ତୃତୀୟ ବିଳାସୁଣୀ ମହୋତ୍ସବ ମହାସମାରୋହରେ ଆୟୋଜିତ

କଟକ/ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) (ନି. ପ୍ର ) :- କଟକ ଜିଲ୍ଲାର ନିଆଳି ବ୍ଲକ ଅନ୍ତର୍ଗତ ବିଳାସୁଣୀ ଗ୍ରାମରେ ତିନିଦିନିଆ ତୃତୀୟ ବିଳାସୁଣୀ ମହୋତ୍ସବ ମହା ସମାରୋହରେ ସମାପ୍ତ ହୋଇଯାଇଛି । ଏହି କ୍ରୀଡ଼ା ଓ ସାଂସ୍କୃତିକ ମହାକୁମ୍ଭରେ ପ୍ରାୟ ଦଶ ହଜାର ସ୍ଥାନୀୟ ବାସିନ୍ଦା ଯୋଗ ଦେଇଥିବା ଦେଖାଯାଇଥିଲା। ଗୋପବନ୍ଧୁ ଏଭରଗ୍ରୀନ ଆଞ୍ଚଳିକ ଯୁବ ପରିଷଦ ଏବଂ ଭଲ୍ୟୁଣ୍ଟାରୀ ଏମ୍ପାୱାରମେଣ୍ଟ,ଡେଭେଲପମେଣ୍ଟ ଆଣ୍ଡ ଆକ୍ସନ(ଭେଦା) ର ମିଳିତ ସହଯୋଗରେ ଆୟୋଜିତ ଏହି ମହୋତ୍ସବ ବିପୁଳ ସଫଳତା ହାସଲ କରିଥିବା ଲକ୍ଷ୍ଯ କରାଯାଇଛି ।

ଗୋପବନ୍ଧୁ ଏଭରଗ୍ରୀନ ଆଞ୍ଚଳିକ ଯୁବ ପରିଷଦ ବିଳାସୁଣୀଠାରେ ଗୁଣାତ୍ମକ କ୍ରୀଡ଼ାର ବିକାଶ ନେଇ ସକ୍ରିୟ ଭାବରେ କାର୍ଯ୍ୟ କରି ଆସୁଛି। ଭେଦା ଓଡ଼ିଶାର ଗ୍ରାମାଞ୍ଚଳରେ ସମାଜ ସେବା, ଶିକ୍ଷା, ସ୍ୱାସ୍ଥ୍ୟ, କ୍ରୀଡା, ସଂସ୍କୃତି ଓ ଆଧ୍ୟାତ୍ମିକ ପରମ୍ପରା ଆଦିର ସର୍ବାଙ୍ଗୀନ ଉନ୍ନୟନ ଦିଗରେ ଏହାର ଅଧ୍ୟକ୍ଷ ଡ଼ଃ ବଦ୍ରି ନାରାୟଣ ମହାପାତ୍ରଙ୍କର ସୁଦକ୍ଷ ନେତୃତ୍ୱରେ ବ୍ୟାପକ ପ୍ରୟାସ କରି ଆସୁଛି ।

