ଓଡିଶା ତାଜା ନ୍ୟୁଜ୍ (୨୬ ଅଗଷ୍ଟ ବୁଧବାର ) ଭୁବନେଶ୍ୱର : – ଖରିଫ ୨୦୨୦-୨୧ ଧାନ ସଂଗ୍ରହ ନିମନ୍ତେ ଚାଷୀ ମାନଙ୍କର ନାମ ପଂଜୀକରଣ କାର୍ଯ୍ୟକୁ ତ୍ୱରାନ୍ୱିତ କରି ଧାର୍ଯ୍ୟ ସମୟ ମଧ୍ୟରେ ଶେଷ କରିବା ପାଇଁ ଖାଦ୍ୟଯୋଗାଣ ଓ ଖାଉଟି କଲ୍ୟାଣ, ସମବାୟ ମନ୍ତ୍ରୀ ଶ୍ରୀ ରଣେନ୍ଦ୍ର ପ୍ରତାପ ସ୍ୱାଇଁ ବିଭାଗୀୟ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଛନ୍ତି । ଚଳିତ ଅଗଷ୍ଟ ମାସ ୩୧ ତାରିଖ ଖରିଫ୍ ଧାନ ସଂଗ୍ରହ ନିମନ୍ତେ ଚାଷୀ ନାମ ପଂଜୀକରଣ ଶେଷ ତାରିଖ ହୋଇଥିବା ବେଳେ ସମସ୍ତ କ୍ଷେତ୍ରାଧିକାରୀ, ଡିଆର୍ସିଏସ୍, ଏଆର୍ସିଏସ୍ ମାନେ ପ୍ୟାକ୍ସ ପରିଦର୍ଶନ କରି ଚାଷୀ ନାମ ପଞ୍ଜିକରଣ କାର୍ଯ୍ୟକୁ ତଦାରଖ କରିବା ପାଇଁ ମନ୍ତ୍ରୀ ଶ୍ରୀ ସ୍ୱାଇଁ କହିଛନ୍ତି । ଆଜି ଲୋକସେବା ଭବନଠାରେ ଆୟୋଜିତ ଭିଡ଼ିଓ କନ୍ଫରେନ୍ସ ବୈଠକରେ ମନ୍ତ୍ରୀ ଶ୍ରୀ ସ୍ୱାଇଁ ଚାଷୀ ନାମ ପଞ୍ଜିକରଣ, ରାସନ୍ କାର୍ଡର ଆଧାର ସଂଯୋଗୀକରଣ ଓ ବୈଧକରଣ, ସାଧାରଣ ବଣ୍ଟନ ବ୍ୟବସ୍ଥାରେ ରାସନ୍ ସାମଗ୍ରୀ ଯୋଗାଣ, ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାରେ ରାସନ୍ ସାମଗ୍ରୀ ବଣ୍ଟନ ଏବଂ ମିଲରମାନଙ୍କ ଦ୍ୱାରା କଷ୍ଟମ୍ ମିଲିଂ ଚାଉଳ ପ୍ରଦାନ ଆଦିର ଅଗ୍ରଗତି ସଂପର୍କରେ ସମୀକ୍ଷା କରିଥିଲେ ।
ଖରିଫ୍ ଧାନ ସଂଗ୍ରହ ନିମନ୍ତେ ରାଜ୍ୟରେ ଅଦ୍ୟାବଧି ୭ ଲକ୍ଷ ୯୬ ହଜାର ୫୧୦ ଜଣ ଚାଷୀ ସେମାନଙ୍କର ନାମ ପଂଜୀକରଣ କରିଛନ୍ତି । ଗଜପତି, ସଞ୍ଚଲପୁର, କନ୍ଧମାଳ, ଯାଜପୁର, କଳାହାଣ୍ଡି, କଟକ ଆଦି ଜିଲ୍ଲା ଗୁଡ଼ିକରେ ବିଗତବର୍ଷ ତୁଳନାରେ ଚାଷୀ ନାମ ପଞ୍ଜିକରଣ ସନ୍ତୋଷ ଜନକ ହୋଇଥିବାବେଳେ ଅନ୍ୟ ଜିଲ୍ଲା ଗୁଡ଼ିକରେ ଧାର୍ଯ୍ୟ ସମୟ ମଧ୍ୟରେ ସମସ୍ତ ଚାଷୀ ନାମ ପଞ୍ଜିକରଣ କାର୍ଯ୍ୟ ଶେଷ କରିବା ପାଇଁ ମନ୍ତ୍ରୀ ଶ୍ରୀ ସ୍ୱାଇଁ ବିଭାଗୀୟ ଅଧିକାରୀ ମାନଙ୍କୁ ନିର୍ଦ୍ଦେଶ ଦେଇଥିଲେ । ଚାଷୀ ନାମ ପଞ୍ଜିକରଣ ଓ ନବୀକରଣ ଫର୍ମ ଚାଷୀ ମାନଙ୍କ ମଧ୍ୟରେ ବଣ୍ଟନ କରି ସେମାନଙ୍କର ନାମ ପଞ୍ଜିକରଣ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ କହିଥିଲେ । ଏଥିସହିତ ଚାଷୀ ମାନଙ୍କର ଜମି କାଗଜ ପତ୍ର ଯାଞ୍ଚ ସହିତ ବ୍ୟାଙ୍କ ଆକାଉଣ୍ଟ, ବୋରେଓ୍ୱଲ୍ ଏବଂ ଉଠାଜଳସେଚନ ବାବଦରେ ମଧ୍ୟ ଯାଞ୍ଚ କାର୍ଯ୍ୟ ସଂପନ୍ନ କରି ନିର୍ଭୁଲ ଚାଷୀ ପଞ୍ଜିକରଣ ତାଲିକା ପ୍ରସ୍ତୁତ କରିବା ପାଇଁ ମନ୍ତ୍ରୀ ଶ୍ରୀ ସ୍ୱାଇଁ କହିଥିଲେ । ବୈଠକରେ ଖାଦ୍ୟ ସୁରକ୍ଷା ଯୋଜନାର ହିତାଧିକାରୀ ମାନଙ୍କର ଆଧାର କାର୍ଡ ସଂଯୋଗ ଓ ଆଧାର ବୈଧିକରଣ କାର୍ଯ୍ୟର ଅଗ୍ରଗତି ସଂପର୍କରେ ସମୀକ୍ଷା କରାଯାଇଛି ।
ଅଦ୍ୟାବଧି ୩ କୋଟି ୨୨ ଲକ୍ଷ ୮୬ ହଜାର ୬୯ ଜଣ ହିତାଧିକାରୀଙ୍କ ଆଧାର ସଂଯୋଗୀକରଣ କରାଯାଇଥିବା ବେଳେ ତନ୍ମଧ୍ୟରୁ ୮୮ ପ୍ରତିଶତ ହିତାଧିକାରୀଙ୍କ ଆଧାର ବୈଧିକରଣ କାର୍ଯ୍ୟ ସରିଛି । ଆଧାର ସଂଯୋଗୀକରଣ ହୋଇନଥିବା ହିତାଧିକାରୀ ରାସନ୍ କାର୍ଡ ସହିତ ଆଧାର ସଂଯୋଗ ଓ ଆଧାର ବୈଧିକରଣ କାର୍ଯ୍ୟକୁ ଶୀଘ୍ର ଶେଷ କରିବା ପାଇଁ ସଂପୃକ୍ତ ଅଧିକାରୀଙ୍କୁ ମନ୍ତ୍ରୀ ଶ୍ରୀ ସ୍ୱାଇଁ ନିର୍ଦ୍ଦେଶ ଦେଇଥିଲେ । ସାଧାରଣ ବଣ୍ଟନ ବ୍ୟବସ୍ଥାରେ ଖାଦ୍ୟ ସୁରକ୍ଷା ଯୋଜନାରେ ଅନ୍ତର୍ଭୁକ୍ତ ହିତାଧିକାରୀ ମାନଙ୍କୁ ଜୁଲାଇ ଓ ଅଗଷ୍ଟ ମାସର ରାସନ୍ ସାମଗ୍ରୀ ବଣ୍ଟନ କାର୍ଯ୍ୟ ଶେଷ ହୋଇଛି । ଏଥିସହିତ ପ୍ରଧାନମନ୍ତ୍ରୀ ଗରିବ କଲ୍ୟାଣ ଅନ୍ନ ଯୋଜନାରେ ହିତାଧିକାରୀମାନଙ୍କୁ ଜୁଲାଇ ଓ ଅଗଷ୍ଟ ମାସର ରାସନ୍ ସାମଗ୍ରୀ ଯୋଗାଇ ଦିଆଯାଇଛି ।
ସେପଫଞ୍ଚର ଓ ଅକେଫାବର ମାସ ନିମନ୍ତେ ରାସନ ସାମଗ୍ରୀ ଉଠାଣ କାର୍ଯ୍ୟ ଆରମ୍ଭ ହୋଇଛି । କଷ୍ଟମ ମିଲିଂ ରାଇସରେ ମିଲର ମାନଙ୍କ ଦ୍ୱାରା ଚାଉଳ ପ୍ରଦାନ ସଂପର୍କରେ ସମୀକ୍ଷା କରିବା ଅବସରରେ ଯେଉଁସବୁ ସ୍ଥାନ ଗୁଡ଼ିକରେ ଅଦ୍ୟାବଧି କମ ଚାଉଳ ସଂଗୃହୀତ ହୋଇଛି ସେଠାରେ ମିଲର ମାନଙ୍କ ଠାରୁ ଯଥାଶୀଘ୍ର ଚାଉଳ ସଂଗ୍ରହ କରି ସାଧାରଣ ବଣ୍ଟନ ବ୍ୟବସ୍ଥାରେ ଚାଉଳ ଯୋଗାଇ ଦେବା ନିମନ୍ତେ ମନ୍ତ୍ରୀ ଶ୍ରୀ ସ୍ୱାଇଁ ନିର୍ଦ୍ଦେଶ ଦେଇଥିଲେ । ଭିଡ଼ିଓ କନ୍ଫରେନ୍ସ ବୈଠକରେ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ବିଭାଗର କମିଶନର ତଥା ଶାସନ ସଚିବ ଶ୍ରୀ ବୀର ବିକ୍ରମ ଯାଦବ ଓ ଓଡ଼ିଶା ଯୋଗାଣ ନିଗମର ପରିଚାଳନା ନିର୍ଦ୍ଦେଶକଙ୍କ ସମେତ ଖାଦ୍ୟେଯୋଗାଣ ଓ ଖାଉଟି କଲ୍ୟାଣ ଏବଂ ସମବାୟ ବିଭାଗର ବରିଷ୍ଠ ଅଧିକାରୀ ତଥା ସମସ୍ତ ଜିଲ୍ଲାର ମୁଖ୍ୟ ଯୋଗାଣ ଅଧିକାରୀ, ଯୋଗାଣ ଅଧିକାରୀ, ଏଆର୍ସିଏସ୍ ଡିଆର୍ସିଏସ୍ ଓ ଯୋଗାଣ ନିରୀକ୍ଷକମାନେ ଯୋଗଦେଇଥିଲେ ।
