ଏ.କେ.ଏମ୍‍ ଆଗ୍ରୋ ବିଶ୍ୱଭରୀ କାଜୁ ବାଦାମ ଶିଳ୍ପ ପାଇଁ ଆଦର୍ଶ ହେବାକୁ ଉଦ୍ଦିଷ୍ଟ

ଓଡ଼ିଶା ତାଜା ନ୍ୟୁଜ (୧୯ ଜୁଲାଇ ସୋମବାର) ଭୁବନେଶ୍ୱର/ଦୁବାଇ :- ଓଡ଼ିଶାରେ କାଜୁବାଦାମ ଶିଳ୍ପର ପ୍ରୋତ୍ସାହନ, ଏହାର ପ୍ରସାର ଏବଂ ଦେଶବିଦେଶରେ ଓଡ଼ିଶା ମାର୍କା କାଜୁକୁ ଲୋକପ୍ରିୟ କରିବା କ୍ଷେତ୍ରରେ ଏ.କେ.ଏମ୍‍ ଆଗ୍ରୋ ଗ୍ରୁପ୍‍ ଅଗ୍ରଣୀ ଭୂମିକା ଗ୍ରହଣ କରିଥିବା ଜଣାଯାଇଛି । ରାଜ୍ୟରେ କାଜୁ ବାଦାମର ଚାଷ, ଅମଳ, ଉତ୍ପାଦନ, ଚାଷୀଙ୍କଠାରୁ ସମୟକ୍ରମେ ସଂଗ୍ରହ, ଫସଲର ପ୍ରକ୍ରୀୟାକରଣ ଏବଂ ଏହାର ବିକ୍ରୟ ତଥା ରପ୍ତାନୀ ଆଦି କ୍ଷେତ୍ରରେ ଏ.କେ.ଏମ୍‍ ଏକ ବୈପ୍ଳବିକ ପରିବର୍ତ୍ତନ ଆଣିଥିବା ପରିଲ୍ଲଖିତ କରାଯାଉଛି ।

ଫଳସ୍ୱରୂପ କାଜୁ ବ୍ୟାପାର ବ୍ୟାପକମାତ୍ରା ବୃଦ୍ଧି ପାଇବା ସହିତ ଦେଶ ତଥା ରାଜ୍ୟର ଆର୍ଥିକ ଅଭିବୃଦ୍ଧି କ୍ଷେତ୍ରରେ ଏହାର ଅନୁଦାନ ବହୁଗୁଣିତ ହୋଇପାରିଥିବା ବିଶେଷଜ୍ଞମାନଙ୍କ ସୂତ୍ରରୁ ପ୍ରକାଶ । ବିଶେଷ କରି କରୋନା ମହାମାରୀ ଜନିତ ବଜାରର ଅର୍ଥନୈତିକ ମାନ୍ଦା ପରିସ୍ଥିତିକୁ ଭ୍ରୁକ୍ଷେପ ନ କରି ଏ.କେ.ଏମ୍‍ ଯେଭଳି ଏହାର ବ୍ୟବସାୟକୁ ବଢ଼ାଇ ଚାଲିଛି, ତାହା ଆମର ରାଜକୋଷ ପାଇଁ ବରଦାନ ସ୍ଥାପିତ ହୋଇଥିବା ଲକ୍ଷ କରାଯାଉଛି । ୨୦୧୭ ମସିହାରେ ପ୍ରତିଷ୍ଠିତ ଏ.କେ.ଏମ୍‍. ଆଗ୍ରୋ ପ୍ରୋସେସିଂ ପ୍ରାଇଭେଟ୍‍ ଲିମିଟେଡ୍‍ର ଖୋର୍ଦ୍ଧା ଶିଳ୍ପାଞ୍ଚଳ ଇଲାକାସ୍ଥିତ ପ୍ରକ୍ରିୟାକରଣ କାରଖାନାକୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ୨୦୧୯ ମସିହା ଫେବୃଆରୀ ୨୪ ତାରିଖରେ ଉଦ୍‍ଘାଟନ କରିଥିଲେ ।

