେ ଆବଶ୍ୟକୀୟ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହିତ ବ୍ୟକ୍ତିଗତ ଦଖଲରୁ ସାହି କୋଠଘରକୁ ଉଦ୍ଧାର କରି ସର୍ବ ସାଧାରଣଙ୍କ ବ୍ୟବହାର୍ଯ୍ୟ ନିମନ୍ତେ ଅନୁମତି ପ୍ରଦାନ କରିବା ପାଇଁ ସେମାନେ ବିଡିଓଙ୍କୁ ନିବେଦନ କରିଛନ୍ତି।
