ଅଗ୍ନିବିପନ୍ନ ପରିବାରକୁ ସହାୟତାର ହାତ ବଢାଇଲେ ମନ୍ତ୍ରୀ ଅରୁଣ

ଖବର ପାଇଲା ପରେ ତୁରନ୍ତ ମନ୍ତ୍ରୀ ଡଃ ଅରୁଣ କୁମାର ସାହୁ ସହାୟତାର ହାତ ବଢାଇଛନ୍ତି । ମନ୍ତ୍ରୀ ଡ଼ଃ ସାହୁ ସମସ୍ତ କ୍ଷତିଗ୍ରସ୍ତ ପରିବାରକୁ ବାର୍ତ୍ତା ମାଧ୍ୟମରେ ସମବେଦନା ଜଣାଇବା ସହ ସମସ୍ତ ପରିବାରର ପୁରୁଷ ମହିଳା ଏବଂ ଛୋଟଛୁଆଙ୍କ ପାଇଁ ପୋଷାକର ବ୍ୟବସ୍ଥା କରାଇଥିଲେ । ଆଗାମୀ ୭ଦିନ ପର୍ଯ୍ୟନ୍ତ ରନ୍ଧାଖାଦ୍ୟର ବ୍ୟବସ୍ଥା ସମସ୍ତ ବିପନ୍ନଙ୍କ ପାଇଁ କରିଥିଲେ ।

ଓଡ଼ିଶା ତାଜା ନ୍ୟୁଜ (୨୭ ଅପ୍ରେଲ ମଙ୍ଗଳବାର) ନୟାଗଡ଼ :- ନୟାଗଡ଼ ଜିଲ୍ଲା ଓଡ଼ଗାଁ  ଗତ କାଲି ଅପରାହ୍ନରେ ଓଡ଼ଗାଁ ବ୍ଲକ ବାଣ୍ଠପୁର ପଞ୍ଚାୟତ ପୋଡାସାହି ଗ୍ରାମର ନୂଆଁ ସାହିରେ ଅଗ୍ନିକାଣ୍ଡ ଘଟି ୨୧ ପରିବାରର ସବୁ କିଛି ଜଳି ଛାରଖାର ହୋଇଯାଇଥିଲା । ନିଆଁ ଲାଗି ସାହିରେ ଥିବା ୨୧ପରିବାରର ୩୫ ବଖରା ଘର ପୋଡି ପାଉଁଶ ହୋଇ ଯାଇଛି । ନିଆଁର ଆଁରେ ଅନେକ ପରିବାରର ଧାନ ଚାଉଳ, ଆସବାବପତ୍ର ପୋଡିଯାଇଛି । ଏହାସହ ନିଆଁ ଲାଗି ୨୫ରୁ ଅଧିକ ଛେଳି ଓ ଗୋଟିଏ ଗାଈ ଜୀବନ୍ତ ଦଗ୍ଧ ହୋଇ ଯାଇଛନ୍ତି ।

ତେବେ ନିଆଁର ପ୍ରକୋପ ଏତେ ଭୟଙ୍କର ଥିଲା ଯେ ପାଖରେ ଥିବା ନଡିଆ ଏବଂ ଆମ୍ବ ଗଛ ମଧ୍ୟ ଜଳିଯାଇଥିଲା । ଗାଁରେ ମୋବାଇଲ୍ ନେଟୱାର୍କ ନଥିବାରୁ ବିଳମ୍ବରେ ଖବର ପାଇ ଓଡ଼ଗାଁ ଓ ନୟାଗଡ଼ ଦମକଳ ବାହିନୀ ଗାଁରେ ପହଞ୍ଚିଥିଲେ । ହେଲେ ଦମକଳ ପହଞ୍ଚିବା ବେଳକୁ ସବୁ ଜଳିପୋଡି ପାଉଁଶ ହୋଇଯାଇଥିଲା । ପରିବେଶ ପୁରା ଧୂଆଁମୟ ହୋଇପଡିଥିଲା । କାଳେ କିଛି ଜିନିଷ ନିଆଁର ଆଁରୁ ବର୍ତ୍ତି ଯାଇଥିବା ସେହି ଆଶାରେ ପାଉଁଶ ଭିତରେ କେହି କେହି ଖୋଜିବାରେ ଲାଗିପଡିଥିଲେ ।

