ଭୁବନେଶ୍ୱର (ଓଡିଶା ତାଜା ନ୍ୟୁଜ୍ ) ଭୁବନେଶ୍ୱର 2020 :- ଆସନ୍ତା ମାର୍ଚ୍ଚ ୧୫ରେ ଅନୁଷ୍ଠିତ ହେବ ୧୦ମ ରୁଚି ଓଡ଼ିଶା ଫିଲ୍ମ ଫେୟାର ଆୱାର୍ଡ୍ସ । ଜନତା ମଇଦାନ ଠାରେ ଆୟୋଜିତ ହେବ ଓଲିଉଡର ଏହି ସର୍ବବୃହତ ଓ ଲୋକପ୍ରିୟ ଚଳଚ୍ଚିତ୍ର ପୁରସ୍କାର ଉତ୍ସବ । ଓଡ଼ିଶାର ଅଗ୍ରଣୀ ଇଭେଣ୍ଟ ମ୍ୟାନେଜମେଣ୍ଟ ପ୍ରତିଷ୍ଠାନ ହ୍ୱାଇଟ୍ କାନ୍ଭାସ୍ ଓ ଓଡ଼ିଶା ଫିଲ୍ମ ଫେୟାର(ଓଫା) ଫାଉଣ୍ଡେସନ୍ ଆନୁକୁଲ୍ୟ ରେ ପ୍ରତିଷ୍ଠିତ ମସଲା ଉଦ୍ୟୋଗ ରୁଚି ସହଯୋଗରେ ଏହି ଉତ୍ସବ ଆୟୋଜିତ ହେଉଛି ବୋଲି ସାମ୍ବାଦିକ ସମ୍ମିଳନୀରେ ସୂଚନା ଦିଆଯାଇଛି । ଏହି ଅବସରରେ ଚଳିତ ବର୍ଷ ସମ୍ମାନ ଜୀବନବ୍ୟାପୀ ସାଧନା ପୁରସ୍କାର ପ୍ରଖ୍ୟାତ ଅଭିନେତା ଅଜିତ ଦାସଙ୍କୁ ପ୍ରଦାନ କରାଯିବ । ପୁରସ୍କାର ସ୍ଵରୂପ ତାଙ୍କୁ ୨୫ହଜାର ଟଙ୍କା, ମାନପତ୍ର ଓ ଟ୍ରଫି ପ୍ରଦାନ କରାଯିବ । ଏହା ବ୍ୟତୀତ ବିଭିନ୍ନ ବର୍ଗରେ ୨୬ଟି ପୁରସ୍କାର ପ୍ରଦାନ କରାଯିବ ।
ଚଳିତ ବର୍ଷ ଶ୍ରେଷ୍ଠ ସ୍ପଟ୍ ବୟ ପୁରସ୍କାର ମଧ୍ୟ ଦିଆଯିବ । ପୁରସ୍କାର ସ୍ୱରୂପ ୧୦ହଜାର ଟଙ୍କା, ମାନପତ୍ର, ଟ୍ରଫି ପ୍ରଦାନ କରାଯିବ । “ଓଫା’ର ମିଡିଆ ସଂଯୋଜକ ସ୍ୱର୍ଗତ ରବି ସ୍ୱାଇଁଙ୍କ ସ୍ମୃତିରେ ରବି ସ୍ୱାଇଁ ସ୍ମାରକୀ ଶ୍ରେଷ୍ଠ ସାମ୍ବାଦିକ ପୁରସ୍କାର ପ୍ରଦାନ କରାଯିବ । ଏହି ପୁରସ୍କାର ଉତ୍ସବରେ ମୁଖ୍ୟ ଆକର୍ଷଣ ସାଜିବେ ବଲିଉଡ ଅଭିନେତ୍ରୀ କାଜଲ ଅଗ୍ରୱାଲ ଓ ଜୁନିୟର ବିଗ୍ବି ଅମିତାଭ ବଚ୍ଚନ ଭାବେ ପରିଚିତ ମୁମ୍ବାଇ ପୁନେର ଶଶିକାନ୍ତ ପେଡୱାଲ । ମଞ୍ଚରେ ଦର୍ଶକଙ୍କ ନିମନ୍ତେ ଓଲିଉଡ କଳାକାର ଓ ବିଭିନ୍ନ ପ୍ରତିଷ୍ଠିତ ନୃତ୍ୟାନୁଷ୍ଠାନ, ହାସ୍ୟାଭିନେତାଙ୍କ ଦ୍ୱାରା ସାଂସ୍କୃତିକ ତଥା ରଙ୍ଗାରଙ୍ଗ କାର୍ଯ୍ୟକ୍ରମ ହେବ । ଉପସ୍ଥିତ ଦର୍ଶକମାନେ ଜୁନିୟର ବିଗ୍ ବିଙ୍କ ସହ କୁଇଜ୍ କାର୍ଯ୍ୟକ୍ରମରେ ସାମିଲ ହୋଇ ଯଥାକ୍ରମେ ୨୦ହଜାର, ୧୫ହଜାର ଏବଂ ୧୦ହଜାର ଟଙ୍କାର ନଗଦ ଅର୍ଥରାଶି ଜିତି ପାରିବେ । ସାମ୍ବାଦିକ ସମ୍ମିଳନୀ ପ୍ରାରମ୍ଭରେ ସ୍ୱର୍ଗତ ରବି ସ୍ୱାଇଁଙ୍କ ସ୍ମୃତିରେ ୧ମିନିଟ୍ ନୀରବ ପ୍ରାର୍ଥନା କରା ଯାଇଥିଲା ।
ଶେଷରେ “ଓଫା’ର ୱେବ୍ସାଇଟ୍କୁ ଏହାର ବ୍ରାଣ୍ଡ୍ ଆମ୍ବାସଡର ଅଭିନେତା ଶୁଭାଶିଷ ଶର୍ମା (ମଣ୍ଟୁ) ଉନ୍ମୋଚନ କରିଥିଲେ । ଅଭିନେତା ଗୁଡ୍ଡୁ ଏବଂ ନଟିଆ (ସ୍ମୃତି) ଉପସ୍ଥିତ ଥିଲେ । ସାମ୍ବାଦିକ ସମ୍ମିଳନୀରେ “ଓଫା’ ପ୍ରତିଷ୍ଠାତା ଓ ଅଧ୍ୟକ୍ଷ ଉଲ୍ଲାସ ଚନ୍ଦ୍ର ବେହେରା, ଉପାଧ୍ୟାକ୍ଷ ସ୍ମୃତିଶକ୍ତି ସାମନ୍ତରାୟ,ଆବାହକ ଡ. ମନୋଜ କୁମାର ଦାଶ, ମୁଖ୍ୟ ଉପଦେଷ୍ଟା ବାପୁ ଲେଙ୍କା, ନିର୍ଦ୍ଦେଶକ ଚିଣ୍ଟୁ ମିଶ୍ର, ରୁଚି ମସଲାର ପରିଚାଳନା ନିର୍ଦ୍ଦେଶକ ଡ. ଶରତ କୁମାର ସାହୁ, ରୁଚିର ନିର୍ଦ୍ଦେଶକ ଅରବିନ୍ଦ ସାହୁ, “ଓଫା’ର ନିର୍ଦ୍ଦେଶକ ସୌମ୍ୟଜିତ ପରିଡ଼ା, ଅମୃତରଞ୍ଜନ ଦାଶ, ଜ୍ଞାନରଞ୍ଜନ ରାୟ, ଉପଦେଷ୍ଟା ପ୍ରଶାନ୍ତ ମହାନ୍ତି, ଅଜୟ ନାୟକ, ଉତ୍କଳ କେଶରୀ ସିଂହ, ପ୍ରଦୀପ ସାହୁ, ସୌମ୍ୟନ୍ଦ୍ର ନାୟକ, ଶୁଭେନ୍ଦୁ ଦାଶ ଓ ମିଡିଆ ସଂଯୋଜକ ହରପ୍ରସାଦ ମହାପାତ୍ର ଉପସ୍ଥିତ ଥିଲେ ।
