ହିଞ୍ଜିଳିକାଟୁ ରିପୋର୍ଟ , ଶେଷଦେବ ସାହୁ ( ଓଡିଶା ତାଜା ନ୍ୟୁଜ୍ ) ଚାଲିଛି ବେଧଡ଼କ ଗୁଟ୍ଖା, ସିଗାରେଟ ଓ ମଦ ବେପାର, ୨୫ ଏପ୍ରିଲ, ଶନିବାର :- ମହାମାରୀ କରୋନା ଭୁତାଣୁ ସଂକ୍ରମଣକୁ ଦୃଷ୍ଟିରେ ରଖି ସରକାର ଲକଡ଼ାଉନ କଟକଣାକୁ ମେ ୩ ତାରିଖ ପର୍ଯ୍ୟନ୍ତ ଅବଧି ବୃଦ୍ଧି କରିଛନ୍ତି । ନିତ୍ୟ ବ୍ୟବହାର୍ଯ୍ୟ ସାମଗ୍ରୀର ଦୋକାନକୁ ବାଦ୍ ଦେଲେ ଅନ୍ୟ ସମସ୍ତ ଦୋକାନ ବଜାର ପ୍ରାୟତଃ ବନ୍ଦ ରହିଛି । ଏହାର ସୁଯୋଗ ନେଇ କିଛି ଦଲାଲ ସକ୍ରିୟ ହୋଇ ଉଠିଛନ୍ତି । ସଂପୃକ୍ତ ଦଲାଲ ମାନେ ବିଭିନ୍ନ ସ୍ଥାନରୁ ଚୋରାରେ ମଦ, ସିଗାରେଟ୍ ଓ ଗୁଟଖା ସମେତ ବିଭିନ୍ନ ପାନମସଲା ଆଣି ଚଢା ଦରରେ ବିକ୍ରି କରୁଛନ୍ତି । ଏପରିକି କିଛି ରାସନ ଦୋକାନୀ ଚୋରାରେ ସିଗାରେଟ, ଗୁଟଖା ଏବଂ ବିଭିନ୍ନ ପାନମସଲା ବିକ୍ରି କରୁଛନ୍ତି । ଧାର୍ଯ୍ୟ ମୂଲ୍ୟ ଠାରୁ ଯଥେଷ୍ଟ ଚଢା ଦରରେ ବିକ୍ରି କରୁଥିବା ଜଣାପଡ଼ିଛି । ମହାମାରୀ କରୋନା ଭୁତାଣୁ ସଂକ୍ରମଣକୁ ଦୃଷ୍ଟିରେ ରଖି ସରକାର ନୁଆଁ ଗାଇଡ଼ ଲାଇନ ଜାରୀ କରିଛନ୍ତି ।
ସର୍ବସାଧାରଣ ସ୍ଥାନରେ ଛେପ ପକାଇଳେ ୨ଶହ ଟଙ୍କା ଜୋରିମାନା ଆଦାୟ ପାଇଁ କଡ଼ା ନିର୍ଦ୍ଦେଶନାମା ଜାରୀ କରିଛନ୍ତି । ପରିତାପର ବିଷୟ ସିଗାରେଟ, ଗୁଟଖା ଏବଂ ବିଭିନ୍ନ ପାନମସଲା ବିକ୍ରି କରୁଥିବା ବ୍ୟବସାୟୀ ମାନଙ୍କ ଉପରେ ପ୍ରଶାସନର କିପରି ନଜର ପଡୁନାହିଁ, ତାହା ବିରାଟ ପ୍ରଶ୍ନବାଚି ସୃଷ୍ଟି କରିଛି । ଚାହା, ପାନ, ସିଗାରେଟ, ହୋଟେଲ, ଫାଷ୍ଟଫୁଡ଼, ଗୁପଚୁପ ଦୋକାନ ବନ୍ଦ ରଖିବା ପାଇଁ ନିର୍ଦ୍ଦେଶ ରହିଥିଲେ ମଧ୍ୟ ହିଞ୍ଜିଳିକାଟୁ ପୌରାଂଚଳ ସମେତ ନିକଟବର୍ତି ଗ୍ରାମାଂଚଳର ବହୁ ପାନ ଦୋକାନୀ ଲୁଚାଛପାରେ ଦୋକାନ ଖୋଲି ସିଗାରେଟ, ଗୁଟଖା ଏବଂ ବିଭିନ୍ନ ପାନମସଲା ଚଢା ଦରରେ ବିକ୍ରି କରୁଥିବାର ଦେଖିବାକୁ ମିଳିଛି । ପୂର୍ବରୁ ୫ ଟଙ୍କାରେ ମିଳୁଥିବା ସିଗାରେଟ ୧୦ ଟଙ୍କା, ୮ ଟଙ୍କାର ସିଗାରେଟକୁ ୧୫ ଟଙ୍କା, ୩ ଟଙ୍କାର ଗୁଟଖାକୁ ୫ ଟଙ୍କା, ୫ ଟଙ୍କାର ଗୁଟଖାକୁ ୧୦ରୁ ୧୨ ଟଙ୍କା, ୫ ଟଙ୍କାର ଖଇନି ୧୦ ଟଙ୍କାରେ ବିକ୍ରି କରାଯାଉଥିବା ଜଣାପଡ଼ିଛି । କିଛି ଗ୍ରାହକ ଚଢା ଦର ନେଇ ଦୋକାନୀଙ୍କୁ ପଚାରିଲେ ଆମେ ଚଢା ସରରେ କିଣିଛୁ, ଲାଭ ନରଖି ବିକିବୁ କିପରି ବୋଲି କହୁଛନ୍ତି । ସିଗାରେଟ, ଗୁଟଖା ଏବଂ ବିଭିନ୍ନ ପାନମସଲା ଲୋକଙ୍କ ଅଭ୍ୟାସରେ ପରିଣତ ହୋଇଥିବା ଯୋଗୁଁ ଏହାକୁ ସହଜରେ ଛାଡ଼ି ପାରୁନାହାନ୍ତି ।
ଦର ଯେତେ ଅଧିକ ହେଲେ ମଧ୍ୟ ବାଧ୍ୟ ହୋଇ କିଣି ଖାଉଛନ୍ତି । ଅଭ୍ୟାସରେ ପରିଣତ ହୋଇଥିବା ଯୋଗୁଁ କିଛି ଲୋକେ ଦୈନିକ ୨୦ଟି ଗୁଟଖା କିମ୍ବା ପାନମସଲା ବଦଳରେ ୫ରୁ ୭ଟି ଖାଉଥିବା ନେଇ କିଛି ଯୁବକ କହିଛନ୍ତି । ଏପରିକି କିଛି ଲୋକ ବିଭିନ୍ନ ପାନମସଲା ଜାତ ଦ୍ରବ୍ୟ ଘରେ ରଖି ପାନଭାଙ୍ଗି ଖାଉଥିବା ଜଣାପଡ଼ିଛି । ଅନୁରୂପ ଭାବେ ସ୍ଥାନୀୟ ପୁଲିସ ପ୍ରଶାସନ ପକ୍ଷରୁ ବିଭିନ୍ନ ସ୍ଥାନରେ ଚଢାଉ କରାଯାଇ ବିପୁଳ ପରିମାଣରେ ଦେଶୀ ଓ ବିଦେଶୀ ମଦ ଜବତ କରାଯାଉଥିଲେ ମଧ୍ୟ ସ୍ଥାନୀୟ ପୌରାଂଚଳ ସମେତ ନିକଟବର୍ତି ଗ୍ରାମାଂଚଳ ଗୁଡ଼ିକରେ ଚୋରାରେ ମଦ ବିକ୍ରି ଜୋର ଧରିଛି । ପୂର୍ବରୁ ମଦ ଦର ଯେତିକି ରହିଥିଲା ବର୍ତମାନ ଦର ଅଢେଇ ଗୁଣ ଅଧିକରେ ବିକ୍ରି କରାଯାଉଥିବା ଜଣାପଡ଼ିଛି । ୧୬୦ ଟଙ୍କାର ନିପ୍କୁ ବର୍ତମାନ ୪ଶହ ଟଙ୍କାରେ ବିକ୍ରି କରାଯାଉଛି । ତାହା ବି ପୁଣି ସମସ୍ତଙ୍କୁ ବିକ୍ରି କରାଯାଉ ନାହିଁ । ପରିଚିତ ଲୋକଙ୍କୁ ହିଁ ବିକ୍ରି କରାଯାଉଛି । ଫୋନ୍ କଲ ପାଇବା ପରେ ସମୟ, ସୁବିଧା ଦେଖି ଗ୍ରାହକଙ୍କ ନିକଟରେ ମଦ ପଂହଚି ଯାଉଛି । ଏ ଦିଗରେ ପୁଲିସ ଓ ଅବକାରୀ ବିଭାଗୀୟ ଅଧିକାରୀ ଦୃଷ୍ଟି ଦେଇ ଚୋରାରେ ମଦ, ସିଗାରେଟ, ଗୁଟଖା ଏବଂ ବିଭିନ୍ନ ପାନମସଲା ବିକ୍ରି କରୁଥିବା ବ୍ୟବସାୟୀକ ଅନୁଷ୍ଠାନ ଉପରେ ଚଢାଉ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୁଦ୍ଧିଜୀବି ମହଲରେ ଦାବି ହେଉଛି ।
