ଅଗ୍ନିକାଣ୍ଡରେ ୨ ପରିବାରର ୪ ବଖରା ପାଉଁଶ : ଧନସମ୍ପତ୍ତି ନଷ୍ଟ

ଓଡ଼ିଶା ତାଜା ନ୍ୟୁଜ (୨୮ ଡିସେମ୍ବର ସୋମବାର ) ଦିଗପହଣ୍ଡି :-  ଗଞ୍ଜାମ ଜିଲ୍ଲା ଦିଗପହଣ୍ଡି ବ୍ଲକ ଖମ୍ବାରି ଗାଁ ପଞ୍ଚାୟତ ଅନ୍ତର୍ଗତ ବୁରୁଡାଙ୍ଗ ଗ୍ରାମର ହରିଜନ ସାହିରେ ଗତକାଲି ବିଳମ୍ବିତ ରାତିରେ ଆକସ୍ମିକ ଘଟି ଦୁଇଟି ପରିବାରର ୪ଟି ବଖରା ଜାଳିପୋଡି ପାଉଁଶ ହୋଇଯାଇଥିବା ବେଳେ ଏଥିରେ ଉଭୟ ପରିବାର ର ବହୁ ଧନସମ୍ପତ୍ତି ନଷ୍ଟ ହୋଇ ଯାଇଥିବା ଜଣାପଡିଛି । ଖବରପ୍ରକାରେ , ଗତକାଲି ଗ୍ରାମର ମମି ନାଇକ ଓ ସୁବି ନାୟକଙ୍କ ପରିବାର ସଦସ୍ୟ ଖାଇସାରି ଶୋଇ ପଡିଥିଲେ । ତେବେ ରାତି ସାଢ଼େ ୧୨ ଘଣ୍ଟା ସମୟରେ ହଠାତ୍ ତାର ଉପରେ ନିଆଁ ଲାଗିଥିଲା ଗ୍ରାମର କିଛି ଯୁବକ ଦେଖି ଉଭୟ ପରିବାରର ସଦସ୍ୟମାନଙ୍କୁ ଘର ଭିତରୁ ବାହାରକୁ ନେଇ ଆସିଥିଲେ । ଏହାପରେ ନିଆଁକୁ ଦେଖି ଗ୍ରାମବାସୀ ନିଆଁ ଲିଭାଇବାକୁ ଦୌଡ଼ି ଯାଇଥିଲେ ।

ହେଲେ ନିଆଁର ପ୍ରକୋପ ଏତେ ଥିଲା ଯେ ନିମିଷକ ମଧ୍ୟରେ ନିଆଁ ଚାରିଆଡ଼େ ବ୍ୟାପିଗଲା । ଘଟଣାପରେ ଦିଗପହଣ୍ଡି ବ୍ଲକ ଯୁବ ବିଜେଡ଼ି ସଭାପତି ଚିତ୍ରସେନ ଗୌଡ଼ , ପୂର୍ବତନ ସମିତି ସଭ୍ୟ ପ୍ରତିନିଧି ଗୁଣ୍ଡିଚା ପାଇକ , ରାମଚନ୍ଦ୍ର ସେଠୀ ଘଟଣାସ୍ଥଳରେ ପହଞ୍ଚି ଦିଗପହଣ୍ଡି ଅଗ୍ନିଶମ ବିଭାଗକୁ ଖବର ଦେଇଥିଲେ । ଖବର ପାଇ ଦିଗପହଣ୍ଡି ଅଗ୍ନିିିଶମ ବାହିନୀ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିିିଥିଲେ। ତେବେ ମମି ନାଇକ ଝିଅ ବାହାଘର ପାଇଁ ଟଙ୍କା ଓ ସୁନା ଏବଂ ବହୁ ଆସବାବପତ୍ର ଜିନିଷ ରଖିଥିବା ବେଳେ ତାହା ପୋଡ଼ି ପାଉଁଶ ହୋଇ ଯାଇଥିବା ଜଣାପଡ଼ିଛି । ସେହିପରି ସୁବି ନାୟକଙ୍କ ମଧ୍ୟ ବହୁ ଆସବାବ ପତ୍ର ଜିନିଷ ସହ କିଛି ଟଙ୍କା ପୋଡିଯାଇଛି । ତେବେ ଉଭୟ ପରିବାର ବହୁ ଗରୀବ ହୋଇଥିବାରୁ ସରକାରୀ ସହାୟତା ପାଇଁ ଗ୍ରାମବାସୀମାନେ ଦାବି କରିଛନ୍ତି । ( ରିପୋର୍ଟ : ଶେଷଦେବ ସାହୁ , ଗଞ୍ଜାମ ଜିଲ୍ଲା ବ୍ୟୁରୋ )