ଜାନକୀବଲ୍ଲଭ ଛାତ୍ରାବାସରେ ସ୍ୱାଗତ ସମ୍ବର୍ଦ୍ଧନା, ଛାତ୍ରମାନେ କଲେଜର ସଂପଦ

୦୫ ଡିସେମ୍ବର ୨୦୨୪ (ଓଡ଼ିଶା ତାଜା ନ୍ୟୁଜ୍ ) ବାଙ୍କୀ :-> ବାଙ୍କୀ ସ୍ୱୟଂଶାସିତ ମହାବିଦ୍ୟାଳୟ ଜାନକୀବଲ୍ଲଭ ଛାତ୍ରାବାସର ନବାଗତ + ୨ ପ୍ରଥମ ବର୍ଷ ଓ + ୩ ପ୍ରଥମ ବର୍ଷ ଛାତ୍ରମାନଙ୍କୁ ପୁଷ୍ପଗୁଚ୍ଛ ଓ ଉପଢ଼ୌକନ ଦେଇ ସମ୍ବର୍ଦ୍ଧିତ କରାଯାଇଛି । ଆୟୋଜିତ ସମ୍ବର୍ଦ୍ଧନା ଉତ୍ସବରେ +୨ ମହାବିଦ୍ୟାଳୟର ଅଧ୍ୟକ୍ଷ ପ୍ରାଧ୍ୟାପକ ସମୀର କୁମାର ମହାପାତ୍ର ସଭାପତିତ୍ୱ କରିଥିଲେ । ଛାତ୍ରାବାସର ତତ୍ତ୍ୱାବଧାରକ ଡକ୍ଟର ଶ୍ରୀକାନ୍ତ ଦାସ ସ୍ୱାଗତ ଭାଷଣ ଦେବା ସହ ଅତିଥିମାନଙ୍କର ପରିଚୟ ପ୍ରଦାନ କରିଥିଲେ । ମୁଖ୍ୟଅତିଥି ଭାବେ ଅଧ୍ୟକ୍ଷ ଡକ୍ଟର ନିରଞ୍ଜନ ମହାନ୍ତି ଯୋଗଦାନ କରି ନବାଗତ ଛାତ୍ରମାନେ କଲେଜ ଓ ଛାତ୍ରାବାସାରେ ଶୃଙ୍ଖଳା ରଖିବା ସହିତ ଭଲ ପାଠ ପଢ଼ିବା ପାଇଁ ପରାମର୍ଶ ଦେଇଥିଲେ ।

ମୁଖ୍ୟବକ୍ତା ଭାବେ ପୂର୍ବତନ ଉପାଧ୍ୟକ୍ଷ ପ୍ରାଧ୍ୟାପକ ମନୋଜ କୁମାର ମହାପାତ୍ର ଯୋଗଦାନ କରି ଛାତ୍ରମାନେ କଲେଜର ସଂପଦ ଭାବେ ବର୍ଣ୍ଣନା କରିବା ସହିତ ଭଲ ମଣିଷ ହେବା ପାଇଁ କହିଥିଲେ । ସମ୍ମାନିତ ଅତିଥି ଭାବେ ପୂର୍ବତନ ତତ୍ତ୍ୱାବଧାରକ ଡକ୍ଟର ସନ୍ତୋଷ କୁମାର ପଣ୍ଡା, ଅଧ୍ୟାପକ ଚିନ୍ମୟ କୁମାର ତ୍ରିପାଠୀ, ଅଧ୍ୟାପକ ଚିନ୍ମୟ ଚିତ୍ତରଞ୍ଜନ ଓ ରଞ୍ଜିତ କୁମାର ରାଉତ ପ୍ରମୁଖ ଯେଗାଦାନ କରି ଛାତ୍ରମାନଙ୍କୁ ଆଶୀର୍ବାଦ ପ୍ରଦାନ କରିଥିଲେ । ଏହି ଅବସରରେ ମହାବିଦ୍ୟାଳୟର ନୂତନ ଅଧ୍ୟକ୍ଷ ଡକ୍ଟର ମହାନ୍ତି ଓ ନୂତନ ତତ୍ତ୍ୱାବଧାରକ ଡକ୍ଟର ଶ୍ରୀକାକନ୍ତ ଦାସଙ୍କୁ ପୁଷ୍ପଗୁଚ୍ଛ ଦେଇ ସ୍ୱାଗତ ସମ୍ବର୍ଦ୍ଧନା କରାଯାଇଥିଲା ଏବଂ ଛାତ୍ରାବାସର ପୂର୍ବତନ ତତ୍ୱାବଧାରକ ଡକ୍ଟର ସନ୍ତୋଷ କୁମାର ପଣ୍ଡାଙ୍କୁ ବିଦାୟକାଳୀନ ସମ୍ବର୍ଦ୍ଧନା ପ୍ରଦାନ କରାଯାଇଥିଲା । ଛାତ୍ରାବାସର ସହତତ୍ତ୍ୱାବଧାରକ ସୁଜିତ୍ ସାହୁ ଧନ୍ୟବାଦ ଅର୍ପଣ କରିଥିଲେ ।