ପାରଳାଖେମୁଣ୍ଡି ସେଞ୍ଚୁରିଆନ ବିଶ୍ୱବିଦ୍ୟାଳୟ ପରିସରରେ ରାଜ୍ୟପାଳ ଙ୍କ ଦ୍ଵାରା ତୃତୀୟ ଭାରତୀୟ ବିଶ୍ଵବିଦ୍ୟାଳୟ ସଂଘ ମହିଳା ସଂସଦ ଉଦଘାଟିତ

ପାରଳାଖେମୁଣ୍ଡି (ଓଡ଼ିଶା ତାଜା ନ୍ୟୁଜ୍)  :- ଜାତୀୟ ମହିଳା ଛାତ୍ର ସଂସଦର ତୃତୀୟା ସଂସ୍କରଣକୁ ଓଡିଶାର ମହାମହିମା ଡ଼. କୁମ୍ଭମ୍ପତି ହରିବାବୁ,ରାଜ୍ୟପାଳଙ୍କ ଦ୍ଵାରା ସେଞ୍ଚୁରିଆନ ବିଦ୍ୟାଳୟରେ ଉଦ୍‌ଘାଟିତ ହୋଇଛି।ଏହି କାର୍ଯ୍ୟକ୍ରମ ଟି ଭାରତୀୟ ବିଶ୍ୱବିଦ୍ୟାଳୟ ସଂଘ(AIU)ଓ ସେଞ୍ଚୁରିଆନ ବିଶ୍ୱବିଦ୍ୟାଳୟର ମିଳିତ ଅନୁକୂଲ୍ୟ ରେ ଆୟୋଜିତ କରାଯାଇ ଅଛି ଏଥିରେ ଦେଶ ର ବିଭିନ୍ନ କୋଣ ରୁ ୩୦ ରୁ ଅଧିକ ବିଶ୍ୱବିଦ୍ୟାଳୟରୁ ୨୦୦ ରୁ ଅଧିକ ମହିଳା ଛାତ୍ରୀ ନେତା ଅଂଶଗ୍ରହଣ କରିଛନ୍ତି।ଏହି କାର୍ଯ୍ୟକ୍ରମର ସଂଯୋଜକ, ସଙ୍ଗ୍ରାମ କେଶରୀ ସ୍ୱାଇଁଙ୍କ ଉଦ୍ବୋଧନ ବକ୍ତବ୍ୟ ସହ ଅତିଥି ମାନଙ୍କୁ ସ୍ୱାଗତ କରାଗଲା । ଏହି ଅବସରରେ ବିଶ୍ୱବିଦ୍ୟାଳୟର କୁଳପତି, ଡ଼ଃ ସୁପ୍ରିୟା ପଟ୍ଟନାୟକ ସମ୍ପ୍ରତି ଯୁଗରେ ମହିଳା ସଶକ୍ତିକରଣ ଏବଂ ନାରୀ-ନେତୃତ୍ୱର ପ୍ରାଧାନ୍ୟ ଉପରେ ଆଲୋକପାତ କରିଥିଲେ ।

ମହାମହିମ ଡ଼. କୁମ୍ଭମ୍ପତି ହରିବାବୁ ନିଜ ଉଦ୍‌ବୋଧନରେ କହିଲେ, “ସମାନତା, ସଶକ୍ତିକରଣ ଏବଂ ମୁକ୍ତି ସମ୍ପ୍ରତିକାଳୀନ ଧାରଣା ନୁହେଁ, ଏଗୁଡ଼ିକ ପ୍ରତ୍ୟେକ ଭାରତୀୟ ମହିଳାଙ୍କ ପାଇଁ ଏକ ବାସ୍ତବତା। ଆମେ ଏହି ସନ୍ଦର୍ଭରେ ସେହି ଅଗ୍ରଣୀ ମହିଳାମାନଙ୍କୁ ମଧ୍ୟ ସ୍ମରଣ କରିବା ଉଚିତ୍‌ ଯେଉଁମାନେ ଭାରତୀୟ ସଂବିଧାନ ରଚନାରେ ଗୁରୁତ୍ୱପୂର୍ଣ୍ଣ ଭୂମିକା ନେଇଥିଲେ। ଆଜିର ଭାରତରେ ମହିଳାମାନେ କୋର୍ପୋରେଟ ନେତୃତ୍ୱ ଦେଉଛନ୍ତି, ଉଚ୍ଚ ପ୍ରଶାସନରେ ରହି ନିଷ୍ପତ୍ତି ନେଉଛନ୍ତି, ନୂତନ ଅଭିନବତା ଆଣୁଛନ୍ତି, ନ୍ୟାୟାଳୟରେ ନିୟମ ଉପରେ ଅନୁସନ୍ଧାନ କରୁଛନ୍ତି ଏବଂ ସାମାଜିକ ପରିବର୍ତ୍ତନ ଆଣୁଛନ୍ତି।

