ଗୃହମନ୍ତ୍ରୀ ଅମିତ ଶାହାଙ୍କ ଇସ୍ତଫା ଓ ଚାଷିଙ୍କୁ କ୍ଷତିପୂରଣ ଦେବା ଦାବୀରେ ସିପିଆଇ (ଏମ୍) ର ବିକ୍ଷୋଭ

୩୦ ଡିସେମ୍ବର ୨୦୨୪ (ଓଡ଼ିଶା ତାଜା ନ୍ୟୁଜ୍ ) ରଣପୁର :->  ଅଦିନିଆ ଲଗାଣ ବର୍ଷା ରେ ରଣପୁରରେ ଚାଷୀଙ୍କ ପାଚିଲା ଧାନରେ ପାଣି ମାଡି ଗଜା ହେବା ସହ ରବି ଫସଲ ସମ୍ପୂର୍ଣ୍ଣ ନଷ୍ଟ ହୋଇ ଯାଇଥିଲାବେଳେ ଚାଷୀମାନେ ମାନସିକ ଭାବେ ଭାଙ୍ଗି ପଡି ମୁଣ୍ଡରେ ହାତ ଦେଇ ବସିଛନ୍ତି। ଅଥଚ ଜିଲ୍ଲା ଓ ସ୍ଥାନୀୟ ପ୍ରଶାସନ ବିଧି ପାଳନ ପୂର୍ବକ ନୀରବ ଦ୍ରଷ୍ଟା ସାଜିଛନ୍ତି। ସରକାର ବେସାହାରା ଚାଷୀମାନଙ୍କୁ ପ୍ରତିଶୃତି ଦେଇ ମିଛ ଅଭିନୟ କରି ଭୂୟାଁ ବୁଲାଉଛନ୍ତି। ସରକାର ଓ ପ୍ରଶାସନର ଏଭଳି ନିଷ୍କ୍ରିୟତା ପ୍ରତିବାଦ କରି ସିପିଆଇ (ଏମ) ରଣପୁର ଆଞ୍ଚଳିକ କମିଟି ତରଫରୁ ଆଜି ଶତାଧିକ ଚାଷୀ ଗଜାଧାନ ଧରି ରଣପୁର ପଞ୍ଚୁଦୋଳ ପଡିଆ ରୁ ଏକ ଶୋଭାଯାତ୍ରା ରେ ବାହାରି ତହସିଲ କାର୍ଯ୍ୟାଳୟ ସମ୍ମୁଖରେ ସଂଗଠିତ ହୋଇ ଗଣ ବିକ୍ଷୋଭସାମିଲ ହୋଇଥିଲେ ।

ସାଥୀ ଦୁଃଶାସନ ଜେନାଙ୍କ ସଭାପତିତ୍ବରେ ଅନୁଷ୍ଠିତ ବିକ୍ଷୋଭ ସମାବେଶରେ ବକ୍ତାମାନେ ପ୍ରଶାସନ ତରଫରୁ ଶୀଘ୍ର ତଦନ୍ତ କରି ,ଚାଷୀମାନଙ୍କୁ କ୍ଷତିପୂରଣ ଏକର ପିଛା ୨୫ ହଜାର ଟଙ୍କା ପ୍ରଦାନ, ଚାଷୀରୂଣ ଛାଡ,ବ୍ୟାପକ ନୂଆ କୃଷିରୁଣ ପ୍ରଦାନ, ବିନା କଟନୀ ଛଟନୀରେ ତୁରନ୍ତ ଚାଷିମାନଙ୍କ ଠାରୁ ଧାନ କ୍ରୟ ଏବଂ ୨୦୧୫ର ଚାଷୀ କ୍ଷତିପୂରଣ ରାଶିର ସଂଶୋଧନ ପାଇଁ ଦାବୀ କରିଥିଲେ। ସରକାର ଏଥିରେ ବ୍ୟତିକ୍ରମ କଲେ ଭବିଷ୍ୟତରେ ଦୃଢ଼ ଚାଷୀ ଆନ୍ଦୋଳନ କରାଯିବ ବୋଲି ପାର୍ଟି ତରଫରୁ ଚେତାବନୀ ଦିଆ ଯାଇଛି।

