ଲଣ୍ଡନର ଓଡ଼ିଆ ସାଂସ୍କୃତିକ ସଂଘ ଦ୍ୱାରା ଉତ୍କଳ ଦିବସ ପାଳନ

ଓଡ଼ିଶା ତାଜା ନ୍ୟୁଜ୍ (୧୨ ଏପ୍ରିଲ ସୋମବାର ) ଲଣ୍ଡନ / ମାଞ୍ଚେଷ୍ଟର / ଭୁବନେଶ୍ୱର :- ଲଣ୍ଡନସ୍ଥିତ ଓଡ଼ିଆ ସାଂସ୍କୃତିକ ସଂଘ (ଓକାଲ) ଏବଂ ଓଡ଼ିଆ ସମାଜ ୟୁ.କେ (ଓସୁକ)ର ମିଳିତ ସହଯୋଗରେ ନିକଟରେ ୮୫ତମ ଉତ୍କଳ ଦିବସ ଅନ୍‍ଲାଇନ୍‍ ଯୋଗେ ପାଳନ କରାଯାଇଛି । ଏହି ଉପଲକ୍ଷେ ଆୟୋଜିତ ଭର୍ଚ୍ଚୁଆଲ ସଭାରେ ସମ୍ମାନନୀୟ ଅତିଥି ମାନେ ଯୋଗଦେଇ ଉତ୍କଳ ଦିବସ ପାଳନର ବିଶେଷତ୍ୱ ଏବଂ ଭବିଷ୍ୟତ ପିଢ଼ୀକୁ ଓଡ଼ିଶାର ଇତିବୃତ୍ତ ସମ୍ପର୍କରେ ସଚେତନ କରାଇବାର ଆବଶ୍ୟକତା ଉପରେ ଆଲୋକପାତ କରିଥିଲେ । ଓଡ଼ିଶାରେ ମହଯୁଦ ଥିବା ଅଚଳାଚଳ ପ୍ରାକୃତିକ ପ୍ରାଚୁର୍ଯ୍ୟ, ଅଗାଧ ଖଣିଜ ସମ୍ପଦ, ଅପର୍ଯ୍ୟାପ୍ତ ଶିଳ୍ପାୟନର ଭିତ୍ତିଭୂମି, ଉନ୍ନତ ମାନବ ସମ୍ବଳ, ସୁଦୀର୍ଘ ସମୁଦ୍ର ତଟ, ଅପାର ପର୍ଯ୍ୟଟନର ଭଣ୍ଡାର ଏବଂ ସର୍ବୋପରି ଶ୍ରୀଜଗନ୍ନାଥଙ୍କର ମହିମା ଓ ଆଧ୍ୟାତ୍ମିକତାର ଉତ୍ସ୍ବାସ , ରାଜ୍ୟକୁ ସମୃଦ୍ଧିର ଶୀର୍ଷତ୍ୱ ପ୍ରଦାନ କରିବା ପାଇଁ ଯଥେଷ୍ଟ ବୋଲି ବିଶିଷ୍ଟ ବକ୍ତା ମାନେ ମତ ପ୍ରକାଶ କରିଥିଲେ ।

ଅତୀତରେ ଓଡ଼ିଶାର ସାଧବ ପୁଅ ମାନଙ୍କର ନୌବାଣିଜ୍ୟର ସ୍ୱର୍ଣ୍ଣାଭ ଅଧ୍ୟାୟ, ଗଙ୍ଗାଠାରୁ ଗୋଦାବରୀ ପର୍ଯ୍ୟନ୍ତ ପରିବ୍ୟାପ୍ତ ବିଶାଳ କଳିଙ୍ଗ ସାମ୍ରାଜ୍ୟର ସାମରିକ ଆଧିପତ୍ୟ ଏବଂ କୋଣାର୍କ ଭଳି ମନ୍ଦିର ଗୁଡ଼ିକରେ ଉତ୍କୃଷ୍ଟ କଳା, ସ୍ଥାପତ୍ୟ ଓ ଭାସ୍କର୍ଯ୍ୟର ସମାହାରକୁ ଉଲ୍ଲେଖ କରି ଖୁବ୍‍ ଶୀଘ୍ର ରାଜ୍ୟ ଏହାର ହୃତ ଗୌରବ, ଲୁପ୍ତ ବୈଭବ ଏବଂ ସୁପ୍ତ ସୌରଭକୁ ଫେରି ପାଇବାକୁ ଯାଉଥିବା ନେଇ ସେମାନେ ସମ୍ପୂର୍ଣ୍ଣ ଆଶାବାଦୀ ବୋଲି ପ୍ରକାଶ କରିଥିଲେ । ଉପସ୍ଥିତ ବରେଣ୍ୟ ଅତିଥି ମାନଙ୍କ ମଧ୍ୟରେ ରାଜ୍ୟ ଉଚ୍ଚଶିକ୍ଷା ମନ୍ତ୍ରୀ ଡ. ଅରୁଣ ସାହୁ, ସଂସ୍କୃତି ଓ ପର୍ଯ୍ୟଟନ ମନ୍ତ୍ରୀ ଜ୍ୟୋତି ପ୍ରକାଶ ପାଣିଗ୍ରାହୀ, ରାଜ୍ୟସଭା ସାଂସଦ ଅମର ପଟ୍ଟନାୟକ, ବିଧାୟକ ସୁରେଶ ରାଉତରାୟ ଓ ରାଜ୍ୟ ସଂସ୍କୃତି ବିଭାଗର ପ୍ରମୁଖ ସଚିବ ବିଷ୍ଣୁପଦ ସେଠୀ ପ୍ରମୁଖ ଅନ୍ତର୍ଭୁକ୍ତ ଥିଲେ ।

