ଓଡ଼ିଶା ତାଜା ନ୍ୟୁଜ (୧୮ ଅକ୍ଟୋବର ରବିବାର ) ବ୍ରହ୍ମପୁର :- ଦକ୍ଷିଣ ଓଡ଼ିଶାର ସ୍ବେଛାସେବୀ ସଂଗଠନ ଟିମ କ୍ଲିନ ସିଟି ପକ୍ଷରୁ ଜାରି ରହିଛି ସାପ୍ତାହିକ ସମାଜ ସେବା କାର୍ଯ୍ୟକ୍ରମ। ପୂର୍ବରୁ ବ୍ରହ୍ମପୁର ସହରକୁ ପୋଷ୍ଟର ମୁକ୍ତ କରିବା ଓ ଅସହାୟଙ୍କୁ ସହାୟ ହୋଇ ବେଶ ପ୍ରଶଂସା ସାଉଁଟି ଥିବା ଏହି ଟିମ ପକ୍ଷରୁ ବର୍ତ୍ତମାନ ସହରରେ ଅବହେଳିତ ଅବସ୍ଥାରେ ରହିଥିବା ମହାପୁରୁଷଙ୍କ ପ୍ରତିମୂର୍ତ୍ତି ସଫେଇ କାର୍ଯ୍ୟକ୍ରମ ହାତକୁ ନିଆଯାଇଛି । ଏହି ଅବସରରେ ଟିମ ପକ୍ଷରୁ ପୂର୍ବରୁ ୭ ଜଣ ମହାପୁରୁଷଙ୍କ ପ୍ରତିମୂର୍ତ୍ତି ଉଦ୍ଧାର କରାଯାଇଥିବା ବେଳେ ଆଜି ଅଷ୍ଟମ ପର୍ଯ୍ୟାୟରେ ଭାରତର ପ୍ରଥମ ମହିଳା ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଙ୍କ ପ୍ରତିମୂର୍ତ୍ତି ସଫେଇ କାର୍ଯ୍ୟ ଟିମ ପକ୍ଷରୁ ହାତକୁ ନିଆଯାଇଥିଲା ।
ବ୍ରହ୍ମପୁର ସହରର ପୁରୁଣା ବସଷ୍ଟାଣ୍ଡ ଠାରେ ଥିବା ପ୍ରଥମ ମହିଳା ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଙ୍କ ପ୍ରତିମୂର୍ତ୍ତି କୁ ଟିମ ପକ୍ଷରୁ ସଫା କରାଯିବା ସହ ପୁଷ୍ପମାଲ୍ୟ ଅର୍ପଣ କରି ତାଙ୍କରି ସ୍ମୃତି ଚାରଣ କରାଯାଇଥିଲା । ଅଞ୍ଜଳି ମହାନ୍ତି, ନଗେଶ୍ୱର ପୃଷ୍ଟି, ପଦ୍ମିନୀ ମିଶ୍ର, ଲଳିତ ମଙ୍ଗରାଜ ପ୍ରମୁଖ ପ୍ରତିମୂର୍ତ୍ତି ରେ ପୁଷ୍ପମାଲ୍ୟ ଅର୍ପଣ କରିଥିଲେ । ଏଥିରେ ଟିମର ସମସ୍ତ ସଦସ୍ୟ ପ୍ରମୁଖ ଉପସ୍ଥିତ ଥିଲେ । ଆଗକୁ ମଧ୍ୟ ଏଭଳି ସମାଜସେବା କାର୍ଯ୍ୟ ଯଥା ଅସହାୟଙ୍କୁ ଉଦ୍ଧାର ଓ ମହାପୁରୁଷଙ୍କ ପ୍ରତିମୂର୍ତ୍ତି ସଫେଇ କାର୍ଯ୍ୟ ଜାରି ରହିବ ବୋଲି ଟିମ ପକ୍ଷରୁ ସୂଚନା ଦିଆଯାଇଛି । (ରିପୋର୍ଟ : ଶେଷଦେବ ସାହୁ)