ସେହିଭଳି ସମ୍ବିଧାନର ୭୫ତମ ବର୍ଷ ପୂର୍ତ୍ତି ପାଳନ ପରିପ୍ରେକ୍ଷୀରେ ଆଲୋଚନା ବେଳେ ରାଜ୍ଯ ସଭାରେ ଗୃହ ମନ୍ତ୍ରୀ ଅମିତି ଶାହାଙ୍କ ସମ୍ବିଧାନ ପ୍ରଣେତା ଡକ୍ଟର ଭୀମ ରାଓ ଆମ୍ବେଦକରଙ୍କ ପ୍ରତି ଦେଇ ଥିବା ଦାୟିତ୍ଵ ହୀନ ମନ୍ତବ୍ୟର ପ୍ରତିବାଦ କରି ବାମପନ୍ଥୀ ଦଳ ଗୁଡ଼ିକ ଡାକରାରେ ଆଜି ଦେଶ ବ୍ୟାପି ଗୃହ ମନ୍ତ୍ରୀ ଅମିତି ଶାହା ଙ୍କ ତୁରନ୍ତ ଇସ୍ତଫା ଦାବୀରେ ଅନୁଷ୍ଠିତ ପ୍ରତିବାଦ ପରି ପରିପ୍ରେକ୍ଷୀରେ ଆମ ପାର୍ଟି ତରଫରୁ ଆଜି ପ୍ରଥମେ ଶହୀଦ ରଘୁ-ଦିବାକରଙ୍କ ଶହୀଦ ମଣ୍ଡପ ନିକଟରେ ବିକ୍ଷୋଭ ପ୍ରତିବାଦ ଅନୁଷ୍ଠିତ ହୋଇ ଥିଲା। ବକ୍ତା ମାନେ ମୋଦୀ ସରକାରର ବିଫଳତା ସାଙ୍ଗକୁ ସମ୍ବିଧାନ ବିରୋଧି ପଦକ୍ଷେପକୁ ଦୃଢ ନିନ୍ଦା କରିଥିଲେ ଓ ଅମିତ ଶାହାଙ୍କ ତୁରନ୍ତ ଇସ୍ତଫା ଦାବୀ କରିଥିଲେ।

ପାର୍ଟି ତରଫରୁ ଏକ ପ୍ରତିନିଧିଦଳ ରଣପୁର ତହସିଲଦାରଙ୍କୁ ଭେଟି ଚାଷୀଙ୍କ ଦାବୀ ତୁରନ୍ତ ପୂରଣ ପାଇଁ ମୁଖ୍ୟମନ୍ତ୍ରୀଙ୍କୁ ଓ ଅମିତ ଶାହାଙ୍କ ଇସ୍ତଫା ପାଇଁ ମାନ୍ୟବର ରାଷ୍ଟ୍ରପତି ଙ୍କୁ ଦାବୀ ପତ୍ର ପ୍ରଦାନ କରାଯାଇଛି। ଏହି ବିକ୍ଷୋଭ ଆନ୍ଦୋଳନରେ ପାର୍ଟିର ଜିଲ୍ଲା ସମ୍ପାଦକ ହରିଶ୍ଚନ୍ଦ୍ର ମିଶ୍ର,ବରିଷ୍ଠ ନେତା ଗଙ୍ଗାଧର ଆଚାର୍ଯ୍ୟ,ନିତ୍ଯାନନ୍ଦ ପରିଡା,ସୁରେଶ ସ୍ଵାଇଁ,ଦୁଃଶାସନ ଜେନା,ଉଚ୍ଚ ନ୍ୟାୟାଳୟର ଆଇନଜୀବୀ କବିରାଜ ପ୍ରଧାନ , ମହିଳା ନେତ୍ରୀ ସଂଯୁକ୍ତା ସେଠୀ, ଗଦାଧର ପ୍ରଧାନ,ସୁଶୀଲ ମହାନ୍ତି,ଭିକାରୀ ଚରଣ ସାହୁ,ସବ୍ୟସାଚୀ ସେନାପତି,କୁଳମଣି ପଲେଇ ଓ ବିଜୟ ଜେନା ପ୍ରମ୍ମୁଖ ବକ୍ତବ୍ୟ ଦେଇଥିଲେ।