ଓଡ଼ିଶା ତାଜା ନ୍ୟୁଜ (୧୭ ଅକ୍ଟୋବର ଶନିବାର ) ଭୁବନେଶ୍ୱର :- ବରିଷ୍ଠ ରାଜନେତା, ପୂର୍ବତନ ମନ୍ତ୍ରୀ, ପିପିଲିର ବିଧାୟକ ତଥା କଳା ଓ ସଂସ୍କୃତିପ୍ରେମୀ ସ୍ୱର୍ଗତଃ ପ୍ରଦୀପ ମହାରଥୀଙ୍କ ଅକାଳ ବିୟୋଗରେ ରାଜ୍ୟର ଅଗ୍ରଣୀ ସାମାଜିକ ଓ ସାଂସ୍କୃତିକ ଅନୁଷ୍ଠାନ ନୀଳାଦ୍ରିବିହାର ଯୁବ ଓ ସାଂସ୍କୃତିକ ସଂଘ ତରଫରୁ ଭାବବିହ୍ୱଳ ଶ୍ରଦ୍ଧାଞ୍ଜଳୀ ଅର୍ପଣ କରାଯାଇଛି । ସଂଘର ସଭାପତି ଡଃ ପ୍ରକାଶ ଚନ୍ଦ୍ର ପାଣିଗ୍ରାହୀଙ୍କ ଆବାହକତ୍ୱରେ, ଆୟୋଜିତ ଏହି ସ୍ମୃତି ସଭାରେ ସଂଘର ସଭ୍ୟ, ସ୍ଥାନୀୟ ଯୁବବନ୍ଧୁ, ଲୋକପ୍ରତିନିଧି, ଅଞ୍ଚଳର ବରିଷ୍ଠ ନାଗରିକ ତଥା ବାସିନ୍ଦାମାନେ ଉପସ୍ଥିତ ରହି ସ୍ୱର୍ଗତ ମହାରଥୀଙ୍କୁ ଗଭିର ଶ୍ରଦ୍ଧାଞ୍ଜଳୀ ଅର୍ପଣ କରିଥିଲେ । ପ୍ରାରମ୍ଭରେ ତାଙ୍କ ଫଟୋଚିତ୍ରରେ ମାଲ୍ୟାର୍ପଣ ଓ କ୍ୟାଣ୍ଡେଲ ପ୍ରଜ୍ୱଳନ କରାଯାଇ ତାଙ୍କ ଅମର ଆତ୍ମାର ସଦଗତି ନିମନ୍ତେ ଦୁଇ ମିନିଟ୍ ନୀରବ ପ୍ରାର୍ଥନା କରାଯାଇଥିଲା ।
ସଂଘର ସାଧାରଣ ସଂପାଦକ ତଥା ସମାଜସେବୀ ଶ୍ରୀ ବିଶ୍ୱଜିତ୍ ପଟ୍ଟନାୟକ(ସିଲୁ) ସ୍ୱର୍ଗତଃ ମହାରଥୀଙ୍କୁ ଏକ ପ୍ରବୀଣ ରାଜନେତା ସହ ତାଙ୍କୁ ଏକ ଅନୁଷ୍ଠାନ ଭାବେ ଚିତ୍ରଣ କରିଥିଲେ ଓ ତାଙ୍କ ବିୟୋଗରେ ରାଜ୍ୟ ରାଜନୀତି ତଥା କଳା ଓ ସଂସ୍କୃତି କ୍ଷେତ୍ରରେ ଏକ ଅପୂରଣୀୟ କ୍ଷତି ଘଟିଲା ବୋଲି ମତବ୍ୟକ୍ତ କରିଥିଲେ । ସଂଘର ସାଂସ୍କୃତିକ ସଂପାଦକ, ଶ୍ରୀ ବଟକୃଷ୍ଣ ପଣ୍ଡା ସ୍ୱର୍ଗତଃ ମହାରଥୀଙ୍କୁ କଳା ଓ ସଂସ୍କୃତିର ପୂଜାରୀ ରୂପେ ଅଭିହିତ କରିବା ସହ ରାଜନୀତି ଜୀବନର ବ୍ୟସ୍ତତା ମଧ୍ୟରେ ଲୁଚିଯାଉଥିବା ଯାତ୍ରା ସଂସ୍କୃତିକୁ ଅନେକ ପାଦ ଆଗକୁ ବଢାଇବାରେ ସ୍ୱର୍ଗତଃ ମହାରଥୀଙ୍କ ଅବଦାନ ଅତୁଳନୀୟ ବୋଲି ବିବେଚନା କରିଥିଲେ ।
ଏଥିସହ ଉପସ୍ଥିତ ବ୍ୟକ୍ତି ବିଶେଷ ସ୍ୱର୍ଗତ ମହାରଥୀଙ୍କ ସ୍ମୃତି ଚାରଣ କରିବା ସହ ଶ୍ରଦ୍ଧା ସୁମନ ଅର୍ପଣ କରିଥିଲେ । ଶେଷରେ ସଂଘର କୋଷାଧ୍ୟକ୍ଷ ଶ୍ରୀ ପ୍ରକାଶ ଚନ୍ଦ୍ର ସାହୁ (ଗଗନ) ପ୍ରଭୁ ଶ୍ରୀଜଗନ୍ନାଥ ତାଙ୍କ ପରିବାରକୁ ଏହି ଦୁଃଖଦ ସମୟରେ ଅସୀମ ସାହସ ଓ ଧୈର୍ଯ୍ୟ ପ୍ରଦାନ କରିବା ପାଇଁ ପ୍ରାର୍ଥନା କରିବା ସହ ଧନ୍ୟବାଦ ଅର୍ପଣ କରିଥିଲେ । ଏଥିରେ ଅନ୍ୟମାନଙ୍କ ମଧ୍ୟରେ ସାମ୍ବାଦିକ ଶ୍ରୀ ସୁକାନ୍ତ ରାଉତ, ରଞ୍ଜନ କୁମାର ସାହୁ, ଆଲୋକ ପରିଡା, ନରେନ୍ଦ୍ର ସାହୁ, କୁମର ବାରିକ, କୈବଲ୍ୟ ପ୍ରସାଦ ସାହୁ, ଭୀମସେନ ସାମଲ, ନିରଞ୍ଜନ ସାହୁ ପ୍ରମୁଖ ଉପସ୍ଥିତ ରହି କାର୍ଯ୍ୟକ୍ରମରେ ସହଯୋଗ କରିଥିଲେ ।