ଚଳିତ ବର୍ଷର ବିଳାସୁଣୀ ମହୋତ୍ସବର ବିଶେଷ ଆକର୍ଷଣ ମହାଦେବ ମହାପାତ୍ର ସ୍ମାରକୀ ଆନ୍ତଃ ଜିଲ୍ଲା ତଥା ଆନ୍ତଃରାଜ୍ୟ ଫୁଟବଲ ଟୁର୍ଣ୍ଣାମେଣ୍ଟ ଥିଲା। ଏଥିରେ ପଶ୍ଚିମବଙ୍ଗ, ଝାରଖଣ୍ଡ, କଟକ, ଖୋର୍ଦ୍ଧା, ଜଗତସିଂହପୁର, ସୋନପୁର, ଦେବଗଡ଼ ଓ ବଲାଙ୍ଗୀର ଆଦି ଆଠଟି ଅଗ୍ରଣୀ ଫୁଟବଲ ଟିମ ଭାଗ ନେଇଥିଲେ। ଟୁର୍ଣ୍ଣାମେଣ୍ଟରେ କଟକ ବିଜୟୀ ହୋଇ ଚମ୍ପିୟାନ ହୋଇଥିବା ବେଳେ ଖୋର୍ଦ୍ଧା ଟିମ ରନର୍ସଅପ ହୋଇଥିଲା। ଏହି ଟୁର୍ଣ୍ଣାମେଣ୍ଟକୁ ଆତ୍ମାର ଅଧ୍ୟକ୍ଷ ଗଣେଶ୍ୱର ମିଶ୍ର, ଅତିରିକ୍ତ ତହସିଲଦାର ପ୍ରଭାତ ଜେନା ଏବଂ ବିଳାସୁଣୀର ସରପଞ୍ଚ ସବିତା ନନ୍ଦ ପ୍ରମୁଖ ଉଦ୍ଘାଟନ କରିଥିଲେ ।

ମହୋତ୍ସବର ଉଦଯାପନୀ ଉତ୍ସବରେ ମୁଖ୍ୟ ଅତିଥି ଭାବେ ଯୋଗଦେଇ ସ୍ଥାନୀୟ ବିଧାୟକ ଛବି ମଲ୍ଲିକ ଉଭୟ ଟିମକୁ ଟ୍ରଫି ମାନ ପ୍ରଦାନ କରିଥିଲେ। ଶ୍ରୀ ମଲ୍ଲିକ ଗ୍ରାମାଞ୍ଚଳରେ ଏଭଳି ଅନନ୍ୟ ଆୟୋଜନ କରାଯିବାର ସାଧୁ ଉଦ୍ୟମକୁ ଭୁୟସୀ ପ୍ରଶଂସା କରିଥିଲେ। ବିଳାସୁଣୀ ଖେଳ ପଡ଼ିଆର ଖୁବ ଶୀଘ୍ର ଉନ୍ନତିକରଣ କରାଯାଇ ଏଠାରେ ଏକ ମିନି ଷ୍ଟାଡିୟମ ନିର୍ମାଣ କରାଯିବ ବୋଲି ଶ୍ରୀ ମଲ୍ଲିକ ପ୍ରତିଶୃତି ଦେଇଥିଲେ। ଅନ୍ୟାନ୍ୟ ଅତିଥିମାନଙ୍କ ମଧ୍ୟରେ ବିଜେପି ନେତା ଶଶିକାନ୍ତ ଲେଙ୍କା ଓ ପ୍ରଦୀପ ମହନ୍ତ ପ୍ରମୁଖ ଯୋଗ ଦେଇ ବିଳାସୁଣୀ ଗ୍ରାମବାସୀଙ୍କୁ ସମୃଦ୍ଧ ଓ ସଶକ୍ତ କରିବା ପାଇଁ ଏହି ଅଭିନବ ପରିକଳ୍ପନାକୁ ଅଭିନନ୍ଦନ ଜଣାଇଥିଲେ।

ପ୍ରଥମ ଦିବସରେ ସମ୍ମାନିତ ଅତିଥି ଭାବରେ ଯୋଗ ଦେଇ ରାଜ୍ୟ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ଡ଼ଃ ମୁକେଶ ମହାଲିଙ୍ଗ ବିଳାସୁଣୀ ଭଳି ଗ୍ରାମରେ ଏଭଳି ମହୋତ୍ସବ ଆୟୋଜନ ଆଞ୍ଚଳିକ ସ୍ତରରେ ଏକତା ଓ ସଦ୍ଭାବନାକୁ ସୁଦୃଢ଼ କରିବାରେ ସହାୟକ ହେବ ବୋଲି ମତ ବ୍ୟକ୍ତ କରିଥିଲେ। ଡଃ. ମହାଲିଙ୍ଗ ବିଶିଷ୍ଟ ଲେଖିକା ସୁକାନ୍ତି ରାଉତଙ୍କ ଦ୍ୱାରା ସମ୍ପାଦିତ ମହୋତ୍ସବର ସ୍ମରଣିକାକୁ ଉନ୍ମୋଚନ କରିଥିଲେ।