ପ୍ରଥମେ ବିଶ୍ୱସ୍ତରୀୟ ଅତ୍ୟାଧୁନିକ ବୈଷୟିକ ଉପକରଣ ସହିତ ଖାଇବା ତେଲ ଓ ପନିପରିବାର ପ୍ରକ୍ରିୟାକରଣ କାର୍ଯ୍ୟ ଏ.କେ.ଏମ୍‍ ଗତବର୍ଷ ଆରମ୍ଭ କରିଥିଲା । ଚଳିତ ବର୍ଷ ହିଁ କମ୍ପାନୀ କାଜୁ ବାଦାମ ବ୍ୟାପାର କ୍ଷେତ୍ରରେ ପ୍ରବେଶ କରିଛି । ଓଡ଼ିଶାରେ ମୁଖ୍ୟତଃ ଛୋଟ ଏବଂ ନାମମାତ୍ର କୃଷକମାନେ କାଜୁ ବାଦାମ ଚାଷ କରୁଛନ୍ତି । ରାଜ୍ୟରେ ବଜାରଗତ ସୁବିଧା ସୁଯୋଗ ଅଭାବରୁ ଚାଷୀମାନେ ପ୍ରାୟତଃ ଅଭାବୀ ବିକ୍ରିର ଶୀକାର ହେଉଛନ୍ତି । ପରିସ୍ଥିତିର ଫାଇଦା ନେଇ ପଡ଼ୋଶୀ ରାଜ୍ୟର ବ୍ୟାପାରୀମାନେ ଶାଗ, ମାଛ ଭାଉରେ ଏହି ଚାଷୀମାନଙ୍କଠାରୁ କାଜୁ ଖରିଦ କରି ନେଉଛନ୍ତି ।

ଏ.କେ.ଏମ୍‍ର ଆବିର୍ଭାବ ଘଟିବା ପରେ କାଜୁ କୃଷକମାନଙ୍କର ଏହି ସମସ୍ୟା ଅନେକାଂଶରେ ଦୂରୀଭୂତ ହୋଇଥିବା ଲକ୍ଷ କରାଯାଉଛି । ଏ.କେ.ଏମ୍‍ ମଝିରେ କୌଣସି ଦଲାଲ ବା ଠିକାଦାରଙ୍କ ଜରିଆରେ ନଯାଇ ସିଧାସଳଖ ଚାଷୀଙ୍କଠାରୁ କାଜୁ କିଣୁଥିବା ଦେଖାଯାଉଛି । ଫଳସ୍ୱରୂପ ଉତ୍ପାଦନକାରୀମାନେ ତାଙ୍କ ଫସଲର ସର୍ବାଧୀକ ଦର ହାସଲ କରିପାରୁଛନ୍ତି । କମ୍ପାନୀ ସ୍ୱୟଂ ଖରିଦ କରୁଥିବାରୁ ଦ୍ରବ୍ୟର ଗୁଣବତ୍ତାର ମାନ ପ୍ରତିନ୍ଦ୍ୱନ୍ଦୀ ଓ ଆନ୍ତର୍ଜାତୀୟ ବଜାର ଉପଯୋଗୀ ହେବା ଦିଗରେ ମଧ୍ୟ ଧ୍ୟାନ ଦିଆଯାଉଛି । ଓଡ଼ିଶାରେ ସାଧାରଣତଃ କାଜୁ ଅମଳ ମେ’, ଜୁନ୍‍ ମାସରେ କରାଯାଇଥାଏ ।

