~ଅଏଲ୍ ଇଣ୍ଡିଆ ଏବଂ ସିଏସଆଇଆର-ଆଇଏମଏମଟି ମଧ୍ୟରେ ବୁଝାମଣାପତ୍ର ସ୍ୱାକ୍ଷରିତ~
ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ଅଏଲ୍ ଇଣ୍ଡିଆ ଲିମିଟେଡ୍ (ଏକ ମହାରତ୍ନ କମ୍ପାନୀ), ଭାରତ ସରକାରଙ୍କ ଖଣି ମନ୍ତ୍ରଣାଳୟ ଦ୍ୱାରା ‘ଜାତୀୟ ଗୁରୁତ୍ୱପୂର୍ଣ୍ଣ ଖଣିଜ ମିଶନ’ (ଏନସିଏମ୍ଏମ୍) ଅଧୀନରେ ସର୍ବବୃହତ ‘କ୍ରିଟିକାଲ୍ ମିନେରାଲ୍ସ ସେଣ୍ଟର ଅଫ୍ ଏକ୍ସଲେନ୍ସ’ ଭାବେ ସ୍ୱୀକୃତିପ୍ରାପ୍ତ ସିଏସଆଇଆର – ଇନଷ୍ଟିଚ୍ୟୁଟ୍ ଅଫ୍ ମିନେରାଲ୍ସ ଆଣ୍ଡ ମ୍ୟାଟେରିଆଲ୍ସ ଟେକ୍ନୋଲୋଜି (ସିଏସଆଇଆର-ଆଇଏମଏମଟି ), ଭୁବନେଶ୍ୱର ସହିତ ଏକ ବୁଝାମଣାପତ୍ର ସ୍ଵାକ୍ଷର କରିଛି। ଏହି ରଣନୈତିକ ସହଭାଗିତାର ଲକ୍ଷ୍ୟ ହେଉଛି ‘ଆତ୍ମନିର୍ଭର ଭାରତ’ ଏବଂ ‘ବିକଶିତ ଭାରତ’ର ସଂକଳ୍ପକୁ ସାକାର କରିବାରେ ସହାୟକ ହେବା ।
ଏହି ବୁଝାମଣାପତ୍ର ସ୍ଵାକ୍ଷର ସହିତ, ଅଏଲ୍ ଇଣ୍ଡିଆ ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରଣାଳୟ ଅଧୀନରେ ଥିବା ସିଏସଆଇଆର-ଆଇଏମଏମଟିର ପ୍ରଥମ “ଇଣ୍ଡଷ୍ଟ୍ରି ସ୍ପୋକ୍” ହୋଇପାରିଛି, ଯାହା ବିଭିନ୍ନ କ୍ଷେତ୍ର ମଧ୍ୟରେ ସହଯୋଗ କ୍ଷେତ୍ରରେ ଏକ ପ୍ରମୁଖ ମାଇଲଖୁଣ୍ଟ ସ୍ଥାପନ କରିଛି । ଅଏଲ୍ ଇଣ୍ଡିଆର ଅଧ୍ୟକ୍ଷ ତଥା ପରିଚାଳନା ନିର୍ଦ୍ଦେଶକ (ସିଏମଡି) ଡ଼ ରଞ୍ଜିତ ରଥଙ୍କ ଉପସ୍ଥିତିରେ, ଅଏଲ୍ ଇଣ୍ଡିଆର ନିର୍ଦ୍ଦେଶକ (ଅନ୍ୱେଷଣ ଏବଂ ବିକାଶ) ଶ୍ରୀ ସାଲୋମା ୟୋମଦୋ ଏବଂ ସିଏସଆଇଆର-ଆଇଏମଏମଟିର ନିର୍ଦ୍ଦେଶକ ରାମାନୁଜ ନାରାୟଣ ଏହି ବୁଝାମଣାପତ୍ର ସ୍ଵାକ୍ଷର କରିଛନ୍ତି। ଏହି କାର୍ଯ୍ୟକ୍ରମରେ ଅଏଲ୍ ଇଣ୍ଡିଆର କାର୍ଯ୍ୟକାରୀ ନିର୍ଦ୍ଦେଶକ ଓ ବରିଷ୍ଠ ଅଧିକାରୀଙ୍କ ସମେତ ସିଏସଆଇଆର-ଆଇଏମଏମଟିର ବରିଷ୍ଠ ବୈଜ୍ଞାନିକ ଡ଼ କାଳୀ ସଞ୍ଜୟ ଏବଂ ଡ଼ ସତ୍ୟଜିତ ରଥ ଉପସ୍ଥିତ ଥିଲେ।