ତିନିଦିନର ସଭାରେ ସଭାପତିତ୍ୱ କରି ମୁଖ୍ୟ ଆୟୋଜକ ଓ ଭେଦାର ଅଧ୍ୟକ୍ଷ ଡ଼ଃ ବଦ୍ରି ନାରାୟଣ ମହାପାତ୍ର ବିଳାସୁଣୀକୁ ଏକ ମଡେଲ ଗ୍ରାମରେ ପରିଣତ କରିବା ପାଇଁ ସମସ୍ତଙ୍କର ସାହାଯ୍ୟ ସହଯୋଗ କାମନା କରିଥିଲେ। ସଭାକୁ ଗୋପବନ୍ଧୁ ଏଭରଗ୍ରୀନ ଆଞ୍ଚଳିକ ଯୁବ ପରିଷଦର ଅଧ୍ୟକ୍ଷ ଚକ୍ରଧର ରାଜ ପରିଚାଳନା କରିଥିଲେ । ସଭାପତି ବିଷ୍ଣୁ ଚରଣ ଡାଳୁଆ ବାର୍ଷିକ ବିବରଣୀ ପାଠ କରିଥିଲେ । ସମ୍ପାଦକ ଲଲାଟେନ୍ଦୁ ସାହୁ ଧନ୍ୟବାଦ ଅର୍ପଣ କରିଥିଲେ।

ପ୍ରଥମ ଦିବସରେ ଅନୁଷ୍ଠିତ ଶ୍ରୀ ଶ୍ରୀ ଗୋପାଳଜୀଉ ଏକଦିବସୀୟ ଫୁଟବଲ ଟୁର୍ଣ୍ଣାମେଣ୍ଟରେ ବାହାରଣା ଟିମ୍ ବିଜୟୀ ହୋଇଥିବା ବେଳେ ବ୍ରାହ୍ମଣ ଝରିଲୋ ରନର୍ସଅପ୍ ହୋଇଥିଲା। ସମ୍ମାନିତ ଅତିଥି ଭାବରେ ଯୋଗ ଦେଇ ପୂର୍ବତନ ବିଧାୟକ ଡଃ. ପ୍ରମୋଦ କୁମାର ମଲ୍ଲିକ ଓ ରବୀନ୍ଦ୍ର କୁମାର ମଲ୍ଲିକ ଉଭୟ ଟିମକୁ ଟ୍ରଫି ପ୍ରଦାନ କରିଥିଲେ।

ସମାରୋହର ତିନି ସନ୍ଧ୍ୟାରେ ପରିବେଷିତ ସାଂସ୍କୃତିକ କାର୍ଯ୍ୟକ୍ରମ, ଉପସ୍ଥିତ ଦର୍ଶକମାନଙ୍କ ଦ୍ୱାରା ବେଶ ଆଦୃତ ହୋଇଥିଲା। ବିଶିଷ୍ଟ ଗାୟିକା ଇରା ମହାନ୍ତି, ପ୍ରଖ୍ୟାତ ହାସ୍ୟ ଅଭିନେତା ଯୋଡ଼ି ପ୍ରଜ୍ଞା-ଶଙ୍କର , ଓଲିଉଡ ତାରକା ଦୀପକ ବାରିକ ଓ ରିଆ ଦେ, ଅଭିନେତ୍ରୀ ତୃପ୍ତି ମୀରାମ୍ବିକା, ପାୟଲ ପ୍ରିୟଦର୍ଶିନୀ ତଥା ସାଧନା କଳାକେନ୍ଦ୍ର ଏବଂ ମା କୁତ୍ତାମଚଣ୍ଡୀ ନୃତ୍ୟ ଗ୍ରୁପର ପ୍ରତିଭାବାନ କଳାକାରମାନେ ସେମାନଙ୍କର ପାରଦର୍ଶୀ କଳା ଚାତୁର୍ଯ୍ୟ ପ୍ରଦର୍ଶନ କରି ଦର୍ଶକମାନଙ୍କୁ ମନ୍ତ୍ରମୁଗ୍ଧ କରିଦେଇଥିଲେ। ସମଗ୍ର ସାଂସ୍କୃତିକ କାର୍ଯ୍ୟକ୍ରମକୁ ଲଲାଟେନ୍ଦୁ ସାହୁ ଖୁବ ସୁଚାରୁ ରୁପେ ସଂଯୋଜନା ଓ ସଞ୍ଚାଳନା କରିଥିଲେ।