ବ୍ୟବସାୟ, କ୍ରୀଡ଼ା, ଆଇନ, ନୀତି ନିର୍ମାଣ ଏବଂ କଳା ଅଞ୍ଚଳରେ ମହିଳାମାନଙ୍କ ଉନ୍ନତି ଦେଖିଲେ ଏହି ପରିବର୍ତ୍ତନର ପ୍ରମାଣ ମିଳେ।” ସେ ଏହି ପ୍ରୟାସକୁ ସ୍ୱାଗତ ଜଣାଇ ନୃତନ ନୀତି ଗଠନ ଏବଂ ରାଷ୍ଟ୍ର ଗଠନ ଉପରେ ଛାତ୍ରମାନଙ୍କ ଅଂଶଗ୍ରହଣ ଜରୁରୀ ବୋଲି ଉତ୍ସାହିତ କଲେ।କାର୍ଯ୍ୟକ୍ରମର ବିଷୟବସ୍ତୁକୁ ଆଧାର କରି ଭାରତୀୟ ବିଶ୍ୱବିଦ୍ୟାଳୟ ସଂଘ (AIU) ର ଅତିରିକ୍ତ ସଚିବ ଡ଼ଃ ମମତା ରାଣୀ ଅଗ୍ରୱାଲ ଭବିଷ୍ୟର ମହିଳା ନେତୃତ୍ୱ ସୃଷ୍ଟି କରିବାରେ ଏହି ପ୍ଲାଟଫର୍ମର ଭୂମିକା ଉପରେ ବିଶ୍ଳେଷଣମୂଳକ ଉଦ୍ବୋଧନ ଦେଇଥିଲେ ।

ଆନ୍ଧ୍ର ପ୍ରଦେଶସ୍ଥିତ ସେଞ୍ଚୁରିଆନ ବିଶ୍ୱବିଦ୍ୟାଳୟର କୁଳାଧିପତି ମହାମହିମ ଡ଼ଃ ଜି.ଏସ.ଏନ୍. ରାଜୁ ଲୈଙ୍ଗିକ ସମାନତା ବିଷୟକୁ ଗୁରୁତ୍ୱାରୋପ କରି ସମାଜରେ ଶିକ୍ଷା ଏବଂ ନେତୃତ୍ୱର ବିକାଶ ଉପରେ ନିଜ ଆଭିମୁଖ୍ୟ ଉପସ୍ଥାପନା କରିଥିଲେ । ବ୍ରହ୍ମପୁର ବିଶ୍ୱବିଦ୍ୟାଳୟ ର ସମ୍ମାନନୀୟ କୁଳପତି ଡ଼ଃ ଗୀତାଞ୍ଜଳି ଦାଶ ଏବଂ ବିଜୁ ପଟ୍ଟନାୟକ ପ୍ରଯୁକ୍ତି ବିଶ୍ୱବିଦ୍ୟାଳୟର ସମ୍ମାନନୀୟ କୁଳପତି ଡ଼ଃ ଅମୀୟ କୁମାର ରଥ ଗଣ ନୀତି ନିର୍ମାଣ ଏବଂ ଶାସନରେ ମହିଳାମାନଙ୍କ ଅଂଶଗ୍ରହଣର ଗୁରୁତ୍ୱ ବିଷୟରେ ଉଦ୍ବୋଧନ ଦେଇଥିଲେ ।