ନିଆଁ କେଉଁଠୁ ଆସିଲା ତାହା ସ୍ପଷ୍ଟ ହୋଇନଥିଲେ ମଧ୍ୟ ଜଙ୍ଗଲରୁ ନିଆଁ ଆସିଥିବା ଗ୍ରାମବାସୀ ଅଭିଯୋଗ କରିଛନ୍ତି । ନିଆଁ ଏତେ ଭୟଙ୍କର ଥିଲା ଯେ, ଘରୁ କିଛି ଜିନିଷ ଉଦ୍ଧାର କରିବା ସମ୍ବଭ ହୋଇପାରିନଥିଲା । ସ୍ଥାନୀୟ ସରପଞ୍ଚ ଏବଂ କିଛି ସ୍ବେଚ୍ଛାସେବୀ ଗାଁରେ ପହଞ୍ଚି ଲୋକଙ୍କୁ ଶୁଖିଲା ଖାଦ୍ୟ ବାଣ୍ଟିଛନ୍ତି । ମୁଣ୍ଡ ଗୁଞ୍ଜିବାକୁ ଯାଗା ନଥିବାରୁ ପ୍ରଶାସନ ତୁରନ୍ତ ସାହାଯ୍ଯ ଯୋଗାଇ ଦେବାକୁ ଅଗ୍ନି ବିପନ୍ନ ମାନେ ଅନୁରୋଧ କରିଛନ୍ତି । ସ୍ଥାନୀୟ VLW ମଧ୍ୟ ଗାଁରେ ପହଞ୍ଚି କ୍ଷୟକ୍ଷତି ଆକଳନ କରିଛନ୍ତି ।

ଖବର ପାଇଲା ପରେ ତୁରନ୍ତ ମନ୍ତ୍ରୀ ଡଃ ଅରୁଣ କୁମାର ସାହୁ ସହାୟତାର ହାତ ବଢାଇଛନ୍ତି । ମନ୍ତ୍ରୀ ଡ଼ଃ ସାହୁ ସମସ୍ତ କ୍ଷତିଗ୍ରସ୍ତ ପରିବାରକୁ ବାର୍ତ୍ତା ମାଧ୍ୟମରେ ସମବେଦନା ଜଣାଇବା ସହ ସମସ୍ତ ପରିବାରର ପୁରୁଷ ମହିଳା ଏବଂ ଛୋଟଛୁଆଙ୍କ ପାଇଁ ପୋଷାକର ବ୍ୟବସ୍ଥା କରାଇଥିଲେ । ଆଗାମୀ ୭ଦିନ ପର୍ଯ୍ୟନ୍ତ ରନ୍ଧାଖାଦ୍ୟର ବ୍ୟବସ୍ଥା ସମସ୍ତ ବିପନ୍ନଙ୍କ ପାଇଁ କରିଥିଲେ । ପ୍ରଶାସନ ତରଫରୁ ତହସିଲଦାର ବିଜୟିତା ସାମନ୍ତସିଂହାର ବିଡ଼ିଓ ସ୍ବାତୀଲେଖା ଦାସ, ଜିଲ୍ଲା ପରିଷଦ ସଭ୍ୟ ଲୋକନାଥ ସାହୁ, ବିଭୁପ୍ରସାଦ ସାହୁ ପହଞ୍ଚି ପ୍ରଥମେ ଶୁଖୁଲା ଖାଦ୍ୟର ବ୍ୟବସ୍ଥା କରିଥିବା ବେଳେ ସମସ୍ତ ବିପନ୍ନଙ୍କ ପରିବାରକୁ ଜରିପାଲ ଆଦି ପ୍ରଦାନ କରିଥିଲେ । ବିପନ୍ନଙ୍କୁ ସମସ୍ତ ପ୍ରକାର ସରକାରୀ ସୁବିଧା ଯୋଗାଇ ଦେବା ନିମନ୍ତେ ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି ।