୩୦ ସେପ୍ଟେମ୍ବର,୨୦୨୪ (ଓଡ଼ିଶା ତାଜା ନ୍ୟୁଜ୍ ) ଭୁବନେଶ୍ୱର :-> ଚନ୍ଦକାସ୍ଥିତ ନାଳନ୍ଦା ଇନ୍ଷ୍ଟିଚ୍ୟୁଟ ଅଫ୍ ଟେକ୍ନୋଲୋଜିରେ ଓଡିଶାର ସର୍ବବୃହତ ନିର୍ମାତା ହ୍ୟାକାଥନ ଇନୋଭେଟ ଓଡିଶା ୨.୦ ତଥ୍ୟପୂର୍ଣ୍ଣ ଆଲୋଚନା ଓ ନୂତନ ସମାଧାନଗୁଡିକର ଉତ୍ସବ ସହିତ ଶେଷ ହୋଇଛି । ଏଆଇସି-ନାଳନ୍ଦା ଇନ୍ଷ୍ଟିଚ୍ୟୁଟ ଅଫ୍ ଟେକ୍ନୋଲୋଜି ଫାଉଣ୍ଡେଶନ ଓ କାରଖାନା ମେକରସ୍ପେଶ୍ ପକ୍ଷରୁ ଆୟୋଜିତ ଏହି ୨ୟ ସଂସ୍କରଣ ଜେନେରେଟିଭ ଏଆଇ, କ୍ଲାଇମେଟ ଟେକ୍, ଡିଜିଟାଲ ଟ୍ୱିନ ଓ ଇଣ୍ଡଷ୍ଟ୍ରୀ ଅଟୋମେଶନ ଭଳି ଉଦୀୟମାନ କ୍ଷେତ୍ରଗୁଡିକ ଉପରେ ଗୁରୁତ୍ୱ ଦେଇଥିଲା । ଓଡିଶାର ବିଭିନ୍ନ ଶିକ୍ଷାନୁଷ୍ଠାନରୁ ୨୦୦ରୁ ଅଧିକ ଆବେଦନ ମିଳିବା ସହିତ ଏହି କାର୍ଯ୍ୟକ୍ରମରେ ଉତ୍ସାହଜନକ ଅଂଶଗ୍ରହଣର ଦେଖିବାକୁ ମିଳିଛି ।
ଏହି କାର୍ଯ୍ୟକ୍ରମରେ ଓଡିଶାର ୧୫ରୁ ଅଧିକ ବୈଷୟିକ ଶିକ୍ଷାନୁଷ୍ଠାନରୁ ୧୨୦ରୁ ଅଧିକ ଛାତ୍ରଛାତ୍ରୀ ସାମିଲ ଥିବା ୨୦ଟି ଟିମ୍କୁ ତାଲିକାଭୁକ୍ତ କରାଯାଇଛି । ଏହି ୨୪ ଘଂଟାର ହ୍ୟାକାଥନ ବୈଷୟିକ ଛାତ୍ରଛାତ୍ରୀ ଓ ପ୍ରଫେସନାଲଙ୍କୁ ସହଯୋଗିତା ଓ ଉଦ୍ଭାବନ କରିବା ଏବଂ ବାସ୍ତବ ଦୁନିଆର ସମସ୍ୟାଗୁଡିକୁ ସମାଧାନ କରିବା ପାଇଁ ସଶକ୍ତ କରିବାକୁ ଲକ୍ଷ୍ୟ ରଖିଛି । ଏହି ବିଦାୟକାଳିନ ସମାରୋହରେ ଓଡିଶା ସରକାରଙ୍କ ମତ୍ସ୍ୟ ଓ ପଶୁ ସମ୍ପଦ ବିଭାଗ ଏବଂ ଏମ୍ଏସ୍ଏମ୍ଇ ବିଭାଗର ରାଜ୍ୟ ମନ୍ତ୍ରୀ (ସ୍ୱାଧୀନ) ଶ୍ରୀ ଗୋକୁଳାନନ୍ଦ ମଲ୍ଲିକ, ବିଜେପି ଓଡିଶାର ଅଧ୍ୟକ୍ଷ ଏବଂ ପୂର୍ବତନ ରାଜ୍ୟସଭା ସଦସ୍ୟ ଶ୍ରୀ ମନମୋହନ ସାମଲ, ବିଓଏ, ଏଆଇସି-ନାଳନ୍ଦାର ଅଧ୍ୟକ୍ଷ, ବିଜେପି ସେଲ୍ର କୋ- କନ୍ଭେନର ଓ ନାଲ୍କୋର ପୂର୍ବତନ ସିଏମ୍ଡି ଡଃ ତପନ କୁମାର ଚାନ୍ଦ, ବିଜେପି ଇଣ୍ଡଷ୍ଟ୍ରୀ ସେଲ୍ର କନ୍ଭେନର ଶ୍ରୀ ପ୍ରଭାତ କେଶରୀ ମିଶ୍ର ପ୍ରମୁଖ ଯୋଗ ଦେଇଥିଲେ ।