ଏ.କେ.ଏମ୍‍ର ୧୭ ଏକର ପରିମିତ ଖୋର୍ଦ୍ଧା କାରଖାନାର ଭଣ୍ଡାର ଗୃହରେ ବ୍ୟାପକ ମାତ୍ରାରେ ଶସ୍ୟ ନିରାପଦରେ ରକ୍ଷଣାବେକ୍ଷଣ ପାଇଁ ଆଧୁନିକ ବ୍ୟବସ୍ଥା ମହଯୁଦ ରହିଛି । କମ୍ପାନୀ ଦ୍ୱାରା ସଂଗୃହୀତ କାଜୁକୁ ଏହିଠାରେ ହିଁ ରଖାଯାଉଛି । ରାଜ୍ୟରେ ଉତ୍ପାଦନ ହେଉଥିବା ପୁରା ପରିମାଣ କାଜୁର ପ୍ରକ୍ରିୟାକରଣ ମାତ୍ର ଦୁଇ/ତିନି ମାସ ମଧ୍ୟରେ ସମ୍ପୂର୍ଣ୍ଣ ହୋଇଯାଇଥାଏ । ଆଞ୍ଚଳିକ ପ୍ରକ୍ରିୟାକରଣ ୟୁନିଟ୍‍ମାନେ ସେମାନଙ୍କର ବ୍ୟବସାୟକୁ ବାର ମାସ ଚାଲୁ ରଖିବା ପାଇଁ ଆନ୍ଧ୍ରପ୍ରଦେଶ, ତାମିଲନାଡ଼ୁ, କେରଳ ଆଦି ରାଜ୍ୟ ଏବଂ ଆଫ୍ରିକାରୁ ଅଣାଯାଉଥିବା ବିଦେଶୀ କାଜୁ ବାଦାମ ଉପରେ ନିର୍ଭର କରିଥାନ୍ତି । ଏହାଦ୍ୱାରା ସେମାନେ ଅକଥନୀୟ ଦୁଃଖଦୁର୍ଦ୍ଦଶା ଭୋଗିଥାନ୍ତି ।

ଏହିଠାରେ ଏ.କେ.ଏମ୍‍ର ହସ୍ତକ୍ଷେପ ରାଜ୍ୟର ପ୍ରକ୍ରିୟାକରଣ ୟୁନିଟ୍‍ମାନଙ୍କୁ ବହୁଭାବରେ ସାହାଯ୍ୟ କରିବାରେ ଲାଗିଛି । ବିନା ଉତ୍ପାଦନକାରୀ ମାସଗୁଡ଼ିକରେ ଏ.କେ.ଏମ୍‍ ବ୍ୟାପାରୀମାନଙ୍କୁ ଏହାର ଖୋର୍ଦ୍ଧାସ୍ଥିତ ଗୋଦାମରୁ କାଜୁ ବାଦାମ ଯୋଗାଇ ଦେଇଆସୁଛି । ଯାହାଦ୍ୱାରା କି ଅନବରତ ପ୍ରକ୍ରିୟାକରଣ ପ୍ରକ୍ରିୟାରେ ଆଉ ଲଗାମ ଲାଗୁନାହିଁ । ଅର୍ଥାତ୍‍ ପ୍ରକ୍ରିୟାକରଣ ପର୍ଯ୍ୟାୟକୁ ବର୍ଷତମାମ ଜାରି ରଖିବା ଓ ଏ ବାବଦରେ ନିଯୁକ୍ତ କର୍ମଚାରୀ ମାନଙ୍କୁ ଛଟେଇ ନ କରାଯିବା ଦିଗରେ ଏ.କେ.ଏମ୍‍ ବିଶେଷ ଧ୍ୟାନ ଦେବା ସହିତ ସ୍ଥାନୀୟ ବଜାରରେ କଞ୍ଚାମାଲ ନିଅଣ୍ଟକୁ ନିଜ ସଞ୍ଚୟରୁ ଭରଣା କରିବା ଭଳି ସୁକାର୍ଯ୍ୟ ଚାଲୁ ରଖିଛି ।

