ଓଡ଼ିଶା ତାଜା ନ୍ୟୁଜ୍ (୧୮ ଅକ୍ଟୋବର ରବିବାର ) ହିଞ୍ଜିଳିକାଟୁ :- ଗଞ୍ଜାମ ଜିଲ୍ଲାରେ ବିଗତ କିଛି ଦିନ ଧରି ଅବିଶ୍ରାନ୍ତ ବର୍ଷ ଯୋଗୁଁ ଧାନ ଜମିରେ ବର୍ଷା ପାଣି ଲହଡ଼ି ଭାଙ୍ଗୁଛି । ନିକଟ ଭବିଷ୍ୟତରେ ଲଘୁଚାପ ସମ୍ଭାବନା ରହିଥିବାରୁ ହିଞ୍ଜିଳିକାଟୁ ପୌରାଂଚଳ ସମେତ ବ୍ଳକର ବିଭିନ୍ନ ଗ୍ରାମାଂଚଳର ଚାଷୀକୁଳ ଚିନ୍ତାରେ ପଡ଼ିଛନ୍ତି । ଗତ ୩୦ ତାରିଖ ଠାରୁ ଆଜି ସୁଦ୍ଧା ୩ଟି ଲଘୁଚାପ ଉପକୂଳବର୍ତି ଅଂଚଳରେ ବ୍ୟାପକ କ୍ଷୟକ୍ଷତି କରିଛି । ବିଶେଷ କରି ଲଘୁଚାପ ଜନିତ ଲଗାଣ ବର୍ଷା ଯୋଗୁଁ ସ୍ଥାନୀୟ ଅଂଚଳର ଧାନ ଓ ପରିବା ଫସଲରେ ବର୍ଷା ଜଳ ଜମି ରହିବା ଯୋଗୁଁ ଫସଲ ପଚିସଢି ଯିବାକୁ ବସିଲାଣି । ହଜାର ହଜାର ଏକର ଚାଷ ଜମି ଜଳମଗ୍ନ ହୋଇପଡ଼ିଛି । ବର୍ତମାନ ଧାନକେଣ୍ଡା ଧରିବା ବେଳକୁ ଲଗାଣ ବର୍ଷା ଯୋଗୁଁ ବ୍ୟାପକ ଫସଲ କ୍ଷତି ହେବାରଯ ଆଶଙ୍କା ରହିଛି । ଏଭଳି ବିପଦ ସମୟରେ ପୁଣିଥିରେ ସୋମବାର ଠାରୁ ବୁଧବାର ପର୍ଯ୍ୟନ୍ତ ପ୍ରବଳ ବର୍ଷା ଆଶଙ୍କା ରହିଥିବାରୁ ଚାଷୀକୁଳ ସର୍ବଶାନ୍ତ ହେବା ଏକ ପ୍ରକାର ନିଶ୍ଚିତ ହୋଇଯାଇଛି । ଅବିଶ୍ରାନ୍ତ ବର୍ଷାରେ ସାଧାରଣ ଜୀବନଯାପନ ବାଧାପ୍ରାପ୍ତ ହୋଇଛି । ବିଶେଷ କରି ମହାମାରୀ କରୋନା ଭୁତାଣୁ ସଂକ୍ରମଣ କାୟା ବିସ୍ତାର କରିଥିବା ବେଳେ ବିଭିନ୍ନ କଟକଣା ସାଙ୍ଗକୁ ଲଗାଣ ବର୍ଷାରେ ଗରିବ, ଖଟିଖିଆ ହାତବାନ୍ଧି ବସିଛନ୍ତି ।
ଅନ୍ୟପଟେ ଲଘୁଚାପନ ଜନିତ ଲଗାଣ ବର୍ଷାରେ ବର୍ଷକର ଆହାର ନଷ୍ଟ ହେବାର ସମ୍ଭାବନା ଦେଖାଦେଇଛି । ଜଳସମ୍ପଦ ବିଭାଗର ମନମାନି ଯୋଗୁଁ ବର୍ଷାଜଳ ନିସ୍କାସିତ ହୋଇପାରୁନଥିବା ଏବଂ ଚାଷ ଜମି ଜଳାର୍ଣ୍ଣର୍ବ ହେଉଥିବା ନେଇ ସ୍ଥାନୀୟ ଅଂଚଳର ବହୁ ଚାଷୀ ଅଭିଯୋଗ କରିଛନ୍ତି । ଧାନ ବିଲରେ ଧାନକେଣ୍ଡା ବାହାରିବା ସମୟ ହୋଇଥିବାରୁ ଏଥିପ୍ରତି ବିପଦ ମୁହାଁଇଥିବା ନେଇ ଚାଷୀମାନେ କହିଛନ୍ତି । ଏଭଳି ସମୟରେ ଚାଷ ଜମିରେ ୩ରୁ ୪ ଦିନ ଧରି ବର୍ଷା ଜଳ ଜମି ରହିଲେ ଧାନଗଛ ନଷ୍ଟ ହୋଇଯିବା ଆଶଙ୍କା ରହିଥିବା କୃଷି ବିଶେଷଜ୍ଞ ମାନେ ମତ ପ୍ରକାଶ କରିଛନ୍ତି । ପ୍ରତିବର୍ଷ ଅକ୍ଟୋବର ମାସ ଆସିଲେ ଲୋକଙ୍କ ମନରେ ବନ୍ୟା, ବାତ୍ୟାର ଛନକା ପଶିଥାଏ । ୧୯୯୯ ମସହା ଅକ୍ଟୋବର ମାସ ୨୯ ତାରିଖର ମହାବରତ୍ୟା କଥା ମନକୁ ଆସିଲେ ଏବେ ବି ଲୋମ ଟାଙ୍କୁରି ଉଠୁଛି । ସେହିପରି ଫାଇଲିନ୍, ହୁଡ଼ହୁଡ଼, ତିତଲିରେ ବ୍ୟାପକ କ୍ଷତି ଘଟିଥିଲା । ଚଳିତ ବର୍ଷ ଅକ୍ଟୋବର ମାସ ଆରମ୍ଭରୁ ଲଘୁଚାପ ବର୍ଷା ଓଡ଼ିଶାର ପ୍ରାୟ ଅଧେ ଜିଲ୍ଲାକୁ ବୁଡ଼ାଇ ସାରିଲାଣି । ସୋମବାର ଠାରୁ ପୁଣିଥରେ ଆଉ ଏକ ଲଘୁଚାପ ବର୍ଷା କେନ୍ଦ୍ରଭୂତ ହେଉଥିବା ନେଇ ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯିବା ପରେ ଲୋକଙ୍କ ମନରେ ଭୟର ବାତାବରଣ ସୃଷ୍ଟି ହୋଇଛି । (ରିପୋର୍ଟ : ଶୁସାନ୍ତ ପ୍ରଧାନ)
