ପବିତ୍ର ଓଡିଶା ଦିବସ,ଏହି ଅବସରରେ ସାରା ଓଡିଶା  ତଥା  ଦେଶ ବିଦେଶରେ ରହୁଥିବା ସବୁ ଓଡିଆ ଭାଇଭଉଣୀ ଏବଂ ଆପଣମାନଙ୍କୁ ସମସ୍ତଙ୍କୁ ମୋର ଅଭିନନ୍ଦନ ଜଣାଉଛି ।

ଓଡ଼ିଶା ତାଜା ନ୍ୟୁଜ୍ (୦୧ ଏପ୍ରିଲ ୨୦୨୧, ଗୁରୁବାର) ଭୁବନେଶ୍ୱର :- ଉତ୍କଳ ଗୌରବ ମଧୁସୂଦନ ଦାସ, ଉତ୍କଳମଣି ପଣ୍ଡିତ ଗୋପବନ୍ଧୁ ଦାସ, ପାରଳା ମହାରାଜା କୃଷ୍ଣଚନ୍ଦ୍ର ଗଜପତି, ଖଲିକୋଟ ରାଜା ବାହାଦୂର ରାମଚନ୍ଦ୍ର ମର୍ଦ୍ଦରାଜ ଦେଓ, ପଣ୍ଡିତ ଗୋଦାବରୀଶ ମିଶ୍ର, ଫକୀର ମୋହନ ସେନାପତି, ଗଙ୍ଗାଧର ମେହରଙ୍କ ପରି ବରପୁତ୍ର ମାନଙ୍କ ତ୍ୟାଗ ଓ ସଂଗ୍ରାମ ଯୋଗୁ ସ୍ବତନ୍ତ୍ର ଓଡିଶାର ସ୍ବପ୍ନ ସଫଳ ହୋଇପାରିଥିଲା। ଏହି ଅବସରରେ ମୁଁ ସେମାନଙ୍କ ପ୍ରତି ମୋର ଶ୍ରଦ୍ଧାଞ୍ଜଳି ଅର୍ପଣ କରୁଛି। ଓଡିଆ ଭାଷା, ସାହିତ୍ୟ, ନୃତ୍ୟ, ସଂଗୀତ ଓ କଳାକୁ ଯେଉଁମାନେ ସମୃଦ୍ଧ କରିଯାଇଛନ୍ତି ସେମାନଙ୍କ ପ୍ରତି ମୋର ସମ୍ମାନ ଜଣାଉଛି। ଆମର ବରପୁତ୍ରମାନେ ଓଡିଆ ଜାତି ପାଇଁ ଅନେକ ସ୍ବପ୍ନ ଦେଖିଥିଲେ। ଭାଷା, ସାହିତ୍ୟ ଓ ସଂସ୍କୃତିର ସୁରକ୍ଷା ସହିତ ବିକାଶ କ୍ଷେତ୍ରରେ ଓଡିଶା ଏକ ସ୍ବତନ୍ତ୍ର ପରିଚୟ ସୃଷ୍ଟି କରିପାରିବ ବୋଲି ସେମାନେ ଦୃଢ ନିଶ୍ଚିତ ଥିଲେ।

ସେତେବେଳେ ଭାଷାଭିତ୍ତିକ ରାଜ୍ୟ ଗଠନ ପାଇଁ ଓଡିଶା ସାରା ଦେଶକୁ ରାସ୍ତା ଦେଖାଇଥିଲା । ଆଜି ମଧ୍ୟ ଆମେ ଅନେକ କ୍ଷେତ୍ରରେ ଆଗୁଆ ହୋଇ ସାରା ଦେଶ ପାଇଁ ଆଦର୍ଶ ସୃଷ୍ଟି କରିପାରିଛୁ । ଆଜି ମହିଳା ସଶକ୍ତିକରଣ, ବିପର୍ଯ୍ୟୟ ପରିଚାଳନା, ଆନ୍ତର୍ଜାତୀୟ କ୍ରୀଡା ପ୍ରତିଯୋଗୀତା ଆୟୋଜନ , ଗରିବ ଲୋକଙ୍କ ପାଇଁ କଲ୍ୟାଣ କାର୍ଯ୍ୟକ୍ରମ – ଏପରି ଅନେକ କ୍ଷେତ୍ରରେ ଆମେ ଦେଶ ପାଇଁ ମଡେଲ ହୋଇପାରିଛୁ । ଆଜି ବିଭିନ୍ନ କ୍ଷେତ୍ରରେ ଓଡିଆ ମାନଙ୍କ ସୁନାମ ଆମକୁ ଗର୍ବିତ କରୁଛି।  ରାଜ୍ୟର ବିକାଶ ହାର ଜାତୀୟ ହାର ଠାରୁ ଅଧିକ ରହିଛି । କୃଷି ଶିଳ୍ପ। ଶିକ୍ଷା, ସ୍ବାସ୍ଥ୍ୟ ଓ ଭିତ୍ତିଭୂମି କ୍ଷେତ୍ରରେ ଆମର visible development ଆସିଛି। ପ୍ରଶାସନକୁ ଦକ୍ଷ, ସ୍ବଚ୍ଛ ଓ ଉତ୍ତରଦାୟୀ କରିବା ପାଇଁ ୫-ଟି ଓ ମୋ ସରକାର ପରି କାର୍ଯ୍ୟକ୍ରମ  ଦେଶରେ ଏକ ଆଦର୍ଶ ତଥା ସମ୍ବେଦନଶୀଳ ପ୍ରଶାସନିକ ମଡେଲ ସୃଷ୍ଟି କରିବାରେ ସଫଳ   ହୋଇପାରିଛି।ଓଡ଼ିଶା ଆଜି ଶାନ୍ତି ଓ ବିକାଶ ର ନୂଆ ପରିଚୟ ହୋଇଛି ।

