ଟ୍ରେନ୍ ଦୁର୍ଘଟଣା ପରିପ୍ରେକ୍ଷୀରେ ଉଦ୍ଧାର ପରବର୍ତ୍ତୀ ସହାୟତା ଜାରି ରହିଛି – ମୁଖ୍ୟ ଶାସନ ସଚିବ ଶ୍ରୀ ଜେନା

୩ ଜୁନ୍ ,୨୦୨୩ ( ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :- ଗତକାଲି ବାହାନଗା, ବାଲେଶ୍ୱରଠାରେ ଘଟିଥିବା ମର୍ମନ୍ତୁଦ ଟ୍ରେନ୍ ଦୁର୍ଘଟଣା ପରିପ୍ରେକ୍ଷୀରେ ଓଡିଶା ରାଜ୍ୟ ସରକାରଙ୍କ ତରଫରୁ କରାଯାଇଥିବା ଉଦ୍ଧାରକାର୍ଯ୍ୟ ଓ ଜାରି ରହିଥିବା ପରବର୍ତ୍ତୀ ସହାୟତା ସଂପର୍କରେ ମୁଖ୍ୟ ଶାସନ ସଚିବ ଶ୍ରୀ ପ୍ରଦୀପ କୁମାର ଜେନା ଆଜି ସଂଧ୍ୟାରେ ସୂଚନା ଦେଇଛନ୍ତି । ଆଜି ସଂଧ୍ୟାରେ ଗଣମାଧ୍ୟମକୁ ସୂଚନା ଦେଇ ମୁଖ୍ୟ ଶାସନ ସଚିବ ଶ୍ରୀ ଜେନା କହିଛନ୍ତି ଯେ, ଅଦ୍ୟାବଧି ମିଳିଥିବା ରିପୋର୍ଟ ଅନୁସାରେ ଏହି ଦୁର୍ଘଟଣାରେ ୨୮୮ ଜଣଙ୍କର ମୃତ୍ୟୁ ଘଟିଛି । ଆଜି ମଧ୍ୟାନ୍ନ ସୁଦ୍ଧା ଏହି ସଂଖ୍ୟ ୨୬୧ ରହିଥିଲା ।

ରାଜ୍ୟର ବିଭିନ୍ନ ଡାକ୍ତରଖାନାରେ ଆହତ ହୋଇଥିବା ପ୍ରାୟ ୧୦୦୦ ରୁ ଊର୍ଦ୍ଧ୍ଵ ଯାତ୍ରୀମାନଙ୍କୁ ଭର୍ତ୍ତି କରାଯାଇ ସେମାନଙ୍କ ଚିକିତ୍ସା ଜାରି ରହିଥିଲା । ସେଥିମଧ୍ୟରୁ ଅଳ୍ପ ଆହତ ହୋଇଥିବା ଅଧିକାଂଶ ଚିକିତ୍ସା ପରେ ଡାକ୍ତରଖାନାରୁ ନିଜ ନଜ ଘରକୁ ଯାଇଛନ୍ତି । ଆହତମାନଙ୍କୁ ବିଭିନ୍ନ ଡାକ୍ତର ଓ ପାରାମେଡିକାଲ ଷ୍ଟାଫମାନେ ଯତ୍ନ ସହକାରେ ଚିକିତ୍ସା କରୁଛନ୍ତି । ମାନ୍ୟବର ମୁଖ୍ୟମନ୍ତ୍ରୀ ଚିକିତ୍ସିତ ସମସ୍ତଙ୍କୁ ସରକାରୀ ସହାୟତାରେ ଉତ୍ତମମାନର ଚିକିତ୍ସା ଯୋଗାଇ ଦେବାକୁ ନିର୍ଦ୍ଦେଶ ଦେଇଛନ୍ତି । ଏହା ମଧ୍ୟରେ ଚିହ୍ନଟ ହୋଇଥିବା କେତେକ ମୃତ ଦେହକୁ ପ୍ରମାଣ ଆଧାରରେ ନିଜ ନିଜର ସଂପର୍କୀୟମାନେ ନେଇଛନ୍ତି ।

ଅନ୍ୟ ସମସ୍ତ ମୃତ ଦେହଙ୍କର ଚିହ୍ନଟ ପ୍ରକ୍ରିୟା ଜାରି ରହିଛି । ମେଡିକୋ-ଲିଗାଲ ପଦ୍ଧତି ଅନୁସାରେ ଶବ ବ୍ୟବଚ୍ଛେଦ କରାଯିବ । ଆବଶ୍ୟକ ସ୍ଥଳେ ଡି.ଏନ୍.ଏ ନମୁନା ସଂଗ୍ରହ କରାଯିବ । ଶବ ଚିହ୍ନଟ ହୋଇନପାରିଲେ ୪୮ ଘଣ୍ଟା ପରେ ମେଡିକୋ-ଲିଗାଲ ପଦ୍ଧିତ ଅନୁସାରେ ଶବ ବ୍ୟବଚ୍ଛେଦ ପାଇଁ ପଦକ୍ଷେପ ନିଆଯିବ ବୋଲି ମୁଖ୍ୟ ଶାସନ ସଚିବ ଶ୍ରୀ ଜେନା କହିଛନ୍ତି । ପ୍ରାୟ ୧୬୦ଟି ମୃତ ଦେହ ବାହାନଗାରୁ ଭୁବନେଶ୍ୱର ଅଣାଯାଇ ସେସବୁକୁ ଶବ ସଂରକ୍ଷଣ ବ୍ୟବସ୍ଥା ଥିବା ଏମସ୍ ଓ ଅନ୍ୟାନ୍ୟ ଡାକ୍ତରଖାନାରେ ରଖାଯାଇ ଚିହ୍ନଟ ପରେ ସେମାନଙ୍କର ସଂପର୍କୀୟକୁ ହସ୍ତାନ୍ତର କରାଯିବ ।

