ଓଡ଼ିଶା ତାଜା ନ୍ୟୁଜ (୧୮ ଅକ୍ଟୋବର ରବିବାର ) ବାଲେଶ୍ୱର :- ବାଲେଶ୍ୱର ଉପନିର୍ବାଚନ ପାଇଁ ଏବେ ପ୍ରଚାର ମଇଦାନରେ କସରତ ଆରମ୍ଭ କରିଛନ୍ତି ତିନି ଦଳର ପ୍ରାର୍ଥୀ । ହେଲେ କାହା ପାଖରେ ନାହିଁ ଠୋସ୍ ପ୍ରସଙ୍ଗ । ବିଜେପି ପାଖରେ କୌଣସି ସ୍ଥାନୀୟ ପ୍ରସଙ୍ଗ ନଥିବାବେଳେ, କଂଗ୍ରେସର ହାତ ମଧ୍ୟ ଖାଲି ପଡ଼ିଛି । ଅନ୍ୟପଟେ ଶାସକ ବିଜେଡି କେବଳ ନବୀନଙ୍କ ନାଁକୁ ନେଇ ନିର୍ବାଚନ ବୈତରଣୀ ପାର୍ ହେବାକୁ ଲକ୍ଷ୍ୟ ରଖିଛି । ବର୍ତ୍ତମାନ ତିନୋଟି ଯାକ ଦଳ ପ୍ରଚାର ଅପେକ୍ଷା ସ୍ଥାନୀୟ ନେତାଙ୍କ ସଂଗଠନ ଉପରେ ବେଶୀ ଗୁରୁତ୍ୱ ଦେଉଛନ୍ତି।ଗ୍ରାମାଞ୍ଚଳ ଭୋଟର, ଯୁବ ଭୋଟର, ସହରାଞ୍ଚଳ ବୁଦ୍ଧିଜୀବୀ ଭୋଟର । ଏମିତି ବିଭିନ୍ନ ଭାଗରେ ଭାଗ କରି ୩ ଦଳ ସେମାନଙ୍କ ବିଭିନ୍ନ ମୋର୍ଚ୍ଚାକୁ କାମରେ ଲଗାଇଛନ୍ତି । ବିଜେଡି ସୁପ୍ରିମୋ ନବୀନ ନିଜେ ପ୍ରଚାର ମଇଦାନକୁ ଓହ୍ଲାଇବାକୁ ଥିବାରୁ କର୍ମୀ ମହଲରେ ଉତ୍ସାହ ଭରି ରହିଛି। ଗତ ସାଧାରଣ ନିର୍ବାଚନ ପରି ହାଇଟେକ ବସରେ ପ୍ରଚାର ହେବ । ଦଳୀୟ ପ୍ରାର୍ଥୀ ସ୍ୱରୂପ ଦାସଙ୍କ ପାଇଁ ପ୍ରଚାର କରିବେ ମୁଖ୍ୟମନ୍ତ୍ରୀ ।
ସେପଟେ ବିଜେପି ପ୍ରଚାରର ମଙ୍ଗ ୨ କେନ୍ଦ୍ରମନ୍ତ୍ରୀଙ୍କ ସମେତ ସମ୍ବିତ ପାତ୍ର, ଅପରାଜିତା ଷଡ଼ଙ୍ଗୀଙ୍କ ଭଳି ଲୋକପ୍ରିୟ ନେତା ଧରିପାରନ୍ତି । ତେବେ କଂଗ୍ରେସର କେହି କେନ୍ଦ୍ରୀୟ ନେତା ପ୍ରଚାରକୁ ଆସିବେନି ବୋଲି ସୂଚନା ମିଳିଛି । ତେବେ ଏଥରର ନିର୍ବାଚନରେ ପ୍ରସଙ୍ଗକୁ ନେଇ ବେଶୀ ଉତ୍ସାହ ଦେଖିବାକୁ ମିଳୁନି । କୌଣସି ସ୍ଥାନରେ ବି ଲୋକ କୌଣସି ପ୍ରସଙ୍ଗକୁ ନେଇ ଚର୍ଚ୍ଚା କରୁନାହାନ୍ତି । ବରଂ ରବୀନ୍ଦ୍ର ଜେନା ଟିକଟ ନ ପାଇବା, ବିଜେପିକୁ ଅନୁକମ୍ପା ଭୋଟ ଯିବ କି ନ ଯିବ, କଂଗ୍ରେସର ନୂଆ ପ୍ରାର୍ଥୀ କେମିତି ଭୋଟରଙ୍କୁ ପ୍ରଭାବିତ କରୁଛନ୍ତି, ଏସବୁ ଆଲୋଚନା ହେଉଛି । ଯେହେତୁ ପ୍ରସଙ୍ଗ ଜୋର୍ ଧରୁନି ତେଣୁ ପଞ୍ଚାୟତ ଓ ୱାର୍ଡସ୍ତରୀୟ ସଂଗଠନକୁ ସକ୍ରିୟ କରି ଲୋକଙ୍କୁ ବ୍ୟକ୍ତିଗତ ଭାବେ ବୁଝାଉଛନ୍ତି ୩ ଦଳ । ତେବେ ସହରାଞ୍ଚଳରେ ଟିକେ ପରିସ୍ଥିତି ଭିନ୍ନ। ଯୁବ ଭୋଟର ନିର୍ଣ୍ଣୟକାରୀ ହେବାର ସମ୍ଭାବନା ଥିବାରୁ ସେମାନଙ୍କ ଉପରେ ୩ ଦଳ ଫୋକସ୍ କରିଛନ୍ତି।ବିଜେପି ପ୍ରାର୍ଥୀ ମାନସ ଦତ୍ତ ଦଳୀୟ ଭିତ୍ତିରେ କାର୍ଯ୍ୟବଣ୍ଟନ, ପଞ୍ଚାୟତିରାଜ ଓ ପୌର ଦୁର୍ନୀତି ପ୍ରସଙ୍ଗ ଧରି ଲୋକଙ୍କ ପାଖରେ ପହଞ୍ଚୁନ୍ତି ।