ଏହି କାର୍ଯ୍ୟକ୍ରମଟି ସେଞ୍ଚୁରିଆନ ବିଶ୍ୱବିଦ୍ୟାଳୟର ମୁଖ୍ୟ ଡ଼ଃ ମୁକ୍ତିକାନ୍ତ ମିଶ୍ର, ଉପମୁଖ୍ୟ, ପ୍ରାଧ୍ୟାପକ ଡି.ଏନ୍. ରାଓଙ୍କ ଉପସ୍ଥିତି ଦ୍ୱାରା ପରିସ୍ଫୁଟିତ ହୋଇଥିଲା।ଏହା ପରେ, ସମସ୍ତ ସମ୍ମାନିତ ଅତିଥି ଏବଂ ଜୁରି ସଦସ୍ୟମାନଙ୍କ ତାଙ୍କର ଅବଦାନ ନିମନ୍ତେ ସମ୍ମାନିତ କରାଯାଇଥିଲା । ସେଞ୍ଚୁରିଆନ ବିଶ୍ୱବିଦ୍ୟାଳୟର କୁଳସଚିବ ଡ଼ଃ ଅନିତା ପାତ୍ର ଧନ୍ୟବାଦ ପ୍ରସ୍ତାବ ଦେଇଥିଲେ, ଏବଂ ଏହି କାର୍ଯ୍ୟକ୍ରମକୁ ସଫଳ କରିବାରେ ବ୍ୟକ୍ତିବିଶେଷ, ଅଂଶଗ୍ରହଣକାରୀ ଏବଂ ଆୟୋଜକଙ୍କ ପ୍ରୟାସ ପାଇଁ କୃତଜ୍ଞତା ପ୍ରକାଶ କରିଥିଲେ । ଦଳ ପରିଚାଳକଙ୍କ ପରିଚୟ ସହିତ ଉଦଘାଟନୀ ଅଧିବେଶନ ଶେଷ ହୋଇଥିଲା ।

ଅପରାହ୍ନରେ, କାର୍ଯ୍ୟକ୍ରମଟି ଏହାର ପ୍ରାରମ୍ଭିକ ପର୍ଯ୍ୟାୟ ସହିତ ଆଗକୁ ବଢ଼ିଥିଲା, ଯେଉଁଠାରେ ଛାତ୍ର ନେତ୍ରୀ ମାନେ ବିଭିନ୍ନ ସାମାଜିକ-ରାଜନୈତିକ ପ୍ରସଙ୍ଗରେ ଚିନ୍ତାପ୍ରବଣ ଆଲୋଚନା ଏବଂ ବିତର୍କରେ ସାମିଲ ହୋଇଥିଲେ। ଭାରତୀୟ ବିଶ୍ୱବିଦ୍ୟାଳୟ ସଂଘ (AIU) ଜାତୀୟ ମହିଳା ଛାତ୍ର ସଂସଦ ଯୁବ ମହିଳାମାନଙ୍କ ପାଇଁ ସେମାନଙ୍କର ଦୃଷ୍ଟିକୋଣ ପ୍ରକାଶ କରିବା ଏବଂ ନୀତି ଆଲୋଚନାରେ ଯୋଗଦାନ ଦେବା ପାଇଁ ଏକ ଉଲ୍ଲେଖନୀୟ ମଞ୍ଚ ହୋଇ ରହିଛି। ଏହି କାର୍ଯ୍ୟକ୍ରମରେ ଆଗାମୀ କିଛି ଦିନ ମଧ୍ୟରେ ଅନେକ ଅଧିବେଶନ ଅନୁଷ୍ଠିତ ହେବ, ଯାହା ଭବିଷ୍ୟତର ମହିଳା ନେତାମାନଙ୍କୁ ସଶକ୍ତ କରିବା ପାଇଁ ଅର୍ଥପୂର୍ଣ୍ଣ ସଂକଳ୍ପରେ ପରିଣତ ହେବ।