ଏ ସଂପର୍କରେ ମୁଖ୍ୟ ଶାସନ ସଚିବ ଶ୍ରୀ ଜେନା କେନ୍ଦ୍ର ରାଜସ୍ୱ ସଚିବ, କେନ୍ଦ୍ର ଗୃହ ବିଭାଗ ସଚିବଙ୍କ ସହିତ କଥା ହୋଇ କାର୍ଯ୍ୟନୁଷ୍ଠାନ ଗ୍ରହଣ କରୁଛନ୍ତି । ଏଭଳି ଏକ ଆହ୍ୱାନ ଜନକ ଉଦ୍ଧାର କାର‌୍ୟ୍ୟରେ ଏନ୍ ଡିଆରଏଫ, ଓଡ୍ରାଫ୍, ଅଗ୍ମିଶମ ସେବା , ଜିଲ୍ଲା ପ୍ରଶାସନ ଓ ପୋଲିସ୍ ପ୍ରଶାସନର ଅଧିକାରୀ ଓ କର୍ମକର୍ତ୍ତାମାନଙ୍କ ସମେତ ସ୍ଥାନୀୟ ଜନସାଧାରଣଙ୍କ ସହଯୋଗ ଅତ୍ୟନ୍ତ ପ୍ରଶଂସନୀୟ ରହିଥିଲା ବୋଲି ମୁଖ୍ୟ ଶାସନ ସଚିବ ଶ୍ରୀ ଜେନା ପ୍ରକାଶ କରିଛନ୍ତି ।

ପ୍ରକାଶ ଥାଉକି, ଆହତ ମାନଙ୍କୁ ଚିକିତ୍ସା ସହାୟତା, ମୃତ ଦେହ ଚିହ୍ନଟ ଓ ସେମାନଙ୍କ ପରିବାରକୁ ହସ୍ତାନ୍ତର ପରିପ୍ରେକ୍ଷୀରେମୁଖ୍ୟ ଶାସନ ସଚିବ ଶ୍ରୀ ଜେନା, “୫-ଟି” ସଚିବ ଶ୍ରୀ ଭି.କେ. ପାଣ୍ଡିଆନ୍, ଉନ୍ନୟନ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀମତୀ ଅନୁ ଗର୍ଗ,ଗୃହ ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ଦେଓ ରଂଜନ କୁମାର ସିଂ, ସୂଚନା ଓ ଲୋକ ସଂପର୍କ ବିଭାଗ ପ୍ରମୁଖ ଶାସନ ସଚିବ ଶ୍ରୀ ସଂଜୟ କୁମାର ସିଂ, ଇଲେକ୍ଟ୍ରୋନିକ୍ସ ଓ ଆଇଟି ବିଭାଗ ପ୍ରମୁଖ ଶାସନ ସଚିବ ଶ୍ରୀ ମନୋଜ କୁମାର ମିଶ୍ର,

ବାଣିଜ୍ୟ ଓ ପରିବହନ ବିଭାଗ ପ୍ରମୁଖ ଶାସନ ସଚିବ ଶ୍ରୀମତୀ ଊଷା ପାଢୀଙ୍କ ସମେତ ରାଜ୍ୟ ପ୍ରଶାସନର ବିଭିନ୍ନ ବିଭାଗର ଶାସନ ସଚିବ ଏବଂ ପଦାଧିକାରୀମାନେ ସ୍ୱତନ୍ତ୍ର ରିଲିଫ କମିଶନରଙ୍କ କଣ୍ଟ୍ରୋଲ ରୁମରେ ଉପସ୍ଥିତ ରହି କାର୍ଯ୍ୟ ତଦାରଖ କରୁଛନ୍ତି । ସେହିଭଳି ବାହାନଗା ଓ ବାଲେଶ୍ୱରରେ ସ୍ୱତନ୍ତ୍ର ରିଲିଫ୍ କମିଶନର ତଥା ଅତିରିକ୍ତ ମୁଖ୍ୟ ଶାସନ ସଚିବ ଶ୍ରୀ ସତ୍ୟବ୍ରତ ସାହୁ, ଶିଳ୍ପ ବିଭାଗ ପ୍ରମୁଖ ଶାସନ ସଚିବ ଶ୍ରୀ ହେମନ୍ତ ଶର୍ମାଙ୍କ ସମେତ ରାଜ୍ୟ ପ୍ରଶାସନର ବିଭିନ୍ନ ବିଭାଗର ବରିଷ୍ଠ ଅଧିକାରୀମାନେ ଉଦ୍ଧାର ଓ ପରବର୍ତ୍ତୀ କାର୍ଯ୍ୟକୁ ତ୍ୱରାନ୍ୱିତ କରୁଛନ୍ତି ।