କଂଗ୍ରେସ ଅମଳରେ ହୋଇଥିବା ବିକାଶମୂଳକ କାର୍ଯ୍ୟ ତଥା ଏ ସରକାରରେ କିଛି କାମ ହୋଇ ନ ଥିବା ଅଭିଯୋଗ ଧରି ଭୋଟରଙ୍କ ପାଖରେ ପହଞ୍ଚୁଛନ୍ତି କଂଗ୍ରେସ ପ୍ରାର୍ଥୀ ମମତା କୁଣ୍ଡୁ । ଅନ୍ୟପଟେ ସରକାରଙ୍କ କରୋନା ମୁକାବିଲାର ସଫଳତାକୁ ନେଇ ଲୋକଙ୍କ ପାଖରେ ବିଜେଡି ପହଞ୍ଚୁଛି।ଗତ ଉପନିର୍ବାଚନରେ ବିଜେଡିର ଗଡ଼ କୁହାଯାଉଥିବା ବାଲେଶ୍ୱର ଆସନ ହାତେଇ ନେଇଥିଲା ବିଜେପି। ମଦନମୋହନ ଦତ୍ତଙ୍କର ନିଜସ୍ୱ ସଂଗଠନ ଥିଲା । ଆଉ ମୋଦୀଙ୍କ ହାୱାରେ ପ୍ରଭାବିତ ବିଭିନ୍ନ ଅଣଓଡ଼ିଆ ଭୋଟର ସହାୟକ ହୋଇଥିଲେ ସ୍ୱର୍ଗତ ଦତ୍ତଙ୍କୁ। କିନ୍ତୁ ଏଥର ସେ ୱେଭ୍ କାମ କରିବ କି ନାହିଁ ତାକୁ ନେଇ ସନ୍ଦେହ ରହିଛି । ସଂଗଠନ ସ୍ତରରେ ଯଦି ଏ ବର୍ଷକ ଭିତରେ କିଛି ଅଭିବୃଦ୍ଧି ହୋଇଥିବ ତେବେ ତା ଉପରେ ବିଜେପିକୁ ଭରସା କରିବାକୁ ପଡ଼ିବ । ଏଥର ବଙ୍ଗାଳି ଭୋଟରର ଧୃବୀକରଣ ହେବାର ସମ୍ଭାବନା କମ ରହିଛି । କାରଣ ଏଥର ୩ ଦଳ ଭିତରେ ଏ ଭୋଟ ବିଭାଜନ ହେବାର ସମ୍ଭାବନା ସୃଷ୍ଟି ହୋଇଛି।ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି କରୋନା ସ୍ଥିତିରେ ଆଗ୍ରେସିଭ୍ ପ୍ରଚାର କରିବା ପ୍ରାୟ ଅସମ୍ଭବ ।
ଶକ୍ତି ପ୍ରଦର୍ଶନ କରିବାର ସୁଯୋଗ ବି ନାହିଁ । ତେଣୁ ଯାହା ହେବ ଭିତରେ ଭିତରେ । ତେବେ ଭର୍ଚୁଆଲ କ୍ୟାମ୍ପେନିଂରେ ଏବେ ବି କୌଣସି ଦଳ ଆଖିଦୃଶିଆ ଉଦ୍ୟମ କରିନାହାନ୍ତି । ଟେକ୍ନୋଲୋଜି ଏଠାରେ ବେଶୀ ସହଯୋଗ କରିବ ନାହିଁ ବୋଲି ୩ ଦଳର ଅନୁଭବ ହୋଇଥିବାରୁ ନେତାମାନେ ଦ୍ୱାରଦ୍ୱାର ବୁଲି ପ୍ରଚାର କରୁଛନ୍ତି । ଆଉ ଗୋଟେ ରୋଚକ ଘଟଣା ହେଉଛି, ବିଭିନ୍ନ ଜିଲ୍ଲାରୁ ଆସିଥିବା ବିଭିନ୍ନ ଦଳର ନେତାମାନେ ଏଠାରେ ତାଙ୍କ ସମ୍ପର୍କୀୟମାନଙ୍କୁ ରାଜନୀତିରେ ବ୍ୟବହାର କରୁଛନ୍ତି । ନେତାମାନେ ସନ୍ଧ୍ୟା ପରେ ସେମାନଙ୍କ ସମ୍ପର୍କୀୟ, ସମ୍ପର୍କୀୟଙ୍କ ସମ୍ପର୍କୀୟ ଓ ସେମାନଙ୍କ ସାଙ୍ଗସାଥୀଙ୍କୁ ଭେଟି ଦଳୀୟ ପ୍ରାର୍ଥୀଙ୍କ ସପକ୍ଷରେ ବୁଝାଉଛନ୍ତି, ଆବଶ୍ୟକ ପଡ଼ିଲେ ଦଳୀୟ କାମରେ ବି ଲଗାଉଥିବା ଖବର ମଧ୍ୟ ଆସୁଛି । (ଦୀପ୍ତିମାନ ପତି /ବାଲେଶ୍ୱର )ବାଲେଶ୍ୱର