ଓଡିଶାର ବିକାଶ ପାଇଁ ମୋ ସରକାର ନିରନ୍ତର ଉଦ୍ୟମ ଜାରି ରଖିଛି।    ତେବେ ବିକାଶ କେବଳ ଏକ ସରକାରୀ ଆଭିମୁଖ୍ୟ ହେବା ଉଚିତ ନୁହେଁ । ଜନସାଧାରଣ ଏବେ କେବଳ ଉପଭୋକ୍ତା ନୁହଁନ୍ତି, ସେମାନେ ବିକାଶର ଭାଗୀଦାର । ଆମର ପ୍ରକୃତ ବିକାଶ ପାଇଁ ବିକାଶ ପ୍ରକ୍ରିୟାକୁ ଏକ  ଜନ ଆନ୍ଦୋଳନରେ ପରିଣତ କରିବାକୁ ହେବ। ମୁଁ ଚାହେଁ, ବିକାଶର ସବୁ ପ୍ରକ୍ରିୟାରେ ଆମର ଜନସାଧାରଣ ଭାଗୀଦାର ହୁଅନ୍ତୁ । ଆମର ମୋ ସ୍କୁଲ ଓ ମୋ କଲେଜ ପରି କାର୍ଯ୍ୟକ୍ରମ ଏ ଦିଗରେ ଏକ ସ୍ବତନ୍ତ୍ର ଉଦ୍ୟମ। ଆଜି ଆମର ୫ ଲକ୍ଷ ପୁରାତନ ଛାତ୍ରଛାତ୍ରୀ  ସେମାନଙ୍କ ସ୍କୁଲର ବିକାଶ ଦିଗରେ ସହଯୋଗ ପାଇଁ ଆଗେଇ ଆସିଛନ୍ତି। ଏହା କିଛି କମ୍‌ କଥା ନୁହେଁ।  ଏହିଭଳି ଚିନ୍ତାଧାରା ନେଇ ଆମେ କାମ କଲେ ଓଡିଶା ନିଶ୍ଚୟ ଆଗରେ ରହିବ। 

୨୦୩୬ରେ ଆମେ ସ୍ବତନ୍ତ୍ର ଓଡିଶା ଗଠନର ୧୦୦ ବର୍ଷ ପାଳନ କରିବୁ । ସେତେବେଳେ ଓଡିଶାକୁ ସବୁ କ୍ଷେତ୍ରରେ ସାରା ଦେଶ ଓ ସାରା ବିଶ୍ବରେ ଏକ ବିକଶିତ ଓ ଏକ ଆଦର୍ଶ ରାଜ୍ୟ ଭାବରେ ଗଠନ କରିବା ଆମର ଲକ୍ଷ୍ୟ ହେବା ଉଚିତ । ତେବେ ଏଥିପାଇଁ ଆମକୁ ସବୁ କ୍ଷେତ୍ରରେ ବିଶ୍ବସ୍ତରୀୟ ଚିନ୍ତାଧାରା ନେଇ ଆଗକୁ ବଢିବାକୁ ହେବ। ତାହେଲେ ଆମର ନୂଆ ଓଡିଶା, ସଶକ୍ତ ଓଡିଶାର ସ୍ବପ୍ନ ବାସ୍ତବରୂପ ନେଇପାରିବ।

ବର୍ତ୍ତମାନ ଆମେ ଏକ ଅସାଧାରଣ ସମୟ ଦେଇ ଗତି କରୁଛୁ । ଏକ ବର୍ଷରୁ ଅଧିକ ସମୟ ଧରି ଆପଣ ମାନଙ୍କ ସମସ୍ତଙ୍କ ସହଯୋଗରେ ଆମେ କରୋନାର ସଫଳ ମୁକାବିଲା କରିପାରିଛୁ । ତେବେ ଏବେ ପୁଣି ଥରେ କରୋନାର ଦ୍ବିତୀୟ ସଂକ୍ରମଣର ଆଶଙ୍କା ସୃଷ୍ଟି ହୋଇଛି । ତେଣୁ ସମସ୍ତଙ୍କୁ ମୋର ନିବେଦନ, ଆପଣମାନେ କରୋନାର ସବୁ ନିୟମକୁ ପାଳନ କରନ୍ତୁ ।  ଆଗକୁ ମଧ୍ୟ କରୋନାକୁ ଦୂର କରିବାରେ ଆମେ ସଫଳ ହେବୁ, ଏହା ମୋର ଦୃଢ ବିଶ୍ବାସ । ବନ୍ଦେ ଉତ୍କଳ ଜନନୀ