ପୁଟୁପଡା ଅଙ୍ଗନବାଡ଼ି କେନ୍ଦ୍ର ରେ “ଆମ ବ୍ୟଞ୍ଜନ” କାର୍ଯ୍ୟକ୍ରମ ଅନୁଷ୍ଠିତ

ପାରମ୍ପରିକ ଓଡ଼ିଆ ଖାଦ୍ୟରେ ରହିଛି ପୋଷକ ତତ୍ତ୍ୱ 

ଗୋପ (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- ପୁରୀ ଜିଲ୍ଲା ର ଗୋପ ବ୍ଲକ ଅନ୍ତର୍ଗତ ବଡଗାଁ ପଞ୍ଚାୟତ ର ପୁଟୁପଡା ଗ୍ରାମରେ ଥିବା ଅଙ୍ଗନବାଡି କେନ୍ଦ୍ର ରେ ଗତ 19 ତାରିଖ ରେ ଏକ ସ୍ୱତନ୍ତ୍ର କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି l ଯାହାର ନାମକରଣ ଥିଲା “ଆମ ବ୍ୟଞ୍ଜନ ” ଏହା ଭୁଆଁ ସେକ୍ଟର ଅଧିନସ୍ତ ପୁଟୁପଡା ଅଙ୍ଗନବାଡି ଜ୍ଞାନ କେନ୍ଦ୍ର ଠାରେ ଆୟୋଜିତ ହୋଇଥିଲା l ଏହାକୁ ଗୋପ ବ୍ଲକ ସମନ୍ୱିତ ଶିଶୁ ବିକାଶ ବିଭାଗ ଆନୁକୂଲ୍ୟରେ ଅନୁଷ୍ଠିତ ହୋଇଥିଲା l

ଏହି କାର୍ଯ୍ୟକ୍ରମରେ ଓଡ଼ିଆ ପାରମ୍ପରିକ ଖାଦ୍ୟର ଗୁରୁତ୍ୱ ଓ ଏହାର ସ୍ୱାସ୍ଥ୍ୟଗତ ଉପକାରିତା ଉପରେ ଆଲୋକପାତ କରାଯାଇଛି। ଉକ୍ତ କାର୍ଯ୍ୟକ୍ରମରେ ଉଦ୍‌ବୋଧନ ଦେଇ ଅଙ୍ଗନବାଡ଼ି କର୍ମୀ ଅହଲ୍ୟା ପାଣ୍ଡି କହିଛନ୍ତି ଯେ, ଓଡ଼ିଆ ଖାଦ୍ୟ କେବଳ ଏକ ପରମ୍ପରା ନୁହେଁ, ବରଂ ଏହା ଶରୀର ପାଇଁ ଆବଶ୍ୟକୀୟ ଭିଟାମିନ୍ ଓ ଖଣିଜ ଲବଣରେ ଭରପୂର। ବିଶେଷ କରି ଜୈବିକ ପଦ୍ଧତିରେ ପ୍ରସ୍ତୁତ ମାଣ୍ଡିଆ ଜାଉ, ଚକୁଳି ପିଠା ଓ ପାରମ୍ପରିକ ପଣା ଭଳି ଖାଦ୍ୟ ଆଧୁନିକ ଫାଷ୍ଟଫୁଡ୍‌ ତୁଳନାରେ ଯଥେଷ୍ଟ ଗୁଣକାରୀ ।

ଆଜିର ପିଢ଼ିକୁ ଆଧୁନିକ ତେଲ-ମସଲାଯୁକ୍ତ ଖାଦ୍ୟରୁ ଦୂରେଇ ରଖି ପୁଣି ଥରେ ନିଜ ସଂସ୍କୃତିର ସୁଷମ ଖାଦ୍ୟ ପ୍ରତି ଆକୃଷ୍ଟ କରିବା ଏହି ଅଭିଯାନର ମୁଖ୍ୟ ଲକ୍ଷ୍ୟ । ଏହି ସଚେତନତା କାର୍ଯ୍ୟକ୍ରମରେ ସେକ୍ଟରର ଅଙ୍ଗନୱାଡ଼ି କର୍ମୀ ମାନେ ଯୋଗ ଦେଇଥିଲେ । ସେମାନଙ୍କୁ ପୃଷ୍ଟିହୀନତା ଦୂର କରିବା ପାଇଁ ଖାଦ୍ୟର ଚୟନ ଓ ପ୍ରସ୍ତୁତି ପ୍ରଣାଳୀ ସମ୍ପର୍କରେ ସଚେତନ କରାଯାଇଥିଲା । ଏହି ଅବସରରେ ଭୂଆଁ ସେକ୍ଟରର ପର୍ଯ୍ୟବେକ୍ଷିକା ରାଧାରାଣୀ ପ୍ରଧାନ ଅତିଥି ଭାବେ ଉପସ୍ଥିତ ରହି କାର୍ଯ୍ୟକ୍ରମର ପରିଚାଳନା କରିଥିଲେ । ଅନ୍ୟମାନଙ୍କ ମଧ୍ୟରେ ଅଙ୍ଗନବାଡ଼ି କର୍ମୀ ମମତା ଜେନା, ସ୍ଵର୍ଣ୍ଣଲତା ଦାସ ,କବିତା ବିଶ୍ୱାଳ, ସସ୍ମିତା ଜେନା, ଅଶାନ୍ତି ଦାସ, ଦୀପ୍ତିପ୍ରାଭା ସ୍ୱାଇଁ ଏବଂ ସନ୍ତୋଷୀ ସାହୁ ପ୍ରମୁଖ ଉପସ୍ଥିତ ରହି ସହଯୋଗ କରିଥିଲେ ।