ବରିଷ୍ଠ ଆଇନଜୀବୀ ଭବାନୀ ଶଙ୍କର ମିଶ୍ରଙ୍କର ପରଲୋକ

ଓଡ଼ିଶା ତାଜା ନ୍ୟୁଜ୍/୨୮ ଜୁନ ମଙ୍ଗଳବାର/କଟକ :- ଓଡ଼ିଶା ଉଚ୍ଚ ନ୍ୟାୟାଳୟର ବରିଷ୍ଠ ଆଇନଜୀବୀ ଭବାନୀ ଶଙ୍କର ମିଶ୍ରଙ୍କର ପରଲୋକ ହୋଇଯାଇଛି। ମୃତ୍ୟୁ ବେଳକୁ ତାଙ୍କୁ ୭୫ ବର୍ଷ ବୟସ ହୋଇଥିଲା । ଗତ ଜୁନ ୨୪ ତାରିଖରେ ଆଷାଢ଼ ମାସ କୃଷ୍ଣ ପକ୍ଷ ପବିତ୍ର ଖଳିଲାଗି ଏକାଦଶୀ ତିଥି ଅବସରରେ ତାଙ୍କର ଦେହାନ୍ତ ଘଟିଛି । କଟକ ସହରର କନିକା ଛକ ନିବାସୀ ସ୍ଵର୍ଗତଃ ମିଶ୍ର ଦୀର୍ଘ ୪୭ ବର୍ଷ ଧରି ଆଇନ୍ ପେଶାରେ ସକ୍ରିୟ ରହିଆସିଥିଲେ । ସେ ଜଣେ ଦକ୍ଷ, ନିଷ୍ଠାପର, ପରୋପକାରୀ ଓ ଦରଦୀ ମଣିଷ ଥିଲେ ।

୧୯୪୬ ମସିହା ଅଗଷ୍ଟ ୧୯ ତାରିଖ ଦିନ ପୁରୀ ଜିଲ୍ଲାର ସାକ୍ଷୀଗୋପାଳଠାରେ ସ୍ବର୍ଗତଃ ପୂର୍ଣ୍ଣଚନ୍ଦ୍ର ମିଶ୍ର ଓ ଲକ୍ଷ୍ମୀ ଦେବୀଙ୍କ ଔରସରୁ ସେ ଜନ୍ମ ଗ୍ରହଣ କରିଥିଲେ । ସତ୍ୟବାଦୀ ହାଇସ୍କୁଲରୁ ବିଦ୍ୟାଳୟ ଶିକ୍ଷା ସମାପ୍ତ କରିବା ପରେ ଶ୍ରୀ ମିଶ୍ର ରେଭେନ୍ସା କଲେଜରୁ ବି.ଏ ଏବଂ ମଧୁସୂଦନ ଆଇନ୍ ମହାବିଦ୍ୟାଳୟରୁ ଆଇନ୍ ରେ ଡିଗ୍ରୀ ହାସଲ କରିଥିଲେ । ସେ କିଛି ଦିନ ହେଲା ଅସୁସ୍ଥ ଥିଲେ । ସ୍ବାସ୍ଥ୍ୟରେ ଅଧିକ ଅବନତି ଘଟିବାରୁ ତାଙ୍କୁ ବେଙ୍ଗାଲୁରୁ ନିଆଯାଇ ସେଠିକାର ମଣିପାଲ ଡାକ୍ତରଖାନାରେ ଭର୍ତ୍ତି କରାଯାଇଥିଲା ।

ସେଠାରେ ତାଙ୍କର ନିଧନ ଘଟିଲା । ତାଙ୍କର ବିୟୋଗରେ କଟକର ଓକିଲ ସମ୍ପ୍ରଦାୟ ମହଲରେ ଗଭୀର ଶୋକର ଛାୟା ଖେଳିଯାଇଛି । ସ୍ଵର୍ଗତଃ ମିଶ୍ର, ତାଙ୍କର ପତ୍ନୀ କାନନବାଳା ମିଶ୍ର ଏବଂ ଚାରି ଝିଅ ଓ ଜାମାତା ଯଥା ଦୁର୍ଗେଶ ନନ୍ଦିନୀ ମିଶ୍ର ଓ ଜୀବନ ପାଣିଗ୍ରାହୀ, ପ୍ରିୟଦର୍ଶିନୀ ମିଶ୍ର ଓ ରଶ୍ମି ପଣ୍ଡା, ପ୍ରିୟଙ୍କା ମିଶ୍ର ଓ ବିକାଶ ମିଶ୍ର ଏବଂ ଶ୍ରୀ ମିଶ୍ର ଓ ସିଦ୍ଧାର୍ଥ ରଥଙ୍କୁ ଶୋକ ସାଗରରେ ଭସାଇ ଦେଇ ଇହଧାମ ତ୍ୟାଗ କରିଛନ୍ତି ।