୩ ସେପ୍ଟେମ୍ବର ୨୦୨୩ (ଓଡ଼ିଶା ତାଜା ନ୍ୟୁଜ ) କଟକ :-> ସେପ୍ଟେମ୍ବର ୧୯ ରେ ଅନୁଷ୍ଠିତ ହେବ ଗଣେଶ ପୂଜା । ଏହି ପୂଜାକୁ ଶାନ୍ତି ଶୃଙ୍ଖଳାର ସହିତ କିପରି ପାଳନ କରାଯିବ , ସେନେଇ ଆଜି ମଧ୍ୟାହ୍ନରେ ସିଏମସି ୫୮ ନମ୍ବର ୱାର୍ଡ ପ୍ରତାପନଗରୀ ସ୍ଥିତ ମା, ଧାକୁଲେଇଙ୍କ ପୀଠରେ କମିଶନରେଟ ପୋଲିସ କଟକ ସଦର ଥାନା ପକ୍ଷରୁ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ କଟକ ସଦର ଥାନାର ଆଇଆଇସି ରଶ୍ମିରଞ୍ଜନ ମହାପାତ୍ର ଅଧ୍ୟକ୍ଷତା କରିଥିଲେ । ଆୟୋଜିତ ପ୍ରସ୍ତୁତି ବୈଠକରେ କଟକର ଅତିରିକ୍ତ ଡିସିପି ଅନିଲ କୁମାର ମିଶ୍ର , ଯୋନ -୪- ଏସିପି ଚନ୍ଦନ ଘଡେଇ, ଅତିରିକ୍ତ ଆଇଆଇସି ରୀନା ମିଶ୍ର , ଜାତୀୟ ରାଜପଥ ଟ୍ରାଫିକ ଥାନା ଫୁଲନଖରାର ଆଇଆଇସି ମନୋଜ କୁମାର ବୁଲୁଙ୍ଗୁ ଯୋଗ ଦେଇଥିଲେ ।
ଚଳିତ ବର୍ଷ ବାବା ଗଣନାଙ୍କ ପୂଜା ଏବଂ ଭଷାଣୀ ଉତ୍ସବକୁ ଶାନ୍ତି ଶୃଙ୍ଖଳାର ସହ ଶେଷକରିବା ପାଇଁ , ବୈଠକରେ ଉପସ୍ଥିତ ଥିବା ପୂଜା କମିଟିର ସମସ୍ତ କର୍ମକର୍ତ୍ତା, ବୁଦ୍ଧିଜୀବି , ଗ୍ରାମବାସୀଙ୍କୁ କମିଶନରେଟ ପୋଲିସର ଗାଇଡ଼ ଲାଇନ ସଂପର୍କରେ ସୂଚନା ଦେଇଥିଲେ । ସେହିପରି ତିନୋଟି ରବିବାର ଗଣେଶ ମୂର୍ତ୍ତି ବିଷର୍ଜନ କରାଯିବ । ପ୍ରଥମ ଭଷାଣୀ ଉତ୍ସବ ପ୍ଟେମ୍ବର ୨୪ ରବିବାର , ଦ୍ୱିତୀୟ ଭଷାଣୀ ଉତ୍ସବ ଅକ୍ଟୋବର ୧ ତାରିଖ ରବିବାର ଏବଂ ତୃତୀୟ ପର୍ଯ୍ୟାୟ ଭଷାଣୀ ଉତ୍ସବ ଅକ୍ଟୋବର ୮ ତାରିଖ ରବିବାର କରାଯିବ ।
ପୂଜା ଏବଂ ଭଷାଣୀ ଉତ୍ସବ ପାଇଁ ପୂଜା କମିଟିର କର୍ମକର୍ତ୍ତା ମାନେ ପରମୀଶନ ପାଇବା ପାଇଁ , ଦାୟିତ୍ୱରେ ଥିବା ସବ୍ ଇନିସପେକଟର ରଞ୍ଜନ କୁମାର ସାହୁଙ୍କ ପାଖରେ ଆବଶ୍ୟକ କାଗଜପତ୍ର ନିର୍ଦ୍ଧାରିତ ସମୟ ମଧ୍ୟରେ ଦାଖଲ କରିବା ଲାଗି ଆଇଆଇସି ଶ୍ରୀ ମହାପାତ୍ର କହିଥିଲେ । ସେହିପରି ମୂର୍ତ୍ତି ବିଷର୍ଜନ ସମୟରେ ମଦ୍ୟପାନ ନକରିବା, ଡିଜେ ସାଉଣ୍ଡ ଏବଂ ବାଣ ବ୍ୟବହାର ନକରିବା , ରାତି ୧୦ ଟାରେ ଭଷାଣୀ କାର୍ଯ୍ୟ ସାରିବା ପାଇଁ ପରାମର୍ଶ ଦେଇଥିଲେ । ଭଷାଣୀ ସମୟରେ ରାସ୍ତାଘାଟ ମରାମତି ,
ଓହଳି ପଡ଼ିଥିବା ବିଦ୍ୟୁତ ତାରକୁ ସଜାଡିବା , ଅଣ୍ଡର ପାସରେ ଆଲୋକର ବ୍ୟବସ୍ଥା କରିବା ପାଇଁ ଡିସିପି ଅଫିସରୁ ବିଭାଗୀୟ ଅଧିକାରୀଙ୍କୁ ଚିଠି କରାଯିବ । ଏହା ସହିତ ଏବଂ ଭଷାଣୀ ଉତ୍ସବ ଅନୁଷ୍ଠିତ ହେଉଥିବା ଅଞ୍ଚଳରେ ଥିବା ମଦଦୋକାନକୁ ବନ୍ଦ ରଖାଯିବ ବୋଲି କହିଥିଲେ । ଏହି ପ୍ରସ୍ତୁତି ବୈଠକରେ ୪ ଗୋଟି ୱ।ର୍ଡ଼ର କର୍ପୋରେଟର, ଜିଲ୍ଲା ପରିଷଦ ସଭ୍ୟା , ସରପଞ୍ଚ, ସମିତି ସଭ୍ୟ ଯୋଗ ଦେଇ ସେମାନଙ୍କର ମତାମତ ଉପସ୍ଥାପନା କରିଥିଲେ । ଏହି ବୈଠକରେ କଟକ ସଦର ଥାନର ସମସ୍ତ ଅଫିସର ଯୋଗ ଦେଇ କାର୍ଯ୍ୟକ୍ରମକୁ ପରିଚାଳନା କରିଥିଲେ ।
