ଭୁବନେଶ୍ୱର /ରିପୋର୍ଟ / ( ଓଡିଶା ତାଜା ନ୍ୟୁଜ୍ ) ମାସ୍କ ତିଆରି ପାଇଁ ମିଳିଛି ବରାଦ , ମଙ୍ଗଳବାର, ୨୮ଏପ୍ରିଲ :- ଭାରତର ଏକ ଅଗ୍ରଣୀ ସିମେଂଟ୍ ନିର୍ମାତା ତଥା ଡାଲମିଆ ଭାରତ ଗ୍ରୁପ୍ର ଅଂଶବିଶେଷ ଡାଲମିଆ ସିମେଂଟ୍ (ଭାରତ) ଲିମିଟେଡ଼ ଏହାର କାରଖାନା ପାରିପାର୍ଶ୍କ ଅଂଚଳରେ ନିରନ୍ତର ଜୀବନଜୀବିକା କାର୍ଯ୍ୟକ୍ରମ ବିକଶିତ କରି ସମାଜକୁ ସଶକ୍ତ କରିବାର ବିଶ୍ୱାସ କରେ । ଏହି ଅଧୀନରେ ଡାଲମିଆ ସିମେଂଟ୍ ଟିମ ତରଫରୁ କୋରନା ସଂକ୍ରମଣ ଭଳି ମହାମାରୀ ସମୟର ଆବଶ୍ୟକତାକୁ ଆଖିରେ ରଖି, ସୁନ୍ଦରଗଡ ଜିଲ୍ଲାର ରାଜଗାଙ୍ଗପୁର ଓ ଲାଞ୍ଜିବେର୍ଣ୍ଣା ଅଂଚଳରେ ଏକାଧିକ ସ୍ୱୟଂ ସହାୟକ ଗୋଷ୍ଠୀ (ଏସଏଚଜି)ର ୫୦ରୁ ଉର୍ଦ୍ଧ୍ୱ ମହିଳାଙ୍କୁ ଫେସ ମାସ୍କ ତିଆରି ପାଇଁ ପ୍ରଶିକ୍ଷଣ ପ୍ରଦାନ କରାଯାଇଥିଲା । ପ୍ରଶିକ୍ଷଣ ପରେ ଏହି ମହିଳା ମାନେ ପେସାଦାର ଭାବେ ମାସ୍କ ଉତ୍ପାଦନ କାର୍ଯ୍ୟ ହାତକୁ ନେଇ ୧,୧୦,୦୦୦ ମାସ୍କ ଯୋଗାଇ ଦେବାର ବରାଦ ହାସଲ କରିଛନ୍ତି ।
ଆଗାମୀ ଦୁଇ ମାସ ଭିତରେ ଏ ସମସ୍ତ ମାସ୍କ ହସ୍ତାନ୍ତର କରାଯିବ । ଏହି ମାସ୍କ ଉତ୍ପାଦନ ପାଇଁ ଆବଶ୍ୟକୀୟ କଂଚାମାଲ ଯୋଗାଇବା ବ୍ୟତୀତ ଡାଲମିଆ ସିମେଂଟ୍ ଟିମ, ଏହି ମାସ୍କ ଗୁଡିକର ସାନିଟାଇଜେସନ ଏବଂ ପ୍ୟାକେଜିଙ୍ଗ ବ୍ୟବସ୍ଥା ମଧ୍ୟ ବୁଝୁଛି । ଏସଏଚଜି ଟିମ ତରଫରୁ ଦୈନିକ ପ୍ରାୟ ୪୦୦୦ ମାସ୍କ ତିଆରି କରାଯାଉଛି । ବର୍ତମାନ ସୁଦ୍ଧା ୩୩,୦୦୦ରୁ ଅଧିକ ମାସ୍କ ପ୍ରସ୍ତୁତ ହୋଇ ସାରିଛି । ଏଠାରେ ଉଲ୍ଲେଖଯୋଗ୍ୟ ଯେ, ସମ୍ପ୍ରତି ଦେଶରେ ଚାଲିଥିବା ଲକଡାଉନ ହେତୁ ଲୋକମାନଙ୍କ ଜୀବିକାର୍ଜ୍ଜନର ସମସ୍ତ ସାଧନ ବନ୍ଦ ହୋଇ ପଡିଥିବା ବେଳେ, ଏହି ଅଭିଯାନ ଜରିଆରେ ସ୍ଥାନୀୟ ମହିଳା ମାନେ ଘରୁ କାମ କରି ରୋଜଗାର କରିପାରୁଛନ୍ତି । ଏହି ସନ୍ଦର୍ଭରେ ଡାଲମିଆ ସିମେଂଟ୍ (ଭାରତ) ଲିମିଟେଡ଼ର ପୂର୍ବାଂଚଳ ଉତ୍ପାଦନ ମୁଖ୍ୟ ଶ୍ରୀଯୁକ୍ତ ସୁନୀଲ କୁମାର ଗୁପ୍ତା କହିଛନ୍ତି ଯେ, “ସ୍ଥାନୀୟ ସମ୍ପ୍ରଦାୟର ସାମାଜିକ ଏବଂ ଆର୍ଥିକ ଅଭିବୃଦ୍ଧି ପାଇଁ ଡାଲମିଆ ଭାରତ ତରଫରୁ ଦେଶରେ ଥିବା ଆମର ସମସ୍ତ କାରଖାନା ଅଂଚଳର ସ୍ୱୟଂ ସହାୟକ ଗୋଷ୍ଠୀଗୁଡିକୁ ଆମେ ମୌଳିକ ଜୀବନ କୌଶଳ ପ୍ରଶିକ୍ଷଣ ପ୍ରଦାନ କରୁଛୁ । ଏହି ବିଶ୍ୱ ମହାମାରୀକୁ ଦୃଷ୍ଟିରେ ରଖି ଏବଂ ଏହା ଯେଉଁଭଳି ଭାବେ ସାରା ଦେଶର କର୍ମଚାରୀ ଏବଂ ଶ୍ରମିକମାନଙ୍କୁ ପ୍ରଭାବିତ କରିଛି, ତାହାକୁ ବିଚାରକୁ ନେଇ ମହିଳା ଏସଏଚଜିଗୁଡିକୁ ମାସ୍କ ତିଆରି ପ୍ରଶିକ୍ଷଣ ପ୍ରଦାନ କରିବାକୁ ନିଷ୍ପତିି ନେଇଥିଲୁ । ଆମର ଲକ୍ଷ୍ୟ ଥିଲା, ଲକଡାଉନ ପାଇଁ ଯେତେବେଳେ ଅନ୍ୟ ସବୁ ପ୍ରକାର ଆୟ ଉତ୍ସ ବନ୍ଦ ହୋଇଯାଇଛି, ସେତେବେଳେ ଏହା ସ୍ଥାନୀୟ ମହିଳାଙ୍କୁ ଆୟର ଏକ ସ୍ଥିର ଉତ୍ସ ପ୍ରଦାନ କରିବ ।
କୋଭିଡ-୧୯ ବିରୋଧ ଲଢେଇରେ ଦେଶକୁ ସହାୟତା ପ୍ରଦାନ କରିବା ପାଇଁ, ଏହି ଏସଏଚଜି ସଦସ୍ୟାମାନେ ୩୩,୦୦୦ ମାସ୍କ ହସ୍ତାନ୍ତର କରିସାରିଛନ୍ତି । ଡାଲମିଆ ଭାରତ ଫାଉଣ୍ଡେସନ ସହ କାର୍ଯ୍ୟ କରିବାର ଅଭିଜ୍ଞତା ବିଷୟରେ ଲାଞ୍ଜିବେର୍ଣ୍ଣା ଗ୍ରାମର ସୀମା ଏକ୍କା କହିଛନ୍ତି ଯେ, “ଏହି ଲକଡାଉନ ଅବଧିରେ ମଧ୍ୟ ଆମେ ଅର୍ଥ ଉପାର୍ଜନ କରି ଘର ଚଳାଇବା ପାଇଁ କମ୍ପାନୀ ତରଫରୁ ମାସ୍କ ତିଆରି ପ୍ରଶିକ୍ଷଣ ଦିଆଯାଇଛି । ଗୋଟିଏ ଦିନରେ ଏକ ଦଳ ଭାବେ ଆମେ ପାଖାପାଖି ୪୦୦୦ ମାସ୍କ ତିଆରି କରୁଛୁ । ଆମେ ଡାଲମିଆଭାରତ ଫାଉଣ୍ଡେସନକୁ ଧନ୍ୟବାଦ ଦେଉଛୁ ଯେ ଏଭଳି ଏକ ସମୟରେ ଆମକୁ ସହାଯ୍ୟ କରିଛି । ଆମେ ଘରୁ କାମ କରି ପରିବାରର ଆର୍ଥିକ ସ୍ୱଚ୍ଛଳତା ରକ୍ଷା କରିବାରେ ସମର୍ଥ ହୋଇଛୁ । ଲକଡାଉନ ଶେଷ ହେବା ପର୍ଯ୍ୟନ୍ତ ଆମେ ନିରନ୍ତର ଭାବେ ମାସ୍କ ତିଆରି ଜାରି ରଖି ଏହି ରୋଗ ବିରୋଧ ଲଢେଇରେ ଦେଶକୁ ସହାୟତା ଯୋଗାଇ ଦେବୁ ।’’ ଡାଲମିଆ ସିମେଂଟ୍ (ଭାରତ) ଲିମିଟେଡ଼ ପକ୍ଷରୁ ସ୍ଥାନୀୟ ମହିଳା ଏବଂ ଏସଏଚଜି ସଦସ୍ୟାମାନଙ୍କୁ ସିଲାଇ, କପଡା ବ୍ୟାଗ ତିଆରି, ଫିନାଇଲ ତିଆରି ଏବଂ ଘରେ ଛତୁ ଚାଷ ଇତ୍ୟାଦି ଉପରେ ଜୀବନଜୀବିକା ପ୍ରଶିକ୍ଷଣ ପ୍ରଦାନ କରାଯାଉଛି । ପ୍ରଶିକ୍ଷଣ ପରେ ଏହି ମହିଳାମାନେ ପ୍ରତ୍ୟକ୍ଷରେ ବ୍ୟକ୍ତିଗତ ଭାବେ କିମ୍ବା ଏସଏଚଜି ଅଧୀନରେ ଦଳଗତ ଭାବେ ଏହି କାର୍ଯ୍ୟ ହାତକୁ ନେଇ ସେମାନଙ୍କ ଆୟ ବଢ଼ାଇପାରୁଛନ୍ତି । ଉପରଲିଖିତ ଯେ କୌଣସି କାର୍ଯ୍ୟ ଆରମ୍ଭ କରିବା ଲାଗି ଡାଲମିଆ ସିମେଂଟ୍ ତରଫରୁ ମହିଳା ଏସଏଚଜିଗୁଡିକୁ ଆର୍ଥିକ ସହାୟତା ମଧ୍ୟ ଯୋଗାଇ ଦିଆଯାଉଛି । ପୁନଶ୍ଚ, ସେମାନଙ୍କ ଉତ୍ପାଦିତ ସାମଗ୍ରୀ (ଫିନିସଡ଼ ପ୍ରଡକ୍ଟ)ର ପ୍ରଦର୍ଶନ ଏବଂ ବିକ୍ରି ପାଇଁ କମ୍ପାନୀ ତରଫରୁ ସେମାନଙ୍କ ପାଇଁ ସୁନ୍ଦରଗଡ ଜିଲ୍ଲାର ରାଜଗାଙ୍ଗପୁରରେ ଥିବା ସ୍ଥାନୀୟ ବଜାର ପରିସରରେ ଏକ ସ୍ଥାନ ଯୋଗାଇ ଦିଆଯାଇଛି ।
