ଓଏଏସ୍ ସଂଘର ସମୂହ ଛୁଟି ପ୍ରଭାବ : ସମଗ୍ର ଜିଲ୍ଲାର ବ୍ଲକ ଓ ତହସିଲ ଅଫିସରେ କାମ ଠପ୍‍ – ଲୋକେ ହନ୍ତସନ୍ତ

କନ୍ଧମାଳ (ଓଡ଼ିଶା ତାଜା ନ୍ୟୁଜ୍) :- ଭୁବନେଶ୍ୱର ମହାନଗର ନିଗମର ଅତିରିକ୍ତ ଆୟୁକ୍ତଙ୍କୁ ମାଡ ଘଟଣାରେ ରାଜ୍ୟର ବିଭିନ୍ନ ସ୍ଥାନରେ ଓଏଏସ ସଂଘର ପ୍ରତିବାଦ ଜାରି ରହିଛି । ଅନିର୍ଦ୍ଦିଷ୍ଟ କାଳ ପର୍ଯ୍ୟନ୍ତ କାର୍ଯ୍ୟବନ୍ଦ ଆନ୍ଦୋଳନ କରିଛନ୍ତି ଓଏଏସ ସଂଘ । ଫଳରେ କନ୍ଧମାଳ ଜିଲ୍ଲାର ବିଭିନ୍ନ ସ୍ଥାନରେ ଅଫିସ୍‍ କାର୍ଯ୍ୟ ବାଧାପ୍ରାପ୍ତ ହୋଇଛି । ଘଟଣା ପଛରେ ଥିବା ମୁଖ୍ୟ କାର୍ପଟଦାରଙ୍କୁ ଗିରଫ କରିବାକୁ ଦାବି କରିଛି ସଂଘ। ଏହାର ପ୍ରତିଫଳନ କନ୍ଧମାଳ ଜିଲ୍ଲାର ପ୍ରତ୍ୟେକ ବ୍ଲକ ଓ଼ ତହସିଲରେ ଦେଖିବାକୁ ମିଳିଛି । ଜିଲ୍ଲାର ପ୍ରତ୍ୟେକ ବ୍ଲକର ବିଡିଓ ଏବଂ ତହସିଲଦାର କାର୍ଯ୍ୟରେ ଯୋଗ ନ ଦେବା ଯୋଗୁଁ ଅଫିସ ରେ କିଛି ମଧ୍ୟ କାମ ହୋଇପାରୁନି ।

ଯାହା ଫଳରେ ବିଭିନ୍ନ ଉନୟନମୂଳକ କାମ ଠପ୍ ହୋଉପଡ଼ିଛି, ଯେପରି ଆବାସ ଯୋଜନା, ବିଭିନ୍ନ ଫାଇଲରେ ଦସ୍ତଖତ ଭଳି ବିଭିନ୍ନ ଉନୟନମୂଳକ କାମ । ସାଧାରଣ ଜନତାଙ୍କ ଅଭିଯୋଗକୁ କେହି ଗ୍ରହଣ କରୁନାହାନ୍ତି । ଏପରିକି ବିଭିନ୍ନ ବିଭାଗରେ କାର୍ଯ୍ୟରତ ଅଧିକାରୀ ମାନେ ଆସି ଅଫିସରେ ବୁଲୁଥିବା ବେଳେ ନିଜ ନିଜ ଟେବୁଲଗୁଡିକ ଫାଙ୍କା ପଡୁଛି । ସେମାନଙ୍କ ଉପରେ ରୋକ ଲଗାଇବାକୁ କେହି ନାହାନ୍ତି ଏବଂ ଅଭିଯୋଗ ଗ୍ରହଣ କରିବାକୁ ମଧ୍ୟ କେହି ରାଜି ହେଉ ନଥିବା ଦୃଷ୍ଟିଗୋଚର ହୋଇଛି ।

ସେହିପରି ତହସିଲରେ ନାମଜାରୀ, କିସମ ପରିବର୍ତନ, ଆୟ ପ୍ରମାଣ ପତ୍ର, ଜାତି ପ୍ରମାଣ ପତ୍ର, ଠିକଣା ପ୍ରମାଣ ପତ୍ର ମଧ୍ୟ ଜନତାଙ୍କୁ ମିଳି ପାରୁନି। ସତେ ଯେପରି ମୁରବୀଶୂନ୍ୟ ହୋଇଯାଇଛି ଅଫିସ୍‌ । ଏବେ ଛାତ୍ରଛାତ୍ରୀ ମାନଙ୍କର ନାମଲେଖା ହେଉଛି, କିନ୍ତୁ ଅଫିସରେ ଅଧିକାରୀ ଙ୍କ ଅନୁପସ୍ଥିତ କାରଣରୁ ଛାତ୍ରଛାତ୍ରୀ ମାନେ ବହୁ ଅସୁବିଧାର ସମ୍ମୁଖୀନ ହେଉଛନ୍ତି । ଜିଲ୍ଲାର ପ୍ରତ୍ୟେକ ବ୍ଲକ ଏବଂ ତହସିଲରେ ପ୍ରବଳ ଭିଡ଼ ପରିଲକ୍ଷିତ ହେଉଥିବା ବେଳେ ସାଧାରଣ ଜନତା ଆସି କେବଳ ଖର୍ଚ୍ଚାନ୍ତ ହୋଇ ଫେରୁଛନ୍ତି। ସମସ୍ତ କାର୍ଯ୍ୟ ବାଧାପ୍ରାପ୍ତ ହୋଇଛି । ତୁରନ୍ତ ଓଡ଼ିଶା ପ୍ରଶାସନିକ ଅଧିକାରୀ କାର୍ଯ୍ୟରେ ଯୋଗଦେବାକୁ ଅଞ୍ଚଳବାସୀ ରାଜ୍ୟ ମୁଖ୍ୟମନ୍ତ୍ରୀଙ୍କୁ ନିବେଦନ କରିଛନ୍ତି ।