କୋରିଆରେ ‘ଇଣ୍ଡିଆ ଡେ’ ଉତ୍ସବରେ ଓଡିଶୀ ନୃତ୍ୟ ପ୍ରଦର୍ଶନ କଲେ ଅଞ୍ଜେଲିନା

ଭୁବନେଶ୍ୱର (ଓଡିଶା ତାଜା ନ୍ୟୁଜ) ନି. ପ୍ର :- ନୃତ୍ୟାନ୍ତର ଓଡିଶୀ ଗ୍ରୁପର ଓଡିଆ ନୃତ୍ୟଶିଳ୍ପୀ ଅଞ୍ଜେଲିନା ଦକ୍ଷିଣ କୋରିଆର ସିଓଲରେ ଆୟୋଜିତ ‘ଇଣ୍ଡିଆ ଡେ ୨୦୨୬’ ଉତ୍ସବରେ ଓଡିଶୀ ନୃତ୍ୟ ପ୍ରଦର୍ଶନ କରିଥିଲେ । ଏହି କାର୍ଯ୍ୟକ୍ରମଟି ସିଓଲସ୍ଥିତ ଭାରତୀୟ ଦୂତାବାସ ଦ୍ୱାରା ଆୟୋଜିତ ହୋଇଥିଲା । ଏହି ଓଡିଶୀ ଦଳରେ ଆଶ୍ୱାସନା, ଅଞ୍ଜେଲିନା, ଶ୍ରେୟାଶୀ ଏବଂ ୫ ବର୍ଷୀୟା ଛୋଟ ଶିଳ୍ପୀ ମିହିକା ମାହନୂର ଅନ୍ତର୍ଭୁକ୍ତ ଥିଲେ । ନୀଳ ଆକାଶ ତଳେ ହାନ୍ ନଦୀ କୂଳରେ ସେମାନଙ୍କର ମନୋମୋହନୀୟ ନୃତ୍ୟ ପ୍ରଦର୍ଶନ ଦର୍ଶକମାନଙ୍କୁ ମୁଗ୍ଧ କରିଦେଇଥିଲା ।

ସୁନ୍ଦର ପରିବେଶ ଓ ଉଜ୍ଜ୍ୱଳ ସୂର୍ଯ୍ୟକିରଣ ମଧ୍ୟରେ ନୃତ୍ୟର ମାୟା ଅଧିକ ଆକର୍ଷଣୀୟ ହୋଇଉଠିଥିଲା । ଲୋକମାନେ ଥମ୍କି ଯାଇ ସଙ୍ଗୀତ ଓ ନୃତ୍ୟର ମାଧୁର୍ୟ ଉପଭୋଗ କରୁଥିଲେ ଏବଂ ଧୀରେଧୀରେ କାର୍ଯ୍ୟକ୍ରମ ସ୍ଥଳୀକୁ ଆସି ଭିଡ଼ ଜମାଉଥିଲେ । ଦକ୍ଷିଣ କୋରିଆରେ ଭାରତୀୟ ଦୂତାବାସ ପକ୍ଷରୁ ଆୟୋଜିତ ଏହା ପ୍ରଥମ ‘ଇଣ୍ଡିଆ ଡେ’ କାର୍ଯ୍ୟକ୍ରମ ଥିଲା। କାର୍ଯ୍ୟକ୍ରମ ସ୍ଥଳୀର ଦୁଇ ପାର୍ଶ୍ୱରେ ଭାରତର ୨୮ଟି ରାଜ୍ୟକୁ ପ୍ରତିନିଧିତ୍ୱ କରୁଥିବା ଷ୍ଟଲ୍ ସଜାଯାଇଥିଲା ।

ଉତ୍ତର, ଦକ୍ଷିଣ, ପୂର୍ବ ଓ ପଶ୍ଚିମ ଭାରତର ସଂସ୍କୃତିକୁ ନଦୀ କୂଳରେ ସୁନ୍ଦର ଭାବେ ପ୍ରଦର୍ଶିତ କରାଯାଇଥିଲା। ବର୍ତ୍ତମାନ ପ୍ରାୟ ୧୮ ହଜାର ଭାରତୀୟ ଦକ୍ଷିଣ କୋରିଆରେ ବସବାସ କରୁଥିବାବେଳେ ଭାରତରେ ବସବାସ କରୁଥିବା କୋରିଆନ୍‌ମାନଙ୍କ ସଂଖ୍ୟା ତୁଳନାମୂଳକ ଭାବେ କମ୍ ରହିଛି। ଅଞ୍ଜେଲିନା କହିଥିଲେ, “ବିଶ୍ୱରେ ଶକ୍ତିର ସମୀକରଣ ପରିବର୍ତ୍ତିତ ହେଉଥିବା ସମୟରେ ଭାରତ ଆଉ ଦୂର ଦେଶ ଭାବେ ରହିନାହିଁ। ଓଡିଶୀ ନୃତ୍ୟ ପ୍ରଦର୍ଶନ ସମୟରେ ଆମେ ଏକ କୋରିଆନ୍ କେ-ପପ୍ ଦଳ ସହ ଭେଟିଥିଲୁ।

ଆଶ୍ଚର୍ଯ୍ୟର କଥା ହେଲା, ସେହି ଦଳର ଜଣେ ପ୍ରମୁଖ ସଦସ୍ୟ ମୋର ରାଜ୍ୟର ରାଉରକେଲା ସହରର ଥିଲେ। ଆମେ କିଛି ସୁନ୍ଦର ମୁହୂର୍ତ୍ତ ସହ କାଟିଲୁ।” ଗଛଛାୟା ତଳେ ଲୋକମାନେ ଭାରତୀୟ ପାରମ୍ପରିକ ବାଦ୍ୟଯନ୍ତ୍ରର ସୁର ଉପଭୋଗ କରୁଥିଲେ। ଭାରତୀୟ ରାଜଦୂତ ଗୋକର୍ଣ୍ଣଲ ଦାସ କହିଥିଲେ, “ମନ ସହ ମନ ଯେତେବେଳେ ଯୋଡ଼ାଯାଏ, ସେତେବେଳେ ସଂସ୍କୃତିର ସତ୍ୟ ସମ୍ମିଳନ ଘଟେ। ଆଜିର ଏହି ସମାବେଶ କୋରିଆ ଓ ଭାରତୀୟ ସଂସ୍କୃତିର ଏକତାର ପ୍ରତୀକ।”