ତାଲିବାନଙ୍କ ଦଖଲରେ ଥିବା ଆଫଗାନିସ୍ତାନରୁ ଆଶ୍ୱସ୍ତ କରିବା ଭଳି ଖବର ଆସିଛି

ଓଡ଼ିଶା ତାଜା ନ୍ୟୁଜ (୨୧ ଅଗଷ୍ଟ ଶନିବାର ) ନୂଆଦିଲ୍ଲୀ :- ଆଜି ସକାଳେ କାବୁଲ ଏୟାରପୋର୍ଟରୁ ତାଲିବାନୀମାନେ ୧୫୦ ଭାରତୀୟଙ୍କୁ ଅପହରଣ କରିଥିବା ଘଟଣାରେ ନୂଆ ଟ୍ୱିଷ୍ଟ ଆସିଛି । ତାଲିବାନୀ ନିଜ ସାଙ୍ଗରେ ନେଇ ଯାଇଥିବା ୧୫୦ ଭାରତୀୟଙ୍କୁ ଏବେ ସୁରକ୍ଷିତ କାବୁଲ ଏୟାରପୋର୍ଟରେ ଛାଡ଼ି ଦେଇଛନ୍ତି । ସେମାନଙ୍କୁ ଏୟାରପୋର୍ଟରୁ ନେବା ପରେ କେବଳ ନିକଟସ୍ଥ ଗୋଟିଏ ଥାନାରେ ଜେରା କରାଯାଇଥିଲା। ଏହାପରେ ସେମାନଙ୍କୁ ଏୟାରପୋର୍ଟକୁ ଅଣା ଯାଇଥିବା ଜଣାପଡ଼ିଛି । ସେମାନେ ଏବେ ଏୟାରପୋର୍ଟରେ ଥିବାରୁ ଖୁବଶୀଘ୍ର ଭାରତ ଫେରିବେ ।

ମିଳିଥିବା ସୂଚନା ଅନୁଯାୟୀ, ଯୁଦ୍ଧ ଗ୍ରସ୍ତ ଆଫଗାନରୁ ଭାରତ ଆସିବା ଲକ୍ଷ୍ୟ ନେଇ ଶତାଧିକ ଭାରତୀୟ ଆଜି ସକାଳୁ କାବୁଲ ଏୟାରପୋର୍ଟରେ ଅପେକ୍ଷା କରିଥିଲେ । ଏମାନଙ୍କ ସହ କିଛି ଶିଖ ଆଫଗାନୀ ମଧ୍ୟ ରହିଥିଲେ। ତେବେ ଏୟାରପୋର୍ଟର ଗୋଟିଏ ଗେଟ୍‌ ନିକଟରେ ଏମାନେ ଅପେକ୍ଷା କରିଥିବା ବେଳେ ବନ୍ଧୁକଧାରୀ ତାଲିବାନୀ ସେଠାରେ ପହଞ୍ଚିଥିଲେ। ଏହାପରେ ସେମାନେ ଗୋଟିଏ ଟ୍ରକ୍‌ରେ ୧୫୦ ଜଣ ଭାରତୀୟଙ୍କୁ ନିଜ ସାଙ୍ଗରେ ନେଇଯାଇଥିଲେ। ପ୍ରଥମେ ଭାରତୀୟଙ୍କୁ ଅପହରଣ କରାଯାଇଥିବା ଖବର ପ୍ରକାଶ ପାଇଥିଲେ। ଏହାକୁ ସମସ୍ତଙ୍କ ଚିନ୍ତା ବଢ଼ି ଯାଇଥିଲା। ତେବେ ତାଲିବାନର ଜଣେ ମୁଖପାତ୍ର ଏହାକୁ ଖଣ୍ଡନ କରିବା ସହ ସମସ୍ତଙ୍କୁ ନିକଟସ୍ଥ ପୁଲିସ୍‌ ଷ୍ଟେସନକୁ ପଚରାଉଚରା କରିବାକୁ ନିଆଯାଇଥିବା କହିଥିଲେ।

ଥାନାରେ ଭାରତୀୟମାନେ ପହଞ୍ଚିବା ପରେ ସେମାନଙ୍କୁ ବିଭିନ୍ନ ପ୍ରଶ୍ନ କରାଯାଇଥିଲା। ଏହାପରେ ସମସ୍ତଙ୍କର ଟ୍ରାଭେଲ ଡକ୍ୟୁମେଣ୍ଟ ଯାଞ୍ଚ କରାଯାଇଥିଲା। ସବୁ କିଛି ଯାଞ୍ଚ କରିବା ପରେ ସମସ୍ତଙ୍କୁ ଏୟାରପୋର୍ଟରେ ଛାଡ଼ି ଦିଆଯାଇଛି। ଏବେ ସେମାନେ ଏୟାରପୋର୍ଟରେ ଭାରତୀୟ ଉଦ୍ଧାରକାରୀ ବିମାନ ଅପେକ୍ଷାରେ ରହିଛନ୍ତି । ଅନ୍ୟପକ୍ଷରେ ଭାରତ ତା’ର ଉଦ୍ଧାର ଅପପରେସନ ମିଶନରେ ସାମାନ୍ୟ ପରିବର୍ତ୍ତନ କରିଛି। ପୂର୍ବରୁ ଦୁଇଥର ଭାରତ ସି-୧୭ ବିମାନ ଦ୍ୱାରା କାବୁଲରୁ ଭାରତୀୟଙ୍କୁ ସିଧାସଳଖ ସ୍ୱଦେଶ ଆଣୁଥିଲା ।

ହେଲେ ଏବେ ତାଜିକିସ୍ତାନରୁ ଅପରେସନ କରାଯାଇଛି। ଆଜି ସକାଳେ ଭାରତ ସରକାର କାବୁଲରୁ ପ୍ରଥମେ ୮୫ ଭାରତୀୟଙ୍କୁ ସି-୧୩୦ଜେ ବିମାନ ଦ୍ୱାରା ତାଜିକିସ୍ତାନ ଆଣିଥିଲେ । ସେଠାରୁ ସି-୧୭ ବିମାନରେ ସମସ୍ତଙ୍କୁ ସ୍ୱଦେଶ ଅଣାଯାଉଛି । ଆଗକୁ ମଧ୍ୟ ଏପରି ଅପରେସନ କରାଯିବ ବୋଲି ଜଣାପଡ଼ିଛି । ତାଲିବାନ କାବୁଲ ଦଖଲ କରିବା ପରେ ଭାରତ ସରକାର ଶନିବାର ସୁଦ୍ଧା ୧୫୦ ଭାରତୀୟଙ୍କୁ ସ୍ୱଦେଶ ଆଣିବାକୁ ସକ୍ଷମ ହୋଇଛନ୍ତି । ଏମାନଙ୍କ ମଧ୍ୟରେ ଦୂତାବାସ କର୍ମଚାରୀ ମଧ୍ୟ ରହିଛନ୍ତି । ଏବେ ବି ଆଫଗାନର ବିଭିନ୍ନ ପ୍ରାନ୍ତରେ ୧୦୦୦ରୁ ଅଧିକ ଭାରତୀୟ ଫସି ରହିଛନ୍ତି । ସେହିପରି ଆଫଗାନ ଶିଖ ଓ ହିନ୍ଦୁମାନଙ୍କୁ ମଧ୍ୟ ଭାରତ ସରକାର ସ୍ୱଦେଶ ଆଣିବେ ବୋଲି ଯୋଜନା କରିଛନ୍ତି ।