ତହସିଲଦାରଙ୍କୁ ଅତିରିକ୍ତ କ୍ଷମତା

ଓଡ଼ିଶା ରାଜସ୍ୱ ବିଭାଗ ଏକ ବଡ଼ ପ୍ରଶାସନିକ ସଂସ୍କାର ଆଣିଛି ।

ଭୁବନେଶ୍ୱର (ଓଡ଼ିଶା ତାଜା ନ୍ୟୁଜ୍) ନି. ପ୍ର :- ଜମିଜମା ସମ୍ବନ୍ଧୀୟ ଦୀର୍ଘ ଦିନର ମାମଲାକୁ ହ୍ରାସ କରିବା ପାଇଁ ଓଡ଼ିଶା ରାଜସ୍ୱ ବିଭାଗ ଏକ ବଡ଼ ପ୍ରଶାସନିକ ସଂସ୍କାର ଆଣିଛି । ପୁରୁଣା ପଞ୍ଜୀକୃତ ବିକ୍ରୟ ଦଲିଲ୍ ଆଧାରରେ ଜମିର ମ୍ୟୁଟେସନ୍‌ (ସ୍ୱତ୍ୱାନ୍ତର)କୁ ଅନୁମୋଦନ କରିବା ପାଇଁ ତହସିଲଦାରମାନଙ୍କୁ କ୍ଷମତା ପ୍ରଦାନ କରାଯାଇଛି । ଗୁରୁବାର ରାଜସ୍ୱ ବିଭାଗ ଓଡ଼ିଶା ସର୍ଭ ଏବଂ ବନ୍‌ଦୋବସ୍ତ (ସଂଶୋଧନ) ନିୟମାବଳୀ, ୨୦୨୫ ଅନୁଯାୟୀ ଏକ ବିସ୍ତୃତ ‘ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଡ୍ୟୁର’ (ଝଙଚ) ଜାରି କରିଛି ।

ଏହି ପଦକ୍ଷେପ ଫଳରେ ଜମି ମାଲିକମାନେ ରେଭିଜିଓନାଲ କୋର୍ଟ କିମ୍ବା ରାଜସ୍ୱ ବୋର୍ଡକୁ ନ ଯାଇ ସିଧାସଳଖ ତହସିଲ କାର୍ଯ୍ୟାଳୟରେ ରେକର୍ଡ ସଂଶୋଧନ କରିପାରିବେ । ସଂଶୋଧିତ ନିୟମ ଅନୁଯାୟୀ, ଜମି ମାଲିକମାନେ ଏବେ ସିଧାସଳଖ ତହସିଲ କାର୍ଯ୍ୟାଳୟରେ ପୁରୁଣା ପଞ୍ଜୀକୃତ ବିକ୍ରୟ ଦଲିଲ୍‌ ଦାଖଲ କରି ରେକର୍ଡ ସଂଶୋଧନ ଏବଂ ମ୍ୟୁଟେସନ୍‌ ପାଇଁ ଆବେଦନ କରିପାରିବେ । ତହସିଲଦାରମାନେ ଏସବୁ ମାମଲାର ଶୁଣାଣି କରିବା ଏବଂ ସ୍ୱାଧୀନ ଭାବରେ ଆଦେଶ ପାରିତ କରିବା ପାଇଁ କ୍ଷମତାପ୍ରାପ୍ତ ହୋଇଛନ୍ତି ।

ଝଙଚ ଅନୁଯାୟୀ, ରାଜ୍ୟର ବିଭିନ୍ନ ରେଭିଜିଓନାଲ କୋର୍ଟରେ ପଡ଼ି ରହିଥିବା ପ୍ରାୟ ୧.୧୫ ଲକ୍ଷ ମ୍ୟୁଟେସନ୍ ସମ୍ବନ୍ଧୀୟ ମାମଲା ସମ୍ପୃକ୍ତ ତହସିଲ କାର୍ଯ୍ୟାଳୟକୁ ହସ୍ତାନ୍ତର କରାଯିବ । ଏହି ସମସ୍ତ ମାମଲାର ହସ୍ତାନ୍ତର ଏବଂ ଡିଜିଟାଲାଇଜେସନ୍ ପ୍ରକ୍ରିୟା ଜାନୁଆରୀ ୩୧, ୨୦୨୬ ସୁଦ୍ଧା ଶେଷ କରିବାକୁ ରାଜସ୍ୱ ବିଭାଗ ସମୟସୀମା ଧାର୍ଯ୍ୟ କରିଛି । ଆବେଦନକାରୀମାନେ ରାଜସ୍ୱ ବିଭାଗର ଅନ୍‌ଲାଇନ୍ ପୋର୍ଟାଲ୍ ମାଧ୍ୟମରେ ପୁରୁଣା ବିକ୍ରୟ ଦଲିଲ୍ ଅପଲୋଡ୍ କରି ଆବେଦନ କରିବେ ।

ପରେ ତହସିଲଦାର ରେକର୍ଡ କିପରଙ୍କ ଜରିଆରେ କାଗଜପତ୍ରର ଯାଞ୍ଚ କରିବା ସହ ରାଜସ୍ୱ ନିରୀକ୍ଷକଙ୍କଠାରୁ ଜମିର କ୍ଷେତ୍ର ଅଧିଗ୍ରହଣ ରିପୋର୍ଟ ମାଗିବେ । ଯେଉଁ ମାମଲାଗୁଡ଼ିକର ଶୁଣାଣି ଶେଷ ହୋଇ କେବଳ ରାୟ ସଂରକ୍ଷିତ ରଖାଯାଇଛି, ସେଗୁଡ଼ିକ କୋର୍ଟରେ ରହିବ ଏବଂ ଏହି ମାମଲାଗୁଡ଼ିକର ଚୂଡ଼ାନ୍ତ ଆଦେଶ ଚଳିତ ମାସ ୩୧ ତାରିଖ ସୁଦ୍ଧା ଶୁଣାଇବାକୁ କୋର୍ଟମାନଙ୍କୁ ନିର୍ଦ୍ଦେଶ ଦିଆଯାଇଛି ।