ସମାଜର ବିଭିନ୍ନ କ୍ଷେତ୍ରରେ ଉଲ୍ଲେଖନୀୟ ସେବା ପାଇଁ ବିଳାସୁଣୀ ମହୋତ୍ସବ ଅବସରରେ ବିଶିଷ୍ଟ ବ୍ୟକ୍ତିମାନଙ୍କୁ ବିଳାସୁଣୀ ସମ୍ମାନ ପ୍ରଦାନ କରାଯାଇଥିଲା। ପୁରସ୍କୃତ ବ୍ୟକ୍ତି ବିଶେଷଙ୍କ ମଧ୍ୟରେ ସୁଶାନ୍ତ କୁମାର ସାବତ, ଦେବ ନାରାୟଣ ସେଠୀ, ରଞ୍ଜନ ଆଚାର୍ଯ୍ୟ, ଉମାକାନ୍ତ ଜେନା, ଜୟରାମ ରଣା, ଲିଲି ଜେନାମଣି, ମନସ୍ମିତା ଜେନା, ନିବେଦିତା ଶତପଥୀ, ଡଃ ସରୋଜିନୀ ପାଣି, ପ୍ରବୋଧ ସାମନ୍ତରା, ଡଃ. ଚିତ୍ତରଞ୍ଜନ ମିଶ୍ର, ବିଜୟ କୁମାର ମହାନ୍ତି, ପଣ୍ଡିତ ରାଜ କିଶୋର ପଣ୍ଡା, ନଳିନୀ ସାହୁ, କୃପାସିନ୍ଧୁ ମହାରାଜ, ଡଃ ଅଧିରାଜ ପରିଡା,ଅତୁଲ୍ୟ ଜେନା ଏବଂ ପ୍ରକାଶ ନନ୍ଦ ପ୍ରମୁଖ ଅନ୍ତର୍ଭୁକ୍ତ ଥିଲେ।

ମହୋତ୍ସବର ଆୟୋଜନକୁ ବ୍ୟାପକ ଭାବେ ସଫଳ କରାଇବାରେ ବିଶେଷ ଯୋଗଦାନ ଦେଇଥିବା ସଂଗଠକ ମାନଙ୍କ ମଧ୍ୟରେ ଉପେନ୍ଦ୍ର ମହାନ୍ତି, ପ୍ରକାଶ ମହାନ୍ତି, ସମ୍ପଦ ମହାନ୍ତି, ସ୍ୱାଧୀନ ମହାନ୍ତି, ନିରଞ୍ଜନ ରାୟ, କାର୍ତ୍ତିକ ଚନ୍ଦ୍ର ଷଡ଼ଙ୍ଗୀ, ମଦନମୋହନ ଜେନା, ବିଷ୍ଣୁ ଚରଣ ଡାଳୁଆ , ଚକ୍ରଧର ରାଜ, ଲଲାଟେନ୍ଦୁ ସାହୁ, ମିହିର ବସ୍ତିଆ, ପ୍ରଭାତ ଜେନା, ସୁବାସ ମହାନ୍ତି ଏବଂ ମାନଭଞ୍ଜନ ବେହେରା ପ୍ରମୁଖ ସାମିଲ ଥିଲେ।