ସରକାରୀ ଗୋଚର ଓ ପତ୍ରାଲ ଜମିଚାଷରେ ଗୋରୁ ଚରାଇବା ନିଷ୍ପତ୍ତି ନେଲେ ପଲମ ଗ୍ରାମବାସୀ

ଓଡ଼ିଶା ତାଜା ନ୍ୟୁଜ୍ (୦୯ ଜୁଲାଇ ଶୁକ୍ରବାର ) କଳାହାଣ୍ଡି :- କଳାହାଣ୍ଡି ଜିଲ୍ଲା ନର୍ଲା ବ୍ଲକ୍ ଅନ୍ତର୍ଗତ ପଲମ ଗ୍ରାମ ପଞ୍ଚାୟତ ସ୍ଥିତ ପଲମ ମୌଜାରେ ମୋଟ ୭୦୦ ଏକର ସରକାରୀ ଗୋଚର ଓ ପତ୍ରାଲ ଜମି ରହିଛି ।ଯାହାକି ଗ୍ରାମର ଗାଈଗୋରୁ ଚରିବା ପାଇଁ ଉଦ୍ଧିଷ୍ଟ ।କିନ୍ତୁ ଉକ୍ତ ଜମିକୁ ଗ୍ରାମର କେତେକ ଖଳ ପ୍ରକୃତିର ଲୋକେ ଅନେକ ବର୍ଷ ହେଲା ଜବରଦଖଲ କରି ଚାଷ କରି ଆସୁଛନ୍ତି ।ଯାହା ଫଳରେ ଗାଈଗୋରୁ ଚରିବା ପାଇଁ ଜାଗା ନପାଇ ଭୋକରେ ଆଉଟୁ ପାଉଟୁ ହୋଇ ଅସୁବିଧା ଭୋଗୁଥିଲେ ।ଚାଷ ସମୟରେ ଗାଈଗୋରୁ ଚରିବା ପାଇଁ କୌଣସି ଜାଗା ଖାଲିନ ଥିବାରୁ ଚାଷବାସ ଗାଈଗୋରୁ ଖାଇ ମଧ୍ୟ ନଷ୍ଟ ହେଉଥିଲା । ଏହାକୁ ଦୃଷ୍ଟିରେ ରଖି ଗ୍ରାମବାସୀ ମାନେ ଏହା ବିରୋଧରେ ଏକ କମିଟି କରି ସ୍ଥାନୀୟ ରାଜସ୍ଵ ନିରିକ୍ଷକ ପଲମ ,ନର୍ଲା ତହସିଲଦାର ,କଳାହାଣ୍ଡି ଜିଲ୍ଲାପାଳ ଓ ସ୍ଥାନୀୟ ବିଧାୟକଙ୍କୁ ଜବରଦଖଲ ଉଚ୍ଛେଦ ପାଇଁ ଲିଖିତ ଅଭିଯୋଗ କରିଥିଲେ ।କିନ୍ତୁ ପ୍ରଶାସନ ଏହାକୁ ହାଲୁକା ଭାବେ ଗ୍ରହଣ କରି କେବଳ ସମସ୍ତ ଜମିକୁ ଚିହ୍ନଟ କରି ଦଖଲକାରୀଙ୍କୁ କେତେ ଟଙ୍କାର ଇନକ୍ରୁଜ୍ ରସିଦ୍ କାଟି କୌଣସି ଦୃଷ୍ଟାନ୍ତ ମୂଳକ ପଦକ୍ଷେପ ନେଇନଥିଲେ ।ଯାହାକି ଗ୍ରାମବାସୀଙ୍କୁ ବହୁତ ବାଧିଥିଲା ।