ଆର୍ନ୍ତଜାତିକ ବାଣିଜ୍ୟ ଓ ବ୍ୟାପାର ବାବଦରେ ଦୀର୍ଘ ଅଭିଜ୍ଞତା ରଖିଥିବା ଏ.କେ.ଏମ୍‍ର ପରିଚାଳନା କର୍ତ୍ତୃପକ୍ଷ ପୃଥିବୀର ବୃହତ୍‍ କାଜୁ ଉତ୍ପାଦନକାରୀ ଦେଶମାନଙ୍କ ସହିତ ଉତ୍ତମ ଯୋଗାଯୋଗ ରକ୍ଷା କରିଆସୁଛନ୍ତି । ବିଶ୍ୱ ବଜାରରେ କାଜୁ ଉତ୍ପାଦନରେ ଆଇଭରୀ କୋଷ୍ଟ ଏବଂ ଭାରତ ମୁଖ୍ୟତଃ ଅଗ୍ରଣୀ ରହିଆସିଛି । ୨୦୧୯ ମସିହାରେ ସାରା ପୃଥିବୀରେ ୪୦ଲକ୍ଷ ଟନ୍‍ର କାଜୁ ବାଦାମ ଉତ୍ପାଦନ ହୋଇଛି । ଏ.କେ.ଏମ୍‍ ଏବେ ମଧ୍ୟପ୍ରାଚ୍ୟ, ଭିଏତ୍‍ନାମ ଏବଂ ପଶ୍ଚିମ ଆଫ୍ରିକାକୁ କାଜୁ ବାଦାମ ରପ୍ତାନୀ କରୁଥିବା ଜଣାଯାଇଛି । ଏ.କେ.ଏମ୍‍ର ଦାତବ୍ୟ କାର୍ଯ୍ୟକ୍ରମ ମଧ୍ୟରେ ଚଳିତ ମହାମାରୀ କାଳରେ ଖୋର୍ଦ୍ଧାର ଅସହାୟ ଜନସାଧାରଣଙ୍କ ମଧ୍ୟରେ ଶୁଖିଲା ଖାଦ୍ୟ ସାମଗ୍ରୀ ରିଲିଫ ଆକାରରେ ବଣ୍ଟନ କରାଯିବା ଉଲ୍ଲେଖଯୋଗ୍ୟ ।

ଚଳିତ ବର୍ଷ ୩୦ କୋଟି ଟଙ୍କାର ବ୍ୟବସାୟ କରିଥିବା ଏ.କେ.ଏମ୍‍ ‘ମେକ୍‍ ଇନ୍‍ ଓଡ଼ିଶା’ ଧ୍ୱନୀକୁ ସାକାର କରିବା ସହିତ ରାଜ୍ୟରେ ବ୍ୟାପାରର ବାତାବରଣକୁ ‘ଭୋକାଲ ଫର୍‍ ଲୋକାଲ’ ଅର୍ଥାତ୍‍ ସ୍ଥାନୀୟ ଉତ୍କର୍ଷତାର ଆଧାରରେ ବାସ୍ତବଧର୍ମୀ ରୂପ ଦେବାକୁ ଚାହୁଁଥିବା ଏହାର ଯୁବ, କର୍ମଠ ଓ କୁଶଳୀ ଅଧ୍ୟକ୍ଷ ଅଜୀତ କୁମାର ମିଶ୍ର ପ୍ରକାଶ କରିଛନ୍ତି । ଶିଳ୍ପ ଜଗତରେ ଏ.କେ.ଏମ୍‍ ଆଗ୍ରୋ ୟୁନିଟ୍‍ର ଆଦର୍ଶରେ ଦେଶ ବିଦେଶର ଶିଳ୍ପସଂସ୍ଥାମାନେ ନିଶ୍ଚିତ ଭାବେ ଅନୁପ୍ରାଣିତ ହେବେ ଏବଂ ସେମାନଙ୍କ ପାଇଁ ଏହା

ଏକ ‘ରୋଲ୍‍ ମଡେଲ’ ସ୍ଥାପିତ ହେବ ବୋଲି ଦୁବାଇରେ ଅବସ୍ଥାପିତ ଏ.କେ.ଏମ୍‍ ଆଗ୍ରୋର ନିର୍ଦ୍ଦେଶକ,ଅଧ୍ୟକ୍ଷ ଅଜିତ କୁମାର ମିଶ୍ର ମତବ୍ୟକ୍ତ କରିଛନ୍ତି । ବ୍ୟବସାୟ କରିବା ସାଙ୍ଗକୁ ଓଡ଼ିଶାର ଗାଁ ଗହଳିରେ ବାତାବରଣର ଦୂଷିତକରଣକୁ ରୋକିବା ଏବଂ ପରିବେଶଗତ ସନ୍ତୁଳନକୁ ରକ୍ଷା କରାଯିବା ପାଇଁ ଏ.କେ.ଏମ୍‍ ସତତଃ ପ୍ରୟାସରତ ଓ ପ୍ରତିଜ୍ଞାବଦ୍ଧ ବୋଲି ଏହାର ଅନ୍ୟତମ ନିର୍ଦ୍ଦେଶକ ଭବାନୀ ଶଙ୍କର ସ୍ୱାମୀ ଘୋଷଣା କରିଛନ୍ତି ।