ବିଜେପି ରାଜଭବନ ସମ୍ମୁଖରେ ପରୀକୁ ନ୍ୟାୟ ଦେବା ପାଇଁ – ଧାରଣା

ଓଡ଼ିଶା ତାଜା ନ୍ୟୁଜ (୭ ଡିସେମ୍ବର ସୋମବାର ) ଭୁବନେଶ୍ୱର :- ‘ପରୀ’ ମୃତ୍ୟୁ ଘଟଣାର ପ୍ରତିବାଦ ଗତ ୪ ଦିନ ଧରି ନୟାଗଡ଼ ଜିଲ୍ଲାପାଳଙ୍କ ଅଫିସ୍ ସାମ୍ନାରେ ଧାରଣା ଦେବା ପରେ ସୋମବାର ବିରୋଧୀ ବିଜେପି ରାଜଭବନ ସମ୍ମୁଖରେ ପରୀକୁ ନ୍ୟାୟ ଦେବା ପାଇଁ ଦାବି କରିଛି ।  ଏପଟେ ଶାସକ ବିଜେଡି କିନ୍ତୁ ଏହି ଘଟଣାକୁ ନେଇ ରାଜନୀତି ନକରିବା ପାଇଁ ବିରୋଧୀଙ୍କୁ କହିଛି । ଏସଆଇଟି ତଦନ୍ତ ରିପୋର୍ଟ ଆସିବା ପରେ ଏହି ଘଟଣା ପଛର ରହସ୍ୟ ପଦାକୁ ଆସିବ ବୋଲି ବିଜେଡି ଉପସଭାପତି ଦେବୀପ୍ରସାଦ ମିଶ୍ର ଗଣମାଧ୍ୟମକୁ ସୂଚନା ଦେଇଛନ୍ତି । ଅନ୍ୟପଟେ କଂଗ୍ରେସ ଏହି ଘଟଣାରେ ବିଜେଡି, ବିଜେପିର ଭିତିରି ସମ୍ପର୍କ ଥିବା ଅଭିଯୋଗ କରିଛି। ବିଜେପି ରାଜ୍ୟ ସଭାପତି ସମୀର ମହାନ୍ତିଙ୍କ ସହ ସୋମବାର ଦଳର ତମାମ ନେତାମାନେ ରାଜଭବନ ସମ୍ମୁଖରେ ଧାରଣା ଦେବା ସହିତ ବିକ୍ଷୋଭ ପ୍ରଦର୍ଶନ ଜାରି ରଖିଛନ୍ତି। ତା’ସହିତ ତୁରନ୍ତ ରାଜ୍ୟ ସରକାର କୁନି ଝିଅ ପରୀକୁ ନ୍ୟାୟ ଦେବା ସହିତ କୃଷିମନ୍ତ୍ରୀଙ୍କ ବହିଷ୍କାର ଦାବି କରିଛି ଦଳ।

ବିଜେପି ରାଜ୍ୟ ସଭାପତି ସମୀର ମହାନ୍ତି କହିଛନ୍ତି, “ପରୀର ବାପା ମା’ ତାଙ୍କ ଝିଅର ହତ୍ୟାକାରୀ କିଏ ବୋଲି ନିଜେ କହୁଛନ୍ତି। ଖୋଦ୍ ମନ୍ତ୍ରୀ ମଧ୍ୟ ଏହି ଘଟଣାରେ ସାମିଲ ଥିବା ଜଣାପଡୁଛି। କିନ୍ତୁ ରାଜ୍ୟ ସରକାର ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ନେଉନାହାନ୍ତି। ଯେପର୍ଯ୍ୟନ୍ତ ଏହି ଘଟଣାର କ୍ରାଇମବ୍ରାଞ୍ଚ ତଦନ୍ତ ନହେବ ସେପର୍ଯ୍ୟନ୍ତ ବିଜେପି ପ୍ରତିବାଦ ଜାରିରଖିବ । ”ସେହିପରି ବିଜେପି ନେତ୍ରୀ ଲେଖାଶ୍ରୀ ସାମନ୍ତସିଂହାର କହିଛନ୍ତି ଯେ, ପରୀର ମୃତ୍ୟୁ ପଛରେ ଅଙ୍ଗ ତସ୍କରୀ ଥିବା ଜଣାପଡୁଛି ।  ଏହି ଅଙ୍ଗ ତସ୍କରୀ ଆଉ ହତ୍ୟା କାମ କରୁଛି । ରାଜ୍ୟ ସରକାର କିନ୍ତୁ ସେମାନଙ୍କୁ ସୁରକ୍ଷା ଯୋଗାଉଛନ୍ତି  । ଯେପର୍ଯ୍ୟନ୍ତ ରାଜ୍ୟ ସରକାର ଏହି ଘଟଣାର କ୍ରାଇମବ୍ରାଞ୍ଚ ତଦନ୍ତ ପାଇଁ ବାଧ୍ୟ ନହୁଅନ୍ତି ସେପର୍ଯ୍ୟନ୍ତ ସେମାନେ ରାଜରାସ୍ତାରେ ପ୍ରଦର୍ଶନ କରିବେ ବୋଲି ସେ କହିଛନ୍ତି । ଅନ୍ୟପଟେ ବିଜେପି ଉପସଭାପତି ଦେବୀପ୍ରସାଦ ମିଶ୍ର କହିଛନ୍ତି, “ରାଜ୍ୟ ସରକାର ଏହି ଘଟଣାର ଏସ୍ଆଇଟି ତଦନ୍ତ ନିର୍ଦ୍ଦେଶ ଦେଇଛନ୍ତି। ଏସ୍ଆଇଟି ମୁଖ୍ୟ ଅରୁଣ ବୋଥ୍ରା ମଧ୍ୟ ଦୁଇ ସପ୍ତାହ ଭିତରେ ସବୁକିଛି ଖୁଲାସା କରିବେ ବୋଲି କହିସାରିଲେଣି । ହେଲେ ବିରୋଧୀମାନେ ଜାଣିଶୁଣି ରାଜନୀତି କରୁଛନ୍ତି । ଏହି ଘଟଣାରେ ରାଜନୀତି ନକରି ସେମାନେ ଏସ୍ଆଇଟି କ’ଣ ତଦନ୍ତ କରୁଛି ଅପେକ୍ଷା କରନ୍ତୁ ।