ଏପରି ଭାବରେ ତିନି ବର୍ଷ ବିତିଯାଇଥିଲେ ମଧ୍ୟ ଏହି ଜମିରେ ଜବରଦଖଲ ଉଚ୍ଛେଦ ହୋଇନଥିଲା । କେତେକ ଲୋକ ନୈତିକତା ଦୃଷ୍ଟିରୁ ୨ବର୍ଷ ଚାଷ ନ କରି ଜମି ଛାଡିଦେଇଥିଲେ ଏବଂ କେତେକ ଲୋକେ ଦଖଲ କରି ଚାଷ କରୁଥିଲେ । କିନ୍ତୁ ତିନିବର୍ଷ ପରେ ପୁଣିଥରେ ସେହିଜମିରେ ସେହି ଲୋକମାନେ ଦଖଲ କରି ଚାଷ କରିଛନ୍ତି । ଏମିତି ଭାବରେ ଦଖଲ କରି ଚାଷ କରିଛନ୍ତି ଯେ ଗାଈଗୋରୁ ଚରିବା ତ ଦୂରର କଥା ମଣିଷ ଚାଲିଯିବା ପାଇଁ ରାସ୍ତା ମଧ୍ୟ ନାହିଁ । ଏହାକୁ ଗ୍ରାମବାସୀ ମାନେ ମନା କରିବାରୁ ଗ୍ରାମବାସୀଙ୍କୁ ଦଖଲକାରୀ ମାନେ ଗାଳି ଗୁଲଜ କରି ଝଗଡା କରୁଛନ୍ତି । ଏହାକୁ ଦୃଷ୍ଟିରେ ରଖି ପଲମ ସରପଞ୍ଚଙ୍କ ସ୍ଵାମୀ ଶ୍ରୀ ବେଣୁଧର ମାଝୀଙ୍କ ଅଧ୍ୟକ୍ଷତାରେ ଏକ ବୈଠକ ଗ୍ରାମବାସୀଙ୍କ ଦ୍ଵାରା ଆୟୋଜନ କରି ଏହାର ତର୍ଜମା କରାଯାଇ ପରିଶେଷରେ ଉକ୍ତ ଦଖଲ ହୋଇ ଚାଷ ହେଉଥିବା ସରକାର ଗୋଚର ଓ ପତ୍ରାଲ ଜମିରେ ହଳ ଓ ଗାଈଗୋରୁ ପଶାଇ ଚରାଇବାର ନିଷ୍ପତ୍ତି ନେଇ ସର୍ବସମ୍ମତ୍ତି କ୍ରମେ ଗୃହିତ କରାଯାଇ କଳାହାଣ୍ଡି ଜିଲ୍ଲାପାଳ ,ନର୍ଲା ତହସିଲଦାର ,ପଲମ ଫାଣ୍ଡି ଭାରପ୍ରାପ୍ତ ଅଧିକାରୀ ଓ ପଲମ ରାଜସ୍ଵ ନୀରିକ୍ଷକଙ୍କୁ ଭେଟି ଏକ ଏକ ଦାବିପତ୍ର ଦେବାପାଇଁ ସ୍ଥିର ହୋଇଥିଲା ।

ପରେ ଗ୍ରାମବାସୀ ମାନେ ପଲମ ଫାଣ୍ଡିକୁ ଯାଇ ଏ ଏସ୍ ଆଇ ଶ୍ରୀ ଅସିତ୍ କୁମାର ପଣ୍ଡାଙ୍କୁ ଭେଟି ଏକ ଦାବିପତ୍ର ଦେଇଥିଲେ । ଏଥିରେ ପଲମ ଗ୍ରା/ପ ସମିତି ସଭ୍ୟାଙ୍କ ସ୍ଵାମୀ ଶ୍ରୀ ବୈଲୁଚନ ମାଝୀ ,ପୂର୍ବତନ ସରପଞ୍ଚ ଶ୍ରୀ ମହେନ୍ଦ୍ର କୁମାର ଭୋଇ ,ପୂର୍ବତନ ସମିତି ସଭ୍ୟ ଶ୍ରୀ ପୁରୁନ୍ଦର ସାହୁ ,ଶ୍ରୀ ନଟବର ସାହୁ ,ଶ୍ରୀ ବୈଦ୍ୟନାଥ ମାଝୀ ,ଶ୍ରୀ ହେମରାଜ ମାଝୀ ,ଶ୍ରୀ ସୁକରଧନ ସାହୁ ,ଶ୍ରୀ ଜଗନ୍ନାଥ ସାହୁଙ୍କ ସମେତ ଗ୍ରାମର ବହୁମାନ୍ୟଗଣ୍ୟ ବ୍ୟକ୍ତି ଏବଂ ଗ୍ରାମବାସୀମାନେ ଯୋଗଦେଇଥିଲେ । (ରିପୋର୍ଟ ପ୍ରଦୀପ କୁମାର ଗଉଡ କଳାହାଣ୍ଡି ବ୍ୟୁରୋ ଚିଫ)