ଗ୍ରାମବାସି ଓ ପରିବାର ବର୍ଗ ମିଶି ଶତାଧିକ ମହିଲା ପୁରୁଷ ସାମିଲ ହୋଇ କଂଟାବାଞ୍ଜି ଥାନାକୁ ଘେରିଥିଲେ :  ହତ୍ୟାକାରୀକୁ ଗିରଫ କରିବା ଓ କଠୋର ଦଣ୍ଡ ଦେବା ସହ ଫାସୀ ଦେବାକୁ ଦାବି କରିଥିଲେ

— ପରିତ୍ୟକ୍ତ କୁଅଁରୁ ଯୂବକଙ୍କ ଗଳିତ ଶବ ଉଦ୍ଧାର

— ପ୍ରେମ ପାଇଁ ବଳି ପଡିଲେ କୁଞ୍ଜ

— ଲୁହା ରଡ୍‌ରେ ମାଡ଼ ଦେଇ ହତ୍ୟାପରେ ପିଙ୍ଗି ଦେଲେ କୁଅଁରେ

— ମୁଖ୍ୟ ଅଭିଯୁକ୍ତ ସହ ସହଯୋଗୀ ଗିରଫ

ବେଲପଡ଼ା (ଓଡ଼ିଶା ତାଜା ନ୍ୟୁଜ୍)  :- ବଲାଙ୍ଗୀର ଜିଲ୍ଲା କଣ୍ଟାବାଞ୍ଜି ଥାନା ସହରର ଆଶ୍ରମପଡା ନିକଟରେ ଥିବା ପୁରୁଣା ସିମେଂଟ କାରଖାନା ପଛପଟେ ଥିବା ଶାଗୁଆନ ଜଙ୍ଗଳ ଭିତରର ଏକ ପରିତ୍ୟକ୍ତ କୁଅଁରୁ ରବିବାର ଏକ ଗଳତ ଶବକୁ ଠାବ କରିଥିଲେ ଗ୍ରାମବାସୀ । ତେବେ ଘଟଣା ପରେ ପୁଲିସ ପଂହଚି ଏହାର ତଦନ୍ତ କରିବା ସହ କୁଅଁ ଭିତରେ ଥିବା ଶବକୁ ଉଦ୍ଧାର କରି ତଦନ୍ତ କରୁଥିଲା । ତେବେ ଏହି ଘଟଣାରେ ପୁଲିସ ଦୁଇ ଜଣଙ୍କୁ ଅଟକ ରଖି ପଚରା ଉଚୁରା କରୁଥିଲା । ଏଥିରେ ସଂପୃକ୍ତ ରହିଥିବା ମୁଖ୍ୟ ଅଭିଯୂକ୍ତ ସତ୍ୟ ନାଗ(୨୦) ଓ ସହଯୋଗୀ ଶଙ୍କର ଖର୍ସେଲ(୧୮)କୁ ଗିରଫ କରି କୋର୍ଟ ଚାଳାଣ କରିଥିବା ସୁଚନା ଦେଇଛନ୍ତି ବଲାଙ୍ଗିର ଅତିରିକ୍ତ ଏସପି ଆଲୋକ ଜେନା ।

ସୋମବାର ସନ୍ଧ୍ୟା ରେ ସମ୍ବାଦିକ ସମ୍ମିଳନୀରେ ଦେଇଥିବା ସୁଚନା ଅନୁସାରେ ଗତ ୨୦ତାରିଖ ଦିନ ଏକ ମେନ୍‌ମିସିଂ ମାମଲା ରୁଜୁ କରି ପୁଲିସ ତଦନ୍ତ କରୁଥିଲା । ଏଥିରେ ଡୁମେରଚୁଆଁ ଗାଁର କୁଞ୍ଜ ନିଖୋଜ ଥିବା ନେଇ ପୁଲିସ ବିଭିନ୍ନ ଦିଗରେ ତଦାରଖ କରୁଥିଲା । ଏହାରି ଭିତରେ ପୁଲିସ ମୃତ କୁଞ୍ଜର ମୋବାଇଲ୍ କୁ ଆସିଥିବା ଲାଷ୍ଟ କଲ୍ କୁ ଟ୍ରେସ୍ କରି କାହାର ଫୋନ ଆସିଥିଲା ତାହା ଯାଂଚ କରିଥିଲା । ତେବେ ଏଥିରେ ସେହି ଗାଁର ସତ୍ୟ ନାଗ ହିଁ ଫୋନ୍ କରି ଡାକିଥିଲା । ଏହା ପରେ ପୁଲିସ ଏକ ଟିମ୍ ଗଠନ କରି ମୋବାଇଲ୍ ଲୋକେସନ୍ ହିସାବରେ ପ୍ରଥମେ ସତ୍ୟକୁ ଉଠାଇ ଆଣି ତଦନ୍ତ କରିଥିଲା । କୁଞ୍ଜକୁ କେଉଁ ଭଲି ଭାବରେ ହତ୍ୟା କରାଯାଇଛି ସମସ୍ତ ଘଟଣାର ସତ୍ୟକଥା ଉଗାଲିଥିଲା ସତ୍ୟ ।

ସଂପୃକ୍ତ ଥିବା ସହଯୋଗୀ ଶଙ୍କର ଖର୍ସେଲକୁ ମଧ୍ୟ ଅଟକ ରଖି ପୁଣି ଅଧିକ ତଦନ୍ତ ଜାରି ରଖିଥିଲା ପୁଲିସ । ଏଥିରେ ଦୁଇଜଣ ସାଙ୍ଗ ସତ୍ୟ ଓ ଶଙ୍କର ସାମିଲ ଥିବା ଜଣାପଡିଛି । ପ୍ରଥମେ କୁଞ୍ଜକୁ ଏକାଟିଆ ଡୁମେରଚୁଆଁ ଗାଁ ମୁଣ୍ଡକୁ ଡାକି ପୁର୍ବରୁ ପ୍ରସ୍ତୁତ କରିଥିବା ପ୍ଲାନ ହିସାବରେ ଏକ ଲୁହା ରଡ୍ ରେ ମୁଣ୍ଡରେ ଯୋର୍ ରେ ମାଡ ମାରି ହତ୍ୟାକରିଥିଲା ସତ୍ୟ । ପରେ ମୃତ କୁଞ୍ଜକୁ ଅଖା ବସ୍ତାରେ ପୁରାଇ ବାଇକ୍ ଯୋଗେ ନିଜ ସହଯୋଗୀ ସହ ପୁରୁଣା ସିମେଂଟ କାରଖାନା ପଛପଟେ ଥିବା ପରିତ୍ୟକ୍ତ କୁଅଁରେ ପିଙ୍ଗି ଦେଇଥିଲେ । ଏହା ପରେ ଅଖାକୁ ପୋଡି ଅନ୍ୟ ଏକ ସ୍ଥାନରେ ପୋତି ଦେଇଥିଲେ ।