ଏହି ଅବସରରେ ମନ୍ତ୍ରୀ ଶ୍ରୀ ଗୋକୁଳାନନ୍ଦ ମଲ୍ଲିକ କହିଛନ୍ତି, “ଓଡିଶାର ଯୁବପିଢିଙ୍କ ନିକଟରେ ସର୍ବୋତମ କାର୍ଯ୍ୟ କରିବାର କ୍ଷମତା ରହିଛି ଏବଂ ସରକାର ସେମାନଙ୍କର ପ୍ରୟାସରେ ସେମାନଙ୍କୁ ସହଯୋଗ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ।” ସେହିପରି ଶ୍ରୀ ମନମୋହନ ସାମଲ କହିଛନ୍ତି, “ନୂଆ ସରକାର ଓଡିଶାର ଲୋକ ଏବଂ ସମାଜର ସମସ୍ତ ବର୍ଗର ଲୋକମାନଙ୍କ ସାମଗ୍ରିକ ବିକାଶ ପ୍ରତି ପ୍ରତିବଦ୍ଧ ରହିଛି ।” ଡଃ ଚାନ୍ଦ ଉଲ୍ଲେଖ କରିଛନ୍ତି ଯେ, “ରାଜ୍ୟର ନୂଆ ବିଜେପି ସରକାର ଓଡିଶାରେ ଶିଳ୍ପ ସ୍ଥାପନ କରିବା ପାଇଁ କେବଳ ପୁଞ୍ଜିନିବେଶ ଆଣିବ ନାହିଁ ବରଂ ଭବିଷ୍ୟତରେ ରାଜ୍ୟର ଯୁବପିଢିଙ୍କ ପାଇଁ ହଜାର ହଜାର ନିଯୁକ୍ତି ସୃଷ୍ଟି କରିବ ।”ଏହି ସମାରୋହ ସମୟରେ ହ୍ୟାକାଥନର ବିଜେତାମାନଙ୍କୁ ପ୍ରତିଷ୍ଠିତ ବ୍ୟକ୍ତିଙ୍କ ଦ୍ୱାରା ସମ୍ମାନିତ କରାଯିବା ସହିତ ସେମାନଙ୍କ ଚମତ୍କାର ଉଦ୍ଭାବନକୁ ସ୍ୱୀକୃତି ପ୍ରଦାନ କରାଯାଇଥିଲା ।
ଶୀର୍ଷ ୪ଟି ପ୍ରଦର୍ଶନୀ ଟିମ୍କୁ ୧,୭୫,୦୦୦ ଟଙ୍କାର ମୋଟ ନଗଦ ପୁରସ୍କାରରେ ପୁରସ୍କୃତ କରାଯାଇଥିଲା । ଏହି କାର୍ଯ୍ୟକ୍ରମରେ ବିଜେପି ଇଣ୍ଡଷ୍ଟ୍ରୀ ସେଲ୍ର କନ୍ଭେନର ଶ୍ରୀ ପ୍ରଭାତ କେଶରୀ ମିଶ୍ର, ପ୍ରଖ୍ୟାତ ସାମାଜିକ କାର୍ଯ୍ୟକର୍ତା ସୁଶ୍ରୀ ଆରତୀ ଦେବୀ, ଏଆଇସି-ନାଳନ୍ଦାର ଅଧ୍ୟକ୍ଷ ଶ୍ରୀ ମଳୟ କୁମାର ପାଢୀ, ଏଆଇସି-ନାଳନ୍ଦାର ସିଇଓ ଶ୍ରୀ ଦୂର୍ଗା ପ୍ରସାଦ ମଧ୍ୟ ଉପସ୍ଥିତ ଥିଲେ । ଏହି କାର୍ଯ୍ୟକ୍ରମରେ ସଫଳ ରୂପେ ପରିଚାଳିତ ଅନ୍ୟାନ୍ୟ ପଦକ୍ଷେପଗୁଡିକୁ ମଧ୍ୟ ଦେଖିବାକୁ ମିଳିଥିଲା ଯେଉଁଥିରେ ମାନ୍ୟବର ପ୍ରଧାନମନ୍ତ୍ରୀଙ୍କ ‘ମନ୍ କି ବାତ୍’ର ୧୧୪ତମ ସଂସ୍କରଣର ଲାଇଭ୍ ସ୍କ୍ରିନିଙ୍ଗ୍, ‘ଭୋକାଲ ଫର୍ ଲୋକାଲ’ ବିଷୟବସ୍ତୁ ଉପରେ ଏକ ଷ୍ଟାର୍ଟଅପ ପ୍ରଦର୍ଶନୀ, ‘ଏକ୍ ପେଡ୍ ମାଁ କେ ନାମ୍’ ଅଧିନରେ ବୃକ୍ଷରୋପଣ କାର୍ଯ୍ୟକ୍ରମ, ବିଜେପିର ଫ୍ଲାଗ୍ସିପ ପ୍ରୋଗ୍ରା ସଦସ୍ୟତା ଅଭିଯାନ ଓ ସେବା ପଖ୍ୱାଡା ଅଧିନରେ ‘ସ୍ୱଚ୍ଛତା ଅଭିଯାନ’ ଆଦି ସାମିଲ ଥିଲା ।