ଏହି ଅବସରରେ ପଦ୍ମଶ୍ରୀ ହଳଧର ନାଗଙ୍କ ଦ୍ୱାରା ଆବୃତ୍ତି କରାଯାଇଥିବା ତାଙ୍କର ପ୍ରସିଦ୍ଧ ପଲ୍ଲୀ କବିତା ଏବଂ ପ୍ରଖ୍ୟାତ କଣ୍ଠଶିଳ୍ପୀ ସୁସ୍ମିତା ଦାସଙ୍କ ଦ୍ୱାରା ପରିବେଷିତ ସୁଲଳିତ ସଂଗୀତ ଏବଂ ହାସ୍ୟ ଅଭିନେତା ବିଭୁ ମିଶ୍ରଙ୍କର ଏକକ ବାକ୍ୟ କଥନ ଉତ୍ସବର ମୁଖ୍ୟ ଆକର୍ଷଣ ଥିଲା । ଅନ୍ୟାନ୍ୟ ସାଂସ୍କୃତିକ କାର୍ଯ୍ୟକ୍ରମ ମଧ୍ୟରେ ଗୌତମ, କୂଲଦୀପ ଓ ପ୍ରଜ୍ଞାଙ୍କର ସୁମଧୂର ସଂଗୀତ, ଡଃ ନାଟାଲୀ ରାଉତ ଓ ୟତୀଶ ନାଥଙ୍କର ନୃତ୍ୟ, ତିର୍ଥୀ ପଟ୍ଟନାୟକ ମହାନ୍ତି ଓ ପ୍ରାଞ୍ଜଲଙ୍କର ଓଡ଼ିଶୀ ନୃତ୍ୟ, ଦିଭିଜା ମିଶ୍ରଙ୍କର ଭାରତନାଟ୍ୟମ୍ ନୃତ୍ୟର ତାଳେ ତାଳେ ବନ୍ଦେ ଉତ୍କଳ ଜନନୀର ପ୍ରସ୍ତୁତି

ଏବଂ ରାମକୃଷ୍ଣ ପଟ୍ଟନାୟକଙ୍କ ଦ୍ୱାରା ବନାଯାଇଥିବା ବସ୍ତ୍ର ଆଧାରିତ ‘ଫେସନ ସୋ’ ଦର୍ଶକ ମାନଙ୍କ ଦ୍ୱାରା ବେଶ୍‍ ଆଦୃତ ହୋଇଥିଲା । ଓସୁକର ସଭାପତି ସୁମନ୍ତ ମାନସିଂହ ସମଗ୍ର ଆୟୋଜନର ସୁପରିଚାଳନା କରିଥିଲେ । ଓକାଲ ଓ ଓସୁକ ର ଦକ୍ଷ ସଂଗଠକ ସନ୍ତୋଷ ସାହୁ, ଉମାକାନ୍ତ ରାଉତ, ଅର୍ଚ୍ଚନା ମାନସିଂହ, ରୀନା ମେହେର, ପ୍ରଜ୍ଞା ଆରିହାନ, ସୁଚିନ୍ତିତା ପୁଜାରୀ, ପ୍ରିୟଙ୍କା ସାହୁ, ଦେବାଶିଷ ମିଶ୍ର, ଅମୂଲ୍ୟ ଜେନା ଏବଂ ଦେବୀ ପଟ୍ଟନାୟକ ପ୍ରମୁଖ ଉତ୍ସବର ସଫଳ ସମାପନ ନେଇ ସକ୍ରିୟ ସହଯୋଗ ପ୍ରଦାନ କରିଥିଲେ । ସମ୍ପୂର୍ଣ୍ଣ ଲାଇଭଷ୍ଟ୍ରୀମିଂ କାର୍ଯ୍ୟକ୍ରମକୁ ଉପସ୍ଥାପକ ବିଶ୍ୱଜିତ ବଳିଆରସିଂହ ବେଶ୍‍ ସୁଚାରୁ ରୂପେ ସଂଯୋଜନା କରିଥିଲେ ।