ଏହି ଅବସରରେ ଡ଼ ରଞ୍ଜିତ ରଥ କହିଛନ୍ତି ଯେ, ଏହି ଏମ୍ଓୟୁ ଫଳରେ ଏନସିଏମ୍ଏମ୍ ଅଧୀନରେ କେବଳ ଗୁରୁତ୍ୱପୂର୍ଣ୍ଣ ଖଣିଜ ସମ୍ପଦ ନୁହେଁ ବରଂ ଅନ୍ୟାନ୍ୟ କ୍ଷେତ୍ରରେ ମଧ୍ୟ ଅଏଲ୍ ଇଣ୍ଡିଆର ସହଭାଗିତା ବୃଦ୍ଧି ପାଇବ । ସେ ଆହୁରି ସୂଚନା ଦେଇଛନ୍ତି ଯେ, ଅଏଲ୍ ଇଣ୍ଡିଆ ପୂର୍ବରୁ ଦୁଇଟି ଗୁରୁତ୍ୱପୂର୍ଣ୍ଣ ଖଣିଜ ବ୍ଲକ – ଅରୁଣାଚଳ ପ୍ରଦେଶର ‘ଫୋପ୍ ଗ୍ରାଫାଇଟ୍-ଭାନାଡିୟମ୍ ସିଏଲ୍ ବ୍ଲକ୍’ ଏବଂ ରାଜସ୍ଥାନର ‘ଜୋରକିଆନ୍ ପୋଟାସ୍ ବ୍ଲକ୍’ ହାସଲ କରିସାରିଛି । ଏହି ସମ୍ପତ୍ତିଗୁଡ଼ିକର ଖଣିଜ ପ୍ରକ୍ରିୟାକରଣ ଏବଂ ଉନ୍ନତିକରଣ ଅଧ୍ୟୟନରେ ସିଏସଆଇଆର-ଆଇଏମଏମଟି ଏକ ପ୍ରମୁଖ ଭୂମିକା ଗ୍ରହଣ କରିବ ।
ଡ଼ ରଥ ଗୁରୁତ୍ୱପୂର୍ଣ୍ଣ ଖଣିଜ ସମ୍ପଦର ଚିହ୍ନଟ ଏବଂ ଲକ୍ଷ୍ୟ ନିର୍ଦ୍ଧାରଣ କ୍ଷେତ୍ରରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସ ଏବଂ ମେସିନ୍ ଲର୍ଣ୍ଣିଂ ଭିତ୍ତିକ ପ୍ରକଳ୍ପର ସମ୍ଭାବନା ଉପରେ ମଧ୍ୟ ଗୁରୁତ୍ୱାରୋପ କରିଛନ୍ତି । ଏଥିସହ ସେ କହିଛନ୍ତି ଯେ ସିଏସଆଇଆରର ମହାନିର୍ଦ୍ଦେଶକଙ୍କ ସହ ପରାମର୍ଶ କରି ଅଏଲ୍ ଇଣ୍ଡିଆ ଏଭଳି ଦଶଟି ଗୁରୁତ୍ୱପୂର୍ଣ୍ଣ କ୍ଷେତ୍ର ଚିହ୍ନଟ କରିଛି । ଡକ୍ଟର ରାମାନୁଜ ନାରାୟଣ କହିଛନ୍ତି ଯେ, ସିଏସଆଇଆର-ଆଇଏମଏମଟି ପାଖରେ ମୌଳିକ ଗବେଷଣା ଏବଂ ପ୍ରଯୁକ୍ତିବିଦ୍ୟା ଭିତ୍ତିକ କାର୍ଯ୍ୟକ୍ରମରେ ବ୍ୟାପକ ଅଭିଜ୍ଞତା ରହିଛି,
ଯାହା ବିଶେଷ କରି ଗୁରୁତ୍ୱପୂର୍ଣ୍ଣ ଖଣିଜ ଏବଂ ସ୍ଥାୟୀ ବିକାଶ କ୍ଷେତ୍ରରେ ଖଣି ଓ ଧାତୁ ଶିଳ୍ପର ଆହ୍ୱାନଗୁଡ଼ିକର ସମାଧାନ କରିବାରେ ସକ୍ଷମ । କେନ୍ଦ୍ରୀୟ ବଜେଟ୍ ୨୦୨୪-୨୫ରେ ଘୋଷିତ ଜାତୀୟ ଗୁରୁତ୍ୱପୂର୍ଣ୍ଣ ଖଣିଜ ମିଶନ (ଏନସିଏମ୍ଏମ୍)ର ଲକ୍ଷ୍ୟ ହେଉଛି ଘରୋଇ ଉତ୍ପାଦନ, ପୁନଃଚକ୍ରଣ ଏବଂ ବିଦେଶରୁ ଅଧିଗ୍ରହଣ ମାଧ୍ୟମରେ ଭାରତର ଗୁରୁତ୍ୱପୂର୍ଣ୍ଣ ଖଣିଜ ଯୋଗାଣ ଶୃଙ୍ଖଳକୁ ସୁଦୃଢ଼ କରିବା । ସିଏସଆଇଆର-ଆଇଏମଏମଟି ଭଳି ଉତ୍କର୍ଷ କେନ୍ଦ୍ରଗୁଡ଼ିକ ଗବେଷଣା ଏବଂ ବିକାଶ ପ୍ରତିଷ୍ଠାନ ଏବଂ ଶିଳ୍ପ ଅଂଶୀଦାରମାନଙ୍କ ସହ ମିଶି କାର୍ଯ୍ୟ କରନ୍ତି, ଯାହା ଦ୍ୱାରା ଗବେଷଣାର ଫଳାଫଳକୁ ଗୁରୁତ୍ୱପୂର୍ଣ୍ଣ ଖଣିଜ ଅନ୍ୱେଷଣ ଏବଂ ପ୍ରକ୍ରିୟାକରଣରେ ପ୍ରାୟୋଗିକ ଭାବେ ବ୍ୟବହାର କରାଯାଇପାରିବ ।