ତେବେ ବ୍ୟବହାର କରିଥିବା ମୋବାଇଲ ଓ ବାଇକ୍ କୁ ମଧ୍ୟ ଅନ୍ୟତ୍ର ଲୁଚାଇ ଦେଇଥିଲେ । ହତ୍ୟାକରିବାର ଘଟଣାରେ ପ୍ରେମ କାହାଣୀ ଥିବା ପୁଲିସ ଆଗରେ ସ୍ୱୀକାର କରିଛି ସତ୍ୟ । ପୁର୍ବରୁ କୁଞ୍ଜର ମୋବାଇଲ ବ୍ୟବହାର କରି ସତ୍ୟ ଏକ ଯୁବତୀ ସହ ପ୍ରେମ କଥା ହେଉଥିଲା । କାଲେ ସେ ଧରା ପଡିଯିବ ସେଥି ପାଇଁ କୁଞ୍ଜ ମୋବାଇଲ ବ୍ୟବହାର କରି ଯୁବତୀ ସହ କଥା ହେଉଥିଲା । ଦୁଇ ବର୍ଷ କଥା ହେବା ପରେ କିନ୍ତୁ ସତ୍ୟ ନାଗ କୁଞ୍ଜକୁ ସନ୍ଦେହ କରିଥିଲା ଯେ ମୋର ପ୍ରେମିକା ସହ ମଧ୍ୟ ପ୍ରେମ କରୁଛି କୁଞ୍ଜ । ଏ ଘଟଣା ପରେ ସନ୍ଦେହ କରି କରି ସେ ରାଗି ଯାଇଥିଲା । ପରେ ଏକ ବ୍ଲୁ ପ୍ରିଣ୍ଟ ପ୍ରସ୍ତୁତ କରିଥିଲା ଯେ କୁଞ୍ଜକୁ ରାସ୍ତାରୁ ହଟାଇ ଦେଲେ ମୋର ପ୍ରେମ ବଂଚି ଯିବ ।

ଏହା ପରେ ଜଘନ୍ୟ ଘଟଣା ଘଟାଇବା ପାଇଁ ପଛାଇଲା ନାହିଁ ସତ୍ୟ । ନିଜ ସାଙ୍ଗ ଶଙ୍କର ସହ ମିଶି ଏତେ ବଡ ହତ୍ୟା କରିଥିଲା । ତେବେ ପୁଲିସ ଏହି ଘଟଣାର ସମସ୍ତ ସିନ୍ ରେକ୍ରେସନ୍ ମଧ୍ୟ କରିଛି । ଆଜି ସମସ୍ତ ଘଟଣା ଉପରେ ପର୍ଦଫାସ ହେବା ପରେ ଅଭିଯୁକ୍ତ ସତ୍ୟ ନାଗ ଓ ଶଙ୍କର ଖର୍ସେଲ କୁ କୋର୍ଟ ଚାଲଣ କରିଥିବା ବେଲେ ଜାମିନ ନାମାଞ୍ଜୁର ହେବାରୁ ବିଚାର ବିଭାଗୀୟ ଜେଲ ହାଜତକୁ ପଠାଇ ଦିଆଯାଇଥିବା ସୁଚନା ମିଲିଛି । ଏଥିରେ ପୁଲିସ ଏକ ଲୁହା ରଡ୍‌, ଭଙ୍ଗା ମୋବାଇଲ ଓ ଗୋଟିଏ ଅପରେସନ୍ କରିବା ବ୍ଲେଡ୍ ଜବତ କରିଛି ।

ଏହା ସହ ଆଜି ଗ୍ରାମବାସି ଓ ପରିବାର ବର୍ଗ ମିଶି ଶତାଧିକ ମହିଲା ପୁରୁଷ ସାମିଲ ହୋଇ କଂଟାବାଞ୍ଜି ଥାନାକୁ ଘେରିଥିଲେ । ଏଥିରେ ହତ୍ୟାକାରୀକୁ ଗିରଫ କରିବା ଓ କଠୋର ଦଣ୍ଡ ଦେବା ସହ ଫାସୀ ଦେବାକୁ ଦାବି କରିଥିଲେ । ଆଜିର ସମ୍ବାଦିକ ସମ୍ମିଳନୀ ରେ ଏସଡିପିଓ ଲକ୍ଷ୍ମିନରାୟଣ ମାରାଣ୍ଡି, କଂଟାବାଞ୍ଜି ଥାନା ଅଧିକାରୀ ରଶ୍ମିତା ବେହେରା, ତୁରେକେଲା ଥାନା ଅଧିକାରୀ ରମାକାନ୍ତ ସାହୁ, ବଙ୍ଗୋମୁଣ୍ଡା ଥାନା ଅଧିକାରୀ ସଞ୍ଜିବ ପଧାନ ଉପସ୍ଥିତ ଥିଲେ ।